وزير الإعلام والنفط الجديد

3/2/2011

يتعرض القطاع النفطي لهجمة شرسة من النواب الانتهازيين..وبسبب اعتلاء فاروق الزنكي سدة رئاسة هذا القطاع الحيوي..وقيادات هذا القطاع المهم يتعرضون لنفس الاتهامات اللي مالها سند او دليل..وطبعا النواب اللي وقفت مصالحهم او تم رفض توسطهم هم اللي شادين حيلهم وقاعدين ينتقدون هالمسؤولين اللي افنوا عمرهم وشبابهم في النفط للمحافظة على هذا الدخل وتنميته...كل هذا افهمه واقدره واقدر اطوفه للنواب اللي ما عندهم شغلة غير قتل الكفاءة وتقديم مصالحهم على مصلحة الكويت..لكن اللي ماني قادر افهمه ولا ني قادر اطوفه او اتغافل عنه هو سكوت الوزير المطبق؟ وصمته الغير مبرر.. اذا ساكت كوزير للإعلام ومخلي الوزارة تدور على حل شعرها، وبتسكت عن وزارة النفط والشركات التابعة لها للنواب ينهشون بلحم ابناء الكويت..يا اخي فكنا! هذولة موظفينك وفريقك العامل ما يجوز تسلمهم تسليم شرعي للنواب اللي انت تعرفهم عدل وتبخصهم زين... وارجوك يا وزير النفط تجاوب على الاسئلة التالية..شنو علاقة اعلامي تربطه فيك علاقة عائلية وقاعد يلعب بيده وريله بالقطاع النفطي لمصلحة قيادي تجاوز قانون الخدمة؟ وشلون تسمح لنفسك وانت وزير في حكومة ناصر المحمد انك تنصاع لشخص يهاجم سمو الرئيس وتمشي مصالحه؟ وكيف تقبل يا معالي الوزير ان يدار مكتبك من نائب واعلامي وقيادي في النفط ويتم اتخاذ كل القرارات وتسليمك اياها علشان توقع عليها وتعتمدها.؟هل يجوز يا شيخ احمد عبدالله الاحمد هذا الشي؟ خيرة القياديين في النفط قاعدين يتعرضون لضغوط والسبب حضرتك اللي مخلي القرعة ترعى! انا اقول لك اياها بملء الفم ..ترى نفس هالاشخاص اللي انت واثق فيهم قاعدين يرتبون ويضغطون لتعديل وزاري ومرشحين صاحبهم علشان يحل محلك.

• كلمة راس
للاسف في الكويت التنمية صارت توزع الهبات علّي يسب الحكومة ويوقف ضد التنمية ويجيّش الكتاب والناشطين الدايخين لمهاجمة الدولة، اما اللي يصدقهم القول والنية وينصحهم ويدعمهم فقدره يكون منكم النكران والانتصار للخصوم عليه.

• كلمة راس (2)
فاروق مطرود.. عبدالناصر مسموم.. السادات مقتول.. (....) شكله مو راضي يفهم.