بو شيخــــــة

سنة الدم




15/3/2011

أهل الكويت من عمر استنوا لهم سنة قديمة وحميدة واهي تسمية السنة بحدث يصير فيها.. مثل سنة الهدامة اللي طاحت فيها بيوت الطين من المطر الغزير، وسنة الغرقة اللي صارت السيول تغمر اليابس والخضر وسنة الطبعة اللي طبعوا فيها بومين لنفس النوخذة في عرض البحر.. وسنة الهيلك.. اللي صارت تالي سنة الهيلق واللي هلكوا فيها الناس بسبب شح المواد الغذائية.. وسنة الغزو.. والصامتة.. وهلمجرا.. واهل الخليج بشكل عام يتشابهون مع اهل الكويت بهذي السنن ولهم تسميات على سنوات محددة ترتبط بأحداث وتواريخ كثيرة.. ولأن الكويت جزء من الامة العربية على قولة اللي كتبوا الدستور.. والخليج عربي مو فارسي مثل ما يدعي البعض.. فالامة العربية في سنة الفين واحد عشر بداياتها من شهر واحد وانت رايح شغالة فيها المظاهرات ويا ليتها سلمية مثل ما نسمع.. لكن اعتقد والله اعلم ان العرب راح يطلقون على سنة الفين واحد عشر سنة الدم.. من مصر وهجوم الخيالة والجمالة على ميدان التحرير وسالفة الشرطي اللي دهس المتظاهرين وطلع دمهم وطشرهم.. وتونس وما ادراك ما تونس اللي الدم فيها لي الركبة بعيد عن الاعلام اللي شب نار الفتنة وتوارى عقبها..وانت رايح شوف ليبيا وشلون القذافي في مقابل بقائه بالكرسي اراق دماء الاطفال والنساء والرجال والشباب بدون ادنى شعور بآدمية البشر.. وآخرتها البحرين وحمام الدم بالسيف والرصاص على عينك ياتاجر.. اللهم لا شماتة ويارب لا تبلانا في الكويت بهذي المناظر القذرة.. مع ان بعض النواب باحدى الديوانيات و«البدون» بصليبية والجهرا حاشهم طشار اندفاع قواتنا الخاصة لكن الله ستر.. سنة الدم في بداياتها هالنمونة عيل بنهاية الفين واحد عشر شنو اللي راح يصير..؟ كل هذا يصير وصاير وراح يصير كمان والامة الاسلامية بمؤتمراتها ولجانها عمك اصمخ.. لأن ارخص شي في الوطن العربي هو الانسان.. وتقولون لي شعب عربي ومظاهرات ويريد اسقاط النظام؟ بشرفكم وذمتكم اي نظام تسقطونه وهو قاعد يذبح الناس من الوريد لي الوريد؟ يا الله عليك ولا على غيرك.. انك تعذبهم بالدنيا والاخرة اللي عذبونا وعذبوا شعوبهم.. ويارب لا تغير علينا بحكم آل الصباح..

• كلمة راس
الصرعاوي والسعدون اختلفوا على منو اللي لازم نستجوبه؟ اعتقد الامر صار اوضح من الوضوح.. والادوات على افا من يشيل.. وغطيني يا صفية.. وبان الصبح بان وايد..

Boshi55a@hotmail.com
Boshi5aa.blogspot.com