متعوس وخايب رجا

8/3/2011
إذا سلمنا جدلا وقلنا ان اليوم في اعتصام أو تظاهر في ساحة الصفاة أو ساحة الارادة للمطالبة برحيل سمو الرئيس! لو فرضنا.. طيب اللي راح يحضر هالتجمع أو الاعتصام اكيد بيكون كويتي وله حق الانتخاب.. لأن من الطبيعي ما يطلع كويتي عمره تحت الواحد وعشرين ويبي يفرض رأيه السياسي وهو ماله حق في ابداء رأيه قانونيا.. بالتالي اللي راح يكون موجود هناك يا طالب مزرق من المحاضرة او موظف ماخذ اجازة مرضية ويدعي المرض ويخالف الشرع والقانون.. او سكرتير عضو طالع بإيعاز من النائب اللي منسجم مع نفس الفكر.. والاكيد ان ماكو شياب ولا متوسطين العمر ولا نساء! وهالشي يوضح لنا ان الموضوع وما فيه كله شغل النواب وسكرتاريتهم أو اللي مضبطينهم من مفاتيح انتخابية وخلافه.. وهذا دليل فشل ذريع للنواب اللي ماقدروا يقنعون زملائهم الغالبية داخل المجلس فلجأوا للاستعانة بالمتعوس اللي يدعي المرض أو الطالب الخايب أو السكرتير المغلوب على امره ولموهم مع خايب الرجا المفتاح الانتخابي اللي باع صوته ومجير اهله وربعه بالبيزات والمعاملات.. كل هذولا يطالبون برحيل سمو الرئيس اللي هو بالاساس اختيار صاحب السمو عرفا ودستورا.. بالاضافة الى انهم يتحدون الرأي الغالب من النواب اللي جدد الثقة بسمو الرئيس.. مثل هذا النوع من المظاهرات ما يشكل واحد من مليون بالعمل السياسي الجاد.. ولا يحقق اي فايدة اللهم لذر الرماد بالعيون.. اذا صج النواب عندهم قواعد خلهم اييبون ربعهم اللي صوتوا لهم.. والا الموضوع واضح، بو عشرين الف وبوعشر الاف واضح، موضوع شراء الذمم بالبيزات والمعاملات واريحك من الدوام وصوت لي.. اذا ذولا نوابنا وذولا قواعدهم.. عزالله انك سالم يا بوصباح.. لا يهمك متعوس وخايب رجا التموا وكل همهم يقبضون الخرجية بعد التجمع.