بو شيخــــــة

محد يعرفكم..؟


13/3/2011

الغريب العجيب باللي قاعد يصير بالديرة وخصوصا في الوضع السياسي هو بروز ناس محد يعرفهم! ولا يعرف تاريخهم! ولا ندري من وين طلعولنا! هذا لسان حال كل شاب كويتي وده يكون له رأي مستقل في اللي قاعد يصير.. سواء من النواب او الوزراء او الناشطين... الجيل الحالي طقه عقر بقر من الوجوه اللي يشوفها بين فترة وثانية تطمر له في الندوات والتجمعات... يعني لو تمسك صورة مرزوق الغانم وتفتر فيها بيت بيت وزنقة زنقة وتسأل منو راعي الصورة تلاقي الناس تعرفه من مختلف المناطق.. ولو تشيل صورة علي الراشد بالسوق تلاقي الكل يقول شفيه هذا شايل صورة النائب علي الراشد.. ولو تحط صورة صالح الملا على سيارتك بدون ما تكتب تحتها اسمه راح تشوف الكل بالشارع يقول لك اكيد انت من ربع صالح الملا النائب الشاب.. بينما اللي نشوفهم بالندوات والتجمعات محد يعرفهم ولا يعرف اساميهم ولا يدري شنو قدموا للكويت.. يمكن فيهم نائب سابق دايما كان ممتنع..او واحد خالط ماي ودهن شي يغث ويحر وينرفز!... احنا ما صدقنا نشوف شباب في المجلس مثل صالح واسيل وعلي والدقباسي وبالوزارة شفنا احمد الفهد وبدر الشريعان.. استبشرنا خير.. شوي والا طالعين لنا ناس عيال فريجهم ما يعرفونهم ويبون يسقطون الحكومة.. يا عمي انت شلون تقود الشباب ومنت قادر تقود سيارتك.. فكونا يا معودين من حروبكم القديمة وخلونا نبني بلدنا بروح الشباب مو كافي عششتوا سنين وخربتوها.. وبعدين محد يعرفكم شتبون؟

• كلمة راس
كاتب اعلامي يوجه نصايح ويقول «ارحل» ومو عاجبه شي بالكويت ويهاجم الحكومة ومسوي روحه شريف روما واهو بلاع بيزة درجة اولى ويبوق معاش الحكومة بدون وجه حق! اللهم لا شماتة.. مو قلت لك يا بوصباح اذا هذولا اللي يقولون لك ارحل...راسك سالم وعمرك طويل.
Boshi55a@hotmail.com
Boshi5aa.blogspot.com