إلى ابنتي..غلا محمد المطيري

26/1/2011

للتاريخ أسجل هذي الرسالة..ولإبراء الذمة والضمير اكتبها..أبوج محمد الميموني المطيري الله يرحمه رجل شريف ومواطن كويتي لم يضر مصالح الكويت العليا..أبوج يا غلا انسان راقي عنده اخطاء بسيطة حاله حال اي انسان عايش على وجه الارض.. قدره قاده وخذاه لمنطقة الحدث اللي كان على موعد معاه...البعض يقول حظه العاثر..والبعض يقول انه نصيبه وده هناك..والبعض يشوف انه قدر مرسوم له وخياراته كانت مرتبطه بكل ما سبق..رسالتي لج يا بنيتي العزيزه غلا محمد المطيري..رسالة أب ما وده تعيش بنته يتيمة الأب بسبب وحش او وحوش بشرية صادرت حقه في الحياة الكريمة..وانتهكت حريته وحبست عنه حق التعبير حتى عن آلامه..يا بنتي ابوج محمد مظلوم وكل خطيئته كانت دمه الثاير ورجولته اللي ما خلته يوطي راسه لمريض نفسي يبي يمارس عليه السلطه بدون وجه حق..أبوج يا غلا محمد المطيري عاش ومات مرفوع الراس..يحبج!! اي نعم يحبج حييل..مثل حبه لنفسه وأكثر..أبوج يا غلا محمد المطيري...تاريخ وشمعة ما ممكن تنطفي في طريج الظلم اللي راح تنتصر له كل الضمائر الحية..لأنه أبوج مات مظلوم.. فتطمني يا غلا مثل ما راح تكبرين وتاخذج الحياة هو عنده حياة أخرى يحياها عند رب العالمين..وصدقيني يا بنتي العزيزه..كثر ما راح تكونين صلبة وتواجهين الحياة يتيمة..راح يكونون عمامج وخوالج حولج يأدون دور أبوج محمد..ويمكن ما يقدرون يحبونج مثله بس تأكدي انج بهالحزن محسودة بمجموع الآباء اللي يحبونج وما تدرين عنهم..وآنا واحد منهم وغيري آلاف..اي نعم ادري يا غلا محمد المطيري محد راح يغطي دور أبوج..بس تأكدي ان الله يكتب الخير من الشر..ويجعل من البلاء مخرج باللطف..وهذا وعد أقطعه على نفسي يا غلا يا بنت محمد المطيري..في كل ذكرى سنويه تمر على رحيل أبوج راح اكتب لج رسالة..اذكرج فيها بأخلاق ابوج وقصة الظلم اللي حصلت له وهزت كل قلوب اهل الكويت الصادقين مع انفسهم..قولي آمين عسى الله يطول بعمرج ويجعلج بارّة في أبوج وأمج..ويوفقج يا بنت المظلوم..يا غلا كل اهل الكويت، يا غلا محمد المطيري..

• كلمة راس
اللي خلاني أكتب هالمقالة..سؤال تلقيته من بنتي الصغيرة قالت فيه..يبا الحين غلا منو يصير أبوها؟؟؟ غالبتني الدموع وكتبت هذي الرسالة..ولا عندي جواب حق بنتي..واحول السؤال حق وزير الداخلية وقياديين الوزارة يمكن يقدرون يجاوبون بنتي على سؤالها..