الاثنين، 21 مارس 2011

العجلة.. الذره.. الاستجواب

20/3/2011


الكويت فيها نادي علمي مختص بتفريخ العلماء الكويتيين والمخترعين ورعايتهم..وهذا الشي واضح من خلال جهود القائمين على النادي منذ تأسيسه..وبين فترة وفترة نسمع عن كويتي فاز بميداليات ذهبية عالمية نتيجة اختراع جديد تم تسجيله دوليا..وبالفترة الاخيرة لا والله زاد عدد المخترعين الكويتيين

بصورة لافتة وصار عندنا مهرجان ومعرض لهم..ولأن النادي علمي ومتخصص بالجانب الفيزيائي والميكانيكي وخلافه.. اتمنى من المسؤولين التركيز على استحداث قسم سياسي في النادي يحطونه يم قسم الميكانيكا..لأن وضع الكويت السياسي يحتاج علماء ومخترعين يشخصون لنا علتنا اللي راح ندفع ثمنها مستقبلا..لأن اخواننا النواب والناشطين والكتّاب والمشتغلين بالمجال السياسي جن جنونهم وصارت عندهم حالة غريبة عجيبة في التفاعل مع كل شي واي شي يحدث على الكرة الارضية..تشوف السعدون يصرح عن اليابان وكارثة المفاعل الياباني..والطبطبائي كل ثلاث دقايق يصرح ويطلع بقنوات محد يشوفها الا ربعه..وقيس عليها الناشطين وعددهم الكبير اللي ما يندرى منو يمولهم ومن يترس راسهم بالافكار اللي تضر الكويت..لازم النادي العلمي الكويتي يكون له دور فعال في هالقضية.. وعلى طاري الاختراعات..العالم استفاد من اختراع العجلة.. واللي بفضلها صرنا نتنقل وندير كل شي من خلالها..والعالم كمان اخترع الذره ومنها تولدت الطاقة اللي تخلينا نكشخ ونشب الليتات..فما كان من الكويتي اللي فاهم بالعجلة والذرة الا اختراع هالة الاستجواب..اي نعم هالة الاستجواب..لأن الاستجواب سؤال مغلظ موجود من ايام ابليس وآدم..لكن الكويتي وتحديدا النائب الكويتي يعتقد ان الاستجواب الخاص فيه اختراع جديد لازم كل الكره الارضية تتجه صوبه وتركز معاه.. من هني نبي النادي العلمي يكون له راي علمي او يتبنى دراسة مجانية يقدمها لنا علشان نعرف هالاستجواب اختراع والا مو اختراع؟ واذا كان اختراع يا ليت يسجلون براءته باسم نائب محدد علشان نفتك من المقلدين..واذا مو اختراع هم بلغونا من باب ان الكويتي فاضي شغل فنعرف الموضوع وندزه «واتس آب» و«برود كاست» و«مسج» و«تويتر» و«ايميل»...لأن في نواب يعتقدون ان الاستجواب اختراع لازم يحسدون عليه

• كلمة راس
اللي يوقف مع البحرين طائفي..واللي يوقف مع الفلوجة بروحها ويترك العراق كله وطني وشجاع..واللي يمدح حزب الله قبل شهرين اهو نفسه اليوم يحذر من تحركاته في البحرين! الجذب شلون صاير احمر اخضر..بس قالوها الاولون.. ما يحبونك لو تبوس روسهم وريولهم..لأن بنظرهم اي شيعي عيمي واي عيمي فارسي واي فارسي مجوسي؟؟ يعني العرب اللي وااو ودشوا الاسلام بسرعه مثلا..؟

• كلمة راس 2
الكاتب المهرّج دام انك شريف وتتغنى بأصلك اليمني.. ليش ما تروح ميدان التحرير بصنعاء مو أحسن من المساج الفلبيني وبنيد القار؟

Boshi55a@hotmail.com
Boshi5aa.blogspot.com

مرسلة بواسطة بوشيخة