بو شيخــــــة

الرحيل المستحق



16/3/2011

مالي عادة أتسلف شعارات، ولا عندي مشكله في تأليف شعار أو صيحة حالي حال كل الكويتيين اللي يعتبرون ملوك الكلام والتنظير في كل شي..لكن هالمرة بوضع اليد راح آخذ شعار «ارحل.. نستحق الأفضل» اللي طلعوه لنا فروخ حدس، ومن خلاله يطالبون برحيل سمو الرئيس لأن بنظرهم مو هو الأفضل..لكن مع شوية تحوير اقول ان شعاري اللي بستخدمه في المقال (ارحل فورا) واوجه هذا الشعار للعم النائب المخضرم السيد الرمز الضروره أحمد عبدالعزيز السعدون..هذا الرجل اللي قدم وقته وجهده لخدمة الكويت منذ نعومة أظفاره..نعم علشان أكون حقاني لازم استذكر دوره لما كان وكيل مساعد بوزارة المواصلات وأسس القطاع وبعدها توجه لخدمة الكويت من خلال كرسي البرلمان وتحديدا سنة 1975 وما غاب عن اي مجلس ولم يفشل بالوصول لكل المجالس المنتخبة الـ14 من 75 و 81 و 85 و92 و 96 و 99 و2003 و 2006 و2008 و2009..الرجل فوق كل هالخدمة شاف ان وضعه يستوجب يكون رئيس للمجلس، وبالفعل صار نائب رئيس وتدرج لغاية ما اصبح رئيس للمجلس لأربع دورات متتالية..ومن خلال كرسي البرلمان خدم أحمد السعدون الكويت والمصالح العامة والخاصة على مدى 36 سنة..وخلال هالستة وثلاثين عام قاد السعدون تحركات كثيرة منها المموه ومنها الملتف ومنها المطحون بعجينة المصلحة الشخصية..وأكيد واحد مثله يعمل 35 سنة ليل نهار راح يخطئ ومن يعمل لازم يخطئ..فمن هذا المنطلق اقولك اياها واطالبك يا ملك الرموز وصاحب المواقف الطيبة..مسامحينك على كل اخطائك ونشكرك من عميق قلوبنا على خدمتك لدولة الكويت..ومانبي نفتح دفاترك القديمة ولا نبي ندش بمناطق احنا وياك نعرفها زين..بس اللي نبيه منك ترتاح وتريح..نبيك تجابل بيتك اللي أهملته على حساب وطنك..نبيك تجابل ربك اللي عطاك العمر الطويل وتشكره..نبيك تنتبه لصحتك وتسافر وتتنقه وتشوف بلدان اوربا واميركا..نبيك ترحل فورا..بدون تردد ولا نقاش..ولا تحتاج تستمزج آراء أو تشاور أحد..ترى الخالدية واهلها يحبونك ويبون لك الراحة..واهل الدائرة الثالثة يثقون بالنواب كلهم ويحبون يشوفونك بين أهلك وربعك بعيد عن الهم السياسي..ارحل فورا لصحتك.. ارحل فورا لعائلتك.. ارحل فورا لربعك.. ارحل فورا يرحم والديك علشان ترتاح يا بو عزوز..لأن رحيلك مستحق..قبل لا يفتحون الملف الأخضر اللي انت واحنا نعرفه عدل..

• كلمة راس
أحمد السعدون مواليد عام 1932 يعني له طولة العمر عمره الحين 79 سنة... لو رحل فورا وسمع كلامي وتفرغ لكتابة مذكراته بدون رتوش وبهارات راح يكون كتاب ذكرياته مرجع لأي سياسي ناشئ يفكر بدخول المعترك وعنده طموح يكون رمز في بداياته وبالتويتر في نهاياته.. على شرط ان تكون آخر كلمة بكتاب المذكرات ...اذا وصلت للي تبيه ارحل فورا علشان لا يفتحون الملف الاخضر..
Boshi55a@hotmail.com
Boshi5aa.blogspot.com