الوزير .. والفاسدين

23/1/2011

النواب يطالبون بالاصلاح، وبتنظيف وزارة الداخلية، ومحاسبة المقصرين! وهم طبعا نفس النواب تقريبا الي يفترون على المخافر من النويصيب لي العبدلي، ومن الوفرة لي السالمي، وهم نفس النواب الي بعضهم يداوم صبح وليل في المخافر، يشوف منو داش منو طالع علشان يتوسط له، وهم نفس النواب الي يكفلون المجرمين، وشيكاتهم جاهزة لدفع الكفالة حتى يطلعون المتهمين ويستفيدون من اصواتهم واصوات اهلهم، وهم نفس النواب الي يتوسطون للمشبوهين حتى يطلعونهم من القضايا، ويشيلون الاتهامات عنهم، ويلزقونها بفراش هندي، أو عامل بنغالي، او يسجلونه ضد مجهول!
يا نوابنا، لو يطالب غيركم بالاصلاح على الاقل نقتنع بحسن نيتكم، الا اذا تخافون ان التنظيف بدايته منعكم من دخول المخافر والتوسط للنطيحة والمتردية!
لنفترض ان نوابنا نيتهم نظيفة، وانه عمرهم ما توسطوا لا لتاجر مخدرات، ولا لمغتصب اطفال «طبعا مو صج بس نفترض»، ونسألهم، الان الوزير يطبق كل ما يريده النواب والناس، ومصر على ان ينظف الوزارة ويصلح فيها، ويحقق مع المسؤولين الكبار قبل الصغار، طيب ليش تبون تستجوبونه؟ هذه ما فهمتها! الوزير يقول انا امارس تنظيف الوزارة والنواب يقولون نظف الوزارة، وفي نفس الوقت يبون يشيلون الوزير الي يبي ينظف! الا اذا النواب لمن يقولون نظف الوزارة، قصدهم حط ربعنا واهلنا والا الاستجواب!
ما يخالف خل نكون واضحين جدا مع الناس، ونكشف لهم المستخبي والمستور، ونوضح لهم ببساطة شنو الوضع، كل نائب من هذوله عنده كشف باسماء ضباط يبون يترقون بالواسطة، وكشف باسماء افراد شرطة بينقلونهم من مكان لي مكان، وكشف باسماء طلبة يبون يدخلونهم دورات الضباط، يعني كل الموضوع موضوع كشوفات، وكل الموضوع ان الوزير ما يبي يمشي كشوفات بالواسطة، لان الواسطة هي الي تسبب الفساد والافساد... عرفتوا الان منو سبب هالفساد!

• كلمة راس
خدمة قلم «الحبر» اللي يديرها وافد كل همه التسويق حق حزبه اللي كان ومازال ضد الكويت بالغزو.. واكبر همومه هاليومين انه يعكس وضع تونس على الكويت.. لكن ارجع واقول الشرهة على وزارة الاعلام اللي نايمة بالعسل.. انا اقترح يخلون وزير الداخلية وزير للإعلام علشان ينظف الوزارة..