بو شيخــــــة

لا تزعلون.. هذا الصج


10/3/2011

شاللي يخلي الكويتي يتدخل بكل شي ويكون عنده رأي بكل قضية.؟ سؤال طرحته على نفسي كوني كويتي كامل الدسم... الكويتي مكفول محفول من ينولد لين يموت...يدرس ببلاش ويتعالج ببلاش والكهربا والماي والتلفون الارضي بسعر رمزي.. وظيفته جاهزة متى ما حب يتوظف واذا حب يتزوج تعطيه الحكومة المهر وعلى ما يطلع له بيت او ارض وقرض بأقساط مخفضة جدا يعطونه بدل ايجار..واذا عنده ولد معاق تصرف الحكومة شي وشويات.. واذا استمرض يتعالج بالخارج ببلاش وياخذ مصروف جيب..والمعاش التقاعدي مضمون.. واذا غاب عن الدوام يردونه لأن الكويتي ما يتفنش..وانتاجية الكويتي شبه معدومة بالقطاع الحكومي والخاص.. ويأخذ بدل بطالة اذا ماله خلق يداوم ودعم عمالة اذا يبي يضبط عمره بشركة أبوه.. معظم الكويتيين عندهم رخص تجارية مأجرينها على الوافدين.. وغالبية الكويتيين كافلين عمالة بمقابل..وفوق كل هذا العلاوات ماشية والترقيات شغالة على ودنو.. وبرضو يطلعون مظاهرات يطالبون بزيادة والمنح يمين وشمال واحتمال يطيحون القروض والتموين ببلاش والزيادات شكثرها.. والحمد لله والشكر لله على هالنعمة.. بس مع كل هذا الكويتي بدل ما يستثمر هالنعمة بدا بعضهم يكفر فيها بتدخله بما لا يعنيه من امور دستورية وبيت الحكم..كل هذا لأنه فاضي شغل والرزق يوصل له بدون تعب.. هذا الصج لا تزعلون منه..لو كويتي يجرب يكون غير كويتي ثلاث دقايق بأي دولة في العالم راح يعرف قيمة كونه كويتي.. وعساها الضرايب تنفرض علشان نقدم حق بلدنا شي بسيط وقليل من اللي قدمه لنا..ونبطل لبحة وحنة وتدخل ومظاهرات مالها معنى.. لأن الفاضي يعمل قاضي.

• كلمة راس
يمكن وايد من القراء والمهتمين يعارضون كلامي وما يعجبهم.. لكن مقيولة حجي الصج يزعل.. والاهم من كل هذا ان الكويتي ينتبه حق ديرته يعرف قيمة العطايا اللي نازلة عليه ويحمد ربه ويصير خوش ولد وما يتدخل باللي ماله شغل فيه.. بس ارجع واقول الفاضي يسوي زحمة والشارع فاضي.
Boshi55a@hotmail.com
Boshi5aa.blogspot.com