بسكم تبمبع

3/3/2011

أهل الحلال في البادية عندهم أمثال كثيرة تنطبق على حال المؤزمين والغوغاء من الشارع اللي هاليومين شادين حيلهم ويبون يغيرون كل شي بالديرة الا عقولهم المصدية وطريقة تفكيرهم... يقولون اهل الصحرا.. قايد عجيد سروحي.. والمقصود فيه ان اول راس من الحلال يمشي تشوف باجي الحلال يلحقه.. البعض يعتقد بأن هذا ذكاء ويحسبها فطنة للحلال من خرفان وبعارين.. لكن الواقع يقول ان البهايم مالها عقل.. والله كرم بني آدم عنها بالعقل والخيارات.. وهذا دليل ان ناصية البهيمة مبرمجة على العلف والنوم فقط.. وعندنا بالاجواء السياسية.. قايد عجيد سروحي.. بعض المؤزمين فاضيين شغل وواحدهم من يطلع ويمشي تلاقي باجي البهايم وراه.. طبعا البهايم هني اوادم الله كرمها بالعقل والخيار لكنها أبت الا انها تعاند الفطرة وتكون مثل البهيمة.. ودش معاهم على الخط ومتنطعين بالظهور الاعلامي وظامئين للعمل العام.. (حلوة متنطعين وظامئين يا بوشيخة).. لي هني والموضوع نقدر نحله بإتصال واحد حق جاسم البدر مدير عام الهيئة العامة للثروة الحيوانية والزراعية.. ونقول له ما عليك امر بو محمد نبي رعيان متخصصين بقيادة اوادم متشبهين بالبهايم..ولأنهم متشبهين نقدر نستعين بجمعيات وناشطين في هذا الجزء.. لأن التشبه جريمة اخلاقية.. وما يصير انسان يبمبع ويزعج العالم.. الغريب في الموضوع ان مطالب هالبهايم ومن يقودهم حسب المثل البدوي.. دكاترة ومنظرين.. اكبر واحد فيهم كل ثلاث ثواني له راي.. لما تكون هذي العينة اللي تبي تقود البلد وتفرض ازعاجها.. لا تلومون العالم اللي قاعد يضحك علينا.. والاغرب من كل هذا انهم يسولفون بالدستور وتغيير النهج.. انتو بالاول صيروا اوادم تالي سولفوا عن هالامور.. عاد هاليومين ربيع انصحكم تروحون المحمية وتبمبعون لي تشبعون لأن اهل الكويت كشفوكم..

• كلمة راس
«زعم الفرزدق ان سيقتل مربعا..ابشر بطول سلامة يا مربع»..هذا بيت شعر اسوقه حق كل تافه يفكر بالتدخل في صلاحيات دستورية ماهي من حقه..هزلت.