«المباركة معصومة» و«مورفين» الدايخ

27/1/2011

والله هالديرة ابتلشت في بعض هالنواب.. اللى صابرين مثل الياهل «الوقح» كل ماعطوه عين يتجرأ زيادة.. وهذا ماله حل الا براشدي مخومس على عينه عشان يرجع لعقله.. هذي النوعية صايرة عندهم موضة هالايام ومنهم الدايخ راعي سالفة الـ«مورفين» الا حتى مكرمة سمو الامير، الله يحفظه، ما اسلمت منه، لا بعد يقط الحجوة وتالي يتبرا منها.. واذا صادوه الاشراف قام يمثمث.. وبأسرع من حذفة النباطة اللي انشاله تاخذ عنه، يقوم ويمش حلجه عن سوالفه الخايسة، ويقول مو قصدي، كنت اقصد شي ثاني.. وانتو تتصيدون بالماي العكر.. عكر الله مزاجك لي يوم الدين..
وهالنوعية من هالنواب يا انهم ما يدرون وين الله حاطهم، ويقطون الكلام على عواهنه (حلوة على عواهنه).. او انهم اخباث ويظهرون غير اللى يبطنونه.. وينيشنون بعيد.. وانا استغرب من باجي النواب اللى في المجلس ليش ما يلجمون هالناس اللي «حلوجها خايسة» وما تتكلم الا بالشي الردي.. لكن اذا خليت خربت ..ودام الكويت فيها مثل «المباركة معصومة» لاتخافون عليها.

• كلة راس
ياليت النواب الرياييل يشتغلون مثل النواب «الاناث» اللي ظبطوا ربعهم «الحريم» في قوانين تفيدهم وتحفظ كرامتهم بمختلف مشاكلهم.. بس اهم لو الله يفك وحدة من عندهم من «شوي» جان اشتغلوا زيادة.