إلا الكذب

7/3/2011
حنا مسلمين ودينا يحثنا على الصدق.. والمصطفى صلوات الله عليه وعلى آله يقول الصدق منجاة.. والصحابة والتابعين والعلماء يشوفون ان الكذب على سبيل المزح مكروه ويكاد يكون محرم.. والمجتمع الكويتي معروف عنه امثال كثيرة واقوال مأثورة في الرجل اللي يجذب او الرجل اللي يلحس كلامه.. لدرجة انهم قالوا بالامثال «الريال لي تفل ما يلحس تفلته» وهذا دليل على عدم حب اهل الكويت للجذب والجذابين.. وعندنا قصص وروايات من التراث ومن العصر الحديث تأكد على ان كل جذاب بالكويت انفضح اصبح عديم الوجود وماله اي قيمة.. ان دش الدواوين طردوه.. وان راح مؤسسات الدولة يكشونه.. وبالشارع يتلثم علشان لا يقولون له يا الجذاب.. ولأن الشعب الكويتي ملك المفردات.. طلعت سالفة بوشلاخ.. وبولمعة.. وبو الصواريخ..وهذي ألقاب يقولونها اهل الكويت حق كل واحد يجذب.. الغمندة وين؟ الغمندة ان السياسي يجذب بس مو كل وقت ومو بكل سالفة.. واذا السياسي حب يجذب يحاول ان جذبته الاولى تكون بينها وبين الجذبة الثانية فجة، يعني على الاقل ست شهور.. لكن لأن احنا بعصر السرعة والتويتر والفيس بوك والآي فون والآي اح والآي باد والآي بيري والقدو والمقصي فالوضع اختلف.. واكبر دليل شوفوا جماعة «الا الدستور».. قبل ثلاث اسابيع صرحوا وقالوا «الدستور ملاذنا وتعديله تنقيح سنقاتل لمنعه»، وكمان قالوا «كل من يريد تعديل الدستور الآن هو كمن يريد الانسلاخ من عهد عبدالله السالم»، وكلام كبير ووايد موجود بكل الجرايد بس فرة وحدة بقوقل تلاقونه.. اليوم نفس النواب وبعض كتّابهم قرروا ان الدستور يجب ان ينقح ويعدل وخصصوا المواد وحددوهم بعد.. شنسمي هذا؟ هل هو انفصام سياسي؟ والا استهبال نيابي؟ والا هو جذب بيّن وانكشفوا ربع بوشلاخ وبولمعة؟ ناس مثل هالنوعية تجذب يوم وترك ما نقدر نقول لهم اكثر من كلمة وحدة.. سليحط.. اي نعم سليحط وسليمة تصكم.. وطيح الله حظ اللي يمشي وراكم من نواب وكتاب وناشطين وناس مهبل ما عندهم هوش.. ويمكن الهايشة احسن منهم.. أنصحكم تخلون شعاركم الا الجذب ما نقدر نتركه.

• كلمة راس
نبيل الفضل أرفع له الغترة والعقال والدشداشة والمكسر اذا يبي.. لانه قبل سنة وشهر كتب مقال قال فيه هالجملة «هؤلاء أفاقين يتلونون يوما بعد يوم»، بالفعل يا استاذ نبيل انت صح ودايما صح وسابقنا.. الظاهر عندك جهاز لكشف الجذب ياليت تزودنا فيه لأن في واحد تلفنا.

• كلمة راس (2)
الكاتب المهرج امس جن جنونه على البوكس في «الدار»، والغبي راح فضح نفسه وقال «انا المهرج المقصود».. يعني اللي عاراسه بطحة يحسس عليها.. هذا وللحين ما تكلمنا عن القصص اليمنية.. انت فضحت نفسك..