البدون أهم

6/2/2011

إذا نواب التأزيم وجماعة الا كل شي، لهم نية يتظاهرون أو ينزلون للشارع حفاي مع ربعهم الطابور الخامس والجم كاتب اللي بايعين ذممهم.. انا اقول اذا لهم نية ينزلون الشارع ويتظاهرون.. أنصحهم لوجه الله وعلشان الناس تصدقهم وتنزل معاهم..انصحهم بتبني ثلاث قضايا.. وانا بكون اول واحد معاهم... القضية الأولى قضية البدون ومعالجتها، وياليت يشيلون صورة صالح الفضالة ويكتبون عليها ارحل لأنه بويوسف بعد ما شكل اللجنة من الثلاثي ايام ما اعتقد القضية بتنحل... والقضية الثانية قضية المرور والزحمة، وياليت المظاهرة تكون بالدائري الرابع لأنه بكل الاحوال زحمة.. واتمنى من المتظاهرين يشيلون صورة وكيل المرور ويكتبون عليها ارحل...اما القضية الثالثة والاهم من كل القضايا.. فهي قضية الوحدة الوطنية اللي قصوا علينا فيها مجلس الوزراء وقالوا انهم بيسووون لها لجنة وفريق ومعالجة ولي الحين ما شفنا شي.. هذي قضايا تستحق ان الانسان مو بس يطلع الشارع ويعتصم، الا تستحق ان اهل الكويت ينامون علشان هالقضايا بالشارع لين تنحل...اما اذا بيطلعون علشان غياب الجلسات ونرجسية السعدون وصوت مسلم البراك وتغيير رئيس الحكومه، فلا طبنا ولا غدا الشر، راح نشوف نفس الويووه اللي ما عندها شغل واللي غايب عن دوامه واللي عاطل عن العمل واللي مأجرينه في التويتر والمدونات مع شوية كتّاب مالهم لا لون ولا طعم...وبكل الاحوال اختيار سمو الرئيس حق اصيل للأمير وحده، وصاحب السمو ذاته مصونة لا تمس حتى لو على شكل مظاهرة وتحدي ارادته يودي السجن..ودمتم..

• كلمة راس
أجهزة الدولة تستعد لاستقبال رؤساء دول وضيوف «في آي بي»... فنتمنى من المواطنين يعطون صورة حضارية عن شعب بوناصر الله يحفظه.. ولا تنسون تصرفون المنحة للبهجة وتعطون الفقير المحتاج.. وبلا شارع وعوار راس..