اللي يحب النبي يضرب

10/2/2011

بما أني كويتي فاهم كل شي بالشأن المحلي والخليجي العربي والافريقي والآسيوي والأوربي والأمريكي.. وطالما اني كويتي لازم أكون عارف بالسياسة وأقدر انتقد مورينيو، وعندي فكرة عن المطاعم واتمتع بخبرة كبيرة عن السفر والسياحة.. مع كل اللي سبق لازم يكون لي راي واضح باللي صار بمصر.. طبعا لأن مصر دولة عربية شقيقة سافرت لها وايد وعرفت أهلها وعاداتهم وتقاليدهم.. «تدرون أنا كويتي أعرف كل شي».. المهم.. الشعب المصري يحب النكتة ويموت على الافلام، واذا مرت دقيقة وما صار جدامهم فلم بالشارع تلاقيهم يسوون ثلاث افلام بدقيقة وحدة.. وفي جم مقولة للشعب المصري كل الكويتيين يعرفونهم...مثلاً «اللي يحب النبي يضرب» هذي المقولة أو المبدأ المصري الخاص يتطبق على أرض الواقع اذا وجدوا حرامي او طاحوا على غريب داش الحارة... ولأن الشعوب الحية تقلب.. ولأن الشعب المصري حي واذا ما قلب باليوم ستين مرة ما يعيش.. طبقوا المثل مال «اللي يحب النبي يضرب» على رئيسهم المتنحي حسني مبارك.. اللي قبل شهرين كانوا يمدحونه ويقولون ان الريس ده هوا اللي جاب لينا الكرامة.. وتحديدا في ذكرى اكتوبر اللي فات. الشعب المصري خرج للشارع وشايل صورة الرئيس ويهتف له.. لكن شتقول ياخوي بشعب كل دقيقة له راي.. وكل ثلاث دقايق عنده هتاف..وهات يا ضرب بالريس وبلمح البصر صار حسني مبارك مو زين ومو خوش ريال وارحل ومش عاوزينك.. وهذا درس لأي رئيس مصري قادم..لا تحط ببطنك بطيخة صيفي ولا تعور راسك وتصدق الهتافات وخصوصا من رعاع الشارع والأحزاب... لأن بعد ثلاثين سنة شلخوا الريال اللي رزهم... والبارح اللي يحب النبي ضرب الرئيس بسمعته وأخلاقه..

• كلمة راس
سقوط الطاغية.. الظالم اندحر.. نهاية دولة الضياع... مصطلحات استخدموها للأسف بعض نوابنا وسياسيينا بعد خبر تنحي مبارك عن الحكم... نتفق مع ان الشعب المصري يقرر مصيره.. لكن يبقى الرئيس حسني مبارك رجل عنده موقف معانا يستحق عليه وفاءنا.. بس شنقول غير ان الكويتي حي ويمكن يقلب.. واللي يحب النبي يضرب.

• كلمة راس ثانية
أحلى كلمة سمعتها أمس خبر عاجل، ان الناس ردوا وتجمعوا في ميدان التحرير وقالوا للريس: حنا كنا نتغشمر معاك، هذي الكاميرا الخفية.. نذيع ولا ما نذيعش؟