هذي حوبة الكويت يالقذافي

22/2/2011

كلنا أيام الدراسة تعلمنا ان الساكت عن الحق شيطان اخرس... ومعظمنا كمسلمين نعرف ان الرؤساء ولاة أمور شعوبهم.. ويمكن في اجماع بين كل العرب ان ادب الكلام أهم من أدب السلوك كقيمة تعلمناها من آباءنا واجدادنا... الا القذافي..اي نعم الا القذافي... هذا الرجل خارج المألوف مع سبق الاصرار والترصد... وزعامته للشعب الليبي وهمية... وهذرته وكثر كلامه هي اللي عنده وبس .. صار له اربعين سنة يسولف وليبيا تسمعه... في كل قمة يهذر ويشط بالهذرة والرؤساء يسمعونه لين سكته خادم الحرمين الملك عبدالله وقال له بالحرف.. الكذب وراك والقبر جدامك.. وصدق بو متعب رجل يقتات على الكذب ويتخذه امام، واليوم انكشف هالشي.. والقبر امامه اصبح امر واقع فقبور التاريخ لا يدفن فيها الا القذافي وربعه... واليوم اصبح واضح وجلي سقوط طاغية آخر ممن أيدوا غزو الكويت ووقفوا مع صدام..وهذي حوبة الكويت، واهلها اليوم الله يبينها للجميع... ولا أقذر من القذافي الا ولده سيف.. اللي قعد امس مثل ابوه يبمبع على التلفزيون ويهذر بدون فايدة ويهدد ويتوعد.. بالفعل اسرة سلاحها الكلام.. الابو يحرسونه حريم.. والولد يغازل عارضات ازياء.. والولد الثاني يهدد واهم ما عنده ما عند بوالمكارم.. والشعب الليبي الحر يهان ويذل... لكن اليوم الله كتب للشعب الليبي الحر الانتفاضة ضد الظلم من الابو وابنه.. وهذي حوبة الكويت واهلها وحكامها ايام الغزو.. وهذي رسالة إلهية للشعوب كلها.. حنا نحمد الله على حكامنا اللي بالعدل والحكمة تواصلوا مع شعوبهم.

• كلمة راس
لا ديمقراطية عربية حقيقية الا في دولة الكويت.. هذا كلام وزير خارجية اميركا كولن باول.. وانا ازيد عليها واقول ان دول الخليج فيها شورى وحكامها يخافون الله .. واللي يخاف من الله لا تخاف منه ولا عليه.