عطلة خمستعش

31/1/2011

شهر فبراير عند أهل الكويت شهر غير عادي.. شهر يونسهم..شهر يحسون فيه بالفرح والبهجه والوناسة... لأنهم كبروا على انه الاستقلال يصادف خمسة وعشرين فبراير..ولما الله ابتلانا بالغزو كان تحرير الكويت بتاريخ ستة وعشرين فبراير.. هذا غير عيد الحب اللي عرفناه من عشرين سنة وموعده اربعتعش فبراير.. ناهيكم عن ان الكويتيين لايمكن ينسون هالشهر لارتباطه بعطلة خمستعش.. وهالعطلة لها طعم خاص ومذاق فريد من نوعه واجواءها مو طبيعية.. اولا لانها تكون بعد امتحانات نص السنة اللي تغث الطلبة.. وثانيا لأنها تجمع الاهل حول شبة النار بالمخيم.. وثالثا لان العطلة تكون للجميع وخيرها يعم كل الكويت.. وتطلع الناس المسيرات وتستانس وتنفه عن روحها واللي متضايق يوسع صدره مع عياله.. والعيال يجتمعون مع الام والابو بنفسية ولا منها نفسية.. وهالسنة الشيخ العود الله يطول عمره اكرمنا وعطانا كل واحد الف دينار.. فراح تكون عطلتنا غير بكل شي..واللي ونسني ووسع صدري زوود..ان الحكومة والنواب العقلاء قرروا وبقيادة العم جاسم الخرافي تأجيل اللغوة والهذرة النيابية وترحيل الجلسات لشهر مارس.. ولأن القرار حكيم ويستحق كل من صوت عليه سواءً يدري او ما يدري على قولة النواب اللا عقلاء.. فهالخبر يبرد الجبد ويخليك كمواطن تستانس وتزيد فرحتك بالاعياد الوطنية وعيد الحب والمخيم والمنحة بدون دوخة راس وعوار قلب بسبب نواب الهم والغم.. يا حلاة عطلة خمستعش هالسنة مو صج على قولة عيال هالوقت.. مو صج مو صج مو صج..

• كلمة راس
ياللي تبي تسوي ندوات وتحرج اهل الكويت وقيادتهم السياسية جدام الضيوف.. اركد واقضب ارضك.. واعرف ان اللي راح يتصدالك اهل الكويت.. ترى الكويت ماهي تونس ولا مصر ولا سورية ولا الاردن..الكويت واهل الكويت غير عن كل العرب..وخصوصا لي غضبوا على شوية نواب يبون يستعرضون لوزهم واصواتهم النشاز..