حلال وحرام النواب

17/2/2011

ورب الكعبة افتر راسي.. والله العظيم وبالله الكريم تشلخت من النواب ولويتهم!! ما ادري احنا شمنتخبين؟ نواب حسب الدستور والقانون المدني والا ملالوه ومصلحين اجتماعيين... شكو مجلس الامة بالسحر وشنو علاقة النواب بالحلال والحرام وفرض كلامهم وفتاويهم على الشعب الكويتي.. يعني سيرك فيه واحد يطلع من القبعة ارنب.. او يبلع خمسين فلس ويطلع دينار من مخباته.. شنو علاقة هذا بالسحر اللي حرمه رب العالمين.. ليش تبون تعلمون الشعب الكويتي الاسلام؟ ومنو انتو علشان تصيرون اوصياء علينا.. بسكم مراهنة على غباء الشعب.. سويتونا جدام العالم طماشة.. المواقع الالكترونية طنازة علينا بدول الخليج وجرايدهم تسخر منا ومنكم بسبب تصريحاتكم المنتهية.. شكو سحر وممنوع السحر ويجب طرد الساحر.؟ يعني الناس مستانسة بهلافبراير وحضراتكم كل واحد قاعد بالمخيم ويفتي؟ ساحر وسحر؟ يعني انا اعتقد النواب يبون يرجعونا الف سنة ورا بسبب تخلف فكرهم ونظرتهم.. وما يبون اهل الكويت يستانسون.. خلاص ولا يهمكم السنة الياية هلافبراير راح يسوون مهرجان خاص بالنباطة.. وفعاليات تختص بالفخة ام شبك وبلعبة المقصي... ولازم يحسبون حسابكم ويعملون مسرح للتراث يتكلم عن كيفية لبس القحفية.. واذا تبون الناس يصدقونكم اتمنى من النواب يقترحون تنظيم هلافبراير من قبل مجلس الامه.. ويكون افتتاح المهرجان بندوة تتحدثون فيها على كيفكم.. ابتلشنا فيكم.. لا اللي احنا قادرين نستانس بغياب الجلسات ولا اللي قادرين نفتك من لبحتكم ولويتكم.. ماندري انتو اقسمتوا على الدستور والا على وثيقة الملا عمر.

• كلمة راس
الاسبوع القادم راح اقول لكم وحسب تحرياتي شلون النواب راح يصرفون المنحة.. ومن الحين اقول لكم ان في ست نواب بينهم نائبة تبرعوا بالمنحة حق واحد شاطر برفع العقال.