جمهور «العربي» و«القادسية»

15/2/2011

أكبر ناديين في الكويت العربي والقادسية واكبر قاعدة جماهيرية في الديرة تتبع هالناديين والباجي منثرين على جم نادي.. لكن مثل جمهور العربي والقادسية ما تحصل.. يحسسونك ان الكرة الكويتية بخير.. ومعاهم تشوف الاصالة الكويتية...وفي كل ديرة تلاقي ناديين يستحوذون على القاعدة الجماهيرية الاكبر.. ولأن العربي يمر بظروف قاسية بكرة القدم راح أبيّن لكم شلون جمهور العربي الوفي ورا لاعبينه وما يخليهم مدى الحياة.. ونفس الشي صار بالثمانينيات ان نادي القادسية مر بمرحلة الاخفاقات ومع هذا تم جمهوره وراه وين ما يروح... وطبعا من باب ضرب الأمثال فقط.. وضد التشبيه طبعا.. راح اقول لكم شاللي قاعد يصير بساحتنا السياسية.. جمهور الشبكة الهتلية طبل وزمر وشال الشيلات لمجموعة من النواب ولما هالنواب راحوا الشارع هتيلية الشبكة لحقوهم.. شوي والا النواب نفسهم ينتقلون رغم اخفاقاتهم رايحين التويتر.. وبالفعل نفس جمهورهم راح وراهم وبنفس العقلية سب وقذف للناس الشرفاء وعلى رأسهم الحكومة... وابشركم لو النواب راحو الفيس بوك نفس الجمهور الدايخ راح يلحقهم.. بالمختصر الجمهور هو هو والنواب هم هم من اخفاق لي اخفاق.. مع الفارق ان جمهور العربي والقادسية يوجه النصح وينتقد الفريق وممكن يشيل مدرب وممكن يعزل اداري.. لكن جمهور النواب حالهم حال الغنم صم بكم عمي ورا النواب بدون معارضة.. وهالحالة خلقت لنا جيل يحب الجذب ويفتري على كيفه والاهم من هذا ان جمهور القادسية والعربي معروفين ويطلعون بالتلفزيون ويحطون اسماءهم، لكن جمهور النواب الداثرين منخشين ورا برقع «النيك نيم».. ومتخفين وخايفين لأنهم يعانون من عدم ثقة بالنفس حالهم حال النواب اللي ما يدرون وين الله حاطهم.. عرفتوا الحين منو يحرك الشارع؟ غنم يتبعون غنم والراعي كل شوي يقول لهم ياكم الذيب ويقص عليهم..

• كلمة راس
من لا يشكر الناس لا يشكر الله.. والشكر موصول لفيصل الدويسان وناجي العبدالهادي ورولا دشتي على مبادراتهم بالطلب لسحب القضايا على وسائل الاعلام.. والشكر الاكبر لصاحب السمو الأمير الله يطول بعمره.. ولسمو رئيس مجلس الوزراء.. وأخيرا اشكر راعي الفكرة اللي رفض ينحط اسمه معاهم.. وعاشت الكويت بأبناءها المخلصين.