أول واحد يعرف كل شي

1/3/2011

تعرفون منو أول واحد ياكل بيض، وطبخ بيض بوعيون ومفيوح؟
تعرفون منو أول واحد حلب البقرة؟ واول واحد ركب الحصان؟
تعرفون منو أول واحد اكتشف اكل البنك؟ واول واحد اكل حب شمسي؟
تعرفون منو أول واحد كشخ ولبس غترة وعقال وبزمة؟ واول واحد كشخ بالسبعة؟
تعرفون منو أول واحد لبس ساعة الكترونية؟ واول واحد مسك مسباح كهرب؟
تعرفون منو أول واحد لعب كرة سلة؟ واول واحد لعب بولينغ؟
طبعا كله ما تعرفون انا ادري. وبقولكم سر، انا بعد ما عرف؟
ومع هالاسئلة لو تدش اي ديوانية بالديرة، اكيد راح تلقى واحد يجاوب عليه، ويقعد يقولك اول واحد حلب البقرة وزير في حضارة المايا، واول واحد سوى بيض عيون خادم في بلاط هارون الرشيد، واول واحد اكل بنك. الاسكندر الاكبر يوم مر الكويت وقف وشرى بنك من ادوار في فيلكا، واول واحد لبس ساعة الكترونية نيكسون رئيس اميركا، واول واحد اكل بطيخ مهراجا هندي في بومباي... ويظبط الكذبة ولا مخابرات هتلر بزمانه، ومخابراتنا العربية بزماننا!
وهالأيام تدش الديوانية تشوف هالنوعية وهو يتكلم عن مصر وليبيا، وتاريخ أحمد عرابي وأقوال سعد زغلول، ومسوي روحه فاهم في تونس، ويعرف جغرافية ليبيا ويقعد يشرح لك مقاطعات ليبيا وثورة عمر المختار، بس ناقص يقولك انه مشارك في الحزب ضد موسوليني!
طبعا أمام هذه الحالة المستعصية والعظيمة والكبيرة بتقولون شلون نحل مشكلتهم؟ الاجابة سهلة، اذا الواحد عنده كل هالموهبة في التشلخ، نصحوه يرشح روحه بالانتخابات الجاية، اكيد يفوز!