بو شيخــــــة

الغبار الحلو



27/3/2011

شكرا يا الغبار، وايد شكرا يالتراب الي ترس الديرة، شوارعها تراب، سياراتها تراب، طوفها تراب، وولدي رجع من الملعب وقت الغبار، قلت له من انت؟ قال لي: يا ابي انا ولدك، وبعدين طلع لي البطاقة المدنية، وصورة الجواز، والجنسية، واربع صور خلفية زرقة... وتأكدت انه ولدي حبيبي ولدي الغالي!
اقول شكرا لان الغبار ما فرق بين سني وشيعي، وبدوي وحضري، الكل دز مسجات يحذر من الغبار، ماكو احد دز وقال «يالشيعة حطوا بالكم في غبار»، ولا واحد دز وقال: «يا البدوي يا اهل القبيلة في غبار بالطريج»، الديرة كلها صارت وحدة، ووزارة الداخلية نايمة بالعسل، ولا على البال، واذاعة الكويت الاغاني شغالة، بعد ما وصل الغبار، وضاعوا الناس في الشوارع، طلع لنا بيان وزارة الداخلية تحذر من الغبار، يا سلام يعني شرفت الوزارة يا باشا، معقولة كل هالاجهزة، والمراقبة، ما عرفتوا تقولون للناس انه في غبار بالطريج! وحطوا بالكم، شالفايدة، تقولون للسواق حطوا بالك وهم في الغبار ومايشوفون جدامهم، انا خابر الناس تحذر قبل مو بعد!
واذاعة الكويت طبعا نفس الشي ولا كانهم في الديرة، حاطين اغاني ووناسة وسوالف، ورايحين ويايين، ولا كأنه بيصير شي، يعني اكيد المذيع وصل له مسج في غبار، ما عرف يقول يا جماعة يقولون في غبار، هذا غبار مو بعد زلزال وتسونامي!..
بس هم اقول مو مهم، المهم تعلمنا بشوية غبار شلون نكون على قلب واحد، ونحس ببعض، ونتألم مع بعض، ونخاف على ديرتنا وأهلها، وعسى الغبار دوم وكل يوم اذا كان بيخلي اهل الديرة قلبهم عالديرة، والله يبعد عنا غبار الطائفية والعنصرية قولوا آمين.
Boshi55a@hotmail.com
Boshi5aa.blogspot.com