شريطية سوق الحمام

25/1/2011

انا قلت من قبل ان هذوله اللي مسمين روحهم معارضة، واللي مسمي نفسه حارس، واسد، واللي ملقب روحه نمر الديمقراطية، وفيل الصفاة، وضفدع ساحة الارادة.. هذوله شريطية ولا شريطية الحراج، لا وطلعوا يصكون على الف شريطي ودلال، وما دري ليش بعض المرات اتذكر بياعين الحمام وهم يكاسرون على بيع يوز حمام!
يبيعون كل شي، ويضاربون على اي قضية، ويتاجرون بالناس ومشاكلهم وهمومهم، ما يصدقون يطيحون على مشكلة، الا قاموا يتاجرون فيها ولا «شايلوك» اليهودي!
مثلا قضية الاعتداء على الطالب في العارضية قبل سنتين، تذكرونه طبعا، شفتوا شلون النواب تاجروا بالقضية، وبعد ما أخذ كل واحد اللي يبيه من التربية سكر حلجه، ولا ياب طاري الاعتداء، ولا همه أمن طلبتنا وطالباتنا!
مثلا قضية محطة مشرف السنة اللي فاتت، بعد التحقيق وبعد ما تاجروا بالقضية، وطالبوا بالتحقيق، وبعد ان حقق، الوزير وتبين انه في وزير سابق هو سبب الفضيحة، وهو صاحبهم، فسكروا حلوجهم، بعد ان تاجروا يومين بصحة الناس!
راقبوا الاوضاع عدل، وراح تشوفون كل يوم عندهم شي يبيعونه، ولا راعي الخام اللي كان يمر على البيوت، آخر سوالفهم قضية المرحوم المطيري، النواب بدل ما يشوفون المشكلة ويساعدون أهله، قاموا يتاجرون بدمه، ويبيعون ويشترون بدمه علشان مصالحهم اللي مو راضية تمشي!
هذه قضية نزلت لهم على طبق من فضة، حتى يضغطون ويمشون معاملتهم عند الوزير، شكلت لجنة تحقيق، في المجلس والوزارة، والداخلية حريصة على اكتشاف الجريمة، ومع ذلك النواب قاعدين يبيعون ويشترون ويهددون بالاستجواب، وصدقوني كله شغل تجارة وبيع ومشترى في الرجل الميت، وصدقوني مو مهم عندهم منو المسؤول، كل هذا مو مهم، المهم شكثر يستفيدون من وراه، واذا ما تصدقون، صبروا وشوفوا .. انا اعرفهم شريطية، عمركم شفتوا شريطي يقول الصج؟

• كلمة راس
بدل ما وزارة الاعلام تترك القضايا المهمة وتشتغل بمراقبة الصحف وخاصة «الدار»، ويصير كل همها شلون ترفع عشرات القضايا يوميا.. ليش ما يشكلون مجلس أعلى للاعلام، يكون عنده التدقيق على الصحف ووسائل الاعلام، ورفع القضايا وتلقي الشكاوى، وحل الخلافات بين وسائل الاعلام اذا حصلت، ومن خلاله تنضبط المواقع والرسائل الاخبارية ويصير عمله موضوعي وحيادي ونزيه.. ولّا الوكيل ما يرضى جذيه؟


• كلمة راس2
نتمنى من النواب الأفاضل فتح جميع ملفات الفساد اللي تصير في الداخلية والصحة وغيرها.. وأولها قضية حمل سفاح حتى ولو كان هناك نائب متورط فيها.. مو لازم النواب الأفاضل يجاملون احد.. لا يجاملون الوزراء ولا النواب، يعني مو معقولة ببلد مثل الكويت وفيها للحين لقطاء.. لا وفيه نائب يتدخل بقضية حمل سفاح من اجل التكسب الانتخابي.. شلون يقابل ربه يوم الحساب؟!