آخر الأسبوع

10/2/2011

الصرعاوي.. صح
اختلف مع هذا الرجل مليونين ونص مليون بالاميه..وساعات احس انه يتصنع الكلام..لا والله ساعات احس ان الصرعاوي يبني كل حساباته على الامور الشخصيه..لكن اليوم اكتشفت ان النائب الدكتور عادل الصرعاوي رجل يتمتع بحس انساني راقي وعالي..بتقولون لي شلون؟ اقول لكم السالفة.. الرجل في قضية «البدون» كتب تقرير وارسله لجهة عليا وكتب فيه «ان اهل الكويت من فئة البدون لابد من انصافهم ولكن الخوف من المندسين اثناء الغزو العراقي وعليه ارجو مراجعة قيودهم الامنيه» وانا بالصدفه شفت وقريت هالتقرير..وأقولها لك يا د.عادل برافو.. انت صح وأنا تسرعت بالحكم عليك.

أندية المعايير.. وينكم؟
تابعت المشكلة الرياضية على مدى سنوات ثلاث مضت.. ولأني كبير بالسن وما اعرف الا القادسية والعربي ما كنت اهتم.. لكن بالفترة الاخيرة حاولت ابص بصة وعرفت الهوايل في الرياضة منها اندية التكتل واندية المعايير.. واكتشفت ان التكتل اندية متوافقة على رأي واحد بالحق والباطل.. واندية المعايير اقلية تحاول تثبت كفاءتها.. بس اليوم للأسف افتقد دور اندية المعايير وتحديدا نادي الكويت وكاظمة والسالمية والعربي اللي تراجع عن موقفه وصار معياره التكتل.. فنداء للطريجي والمرزوق والبنوان وينكم ووين مواقفكم..على الاقل اعلاميا علشان نحس بالتوازن..

أحمد الفهد ورا فاضل صفر
بكل صورة بالصحافة او لقطة بالتلفزيونات والفضائيات اشوف الوزير صفر يوقع ووراه واقف الفهد.. وهذا حسب ما عرفت بروتوكول عالمي يخص توقيع المشاريع..بس انا هاليومين اشم ريحة حلوة غير ريحة مشرف.. واشوف من فوق خوش شوفة احلا من طلة المجلس الاولمبي الاسيوي.. وعندي احساس ان فاضل صار تبع أحمد..وهالشي مو غلط.. بس افتر راسي.. يعني شلون وزير يرشحونه السلف بعد يومين ينحسب على حدس؟ فهمتوني والا لأ.؟

كلمة راس
رسالة مهمة للنواب اللي صايرين بياعة حجي بالندوات وبالتويتر وبالفيس بوك وبالماسنجر وبالجرايد والفضائيات.. رسولنا، عليه وعلى آله وأصحابه افضل الصلاة والسلام، يقول «لا يكب المرء بالنار الا بحصاد لسانه»... ركدوا هيعوا.. بسكم كلام..

كلمة راس (2)
ابتدت حملة لتشويه بعض مؤسساتنا الاقتصادية الوطنية، مثل مؤسسة الساير، على سبيل المثال، من خلال اخبار ملفقة واشاعات مغرضة .. وربعنا بعد ما يصدقون، أي كلمة ينشرونها بسرعة البرق.. يا جماعة هذي مؤسساتنا وأعمدة اقتصادنا، واللي بينشر هالاخبار اكيد منافس لمؤسسة الساير، وآخر همه الازدهار والتنمية والتقدم والاستثمار!