شلوح ملوح

8/7/2010
اخيرا سكر المجلس و«شلوح ملوح اللي يدل بيته يروح» اويا روح ما بعدك روح.. وين ماتروح تبقى الجروح.. ياعيني يابو شيخة، صرت مطرب وقمت تألف وتغني بعد، بس ناقصك تنزل البوم يكسر الدنيا على روس الناس!
من حقي اغني، ليش ما اغني؟ تصوروا اربعة أشهر، لا نواب ولا مجلس، ولا كلام فاضي.
تصوروا معاي، وانتو تفتحون الجرايد، انه مافي اخبار عن هوشة في المجلس بين النواب، ياجماعة صار شغل يهال ونجرة بين الاعضاء وسب مسابب، ولا كأنهم نواب عليهم القيمة!
يامعود لاقيمة ولا مطبق ولا مجبوس.. صار مجلسنا يفشل الواحد ينقص ويهه وهو يشوف النواب اللي اختارهم شيسوون!
طبعا اغني، ليش ما اغني؟ ما شفتوا اخر جلسة لدور الانعقاد، ختموها بهوشة بايخة وكلام عن الاصل والفصل والعرق والفئة.. بذمتكم واكيد عندكم ذمة مو مثل بعض النواب، معقولة هذا مستوى حوار بين ناس فاهمين ومشرعين؟!
بغني وبرقص شوي، مو شوية المجلس يسكر اربعة اشهر، ما ادري ليش ما يسكرونه احدعش شهر وثلاثة اسابيع، يعني يخلونهم يقعدون جلسة واحدة يقولون اللي عندهم وخلاص!
مشروع يعني يحط القانون، يقعد ويشتم ويعرض بالناس وانت عراقي وانت بنغالي وانت دنماركي.. كلام حتى الشباب اللي يقعدون ورا المحولات ما يقولونه! واحنا ما نقوله الا دفعة مردي!
إقرأ المزيد...

إيميل مونديالي

7/7/2010
الكل أكيد شاف إعلان «... ...» تفتخر فيه بأنها قامت ببناء ملعبين من ملاعب جنوب إفريقيا لاستضافة كأس العالم.. ما أدري شنو شعوركم كان.. بس أنا شعرت بالاشمئزاز الكبير وأنا أشوف الإعلان.. تحسرت على الديرة أكثر.. لأن الديرة ما تستاهل من «... ...» مشروع واحد من هالمشاريع؟ خلوني آخذكم بجولة بسيطة للملاعب اللي تتفاخر «... ...» أنها شيدتها: ملعب «... ...» الصراحة معمار رائع.. ومعها حق جنوب إفريقيا انها تفتخر فيه.. يستوعب 68 ألف مشاهد.. بس جم تكلفته؟ تكلفته كانت فقط 330 مليون دولار.. يعني 97 مليون دينار كويتي!.. بس متى بلشوا فيه؟ العقد بدأ في سنة 2007 وتم تسليم الملعب وافتتاحه العام 2009!.. أما ملعب «... ...» يستوعب تقريبا 48 ألف.. والتكلفة 1.7 مليار دولار.. تقريبا 500 مليون دينار كويتي.. وطبعا الملعب هذا بلشوا فيه سنة 2007 وتم التسليم سنة 2009.. باختصار خلونا نقول ان ملعبين تم تسليمهما بأقل من سنتين.. أما استاد جابر الأحمد الدولي.. تتوقعون متى بلشوا «... ...» فيه؟ سنة 2000 واحنا الحين بسنة 2010.. عشر سنوات.. وللحين ما تم افتتاحه.. بالله عليكم مو حرام هالوضع؟ بس ترى اللي مفروض ينلام أنا وانت اللي سكتنا ورضينا أن «... ...» يتلاعبون فيني وفيك.. أنا قلت لا.. انت تقدر تقول لا؟!.. فكر فيها.. ترى الكويت تستاهل على الأقل أن تقول لهم.. لا بس كفاية!..

• كلمة راس
نقلت هالإيميل المونديالي بحرفيته مع مراعاة الجانب القانوني.. بس تدرون.. والله ريحني من كتابة المقال.. وهم فش خلقي.
إقرأ المزيد...

ليش تركيا؟

6/7/2010
عندي نصيحة لا تسافرون، تدرون ليش؟ لانه ماكو أبرد من صالة بيتك، والتكييف شغال، فليش تتعنى وتدور على البراد؟
والسبب الثاني: ان كل النواب مسافرين، وهادين الديرة، وما في احلى من ديرتنا بدون نواب، ولا نجرتهم، ولا تصريحاتهم، ولا فلسفتهم الزايدة!
النواب بيسافرون، بس وين يسافر بعض النواب؟ وفقا لبعض الفتاوى اللي تنباع بسوق الجمعة، قالوا بعضهم سافروا تركيا، بلد السياحة الاسلامية، لان اليهود بيقاطعون تركيا!
طبعا شلون فجأة تركيا تصير اسلامية ما اعرف؟ تركيا والنعم ديرة حلوة وناسها طيبين بس عاد اسلامية وسياحة اسلامية شوي قوية وصعبة!
اللي نعرفه ان تركيا دولة علمانية، ودستورها علماني، ومازالت تحب اتاتورك، وماكو شي في تركيا اسمه وفقا للشريعة الاسلامية، ولا ضوابط، ولا لجنة ظواهر.. يعني ما تغير شي من شهرين، واللي نعرفه ان في تركيا محلات الخمور والبارات اكثر من البقالات عندنا!
واللي نعرفه ان الكازينوهات شغالة اربع وعشرين ساعة،يعني الديرة منفتحة وعلمانية، على الطراز الغربي، اللي يبي يصلي اكو مسجد، واللي يبي يرقص فيه مرقص، وما تغير شي.. ديرتهم وكيفهم، حلوة وزينة وناسها طيبين!
طبعا بعض نوابنا اللي ذابحينا شعارات وضوابط واخلاق واختلاط، ولا تسوون ولا تأكلون، ولا تشترون .. اكيد بيصيفون بتركيا، ليش؟.. طبعا دعما للمجاهدين في غزة! وسلامتكم...
إقرأ المزيد...

امتحانات النواب

1/7/2010
الله يرحمهم اللي كتبوا الدستور ويطول بعمر من بقي منهم.. لو انهم حاطين مادة بالدستور تقول ان رئيس المجلس يجري امتحانات اخر كل دور انعقاد للنواب.. ليتهم حطوا هالمادة علشان نقدر نعرف درجات النواب ومدى دراستهم وانجازاتهم طول فترة دور الانعقاد.. لكن دام انها طافت على اللي عملوا الدستور ما تطوف على بوشيخة.. انا راقبت وتابعت النواب وبسوي لهم امتحان اخر السنة حالهم حال الطلبة، والبارح صححت اوراقهم حسب المضبطة، واليوم بنشر لكم درجاتهم بدون تدخل وبحيادية وهي عبارة عن درجة نهائية مع ملاحظة المدرس اللي اهو الشعب.
نواب الشيعة: امتياز مع مرتبة الشرف ببركة اهل البيت، عليهم السلام.
النواب الحاصلين على الامتياز: علي الراشد، دليهي الهاجري، حسين الحريتي، ناجي العبد الهادي، سلوى الجسار، خلف دميثير.
النواب الحاصلين على جيد جدا: سعد زنيفر، خالد السلطان، صالح الملا، عادل الصرعاوي، عبد الرحمن العنجري، مخلد العازمي، سعدون حماد، مبارك الخرينج، عسكر العنزي.
النواب الحاصلين على جيد: محمد الحويلة، صيفي الصيفي، عبد الله الرومي، سعد الخنفور، شعيب المويزري، خالد العدوة، سالم النملان.
النواب الحاصلين على مقبول: علي الدقباسي، غانم اللميع، فلاح الصواغ، مرزوق الغانم، احمد السعدون، محمد المطير، مبارك الوعلان، خالد الطاحوس، علي العمير, جمعان الحربش.
النواب الناجحين بدرجات مساعدة: مسلم البراك، محمد هايف، وليد الطبطبائي، فيصل المسلم. وبوشيخة يبارك للنواب المتفوقين، ويتمنى لبقية النواب بذل المزيد من الجهود لخدمة الكويت.

• كلمة راس
ابن العمدة دش امتحانات.. العمدة طلب من شيخ الغفر يعلمه بالنتيجة.. اذا ابنه راسب بمادة يقوله جدام الناس: محمد بيسلم عليك.. واذا بمادتين يقوله: محمدين بيسلم عليك.. بعد ساعة رد شيخ الغفر وقاله: امة محمد بتسلم عليك!
إقرأ المزيد...

ميزانيات النواب

30/6/2010
مع موسم السفر والصيف اشتغلوا النواب بشكل غريب عجيب على تأشيرة «لامانع» للعلاج بالخارج.. وبالفعل كل نائب على الأقل وقع له 200 معاملة للعلاج بالخارج حق ناخبينه منها على أقل تقدير 100 معاملة مخالفة للنظام وأخذ فيها استثناء.. طبعا شاملة المريض العيار مع خمطة مرافقين.. ولما تشوفها وتقيسها ماليا تشوف ان التكلفة الإجمالية تتعدى مبلغ نقدر نبني فيه مستشفى.. أو نستقدم فيه أفضل دكاترة العالم لعلاج الامراض المستعصية في الكويت.. نواب من هالنوع شلخوا وأرهقوا ميزانية البلد في وزارة الصحة
.. مو غريبة عليهم يسلقون الموازنات والحسابات الختامية اللي تسوى لها ستعش مليار دينار بثلاث جلسات.. ويطلع لك نائب يتفلسف ويقول يجب المحافظة على المال العام! أي عام أي خاص يا عمي وانت سالق ستعش مليار وموافق عمياني عليها وانت ما تدري عن هوى دارك ولا تعرف وين الله حاطك.. انتو نفسكم يا نواب عندكم ميزانيات شخصية ما يعلم فيها أحد.. البلد ابتلشت فيكم وفي أفكاركم اللي ما تمثل إلا مصالحكم.. والله العظيم عزيزي القارئ تحت ايدي أوراق يشيب لها راس الطفل من معاملات لمرضى علاجهم موجود بمستوصف خيطان.. لكن النائب الفلتة أخذ لهم موافقات للعلاج بلندن بشخطة قلم  استثنت له الموضوع علشان مواقفه مع الوزارة وقياديينها.. ويطلع لك الأخ بالصحف والتلفزيونات ويقول إعلام فاسد وحكومة لا تعرف الأصول السياسية.. يا عمي.. اتق الله في وطنك وفي دعوة مريض حقيقي انحرم من العلاج بسبب استثناء ناخبينك..

• كلمة راس
الإدارة العامة للجنسية والجوازات صكت على التأمينات الاجتماعية بالخدمة المميزة والانضباط الوظيفي.. قولوا آمين عسى الله لا يغير على قياديينها وموظفينها وما يخضعون لصراخ نائب في المجلس.. بالفعل هذي الإدارة نموذج نتمنى يتعمم على جميع مرافق الدولة.
إقرأ المزيد...

عزوز السكبة

29/6/2010
زمان كان بفريجنا واحد من الربع، نناديه، «عبيد السكبة»، طبعا عزوز كله كاشخ ومشط شعره، ونظارة وقلم وساعة.. ينام، يطلع، يقعد على سحارات البقالة بنفس كشخته، طبعا هذا كله عادي بس عاد المو عادي وقت اللعب العصاري، احنا كل واحد ياي شكل، اللي يلعب بدشداشته ورابطها على خصره،
واللي ياي دلاغ لون ولون علشان يعرف يمينه من يساره، واللي ياي لابس فنايل اخوه الوسيعة، واللي يلعب حافي، يعني ماكو اثنين مثل مثلة، جنة طالعين من قوطي ماكنتوش، ماعدا «عبيد السكبة»، ياي كاشخ، الهاف والفنيلة مثل مثل، ومدخل الفنيلة بالهاف، والدلاغ نظيف لي الركبة، واللابجين يلمع يقولك مسويله غسيل وتشحيم، وكسارات على الركبة، ومسشور شعره، يعني لاعب مال الواحد يصور معاه مو يلعب معاه!
المهم عزوز السكبة اخر واحد نختاره بين الفريقين، لانه بدون فايدة يلعب حارس خرّاري بين ايدينه، يلعب دفاع يصير شوارع، نلعبه هجوم كله فنقر يطير الكور، يعني ما يصلح لاي شي بس كاشخ واقف بالملعب، ومن يومها وصلنا الى قاعدة مهمة ان اللاعب كل ما كشخ اكثر يعني ما يعرف يلعب!
عزوز السكبة حاله من حال بعض النواب في المجلس، ماكو ولاشي، ماندري شنو شغلتهم بالضبط، وكله الكور ماشية على كيفها بين ريولهم، وهمه بس كاشخين، داشين، وطالعين من المجلس بسكبتهم، يعني نقدر نسميهم اكشخ النواب، بس تعال اخذ شغل ماكو، اخذ تصريحات وكلام كبير وصعب بس كله عالفاضي.. وقت اللعب، اخر واحد تختارهم.. بالمختصر المفيد، مثل عزوز السكبة، مال الواحد يصور معاهم وبس!
إقرأ المزيد...

جيمس بوند

28/6/2010
ما أدري ليش لازم نستغل كل شي زين، ونحوله إلى قضية شخصية، ما أدري ليش هالنواب صايرين أكثر الناس استغلالا لحاجات المساكين من الناس، يتلاعبون بعواطفهم ويقصون عليهم، ويركبون على ظهرهم بس علشان هالكرسي، تتحول مآسي الناس إلى سلم يصعدون عليه لتحقيق مآربهم عيني علي وعلى مآربهم شكثر مثقف وأنا ما أدري!
مثال واحد، قانون المعاقين، واستغلال ربع بعض هالنواب لقانون المعاقين لصالحهم، النواب سنين يمطون ويمطون في هالسالفة، يجيبون ويردون في هالمعاقين، ويصورون معاهم مع ابتسامة عريضة، إلى أن تتدخل الحكومة وتبادر في حل مشاكلهم، بدون زيطة ولا زمبليطة النواب!
مثال ثاني، قافلة الحرية، تذكرونها، ناس راحت وتبرعت، وأتراك استشهدوا، المهم القضية إنسانية، والكل تعاطف مع القضية، ومع الناس اللي في غزة، مو مهم منو كانوا لأن المهم العمل، شنو صار بعدين؟ تحولت إلى دعاية انتخابية، وطريقة لجمع التبرعات، وادعاء البطولات والصولات والجولات، وكل واحد تحول إلى طارق بن زياد.. اللي قال أنا تهاوشت مع الجندي ورفسته في بطنه، واللي قال أنا خططت لمحاصرة اليهود، واللي واللي، وكل واحد صار لنا جيمس بوند زمانه.. وصارت دعاية بايخة لعمل إنساني!
أهالي أم الهيمان مساكين، عندهم قضية تلوث بيئي، ولازم له حل في النهاية، شنو صار؟ النواب استغلوا معاناة المواطنين، وسووا لهم جم تجمع بو نفرين، وصراخ، وميكروفونات، وطلع نائب قال لهم، أنا أسد شارع الجهراء وقهاويها، وراح أكسر راسهم، وأشيل المصانع، وأقلبها شاليهات لكم، وبيوتكم تتحول إلى عمارات بو عشرين طابق!
الزبدة ربعنا دايما جذي، مخربينها، تخصصهم تشويه كل قضايا الناس، ومعاناتهم.. بعض نوابنا مناشير صاعدة واكلة نازلة واكلة.. على حساب الناس!
إقرأ المزيد...

دستورهم ودستورنا

27/6/2010
غريب عجيب أمر بعض النواب.. كل واحد فيهم شايل الدستور ويقراله منه سطرين يشوف نفسه خبير متمرس بمواده.. وبعضهم يطلع بالتلفزيون ويقتطع أجزاء من بعض مواد الدستور ويطبل حق روحه.. لا تستغربون باجر اذا شفتو نائب شايل الدستور ويقرا نصوص مو موجودة بالدستور من باب الدجل السياسي.. كل نوابنا صاروا خبراء دستوريين..
وأحسن واحد فيهم ما يعرف ينطق كلمة دستور ولا يعرف معناها الحقيقي.. لكن الله ابتلانا بيهال بالمجلس مسويين روحهم كلش واهم ما عندهم ما عند عباسوه.. نواب كل همهم تفتيت المجتمع ومهاجمة أبناء الأسرة بكل شاردة وواردة.. والله وبالله العظيم إن سيرة بعض النواب فيها بلاوي حمرة وخضرة وبيضة لو ركزنا عليها راح يموت النائب من الفشلة.. وتشوف النائب شغله الشاغل الأسرة الحاكمة وكل كلمة والثانية يقول.. يجب ترتيب بيت الأسرة.. وانت شكو من حطك وصي عليهم؟ لا الدستور ولا غيره يكفل حق احد التدخل بشؤون العالم والأسر، فشلون حضرة النائب الياهل مسوي روحه بو الفهامية وقاعد يوجه الأسرة الحاكمة؟ أنا أقول هزلت وطالت وتشمخت.. والظاهر ان اليوم النواب طلعوا طلعة يديدة بالاعتداء على الدستور من خلال دفاعهم المقيت عن واحد معتدي على مسند الإمارة والقضاء ينظر قضيته، وشي غريب كل هالإهانات اللي قاعدين يرتكبونها باسم الدستور اللي داسوا ببطنه وشققوه وقطعوه بيدهم المريضة.. أبشركم يا نواب الغفلة.. الدستور اللي تعرفونه مو نفس الدستور اللي نعرفه.. يا أعضاء النكبة الشوارعية..

• كلمة راس
حرامية المال العام في أواخر الثلاثينات اليوم يايين ومسوين روحهم معارضة! شي عجيب غريب.. وحرامية التثمين بكل وقاحة اليوم يتكلمون عن تطبيق القانون! وحرامية عام 1986 بكل صفاقة اليوم يتحجون عن تكافؤ الفرص!.. أنا قررت أفضحهم واللي فيها فيها..
إقرأ المزيد...

أبطال الملاعب

25/6/2010
ليش مانكون واضحين، الوضوح زين والكلام الواضح يفهمه الكل، بس اللي ما عنده شي، يقول كلام كبير بس على الفاضي، يعني ليش بعض نوابنا وبعض هالكتاب «البوربع» يقولون نص الكلام، ويطخون!
النائب فيصل المسلم تكلم قال انه ضد ابطال الفساد، صراحة بيني وبينكم اول شي حسبالي يتكلم عن ابطال الملاعب، ورحت صوب كابتن ماجد، اللي كان يشوت الكرة، بعد ثلاثة ايام الكرة تدش المرمى، والحارس يومين طاير بالهوا بس علشان يصد الكرة، يعني نقعد شهرين على مباراة وحدة، وما تخلص.. نرجع لابطال الفساد!
عرفنا انه ضد ابطال الفساد، هذا واجد زين، طيب منو ابطال الفساد؟ ممكن تكشف لنا يا نائب الشعب ياللي تخوف ولا تخاف، اسماء الفاسدين، لا تكشف لنا، ما نبي نعرفهم، على الاقل روح بلغ عليهم اقرب مخفر، او على الاقل اقرب جمعية، او اقرب فرع تموين! او بلغ عليهم راعي البرد اللي في الدوار،يعني روح بلغ عنهم ليش ساكت؟
لنفترض ما عندك ادلة، هذي هم سهلة، حلها عندي، سؤال للوزير المختص، او تكلم عنه تحت قبة البرلمان، بعد من شنو خايف؟ مو عندك حصانة، لا احد يحاسبك ولا احد بيدخلك السجن حتى لو كنت غلطان.. تكفه يا نائب الشعب الشجاع اعلنها من هم ابطال الفساد، وانقذ البلد!
بصراحة انا دخت، شكثر نوابنا يحبون يتكلمون ويدوخونا على سالفة الفساد والمال العام والحرامية واللصوص، وما شفنا بعمر عمرنا نائب جر حرامي من خشته، ووداه على النيابة، حتى لو حرامي طوابع بونص دينار!
اقول نرجع لابطال الملاعب وايد احسن!
إقرأ المزيد...

باختصار.. الكويت كلها «بدون»

23/6/2010
واخيرا صار اللي كنت خايف منه..صار اللي محد يتمناه.. صار اللي اليهال من النواب والجهلاء منهم وصلونا بسبب غباءهم التشريعي له
.. صار اللي هدم كل تاريخنا الرياضي.. الكويت وحسب قرار اللجنة الاولمبية الدولية غابت عن البطولات.. وسيتم في أي مشاركة دولية مقبلة رفع العلم الأولمبي بديلا لعلم بلادي دولة الكويت.. هذا العلم اللي سقيناه بالدم منذ نشأة الكويت ولا أجد بعد كل هذا إلا بيت المتنبي التالي..
وجرم جرّه سفهاء قوم
وحل بغير جارمه العذاب

• كلمة راس
اختصرت المقال من الألم اللي اعتراني ككويتي يشوف أمجاده ضايعة بسبب ممارسات صبيانية من بعض المستفيدين من الرياضة..
إقرأ المزيد...

نواب جابولاني

22/6/2010
«جابولاني» هي الكرة اللي يلعبون فيها بكأس العالم، وهذي سالفة من سوالف الفيفا، كل اربع سنوات يطلعون لنا بطلعة، وبكرة جديدة، وطبعا ميزة هذه الكرة انها كلش ماتنمسك وتخدع الحراس، وتبهدل عيشتهم، وماشفتوا شلون الحارس الانجليزي والجزائري خاورها، يقولك ماسكين جمرة!
المهم مو هذي السالفة، السالفة نوابنا، صايرين مثل جابولاني وانا بسميهم نواب جابولاني وهمه موجودين في كل مكان، وجردية وفضائية، ولاتقدر تصيد عليهم شي!
تقوله ياحبيبي مو انت تقول نبي تنمية، ليش ما تقدمون مشاريع تنمية، ليش تعارضون الخصخصة، يقولك لا احنا نحارب الفساد، وسراق المال العام، وحرامية البلد، ولصوص المساء والسهرة.. بعدين نروح للتنمية!..
تقوله طيب كاهو هذا واحد فاسد من عينه، مشاريع مشبوهة ومناقصات دايخة، ليش ما تحاربونه، يقولك لا ما يجوز هذا من كتلتنا وهذي اشاعات مغرضة من الحكومة!
تقوله: هذا مو نائب وطني هذا خالف القانون لازم يعاقب، ما يجوز نصفق للي يخالف القانون.
يقولك: لا هذا سجين رأي والحرية للجميع، ولازم نعبر عن رأينا بصراحة، ولازم نمارس الديمقراطية!
تقوله: يا الحبيب خلني اقول رأيي اللي يعارض رأيك لانه عندك اخطاء كثيرة!
يرد عليك لا هذا مو رأي، هذا تصيد، وانت انبطاحي انسداحي وانت عميل الموساد والصهيونية والامبريالية!
تقوله اي صهيوني انا كويتي، يقولك الولاء مو بالاوراق، الولاء بالقلب!
يعني كلش كلش ما تصيد عليه لاحق ولا باطل، بكل سالفة وقصة عنده رأي، ورأي يخالفه المهم مصلحته واحدة! يعني صج صج اذا قلنا عنه جابولاني مانبالغ!
إقرأ المزيد...

مو.. رشيدة

21/6/2010
لي قبل جم يوم وأنا شاد ظهري بالحكومة وأسميها «حكومتنا الرشيدة» لكن بعد اللي شفته وصار ودريت عنه من اليوم ورايح بسميها حكومتنا اللي مو.. رشيدة.. تدرون ليش؟ أنا أعلمكم السالفة.. حتة إرهابي مدان بقضايا أمنية وعليه شبهات فزع له واحد من النواب، فوقفت الحكومة على صبع واحد.. اللي شال موبايله ودق يستفسر واللي شال شليله وركض يتأكد.. والوزراء الله خير كلن صار بلبل صادح.. تصريحات غير شكل.. وتلميحات يمين ويسار، وكأن الإرهابي المنحاش بطل الأبطال ومحقق النصر العظيم.. صج صج حكومتنا مو رشيدة ولا عندها سالفة وحركتها بهالموضوع ما تنبلع مولية حتى لوشربنا وراها مليون برميل ماي لقاح.. عيل بذمتكم واحد قاتل ويهدد الأمن وخرب علاقاتنا بالعالم ونوقف معاه هالموقف الفاشل؟ وعيالنا اللي ينطقون بالأردن وينهانون بلندن محد درا عنهم؟ وليش نروح حق اللي برة والكويتي بديرته ماكل هوا ديون وقروض وضبط وإحضار والحكومة بسابع نومة؟ ما جذب الصرعاوي لما قال حكومة فاتحة ريولها حق النواب اللي يصرخون عليها.. وما جذب الراشد لما قال ان المعارضة اليديدة تستبيح الكويت باسم الديمقراطية.. مو باجي إلا البلدية تدق وتقول لا تحاتون ترى المطبة اللي يم بيت الإرهابي شلناها علشان إذا بغى يفجر ما يتعطل.. ويدق وزير ويقول أبشركم طرشت ذخيرة حية حق الإرهابي علشان يقوم بشغله على أكمل وجه.. وينط وزير المالية ويقول لا تحاتون معاشاته ومكافآته بصرفها له بأثر رجعي.. ويطامر وزير الشؤون ويطق صدره ويقول ما تغلبوني يا زملائي الوزراء أنا بصرف له إعانة بدل إرهاب وذبح بخلق الله.. ويقوم وزير الخارجية ويعطيه جواز دبلوماسي وبعدها يزعل وزير الداخلية ويقول ما خليتوا لي شي يا وزراء .. بعطيه دورية علشان محد يوقفه واهوا بطريجه للإرهاب.. حسافة يا كويت يصير فيج جذيه.. وحسافة على النواب الأبطال اللي لعبوا دور في الوقوف مع الحكومة هذا قدرهم كموالين ولله دركم يا هايف والبراك آمروا تدللوا ترى هذي فرصتكم..

• كلمة راس
قالها الشيخ الراحل جابر العلي.. حكوماتنا تنقش الردي وتقربه وتخلي الرجل وصاحب المواقف بعيد عنها.. وأنا أحذر اليوم وأقول اذا استمر هالحال مع اللي يصرخون واليهالو رح تشوف الحكومة إن اللي كارمتهم رح يكونون أول الناس ضدها.. والسبب إنها مو.. رشيدة.
إقرأ المزيد...

نواب.. شباب.. يا حليلكم

17/6/2010
يا حلاتهم هالأولاد استبشرنا فيهم خير وقلنا يمكن المجلس اذا صاروا فيه شباب تتجدد الدماء وتنطلق الحياة فيه بتشريعات تخدم الشباب الكويتي اللي يشكل أكثر من ستين بالامية من الشعب الكويتي.. وبالفعل أحد النواب الشباب بدأ مشواره بتصريحات خلتنا نصدق ان الكويت بسنة الفين واثنعش تقدر تبني مركبة فضائية نروح من خلالها المريخ نبني دواوين ما يقدر يهدمها قانون البدر والخترش.. وبعدها بجم شهر اكتشفنا انه ياي يلعب سياسة بطريقة فاول دشداشة فغسلنا إيدنا منه وقلنا حق روحنا اللي ما يرضى بالجزة يرضى بجزة وخروف.. لكنه من أول يوم قدم ثلاث اقتراحات.. الأول عن الشاليهات.. والثاني عن الطب العربي.. أما ثالث اقتراح فكان عن قوانين طلعتنا جدام العالم بصورة سيئة.. بعد كل البنيان اللي بناه الشهيد فهد الأحمد للكويت من مناصب خارجية صار وضع الكويت مو ذاك الزود.. هذي عينة من سوالف النواب الشباب الله يصلحهم.. وبالفعل مشت الأمور لين عزموا على استجواب رئيس الوزراء على خلفية قضية الرياضة وتطبيق القوانين الداثرة.. بس الغريب انهم ذبحونا تصريحات وخبونا بالكلام وما ميش فعل.. واحد منهم قاعد يصرح ويقول زميلي مو مسؤول عني.. مادري ليش طرا على بالي وتذكرت عيال الفريج قبل لما يتناجرون على شغلة.. نواب وتشريع ورقابة وهالله هالله وتاليكم نجرة؟ باباتي اذا فيكم استجواب قدموه وخلكم قد كلمتكم.. واذا بطونكم خالية لا تزعجونا بغازاتكم السامة اللي تطلع على شكل تصريحات تدل على صغر عقولكم وعدم إدراكّم للعمل السياسي.. ترا بوشيخة شاري لكم سباحات حق الصيف علشان لا تغرقون.. يا حليلكم..

• كلمة راس
عزيزي القارئ شرايك باللي يخالف ولي الأمر وتوجيهاته؟ شرايك باللي يلجأ للكبار وبعدين يحرجهم وما يلتزم بكلمته.. شرايك باللي مسوي روحه طرزان واهو يخاف من القطو وشرايك باللي مسوي روحه سندباد واهو مرتين غرقان ببنيدر؟ يهال صح.

إقرأ المزيد...

شيخ الشيوخ

16/6/2010
صبحك الله بالخير طويل العمر.. كيف أصبحت.. عسى الله يحرسك ويوفقك.. يايك اليوم يا بوناصر ومعاي شكر وتقدير واعتزاز من أهل الكويت.. وتحديدا أهل الرياضة.. كلهم طال عمرك يسلمون عليك ويقولون لك.. سامحنا يا بوناصر خذنا وقتك وأشغلناك بقضية الرياضة.. لكن يا طويل العمر من لنا غيرك بعد الله سبحانه يفك همنا ويرد لنا حقنا.. طال عمرك أهل الرياضة من لاعبين واداريين وفنيين وجماهير حملوني لك رسالة يقولون فيها.. لا خلا ولا عدم يا شيخ الشيوخ.. حنا بدونك في مثل هذي المواقف الله يعلم بحالنا.. طال عمرك.. وعندي لك رسالة خاصة من أهل الرياضة.. يقولون في رسالتهم لك.. طقينا كل الأبواب ويشهد الله ان رجالك ما قصروا وحاولوا وحطوا كل جهودهم.. ولد اخوك محمد الله يرحمه، الشيخ ناصر فتح قلبه قبل بابه وحاول باللي الله قدره عليه.. وولد اخوك الشهيد فهد الشيخ أحمد صدره اتسع للكل وبذل كل جهده وما قصر.. وفي رجال طال عمرك ينحطون على اليمين ما رضوا أذكر لك اساميهم.. فيهم التاجر وفيهم الكاتب وفيهم الإعلامي وفيهم السياسي.. يشهد الله علي لعبوا دور كبير في حل رموز القضية.. كلهم اليوم طال عمرك حطوا أمرهم بيدك.. تدري ليش؟ لأنهم وصلوا لتحليل واحد واتفقوا عليه رغم اختلافهم في القضية الرياضية.. اي نعم اتفقوا ان حل المسأله بيد شيخ الشيوخ.. اللي جمع رؤساء عرب وصالحهم.. اللي تدخل بين الإخوان وحل قضاياهم.. اللي قدر يحشد المجتمع الدولي لقضية بلده.. اللي باتصال واحد منه لأي رئيس عربي تنحل المشكلة.. اللي حتى خصومه السياسيين ذيج الفترة شهدوا له .. عرفت الحين طال عمرك ليش أنا ياي اشكرك؟ انت أبونا وانت أخونا وانت خالنا وانت عمنا واحنا بدون رايك ولا شي.. انت بنيت مجد الكويت فكافأك ربي بمجد الكل يحسدك عليه عسى الله يحرسك من العين.. ديرتك حلوة.. شعبك طيب.. الأمور بخير.. ماكو إلا العافية.. واللي قاعد يصير في البرلمان وغيره سياسة انت أخبر واحد فيها وتعرفها طال عمرك.. مشكور يا شيخ الشيوخ.. حطيت ايدك بالقضية وطمنتنا.. وكلنا عيالك واللي تامر فيه تم..

• كلمة راس
هذي نكتة بنقلها لكم بتصرف واهيا نكتة مالكها الأصلي سيد عدنان عبدالصمد.. ثلاث أشخاص دشوا الأهرامات وضاعو.. طلع لهم رمسيس وسأل الأول انت شنو قال أنا فرنسي سأله شلون فرنسا قال له خوش شي مصانع وعطورات وموضة.. سأل الثاني وانت قال أنا أميركي قال له وانتو شعندكم.. قال له الأميركي إحنا أسياد العالم وعندنا كل شي.. سأل الاخير قال له.. انت شتطلع.. قال له أنا كويتي.. فقال له رمسيس (لي الحين مجلسكم دايخ)؟
إقرأ المزيد...

حلم والله حلم

15/6/2010
عبدالحسين عبدالرضا وسعد الفرج في مسرحية «على هامان يافرعون» قدموا مشهد ما ممكن ننساه ابدا.. واللي كان فيه بوعدنان حلمان بريغن وكارتر بسوق المسج.. وكان سعد الفرج يقول له ما يصير وبوعدنان يرد عليه حلم يبا والله حلم.. انا البارح كثرت من اكل الحلو اللي مسويته ام شيخة .. بس مدحت طباخها وقلت لها خوش حلو مع انه مالح.. المهم.. نمت وحلمت بأبو نفيسة لابس ملابس غريبة عجيبة بألوان زاهية وعلى راسه عمامة لونها برتقالي.. فسألته وقلت له عسى ما شر شفيك لابس جذيه.. رد علي وقال لي.. بالحلم طبعا.. يا بوشيخة انا ريال ضيعت عمري وصكيت السبعين ولي الحين ماني قادر اركد على توجه.. فقررت اكون من جماعة الدالاي لاما لانهم خوش ناس.. فبادرته وقلت له.. بالحلم طبعا.. بس هذولا مو مسلمين وانت مسلم.. فرد علي وقالي واهو يبتسم.. اسلام ايه يابوشيخة اللي انت جاي اتئول عليه.. انا كنت مع الاخوان وما حصلت شي.. رحت حق السلف طقني الفقر.. جربت الليبرالية يابت لي الهانق اووفر.. حاولت اتلزق بالشيعة وكشفوني.. تالي قلت خل اصير مفكر واستراتيجي مع شوية جمبزة.. وعشت على أفا الجزيرة وكل يوم مقابلة لين الناس ملت من ويهي وطلعت فشوش.. هني وانا وياه بالحلم لمحت بايده اليسار موبايل... فقلت الله انت شلون شايل موبايل صانعينه الكفرة الغربيين؟ فعصب وقال لي.. بالحلم طبعا.. محد كافر وسافر غيركم ياعرب.. احنا الغربيين خوش ناس! طقتني البوهة واستغربت منه قلت له انت توك تذمهم.. قال لي وهو يبتسم انا يسموني بو ثلاث ورقات وابشرك يابوشيخة راح انزل شريط مع شعبان عبدالرحمن لاني مليت من نفسي.. وعيت من الحلم واستغفرت ربي واتصلت على واحد يعرف أبو نفيسة عدل.. وسألته شفيه منثول؟ فقال لي لا تلومه ياخوك اهله مقاطعينه لانه في اخر الثمانينات باق حلالهم باسم الدين وبعدين ربعه ما يواطنونه لانه قلابي وكل يوم له ملة.. والحين انكشف فأكيد راح يستخف ويقول كلام محد يفهمه الا الاطرم او الاهبل.

• كلمة راس
يا زرزور الجريدة الزرقا.. أهلك محترمين ونحنا نحترمهم.. وندري انهم مو راضين على اللي قاعد تسويه.. فالزم حدّك.. ترى اللي اكبر منك لما ما احترم نفسه دسنا على راسه ورديناه لحجمه الطبيعي.. وأنت مجرد زرزور ما تستحمل ملفات «الخاتم» والبنت الشقرا وغسيل حمام المعزّب ووظيفة الـ200 دينار وغيرهم كثير.. وهذه رسالة نهائية حتى ما تيينا باجر وانت تبجي على حالك وعلى أهلك وعلى جريدتك ؟.. وسلملي على فهود علي واقولك سكر ازرارك يا أهبل.. ما باقي الا الزرازير.
إقرأ المزيد...

استجواب غير رياضي

13/6/2010
لما النائب يسوي قوانين دايخة ممكن نعديها له ونقول ما يفهم وقاعد يتعلم التحسونة بروس القرعان.. لما النائب يصارخ بمايكروفون وبدون مايكروفون ممكن نحطها تحت بند انه قاعد يحاول يضبط صوته حسب القضية وحسب الجمهور.. لما النائب يزدري فئة أو طائفة من أهل الكويت ويلغيهم من خطابه ويطرح طرح فتنة يمزقنا ممكن نعذره لمحدودية فكره وضيق أفقه وضلالة رأيه.. لما النائب يصوت ضد المرأة بالمجلس ويوم الانتخابات يطلب من المرأة تصوت له ممكن نبلعها ونقول حق روحنا هذا جمبازي ويبي يعيش.. لما النائب يبجي ودموعه تصب أربع أربع بزنزانة رقم 6 وبعدين يصير أسد على العالم بالمجلس عادي.. نعديها له ونقول كان بودميعة وصار نائب.. لما النائب يتهم ربعه بالانبطاحيين وما يحترم رأي الأغلبية نقول يمكن كثر ما انبطح أيام رئاسة نسيبه قام يشوف الكل بعين طبعه.. لما نشوف نائب ما عنده شغلة غير مناصبة العداء حق شيوخ محددين على طول نتذكر سالفة الطفاية اللي بالمنصة ونقول معذور.. لكن لما يصرّ بعض النواب انهم يتقصدوا حفيد أحمد الجابر طيب الله ثراه، ويبون يصعدونه المنصة بأداة دستورية مفرغة من محتواها.. هني نستغرب لأن هذولا النواب ربطوا الاستجواب بحكم قضائي! وهذي أم المصايب ولوية اللويات.. عيب يا نواب تعلموا ان المادة خمسين من الدستور ما تعطيكم الحق في القفز على السلطات.. ولازم تعرفوا.. ان الأيام دول، ولولا عطايا آل الصباح جان اليوم كثيرين منكم عند الشيخ خزعل مجابل النخل.. عيب يا يبا عيب..

• كلمة راس
نائب تعود على ممارسة ألاعيبه بالخفا وإعلان الحرب بالوكالة.. ذاك الصوب ترجى وقال فكوني، ومن هالصوب حرك الباقين ضد الرئيس.. ترى هذي مو سياسة.. هذي لعبة قمار سياسية.
إقرأ المزيد...

الغرفة.. أخطر

10/6/2010
في كل العالم ومن العصر الحجري انعرف الانسان بانصياعه التام للقانون برقابة ذاتية ووازع ايماني بمختلف الديانات الا بالكويت صار تجاوز القانون والبلطجة اهو السائد.. ادلة كثيرة وصور شكبرها لهذا التجاوز الدنيء للقانون تحت غطاء اجتماعي سيئ او تحت نفوذ مؤقت.. احسبها معاي يا قارئ.. جم نائب انتهك القانون ومحد قدر يقول له تلت التلاتة كم؟.. جم نائب عارض قرارات ظلم فيها ناس ابرياء مالهم اي ذنب ولا قدر احد يوقفه عند حده..؟ جم مواطن اعتدى بكل صفاقة على املاك الدولة واخذ شي مو له ولا احد قادر يقول له حدك..؟ والمشكلة الكبيرة والطامة العظيمة لما يعتدي أحد التجار على املاك الدولة بشكل صارخ ويمارس الجباية على جيوب أهل المهن الصغيرة بواسطة غرفة.. ولا أحد قادر يردعها لا مجلس ولا حكومة ولا شعب؟.. ما تقولون لي شلون بتكون الامور بالنسبة للمواطن البسيط؟.. شلون تبون العالم تحترم القانون وتطبقه والغرفة منذ التأسيس لاعبة شوردلي وقابضة فلوس الناس ومحتكرة الوكالات وعلى عينك يا قانون..؟! من يلوم الفقير اذا بناله كيربي جدام بيته؟ من يلوم المطلقة اذا خذت بيت بصليبية وسوت لها غرفة حق السايق؟ من يلوم اللي انلعن خيره بسبب الغرفة.. ما تقولون لي يا تكتل يا شعبي وينكم عن هالحيتان اللي دمرت الكويت باسم التجارة.. شنو يسندهم من قانون.. وشنو حجتهم بعد خمسين سنة من نهب جيوب الفقارى.. ؟ انا هني اخاطب وجدان نواب الامة اللي تناسوا هالبوقة التاريخية وتركوها؟ودي اعرف ليش؟ هل الغرفة تخرعونكم؟هل انتو مستفيدين؟ وينكم عن هالبوقة وهالممارسات الشاذة.. ولكن اذا انتوا بتسكتون ترى الناس ما راح تسكت وراح تكون لها كلمة..

• كلمة راس
الغرفة تدعم لان فيها بيزات خلق الله اهل الكويت.. اي نعم تدعم مرشحين وتشتري ذمم حسب القرار اللي تبيه.. بس الشرهة مو على أعضاءها.. الشرهة على اللي ساكت عنهم من النواب والحكومة.. تبون الصج الغرفة اخطر على الوحدة الوطنية من
بو جنسيتين..
إقرأ المزيد...

خطتهم «تثت»

9/6/2010
مادري ليش تذكرت سالفة الرقاصة المصرية فيفي عبده لما رفضت ترقص بعرس ابن أحد الفنانين واعترضت بأن الصالة ما تشيل الا 300 نفر.. واهيا على قولتها متعودة تهز وتردح جدام 1000 شخص على الأقل.. تذكرت هالسالفة لما البعض انسحب واسقط الاستجواب لائحيا بسبب لجوء الحكومة الى استخدام حقها الدستوري بتحويل الجلسة الى سرية.. وأعتقد ان الانسحاب أمس كان واضحا جدا ولا يبيله اي تعليق.. كان المطلوب الإساءة الى شخص سمو الرئيس، وأكبر دليل الإلحاح على علنية الجلسة.. والا وين آلام المواطن اللي شلخونا فيها؟.. ووين المهم في الاستجواب اذا كانت الاهمية بالعلن مو بالسر؟ شهالمنطق الأهوج.. أما كلام الغير اللي قالوا ان السرية تفريغ للدستور فأنا احط صبعي بعيونهم واقول لهم استجواباتكم السبعة اللي فاتت مو تفريغ للدستور من محتواه الا تمزيقه.. عجب عجاب على قولة الامير عبدالرحمن بن مساعد.. عجب عجاب ما تأدي فروضها وتلبس حجاب.. عجب عجاب الادعاء بالحفاظ على الدستور والانسحاب لأن رأي الأغلبيه ساد.. عجب عجاب التصويت قبل سنوات على السرية واليوم يشوفونها تفريغ.. عجب عجاب.. شغلونا بأم الهيمان وأهلها وطلع كل همهم خصومتهم مع الرئيس.. ولا أعجب ولا أغرب من كل هذا القول بأن وسائل الاعلام لم تكن حيادية.. بسألكم.. هل الوسائل اللي دعمت قضيتكم الدائرة كانت حيادية؟ اليوم فيه سقوط في وحل الشخصنة وبانت النوايا المؤزمة والشارع عرف الجميع زين.. تنمية وإصلاح بوربع.. وتكتل وايد عليه سوق الجمعة.. وتكتل راهن على حصان خاسر.. انا لو منهم البس برقع وأداوم باجر بالمجلس.. لأنهم نو وييييييييه سيستقيلون.. سليحط..

• كلمة راس
كلمة شكر وثناء وتقدير للأغلبية النيابية العاقلة لأنها تصدت للعبث وكشفت نوايا المستجوبين ومؤيدينهم.. انتو أمان الكويت وانتو مستقبلها السياسي وننتظر منكم الانجاز.. واللي يبمبع من كتّابهم حذفو له قشر رقي..
إقرأ المزيد...

عباس يحكي ونائب يسمع

8/6/2010
من الأمور الغريبة العجيبة اللي تخلي راسك كمواطن يفتر ويسوي خمسات.. وتعشق البندول أهوا انصياع (حلوة انصياع) بعض النواب خلف ثلاثة اشخاص.. الأول تارس مخباته علج بوطقه مع شوية كروت صفر وحمر ويرفعهم بويوه العالم ويهدد على الفاضي والمليان يالله من فضلك.. والثاني ملك الهلاقة في الشكل والمضمون والقلم.. كان طرار وصار مع اللي صاروا من أصحاب الرأي المعتوه.. أما الثالث فما يقل عن الأول طفاقة ولا عن الثاني ثواله.. اسمه عباسوه.. وبفعل عوامل التعرية النيابية صار يقود تكتل داخل المجلس وله صولات بالندوات وكلام محد يفهمه أبد.. بذمتكم لما مثل هالنماين تقود نواب لهم وزن ونجحوا بأرقام كبيرة ما يطقكم عقر بقر وتشوتكم البوهة وتتساءلون شصاير؟ البعض يسميها فوضى خلاقة وأنا أقول انها مرض نقدر نسميه (ماكو عقل) والبعض يسميها ترسبات الحراك السياسي.. وأنا أرد عليه وأقول له.. فكنا يا عمي أي حراك أي بطيخ اللي يفرز لنا هالنماذج الداجة اللايثة الله يخليك.. والبعض الآخر يقول انها عوامل ظهرت ككلفة لانتقال السلطة وهذا أرد عليه واقول له استرييييييييييح.. أي انتقال سلطة واحنا محكومين بإرادتنا من أطيب عائلة على وجه الأرض؟ أنا أعتقد ان مثل هالثلاثة اراجوزات وجودهم ضروري بالحياة النيابية اللي صارت ماصخة ومالها معنى.. والدليل شوفوا قبل النواب وعقلانيتهم واللي وراهم بتشوفون ناس ذباحة فكريا وعندها فكر.. أما اليوم فهذولا صار وجودهم ضروري بسبب وجود نواب على شاكلتهم.. تبون الصج احترت.. شلون نائب يسلم لحيته لواحد من هالثلاثة وأهوا يدري انهم محدودين.. إحنا بزمن العجايب.. وعلى قولة أهل بيروت مجنون يحكي وعاقل يسمع..

• كلمة راس
التراشق.. (حلوة التراشق).. النيابي اللي صاير بين النواب يكشف لنا شلون الأمور صايرة بالغرف المغلقة.. والا بذمتكم نواب طقوا إصبع باستجواب المسلم اليوم لابسين أسود ويلطمون باستجواب الطاحوس؟ صج زمن العجايب.
إقرأ المزيد...

أفلام الإعلام

7/6/2010
قاعد بأمان الله في الصالة وبيدي الريموت كنترول أتنقل بين القنوات الفضائية.. وفجأة طاحت عيني على قناة حاطة فيلم وثائقي عن الكويت.. قلت أشوفه وانادي شيوخة تشوفه معاي وتعرف تاريخ ديرتها.. وبالفعل كان فيلم مو طبيعي صور الكويت من العشرينات مرورا بالخمسينات انتهاء بالألفية اليديدة.. التفت حق شيوخة والا بعينها ستة وخمسين سؤالا وثلاثمية وستعش استفسار.. قلت حق روحي وليييه شهالوهقة.. تعال الحين جاوبها وحلل لها كل شي.. بنتي وأعرفها فيها فضول أهل الصين.. وبلاغة شف أهل بومبي.. وبالفعل بلشت المزيونة شيوخة وقالت لي.. يبا شنو قصدهم بالفيلم الوثائقي لما قالوا.. (وقد كان التجار يمدون النظام بالمعونة).. هني تعومست وفكرت وقررت أكون صريح معاها.. قلت لها يا بنيتي هذا حجي معضرط واللي كاتبه ومسويه فيلم ثور الله ببرسيمه.. التجار لوما الله وبن صباح ما يمعوا بيزاتهم.. جان تبادرني وتقول لي.. انزين يا بوشيخة الحكيم.. ليش المذيع قال في الفيلم.. (جرت الانتخابات المزورة فانسحب النواب).. قلت لها يا بوج الفيلم فيلم لا تصدقين كل شي، الحكومة لو تبي تزور الانتخابات جان بودميعة وراعي الدياي وضمير الجبرة ما نجحوا.. نزرتها وقلت لها شيخووو ويهد قومي سوي لي حليبة وهاتي لي بخصم ودقي على أمج قولي لها ترد من بيت خالج.. ماصارت أخو هذا اللي مجابلته أكثر مني.. من زين أخوها عاد ثلاث أرباع ويهه حواجب والباجي خشم.. ويوم شيوخة راحت تزهب لي الحليبة.. دشيت عالرسيفر وحذفت القناة.. وقلت حق روحي.. بالله ما تقولون لي من اللي كاتب هالتاريخ.. وين وزارة الإعلام عنهم، والا بس شاطرين رفع قضايا على القنوات الكويتيه؟ هذا تاريخنا وما يجوز ينكتب بصورة مشوهة.. يا جماعة الكويت من قامت واهيا بلد تكافل بين الحاكم والمحكوم.. ولا عمر التجار تصرفوا بشي الا وفق نظرة الحاكم.. وبعدين وين الدليل على ان المجلس مزور؟ هل في أدلة وبراهين والا بس حجي ناس دايخة ما تدري وين الله حاطها.. هذا عيب ويا وزارة الإعلام شوفوا شغلكم هذا تاريخ دولة مو لعب يهال..

• كلمة راس
تخيلوا بعد خمسين سنة يطلع لنا فيلم وثائقي يقول «وقد كان النواب انبطاحيون فتم حل المجلس».. أو لقطة ثانية تقول.. «أما بودميعة فقد كان بطلا في التلوث فحاز التصفيق».. بذمتكم هذا عاد يصير.. اصحى يا نايم تكفى اصحى لا تحدني أصحيك..
إقرأ المزيد...

«بامبرز» نيابي

6/6/2010
هذه العبارة للي يلبسون حفاظات من السياسيين من باب صغر سنهم ودخولهم بأشياء وايد أكبر منهم.. وأنا شفت أن من الملائم استخدام هذا الوصف على بعض نواب مجلس الأمة من اللي لحقوا على الحفاظات ولبسوها.. بالفعل عندنا بالمجلس نواب ما يرتقون للمرجلة بشيء والدليل مواقفهم..عندنا نواب بالمجلس عيال أمس عاشوا الدور ويبون يرفعون راسهم ويحطونه براس عمامهم بكل أنفة وغرور.. الظاهر انهم نسوا روحهم.. ونسوا ان في رجال بالمجلس والحكومة عندهم خبرة تعادل أعمار نواب البامبرز مرتين ونص.. بس شنسوي بزمن أغبر خلا اليهالو يحكمون وفقا للدستور وتحديدا المادة 110 اللي تخلي النائب بو حفاظة يقول اللي يبي ويخيسنا واحنا ما بيدنا شي موليه.. بس صدقوني يا نواب البامبرز. ريحتكم فاحت والناس كشفتكم وعرفت انكم يهال ومالكم كلمة.. أحد النواب سواكم لعبة وشخشيخة يوديكم يسار يمين.. أما الشارع اللي نجحكم ورزكم فيا ويلكم منه يا سواد ليلكم.. ما راح تشوفون منه الا التف والسف.. صج لي قالوا لي بغيت تفضح الريال عرض له مرة ولي بغيت تفضح المرة عرض لها ياهل.. واللي يمشي مع العيال ما يخلاش من الكراريس.. والنائب بالي بالكم راح يتفاجأ باليهال وكسراتهم.. واليهال راح يتفاجأون بالتسريبات اللي بتطلع من حفاظاتهم يوم الاستجواب.. هذا إذا صار استجوابهم الماصخ.. هزلت شوية يهالو ما عارفين وين الله قاطهم..

• كلمة راس
قدرك يا سمو الرئيس ان تكون في زمن الأطفال السياسيين.. وقدرهم يا بوصباح سيكون رهنا على إسفافهم الواضح اللي راح يرجعهم للناخب ليقول كلمة الفصل فيهم.. وعلى قولة أحدهم الطيران المنخفض مطلوب..
إقرأ المزيد...

نائب بخمسين ألف وجه

3/6/2010
ما احب اتبلى على احد، ولا اقول شي ما صار، ما سمعتوا ولا تبين لكم في يوم من الايام ان بوشيخة نصاب وكذاب وكلكجي، ولمن اقول ان بعض نوابنا عندهم خمسين الف وجه انا صادق في كلامي، الحين راقبوا النواب عدل، طبعا لا تراقبون شنو يقولون، وتصفقون، لا اقرأوا بين السطور، وبعدين شوفوا شنو يسوون!
تدرون ليش؟ لانه هالايام راح تبلش الخصخصة وقوانين الخصخصة، وطبعا راح تشوفون بام عيونكم وبدون ما اقول اني اكثر واحد يسب الخصخصة، «ولن ابيع بلدي، ولن افرط بوطني، والخصخصة لن تمر الا على جسدي، وهذي بوق وحرمنة..» راح تشوفوه من «فجر الله» اول واحد في طابور الخصخصة ويبي يستفيد من الخصخصة.. طبعا اذا سالته ليش انت رايح مخصخص حالك وانت ضد الخصخصة؟ راح يجاوبك بعد تفكير، وبعد ان تنزل الدموع من عيونه، وبعد ان تنزل الدماء من لثته، وبعد فاصل من الصراخ على قدر الالم، وبعد ان يعدل غترته ثلاث مرات.. يقول: شوف انا شاركت في الخصخصة وساهمت، وبصير عضو مجلس ادارة، علشان اراقب الخصخصة من الداخل، وعلشان اضمن ما يصير سرقة لاموال الشعب، وعلشان اصيد اللي يسرقون المال العام، وعلشان ادافع عن مصالح الشعب.. وبعدين نحط اغنية وطنية ونرقص!
نوابنا المعارضين راح تشوفونهم اول ناس ركضة للخصخصة، حتى لو بيخصخصون خياط باكستاني، مو بعد وزارات، بعض النواب قول فعل، بس الفعل عكس القول، الكلام سهل، وبلاش، ورخيص، ومافي احد يحاسب على الكلام في هالبلد.. نوابنا يتكلمون ويسولفون عن كل شي.. يسمعون الناس اللي يحبونه، ويسوون اللي يبونه!
إقرأ المزيد...

قرصة إذن

2/6/2010
• وأنا قاعد أتصفح الجريدة شفت مقالة لأحد الكتاب في الجريدة قاعد يصنف الصحف على شكل منتخبات، طبعا الكاتب يمدح الجريدة «يبي معاشه ولا اشلون يدفع حق بنيد القار» ويمدح الجريدة والتلفزيون اللي قاعد يحاول وميّت إنه يرد لهم بس طبعا الجماعة طناش. المهم قلت خلني أفتح الجريدة ما ادري ليش تذكرت المنتخب الهندي لكرة القدم بتقولون اشمعنى أقولكم ليش؟ لأن المنتخب الهندي مصدق نفسه عباله انه فريق صج يسوي معسكرات ليباري الفرق الثانية مباريات تجريبية وكله مغلوب بالخمسة والستة والأهم ان عندهم لاعب مصدق نفسه وداهن راسه بدهن بريك وعباله انه نجم وحلو وان راسه براس ميسي.. ما أقول إلا مالت على البامية.
• البريعصي يقول حق واحد من ربعه اشمعنى أنا اللي حاطين علي صج إن أنا حيوان وصج إني حيوان شايف نفسي وصج إني حيوان غبي وصج إني حيوان مرتشي وإن أبوي رباني بحظيرة بس هذا كله مو سبب إني أتمسخر بهالطريقة.. أبو شيخة يقول: بصراحة أفحمتني!
• نكتة: البريعصي هالأيام هب هبة جديدة يروح مصر يبي يصير «بيه» ويستخف دمه على الإخوان المصريين، وهناك واحد من اللي بيخدمونه كل ما يبي شي يقوله إحنا خدامين الجزمة، وهو مستانس، ويقول شوف هالمصريين يخافون مني.. أبوشيخة يسألك: مو فهمت إنك الجزمة اللي قاعدين يخدمونها؟

• كلمة راس
شفت اشلون انمسح فيك انت وأبوك الأرض عشان تعرف قدرك وانك تافه وهذي بس قرصة إذن لا أكثر ولا أقل تعلم منها الله يستر عليك.
إقرأ المزيد...

صليبخات .. الضاحية .. الروضة

1/6/2010
من العجايب الستين اللي شفناها وراح نشوفها في الديرة..ومن خلال مسؤولين في بعض مرافق الدولة حرام تحطهم حراس بمخيم.. عاشت الكويت قبل امس حالة من الضحك الجماعي اللي حاشت اغلب المواطنين اللي يسكنون بمنطقة الصليبخات..والضاحية..والروضة..شلون؟ تعالوا معاي اضحككم وابجيكم بنفس الوقت..موظف عام في الدولة بمنصب نائب مدير عام..ساكن بمنطقة الصليبخات..طلع بسيارته على شارع بوظبي بامتداد البحر وكمل سيده لين وصل شارع جمال عبدالناصر..ومن هناك لف على شارع الحب وطق بريكات ورن موبايله وكان يكلم نائب.. النائب قال حق الموظف بسرعة تعال لي علشان نضبط المسألة واعلمك شتسوي .. وبالفعل النائب بعد تقاطع الشامية وكيفان طاف الجسر ودش الضاحية وصفط عند المسيد لين وصل النائب بعد ما صلى صلاة الخوف..وقال حق الموظف..هاك هالاوراق وسو نفسك ان عندك وثائق وروح المخفر واشتك وانا بطرش لك جم واحد يسوون لك هليلة وزيطة وزمبليطة علشان تكمل الدور اللي رسمته لك..الموظف ما صدق وقال تم ودق سلف ودش بين الفيحا والنزهة واخذ من الجسر يسار ووصل منطقة الروضة..شال بيده الاوراق ودش المخفر وقال حق الضابط..يسلم عليك النائب ويقول لك سو لنا قضية بالشيخ اللي سوا مثل ما سوا ولد السلطان لما راح ينقذ بنت السلطان..ورفس الباب جنه مارد من نار وكسر باب الاتحاد ودش ونبي نطلعه بالقضية...الضابط حول الموظف الى المحقق..جان يقوم المحقق مثل ما قام الوالي بمسرحية على هامان يا فرعون وبصق في وجه ابا الحصاني..طبعا بصق مو صج..بصق من باب النص المسرحي..لكن المحقق قام وقال حق الموظف..روح حق النائب مالك وقول له المحقق يسلم عليك ويقول لك.. هذي اول مره اشوف موظف حكومة رايح حق الحكومة يبي يشتكي على مواطن....شفتو شلون الديرة فيلم هندي والموظف والنائب ابطاله؟ والله فشله وبالاخير محد عطاه وي وهد الموظف بجم صحافي يبي يسوي مؤتمر صحفي..وبالتالي الصحفيين عرفوا ان ماكو عشا هدووه وراحو.. خوش نائب وخوش مدير..

• كلمة راس
زعم الفرزدق ان سيقتل مربعا... ابشر بطولة سلامة يا مربع
وعلى قولة المثل..جلوح ملوح اللي يدل بيته يروح..ومثل ما وصل الروضة رجع الضاحية اخذ له زفة ورجع نام بصليبخات..
إقرأ المزيد...

احتلال البريعصي

31/5/2010
قاعد بأمان الله العصاري مع أم شيخة أشرب بيالة جاي مزعفر ومهيل.. مع شوية كيك بوسفينة.. دش علينا خال شيخة يركض ويناهت ويتنفس بسرعة الضوء.. سألناه شفيك عسى ما شر.. قال عطوني قلاص ماي.. عطيناه ماي شرب وتالي أخذ نفس عميق وقال لنا.. بيعوا بيتكم ويمعوا بيزاتكم وزهبوا جوازاتكم.. قلت له علامك شصاير؟ قال لي إلحق ما تلحق.. صرخت عليه وقلت له ياخوي شفيك هل إيران طقونا بالنووي؟ قال لأ.. قالت له أم شيخة.. شصاير هل فاض البحر وغرقت الديرة؟.. قال لأ.. نطت شيوخة وسألت خالها .. خالي شصاير.. قالها ما راح تفهمين حتى لو قلت لج.. هني قمت وشلت سيفي البتار وحطيته على راس خال شيوخة.. قلت له الله عطاك دقيقتين يا تفهمنا شصاير يا أذبحك.. نطق عقب التهديد وقال لي.. البريعصي اللي يكتب بعصعصه وجه نداء لاحتلال الكويت.. وقاعد يحرض العالم علينا وأنا خايف عليكم فقلت أمركم وأحذركم.. هني فجيت وزاري وانسدحت على المطرح وقمت أضحك من قمة راسي.. وأم شيخة قالت حق اخوها سالفتك خوش سالفة بس عن الصج حالفة.. وشيوخة خزت خالها خزة ودشت دارها.. نط الخال وقال من صجكم انتو ما تعرفون البريعصي اللي يكتب بعصعصه إذا قال شي يصير ثاني يوم لأنه قلم مؤثر وأوباما يقراله.. تعدلت ورديت ربطت وزاري وقلت حق خال شيوخة.. انت الظاهر ما تعرف قصة البريعصي.. هذا يا خال العيال تيش بريش مثل الحصالة حط فيه بيزات يكتب لك عن أي شي وكل شي.. مرة كتب عن المتفجرات ومرة كتب عن الأزمة المالية ومرة كتب يمدح بومرزوق وبوأحمد علشان يردونه.. وفي فترة كان يسب الصقر والحين يمدحه ويقول انه الرجل الوطني الوحيد بالديرة.. أما سالفة مقالته مالت غزو الكويت واحتلاله فأبشرك.. البريعصي بالغزو خذاه أبوه اليمني وراحوا عدن ولما تحررت الكويت رجعوا.. مثلك عارف البريعصية يموتون بالدبس والكويت فيها دبس على أفا من يشيل.. فلا يغرك البريعصي وعصعصه.. وقوم خلنا نروح نشتري جم فنيلة ومكسر من عم البريعصي بالمباركية..
إقرأ المزيد...

استجواب بودميعة

30/5/2010
يعني الواحد ما يقدر بهالديرة يريح قلمه ويحط ريل على ريل بالسولدير موليه.. الكاتب فينا صاير مثل الإطفائي بشهر أربعة قبل الجرد.. شغال شغال.. والله بلانا بجم نائب ما عندهم شغلة غير التفنتك والتفذلك والتضهول والهييو واللوية.. الكاتب فينا ما يمدي يحط قلمه بالجيس ويزهب جنطته والا نائب ناقز وطاق الرصيف يبي يستجوب، وليش؟ لأنه طق براسه هالشي! عجيب غريب أمرك يا بودميعة الظاهر ما تبت عقب استجوابك للوزير مصطفى الشمالي اللي صار لك سنة وانت رافع ايدك ومحد معطيك وي موليه.. ياينا الحين بدموعك اللي ما نشفت بجنوب السرة وبتسوي نفسك عنتر زمانك.. يا أخي اركد.. طالع لنا بفرعية وكاسر القانون وياي بتصير بطل على ظهر أهل أم الهيمان؟ مسوي نفسك روبن هود وانت من فوق هالله هالله ومن تحت مو مخلي بقالة إلا مستثمرها على ابو انك شاري العمال وحاطهم بمخباتك.. نسيت نفسك يا بو دميعة لما هوشووولك شوي وتبجبجت وقلت ما أعيدها الحين ياينا وصاير فتوة زمانك؟.. اذا تكتلك زفوك وما فاد.. ربعك النواب نصحوك ما سمعت.. الناس ملت من الحركات القرعة مالتك ومنت مقتنع.. ما تقول شتبي؟ بتصير بطل قومي وتنقذنا من التلوث سن لنا قانون وتقدم باقتراح.. مو باقي الا تستجوب وزير الداخلية لأنه المطبة اللي جدام بيتكم عالية.. يا أخي مش دموعك واحمد ربك ألف مرة ان الناس ساكتة عنك.. وترى ما نسينا الجحافل اللي بتطلعها بالشارع وتبي تكسر الدنيا ويوم قطوك بالسرة محد درا عن هوا دارك.. بجيت ودموعك أربع أربع والحين ياينا تقول أنا المنقذ.. إذا فيك حيل حطه بالرياضة اللي تهم الشباب والا الموضوع فيه مساومات وشراء ذمم أنا وانت نعرفها زين.. تبي الصج انت ما يفيد فيك إلا غرفة رقم ستة اللي بجيت فيها.. بس هالمرة لا تجذب علينا وتقول ان صوت بورمية حلو إذا قرا القرآن.. لأن الناس كشفتك.

• كلمة راس
الكاتب البريعصي دعا الأجانب للاحتلال.. أهو شنو هامه مو ديرته.. عنده جنسية ثانية.. وأبوه يمني وأحسن بياع خام.

• كلمة راس (2)
البريعصي صار هالأيام يستخدم مفردات الحمّام .. لأنه عنده حنين للحمّامات من أيام الثانوية.
إقرأ المزيد...

.. ولو كل «كاولي» عوا..

27/5/2010
الظاهر ان بعض الكتاب ظهرهم يحكهم، وواحد فيهم ظهره يحكه وايد، يمكن متذكر أيام تركيا والبلوتوث، لأن الأخ قاعد يسب ويشتم فينا، أنا بوشيخة ولد أم بوشيخة ولا فخر، ويريد مني أن أهد شغلي وأرد عليه!
طبعا ليش يبيني أسبه، وألعن بوخامسه، واشرشحه، وأمسح فيه البلاط، وأدوس بمردانه.. علشان يروح عند معزبه و«يتبجبج» ـ يعني يذهب ويبكي مثل الأطفال ويقول: شوف عمي، أنا مظلوم، أنا يتهجمون علي، وأنا يخافون من قلمي البتار اللي ما خلى لا بار ولا غار ما دشه، طبعا ما اعتقد هو دش بار ما حط بذمتي، بس يقولون انه مرة دش بار، علشان يهدي الناس إلى الصواب، كونه إسلامي متقاعد!
قبل فترة طاح سب في واحد من البنوك، والسبب خوفه على منصبه في البنك الثاني اللي استحوذوا عليه، وخايف على منصبه اللي حطه فيه رفيجه، وزير المعكرونة بوقتها، الحين شكله بيتفنقر، والفنقرة لازم أشرح لكم، هو ضرب مقدمة القدم بأسفل ظهر الرجل فقيل فنقره، وهذا الأخ شكله متفنقر قريبا!
المهم هذا الغبي، يبي يتحرش، ومعتبر نفسه صحافي كبير، بس عاد ما تطوف على بوشيخة، ولهذا طبعا ماراح اروح صوبه، ولا لي شغل فيه.. ياجماعة كيفي وأنا حر متى ما طق براسي، بس الحين ما ابي أرد، ابتلشت بالكتاب الحبربش، والهيلق.. كل واحد كتب له كلمتين، يبيني ارد عليه، شنو انا فاضي لكم، وانا انصحه من موقعي هذا واقول له مثل قلت لصاحبه من يومين: لو كل «كاولي» عوا القمته حجرا.. راح يخلص الصخر!
إقرأ المزيد...

نواب مزدوجون 100 في المئة

26/5/2010
جواب وزير الداخلية على سؤال النائب علي الراشد بأن ما عندنا نواب مزدوجين منو دقيق 100 في المئة.. والدليل عندي.. أحد النواب المزدوجين.. يحارب المرأة ويبي يقعدها بالبيت ويعطيها بيزات وما يبيها تتوظف وتتعلم على غرار «طالبان» وربعه.. وبنفس الوقت يسوي لها ندوات ويترجاها تطلع من البيت تصوت له.. وتقولون لي مو مزدوج؟.. نائب ثاني ملك اللجوء للقضاء ضد كتاب الرأي اللي يكتبون بمقالاتهم نقد مباح كونه شخصية عامة وإذا فاز بحكم يعزم الصحفيين وعقب كل هذا يقول ان ما المفروض على رئيس الوزراء اللجوء للقضاء ضد نسيبه! أكثر من جذيه ازدواج ماكو.. نائب ثالث معروف بخيطان يصيح من قمة رأسه ويبي يستجوب ويطلع بيان بسبب غلاء الأسعار.. واهو بالانتخابات يوزع درجات بالهبل ويظلم الناس ويرصد ميزانية ضخمة لشراء الاصوات؟ هذي مو ازدواجية الا انفصام بالشخصية.. نائب رابع تفوح منه ريحة المناقصات النفطية ويطلع بالمجلس يقول سنمحق من يتاجر بمقدرات البلد؟ هذا مو بس مزدوج الا يطق المزدوجين ستين صفر.. وخذ عندك نواب مزدوجين فكريا كل يوم لهم توجه وقناعة يديدة حسب المصلحة.. والله ثم والله لو الشعب الكويتي يقرأ المضابط ويشوف كلامهم ويقارنها بأفعالهم.. بتشوفون ساحة الإرادة تنقلب الى ساحة حرب ضد النواب الجذابين المزدوجين اللي يطلع عندهم الصحاف أصدق.. وبالأخير يطلع وزير ويقول ماكو مزدوجين؟ إلا أكو ونص..

• كلمة راس
أعزائي القراء كرمكم الله.. هذي نكتة عالماشي لكم.. واحد زار بريعصي نايم بالمستشفى بسبب الكسور اللي حصلت له.. فقال له عسى ما شر يالبريعصي شفيك؟ فرد عليه وقال.. العادة طاقيني بنعال.. تخيلوا هالبريعصي صار كاتب عقب الطقة.
إقرأ المزيد...

لو كل كلب عوى

25/5/2010
أنا عشت وايد، وشفت وايد، وعرفت وايد اشياء.. واذا قلت الشي، فانا اقوله من خبرة، وحبي لهذا البلد!
البني آدم المتطرف، او اللي يسوي روحه متطرف، لانه في فرق، المتطرف انسان جاهل، يتطرف في كل شي، يدوس حد «السليتر» عداد السرعة 180، ولا هامه احد، لازم الكل يوخرون عنه، لانه مو صاحي.. وفي النوع الثاني اللي ابتلينا فيهم، هو المتطرف النصاب اللي يمثل دور المتطرف، وهذا يمشي ورا مصالحه، لا يهمه هالطرف ولاذاك الطرف اهم شي شكثر يدش بحسابه، وشنو يحصل من منصب!
اقولها واضحة، الشيعي اللي يقعد يسب ويحذر من السنة، والسني اللي يسب الشيعة، ويخوف الناس منهم، والحضري اللي بس همه البدو وانهم مو زينين وهم ماكلين البلد، والبدوي اللي يسب الحضر وانهم يبيعون البلد.. وغيرهم وغيرهم كلهم نفس الشي، لان هالنوعيات من التفكير في وراها اما واحد فاصل، او حاقد، او متسلق على ظهر ربعه حتى يوصل!
كذابين اذا هالنوعية من الناس، يصرحون ويقولون انه احنا نحب البلد، تدرون ليش كذابين؟ لانه الديرة مو شوارع ومجمعات وسيارات ومولات ونفط وابراج الكويت.. الديرة في ناسها، في أهلها الطيبين، في اللي بنوها واللي يضحون من اجلها، واللي يسب اهلها واللي يفتن بين اهلها، واللي يقلل من شأن بعض اهلها، واللي يتهم بعض اهلها، هذا يسب الديرة، ويكره الديرة، ويحقد على الديرة وعلى كل اهلها!
يا اهل الديرة اللي تشوفونه يسب الناس، ويهذي بالفتنة، ويحذر اهل الديرة من بعضهم البعض، لا تناقشونه، ولا تردون عليه ولا تحاولون تعلمونه، لانه هالنوعيات تبيع الديرة علشان كرسي، هالنوعية شدو عليه السيفون، ولا حتى تردون عليه، لانه «لو كل كلب عوى» بتحذفه بصخرة، راح تخلص صخر الديرة كلها على راسه!
إقرأ المزيد...

ممدوح المدح

24/5/2010
ادارة الجريدة قالوا لي يابوشيخة أذيتنا، وكله طايح في هالناس، ماخليت احد يابوشيخة،نبي مدح شوي نبي تمدح الناس، مو معقولة كله طايح تشلخ في هالعالم.. فقررت اليوم امدح.
امدح الكاتب العظيم والكبير والساخر بوقلمين، بصراحة هالكاتب ساخر ويموت من الضحك، حتى مرة قعدت ثلاثة ايام بس اضحك على مقالته، وانا متابع دايم لمقالاته مثل ما اتابع المسلسلات التركية، ما ادري ليش تذكرت المسلسلات التركية، المهم وهو مصر كل يوم يكتب، ويعطينا من هالنكت، وهالافكار اللي تضحك، حتى سمعت ان محمود السعدني مات والسبة انه قرأ وحدة من مقالاته فمات من الضحك.. فرجاء يا استاذنا استمر في الكتابة، ومالك شغل باللي يقولون انه دمك ثقيل، استمر ونحن من ورائك، ولا تخاف، نحن من ورائك بس ندعمك، وامدح طبعا النائبة «انا ممتنعة» ياجماعة صج انجازات، وشغل عدل، شكثر تصرح، وياحلاوة تصريحاتها، حفظناها، حريات وحقوق انسان مافي غير هالكلمتين، وكله تبي تسوي، وكله راح تسوي، وكله تفكر تسوي.. وهي طبعا احسن وحدة واكثر وحدة تبتسم في المجلس، وتوزع ورد حتى كل ما اشوفها وهي توزع ورد اتذكر اغنية «ليش ليش ليش ياجارة»!
ابي امدح بعد احد النواب.. بس ما ادري بشنو امدحه المهم ودي امدحه على تصريحاته وانجازاته العظيمة، وبصراحة هو احسن نائب، صج ما ادري شنو انجازاته يمكن عنده وايد وانا ماعرف، بس مادام طايحين له مدح فنمدحه فوق البيعة! نمدح منو، ياجماعة فيني مدح بس مو لاقي احد، اذا عندكم احد يبي ينمدح ومو لاقي انا حاضر، لانه هالايام ايام ممدحة!

• كلمة راس
لو كل نائب راقب نفسه بعيد عن مراقبة الوزراء من أجل الأمور الشخصية لكانت الانجازات خير وبركة على الشعب الكويتي اللي مل من بعض النواب اللي ما مهنتهم غير التصريحات الجارحة..
إقرأ المزيد...

أعداء النجاح

23/5/2010
على كثر ما ذبحونا بعض النواب الدايخين في قضاياهم الداثرة.. وعلى كثر ما طلعوا للشارع مع ستين نفر مو أكثر لدغدغة المشاعر.. وعلى كثر ما أطلقوا التهم على خلق الله بمناسبة وبدون مناسبة.. وعلى كثر ما كسروا هيبة القانون وداسوا ببطن الدستور على قولة بوفيصل وخرقوا مبدأ فصل السلطات.. وعلى كثر ما حاولوا بعض النواب انهم يكونون دكاترة ومهندسين ومقاولين ومدرسين وقضاة ومحامين.. وعلى كثر ما رددوا «إعلام فاسد.. تضليل.. شخصنة».. بالنهاية فشلوا فشل ذريع ونجح الاعلام في تعريتهم وكشفهم وفضحهم.. نعم قدر الاعلام الحر في الكويت من صحافة وفضائيات بكشف المستور وتسليط الاضواء على مكامن الخلل.. (حلوة مكامن).. بعض النواب حاولوا تضليل الشارع وتوصيل رسالة بأن النواب بروحهم اللي بس يفهمون والشعب ما يفهم.. لكن الصحافة بمحررينها الرجال ومسؤولينها الأحرار وملاكها المفتحين باللبن قدروا يعكسون زيف بعض النواب وهرطقاتهم وحيلتهم اللي انكشفت.. وأكبر دليل كانت قضية القوانين الرياضية اللي سموها بعض النواب قانون الإصلاح الرياضي.. طلع قانون عور وما عنده سالفه اللي صاغه ووافق عليه.. وكلمة حق أقولها بناس ما تشرفت باللقاء فيهم.. برنامج «اللوبي» في قناة العدالة.. والقسم الرياضي في جريدة «الدار».. ساهموا مع غيرهم في تحويل الشارع باتجاه الحقيقة اللي كشفوها.. واستطاعوا تحييد المتكسبين على القضية.. وبكل حرفنة ومهنية وبدون شخصنة نالوا مرادهم بالأحكام اللي أيدها قضاؤنا النزيه وانتصرت لها إرادة المجتمع الدولي.. بعيدا عن أشخاص النواب أو الرياضيين اللي كانوا بالقضية.. جريدة «الدار» وقناة «العدالة» وغيرهم من وسائل الإعلام الشريفة قادوا الشارع الرياضي نحو الحقيقة اللي غيبها البعض بتصريحات دايخة والتفاف واضح على عقول العالم.. قودلاك «اللوبي» و«الدار» والمنابر الإعلامية الحرة .. وهاردلاك للي حاول يلف ويدور وانكشف.. وأبشركم يا زملاء الهم بالاعلام الشريف راح تسمعون كلام وهجوم ما يسركم من أعداء النجاح.. فلا تديرون لهم بال واستمروا بكشف المزيد من الحقائق..

• كلمة راس
زيارة صاحب السمو، الله يحفظه، الأخيرة للدول العربية تخليك كمواطن كويتي تفتخر وترفع راسك بأمير الدبلوماسية وشيخ الحكمة.. اللي اعطى لشعبه قيمة مضافة في كل دول العالم بحسه الراقي الإنساني.. فديتك يا بوناصر
إقرأ المزيد...

بي بي أم النواب

20/5/2010
لو فرضنا جدلا ان النواب هبوا بالبلاك بيري وكل واحد فيهم حط «توبيك» يعبر من خلاله عن شخصيته.. تعالوا نفترض ونختلق ونشوف حال نوابنا في البي بي أم..
• جاسم الخرافي: انسحاب تكتيكي
• أحمد السعدون: هذا خلصنا منه يا ويلك يا الياي
• مسلم البراك: أنا وبس والباجي خس
• يوسف الزلزلة: لبيك يا وطني
• عدنان المطوع: وراكم وراكم
• وليد الطبطبائي: أنا الكارثة
• حسين مزيد: لا أسمع لا أرى لا أتكلم
• دليهي الهاجري: أنا الوضوح كله
• علي الدقباسي: نسيت شلون امشي
• عبدالله الرومي: لا «للبدون»
• علي الراشد: أنا لكم بالمرصاد
• مرزوق الغانم: أنا راقي
• شعيب المويزري: طولوا بالكم علي
• محمد المطير: قدساوي بالفطرة
• خالد العدوة: عدت إلى رشدي
• عدنان عبدالصمد: صمتي حكمة
• سعدون حماد: احترس أمامك منعطف
• معصومة المبارك: يا ويلكم يا سواد ليلكم
• رولا دشتي: مواقف كبيرة
• أسيل العوضي: أنا ممتنعة
إقرأ المزيد...

الفن والسياسة.. رسالة

19/5/2010
مرات وايد تمر علينا مقولات مشهورة مرور الكرام – ياسلام على بوشيخة لما يقول حكم – مثل الفن مايوكل عيش على قولة اهل الفن من ممثلين وممثلات مع ان أغنى أغنياء الفنانين تلاقيهم ممثلين، شوفوا هوليوود وبوليوود ونفس الشي عندنا بالكويت تلاقي واحد كومبارس.. يعني الممثل اللي يطلع يقول السلام عليكم ويروح.. أو اللي يوقف عند الحادث أو كلش كلش يتهاوش وياخذله جم طراق وبوكس.. والمشكلة انه بصوب والتمثيل بصوب وبعد جم سنة تلاقيه صار منتج ورصيده بالآلاف وراكب أغلى سيارة.. وعنده يخت.. وشقة على البحر وهلم جرا وتلاقيه يطلع في اللقاءات التلفزيونية والصحفية، ويقولك ان الفن رسالة انت وين والرسالة وين.. وكل أعمالك طراقات وبجي وبنت منحاشة تحب واحد أغنى منها والأخ طايح بالمخدرات، والأبو مريض بالقلب عقب ماخسر تجارته والأم تقعد بالصالة لابسة دراعة تنتظر رجعة اعيالها.. نفس الشي لو غيرنا البوصلة صوب مجلس الأمة تلاقي واحد منتف كحيان مولاقي وظيفة فجأة طول لحيته وقصر دشداشته وترجاله جم واحد من عيال فريجهم، وعيال عمه وصار نائب خو الدوائر الخمس والعشرين فيها دوائر منطقة ماتجاوز عدد قطعها 7 قطع ودوائر فيها 16 منطقة وبعد جم سنة ينسى اللحية ويجابل مذيعات ومقدمات برامج.. والمشكلة ان تسجيل الجلسات فضحهم لأن الغالبية من ممثلي الشعب صج ممثلين كل يوم تلاقيلهم دور، مرة شرير مرة طيب.. مرات يصير دكتور.. مطوع.. تاجر ولاعب كرة !ويزيد نفوذه والحسابة تحسب، لاهدف لا إصلاح لا قوانين ولاتنمية ولا بطيخ ويطلع باللقاءات يقول الكويت اهم شي عندي! جبح رسالة..

• كلمة راس
استغربت تصريح بعض النواب عن الانتخابات المبكرة واستغربت اكثر لما قال أحدهم ان بقاء المجلس أربع سنوات كارثة على الأمة؟!.. وتقولون لي عندنا ديمقراطية؟.. الا عندنا قوقراطية وقواطي.
إقرأ المزيد...

خبر وتعليق

18/5/2010
• القبس.. بورسلي: السادس والنصف دائري جديد في البلاد
- بوشيخة: والله لو تسوون التاسع والنص الزحمة مهي رايحة بسبب ثقافة السواق!
• الوطن: الهارون.. تباين الأسعار بين الدول والأسواق أمر طبيعي والكويت ليست استثناء من ذلك
- بوشيخة: أسمع كلامك يعجبني اشوف تصريحاتك قبل شهر اطيح غشيان!
• الراي.. العفاسي: مليارات الكويت لمساعدة الدول الفقيرة أبهرت المجتمع الدولي
- بوشيخة: شالفايدة والنواب أربعة وعشرين ساعه يتمنون على هالمليارات..؟
• الأنباء: استمرار الخلاف على نسب المعسرين
- بوشيخة: هذا اللي يسمونه اتفقوا على ان لا يتفقوا !
• الجريدة: النملان يقترح تعديلات على الفحص قبل الزواج
- بوشيخة: حتى بهالسالفة دشيتوا يا نوابنا؟
• الدار: نصف مليار دينار لمشروع تطوير فيلكا
- بوشيخة: أنا أقترح تعطون أهالي أم الهيمان بيوت هناك وتطورون منطقتهم!
• عالم اليوم: الجليب محتلة من الآسيويين.. والمسؤولون في سبات عميق
- بوشيخة: محتلة وايد واسعة خلونا نقول مختطفة..؟!
• الرؤية.. صفر: مقبلون على مرحلة تنموية مهمة تتطلب تطوير مهارات قياديي البلدية
- بوشيخة: هذا الشي اللي الكل يفتقده بو عبدالله تكفه طورهم تكفه.؟!
• الصباح.. حياة الفهد: الفنانون سينجحون في مجالات فشل فيها الساسة
- بوشيخة: أنا أقول ان الساسة يمثلون أحسن منكم يا أم سوزان..؟
إقرأ المزيد...

حلم سيدنا يوسف

17/5/2010
سؤال طمر إلى ذهني فجأة.. ليش النائب الدكتور المحترم الراقي الموضوعي الرجل صاحب القلب الكبير ابن السادة الكرام يوسف الزلزلة.. ليش.. هالكثر حليم؟ وابتدت الاجابات تقفز جدام عيني بعضها مقنع وبعضها مقنع بزيادة.. الرجل دكتور متخصص وأكاديمي فذ.. الرجل شبع من كرسي البرلمان وبريقه واقتنع انه بمهمة وطنية.. الرجل مل من كرسي الوزارة وفلاشات المصورين، وصارت عنده أهمية الكويت أولوية.. الرجل اجتماعيا واصل وله علاقات مع الكبار والصغار، واكتشف ان خدمة الكويت سبيله للخلود في ذاكرة الكويت الحديثة.. الرجل شفاف وصادق وما عنده مصلحة شخصية.. وأكبر دليل تركه للعمل التجاري وتفرغه للعمل التشريعي الراقي.. وبعده عن العمل الرقابي اللي ما منه فايدة.. هذي كلها أجوبة على سؤالي اللي سهرني وحيرني.. نعم سيد يوسف نائب نموذجي أتمنى الكل يقتدي فيه من أهل السياسة اللي ناوين يترشحون للمجلس.. الرجل حليم لأبعد الحدود لانه يتأسى بجده محمد بن عبدالله صلى الله عليه وآله.. الرجل حليم لأنه شاف واقع الكويت المؤلم، وحب يكون حجر بناء مو عثرة مثل بعض النواب.. سيد يوسف إنسان يحمل عقل فذ وزاخر بالأفكار لبناء الكويت الحديثة.. وحط له موطئ قدم بصفحات الكويت الجميلة اللي راح تنتقل الى عالم الاقتصاد المنجز.. واسمح لي اقولها لك حاف بدون ألقاب.. يا بوحسين أنت قلب نابض بحب الكويت، رغم كل اللي تتعرض له من خفافيش الإنترنت وهجوم الكتاب الدايخين وهمز ولمز وغمز المتنطعين بالتأزيم.. سيدنا يوسف حلم وعلشان يحقق الرؤيا احتاج سنين ومراحل وتضحيات وسجن وبلاء لكنه وصل بالنهاية لنقطة الإنجاز.. وانت يا سيد يوسف دربك خضر بدعواتنا وعسى الله يحقق لك حلمك يا حليم ويصبرك، وثق تماما ان الداعمين لك ما يستهويهم بريق السياسة.. عيايز وشياب وأطفال وشباب يدعون لك ببيوتهم بالتوفيق وانت قد هالدعاء.

• كلمة راس
أتقدم بالعزاء للدكتور أنس الرشيد بوفاة والده العم الراحل محمد الرشيد.. اللي ترك بصمة في العمل البرلماني خلته علامة فارقة في تاريخ الكويت.. عسى مثواك الجنة ولأهلك الصبر والسلوان.
إقرأ المزيد...

القرية النوبية

15/5/2010
نعم القرية النوبية عبارة عن مقهى ومطعم جميل جدا جدا جدا يقع على شاطئ النيل الساحر في مصر العروبة.. تسمع فيه أم كلثوم.. تأكل فيه حمام مشوي وحمص لذيذ وعرايس ولا مرت على بالك.. من مقومات العروبة مكان ساحر على ضفاف النيل بفندق كبير وهادي وحلو.. اللي راح مصر وما مر القرية النوبية وشاف أهلها كأنه ما راح مصر أبد.. واللي يبي الزود ويبي يعرف عنها ترى القرية لها سفير في الكويت ينقال له بو مشعل.. عنده طاولة ثابتة فيها ينحاش من هم وغم الديرة اللي بعض النواب الله يهدانا وياهم خلوها ظلمة وما تسوى.. القرية النوبية وصديقنا الكبير بالمقام والعمر بومشعل عبرة وقصة لازم نستفيد منهم.. الكويت أصبحت طاردة لكل شي يونس ويفرح القلب.. الكويت اللي انعرفت بالفرح البريء في الستينيات والسبعينيات والثمانينيات صارت اليوم عبارة عن مدينة اشباح.. اللهم مقهى ديوان جبلة اللي يرد الروح شوي ويخليك تحس انك قريب من القرية النوبية.. للأسف بعض النواب تناسوا التشريع والرقابة وصاروا أوصياء علينا.. غثونا شلخونا.. بكل شي داشين مو باقي إلا يمنعون لعب السبيتة بالدواوين تحت ذريعة ان بنت السبيت مو متحجبة وبوعشر الديمن غريب ولازم نفرقهم عن بعض؟ هبلو فينا النواب تلفونا.. مخلين الفتنة ومجابلين القهاوي.. تركو البوق والاختلاسات وحاطين دوبهم دوب ربع بومشعل.. لكن أقولها بملء الفم الانتخابات (عالليت) ويايينكم وبنغيركم ونبي ننتخب نواب معتدلين يعطونا حقوقنا بدون منغصة وما يتدخلون بخصوصياتنا..

كلمة راس
من الطبيعي أن يكون الكاتب المأجور في السجن المركزي بأمر القضاء .. لكنه وقف تناول أدويته وأكله عشان يردللمستشفى.. مصادر طبية اكدت انه يستطيع العودة إلى السجن بعد 24 ساعة، لأن حالته غير خطيرة.. لكن بعض المعازيب ممولي الصندوق، تدخلوا لتغيير امر القضاء وتشخيص الاطباء عشان ابقاء الجاسم بالمستشفى.. مايبون بعد فندق خمس نجوم أو علاج بالخارج للي يتعدون على رموز البلد؟.
إقرأ المزيد...

بوقلمين عاد بالثالث

13/5/2010
كتبت قبل فترة عن كاتب بشارع الصحافة يستخدم قلمين واحد للكتابة وواحد للتعويض عن عادته المحببة له واللي أثبتها بلوتوث تركيا.. هذا الكاتب المعتوه رجع هالمرة للكتابة عن أهل الكويت الأصليين وقام يتعرض لهم بمناسبة وبدون مناسبة.. المشكلة ان هذا الكاتب يعاني من ثلاث عقد.. الأولى القلمين.. الثانية كره الناس له .. الثالثة انه يحاول بكل مرة يتملص من أصوله الفارسية بذر الرماد بالعيون.. يا أخي شفيك مستحي ان أصولك من فارس؟ ترى الفرس خوش ناس.. ولاني بمعرض الدفاع عن إيران أو ملالوتها ومناصرينها في العالم.. انا اللي يهمني يا قطو اني أبين لك عماة عينك وسواد قلبك وحقدك الدفين على أسلافك! المصيبة ان أنا وياك نعرف السبب بس ما ينكتب .. المهم في موضوعنا ان الكاتب هالمرة مسك قلم بيمينه كالعادة والقلم الثاني شغال على منوال بلوتوث تركيا كالمعتاد.. والقلم الثالث كان مغجوج براسه.. وكتب مقال مثل سواد قلبه وبغباءه المعتاد أساء الى رسولنا الكريم ومدح أهل الدنمارك اللي أساءوا إساءة بالغة لنبي الرحمة ومنقذ الأمة في سبيل ذم إيران! يعني بالعربي الفصيح والكويتي القح.. الكاتب الزفر.. القطو اللي يحاول يصير نمر.. مثل اللي قال عنه علي الراشد عاند مرته وقص لسانه.. وبالفعل الكاتب قص لسانه لأنه ما يحتاج يقص شي ثاني.. للأسف أن يقف البعض متفرج على هذي القماءة والصفاقة في الانتصار للدنماركيين اللي اساءوا لرسولنا عليه وعلى آله أفضل الصلاة والسلام.. فمن سيفعّل القانون وينتصر للنبي؟ ومن سيقول كلمة الحق في زمن هذا الكاتب الإمعي الغبي؟ تبون الصج هزلت.

• كلمة راس
ترى بوالقراطيس ورفيجه المأجور ناوين ينقلون أمراضهم وأغراضهم من الكويت لبيروت بالسوليدير..لازم ينتبه لهم أهل بيروت وسعد الحريري ونبيه بري والوزراء والنواب لأن هذوله مثل الوباء اذا انتشر ما تصيده.. واذا يبون دواهم ترى عندي الخلطة اللي توديهم فوق النخل.
إقرأ المزيد...

عهد القلم المأجور

12/5/2010
نعيش هالأيام أسوأ فترة في شارع الصحافة الكويتية.. شلون؟.. أصبح القلم المأجور سلعة تلاقيها متوفرة بسهولة ويسر في كل زوايا الشوارع.. وصارت مهنة يتكسب منها الردي الدنيء وعلى رأسهم المحامي الفاشل.. المكروه عائليا.. المطرود أسريا.. راعي الهرطقات.. وسيد التفاهات.. وصاحب مقولة (المخابرات تلاحقني).. اللي يطر من الشيوخ حق العلاج.. اللي بدا حياته بالفتنة بين الناس.. للأسف ان هذا وبشكل معلن للكل ومعروف للجميع اصبح صاحب أعلى أجر في شارع الصحافة والإنترنت.. نعم اعلى أجر لبيع الذمة.. ما عنده مانع يستغل كل حدث في أسرته حتى لو حادث سيارة علشان يطر مقابل كتاباته.. والمصيبة انه يعرض قلمه للبيع بكل دم بارد.. وبنات أفكاره يمنحها للي يدفع أكثر، وهذا الوقت اللي نعيشه للأسف أصبح مثل هذا القلم المأجور وصاحبه سلعة يتداولها ناس متنفذة تعيش على فتات حروفه الزفرة.. ومن مدرسته في جم كاتب مأجورين على قدهم.. واحد يطبل حق فلان وثاني ماخذ له موقع على الشبكة ومسوي روحه بو العريف وهو أطرش بالزفة.. المصيبة وين ان المهرج وراعي الشبكة برعاية الكاتب المأجور ياخذ فلوس من الصندوق ويوزع عليهم واهما يكتبون اللي يمليه عليهم.. ما خلوا شريف الا هاجموه.. ما تركوا نائب الا وتجنوا عليه بالجذب والزيف.. بس المصيبة ان الكاتب المأجور يعطيهم ربع اللي يقبضه يعني مأجور وحرامي.. وفوق كل هذا عنده أسهم.. هذا عهدك يا مأجور ولي وقفة معاك في قادم الأيام وخصوصا بعد ما راح تحتفل الويك إند القادم بانتصارك المزعوم..

• كلمة راس
الكاتب المأجور شن هجوما في مقالته الأخيرة على رمز نيابي مشهود له بالعطاء والولاء وحسن الإنجاز.. وكتبها بالحرف «السيد اللي تحول من المعارضة الى الموالاة».. فأي سيد تقصد يا من تنقصك الشجاعة كالمعتاد؟
إقرأ المزيد...

الكاتب المأجور المحامي «الخطير»

11/5/2010
الكاتب المأجور ميمو لاري كنغ، كل يوم عنده قصة وسالفة، وهاليومين قاطين مقالته بالزبالة، والاخ ميمو على وزن عوعو راح يبلع الموس ويسكت ولا كلمة، ولا همسة، ولا اي كلمة اعتراض لانه سقط بكل المعايير وانكشفت كل اوراقه..
ما علينا، الاسبوع اللي فات طلع لنا طلعة، وهو شاهر سيفه البتار، من بركات عراب الصندوق، لانه اكتشف اكتشاف عظيم محد يعرفه غيره، وهو ان المخابرات الدولية وجهات كويتية قامت بالهجوم على موقعين اخباريين خوفا منه وكأن الموقعين موقع البنتاغون والسي اي ايه مو مواقع فيها شوية اخبار بايتة، ومقالات دايخة!
طبعا الكاتب ميمو محامي وابو خدود متورمة، يحب تأليف الافلام، مرة المخابرات لاحقينه يبون يفضحونه، مرة القنوات لاحقينه يبون يرشون بس هو ما يبي، ومرة اوباما داق عليه علشان يتوسط بينه وبين العراقيين.. حاله من حال اللي عطوه «بوكس» بسبب مغامراته وقال قوى الفساد طاقيني، ونفسه اللي قال ان الموساد حرقوا سيارة ولدي، بعدين طلع سوالف مراهقين..!
المهم نرجع لميمو الخطير اللي يكتب المقال وبعدين يوصي ربعه يدزون له التعليقات ويشجعونه ويقولون له يا مبدع، يا فارس الخيمة.. يا مسمسم ونقول له روح العب بعيد يا خفيف لانه نعرف سوالفك، وملفاتك عندنا، وعددها كبير ومالنا خلق نفتحها عليك، لانه يالحبيب عمرك الافتراضي انتهى، ليش مو راضي تفهم؟ وجدامك قضايا ما تنتهي ابد.. ويقولون ان احكام يديدة راح تجابلك هاليومين، بس انت مو راضي تفهم.. او فاهم بس وجه عريض.. بعرض الخط السريع.

• كلمة راس:
اللي يدق راسه براس نائب محترم وعنده رصيد شعبي كبير.. بيكون راسه فاضي وعالزيرو !..
إقرأ المزيد...

هارودز وسوق الجمعة

10/5/2010
كنا وما زلنا كدولة كبيرة بعقول ابنائها نقتنص الفرص ونسوي اللي ما يصير في سبيل رفعة الكويت..وعندنا ناس مفتحة باللبن تقدر تحول رمال السودان الى ذهب وعندنا بالديرة نظرة حكومية للاستثمار تعدت نظرات الاوروبيين ..واكبر شاهد على كلامي الحصص اللي تملكها الكويت منذ الستينات في شركات ضخمة تعتبر كنز الكل يتمنى يحصل عليه..ولما نقول هالشي ما نقوله عبط او عيائه على قولة اهل القاهرة..صاحب السمو الله يحفظه كان ولا يزال اللاعب الرئيسي من ايام ما كان وزير للخارجية في تحصين اموال اهل الكويت عن طريق سياسات الاستثمار من الستينيات والسبعينيات..لكن بعض النواب الله لا يوريهم عقل هذا اذا عندهم شوية عقل..اشغلونا بتفاهات مشاريعهم ورغباتهم الداثرة وخلونا نلتفت للداخل وننسى الخارج..ولأن النائب صار فرعون زمانه ومحد قادر يوقفه..وقفت الحال وتلاشت الاستثمارات الجديدة..وآخرتها شنو؟ صار لنا عشر سنوات ما سمعنا عن فرصة استثمار يديدة فازت فيها الكويت..صارلنا عشر سنين مكانك راوح في قطاع الاستثمار الضخم العالمي..وهذولا اهل قطر يا عيني عليهم..بلشوا ياخذون مكانة الكويت الاستثمارية عليهم بالعافية..وآخرتها شراؤهم لمتجر هارودز الضخم المعلم البريطاني الكبير..ضربة معلم ..وقبلها فندق تشرشل وقبلها شراكات استراتيجية في ثمانية شركات اوروبية ارباحها مضمونة ومكانتها مرموقة..واحنا يا خلاف علينا..نوابنا مو عارفين يخصخصون سوق اليمعة وبسطاته..شي يفشل وشي يخليك ككويتي لما تشوف وتقرا خطط قطر التجارية تطق تحيه احترام لهالعقول..اما حنا فلا طبنا ولا غدا شرنا والسبب نوابنا اللي ادمنوا التأزيم ومسوين روحهم بوالعريف..

• كلمة راس
لما يصير عندك مجلس فيه بعض النواب اللي كراسيهم تفهم اكثر منهم..لما يصير عندك جم كاتب ارخص من اقلامهم ومأجورين..ما تقول لي شلون الديره تمشي؟ جبح نواب وكتّاب وناخبين عقارب..

• كلمة راس 2
الكاتب المأجور يقول انه طلب من أحد النواب يعيد النظر بقراراته.. يالحبيب جم انت حصلت اصوات بالانتخابات.. وجم حصل النائب المكرم.. رحم الله امرئ عرف حده..
إقرأ المزيد...

قاعدين بالحراج ؟

9/5/2010
لما النائب علي الراشد صرخ على النواب في احدى الجلسات بسبب الفوضى، وقال لهم: «وين قاعدين.. بالحراج؟» طبعا النائب يقصد الطنازة، بس ترى صج، اقول للنائب الفاضل نعم سوق حراج وشريطية حراج، حراج سيارات، اثاث مستعمل، سكراب.. كله ماشي..! والدليل قرارهم بالنزول لساحة الإرادة ضد قانون «الخصخصة»!..
وكل واحد من النواب يبي ينزل بضاعته ويحرج عليها، واحد منهم راح يتكلم عن رافال وصفقة الاسلحة والطيارات، عاد نوابنا خبراء يعرفون خاصة بالطيارات الحربية، اصلا يقولون ان الثلاثي الكوكباني اهمه اعضاء في لجنة تطوير الاسلحة في وزارة الدفاع الاميركية، يعني الاسلحة هناك ما تمشي الا لمن يوافق الثلاثي!
تبون حراج ثاني، قصة النصب التذكاري، اقتراح نصب تذكاري لشهدائنا اللي مو سامعين عنهم بعض النواب، ما ادري وين كانوا ايام الغزو؟ المهم الاخوان قالوا يبون فتوى، فتوى شنو وليش؟ نصب تذكاري للشهداء، مو نصب تذكاري للرقاصات، بس عاد مثل ما قال الراشد حراج!
تبون حراح، سالفة نائب مع لجنة المرأة، شيبي فيهم؟ لجنة حريم، ولازم مافي اختلاط، ليش مناشبهم، ومتابع اخبارهم، وكل شوي ناط يسأل عن تقاريرهم، مع انه الموضوع حريمي هو شكو مدخل روحه ومسوي حراج عليهم محد يدري؟
والعملية ماشية، هذا يقول وهذا يرد وهذا يسب، وآخر شي يحيلونه للجان! كل ما صارت قضية حولوه للجنة تحقيق ولا لجنة برلمانية ولا..لساحة الارادة.. لانه مالهم خلق، يتكلمون عن شي يفيد الناس ولا يهم الناس، وهذا هو الحراج، الشريطي دائما يدور على بضاعة رخيصة يبيعها غالي، سيارة بو مية يبيعها بالف، وربعنا مع الاسف قاعدين يبيعون اغلى شي وهو وطنا... برخيص !
إقرأ المزيد...

أي إصلاح أي بطيخ

6/5/2010
بصراحة ما ادري شلون، حاولت ارقعها، واقنع نفسي ان الامور راح تمشي تمام التمام، بس ما قدرت، شلون الامور تصير احسن وتصير زينة، اذا كان اصحاب الشأن، اللي انتخبناهم، علشان يصلحون الامور، اهمه يحتاجون تصليح!
اعطيكم مثال علشان لا تقولون اني اتحامل على بعض النواب، او عندي مشكلة معاهم، مثلا خلنا نقول مثلا نواب المجلس مهمتهم يشرعون القوانين، ويقوافقون على المشاريع في البلد، وينظمون البلد، بس هل من الممكن يسوونها؟ طبعا لا، لسبب بسيط لانهم ما يعرفون شلون ينظمون روحهم، الكل يتكلم في المجلس، والكل يرد على الكل، كلهم يتكلمون، منو اللي يسمع ما ادري..؟ فهالنوعية شلون بتنظم ديرة، الا تسويها فوضى، ولا عرس الكواولة!
النواب يشرعون القوانين، شي زين، بس في شي مو زين، انه اكثر ناس يخرقون هالقوانين، هم النواب، يفترون على الوزارات والمخافر ورا بعض المجرمين والنصابين والمهربين، والصبح يفترون على الوزارات، يمشون واسطات ناس على حساب ناس، واستثناءات لربعهم على حساب بقية المواطنين!
النواب يبون يصلحون البلد، طبعا ما يصير، لانهم اهمه اللي يخربون البلد، بدل ما يصلحون الصحة مثلا، ويطالبون بالمستشفيات المحترمة، يدورون واسطات علشان يسفرون ربعهم سياحة وهم لعلاج النشلة!
بدل ما يطلبون التربية بتغيير المناهج حتى نتطور، لا طبعا! النائب يتدخل علشان ينقل مدرس من مدرسته الى مدرسة عن باب بيته، او حتى ينقل طالب من صف الى صف ثاني، ما اتغشمر هذا صج، وياما نواب سووها، لانه ما يعرفون يسوون شي غير الاشياء!
الزبدة، مثل ما وراء كل رجل عظيم امرأة، ووراء كل جريمة امرأة، هم وراء كل خراب، مصيبة، فساد.. في الديرة، لازم نشوف نائب!
إقرأ المزيد...

وليد بوند

5/5/2010
توني واصل مطعم الغدير أبي أطلب بطاط ولبنة جان تتصل فيني أم شيخة وتبشرني ان خالها المكسيكي رافييل ماركيز ياي الكويت لانه عنده مشروع تجاري.. طبعا غصبن على أمي اللي يابتني أروح استقبله بالمطار واجابله.. وبالفعل وصل رافييل وركب معاي السيارة وكوني كويتي ملقوف بالفطرة سألته شنو مشروعك يا خال ام شيخة؟ فجاوبني وقال لي أريد بناء نفق من هني إلى مرقص في بيروت، تعجبت وسألته شكو احنا بلبنان ومنو الجهة المستفيدة من هالنفق؟ قال لي بو ماركيز خلنا نوصل الفندق وأقول لك السالفة.. طبعا بو ماركيز ما يدري اني كويتي الجنسية ملقوف وفيني بلاغة شف مو طبيعية حالي حال كل أهل الديرة.. فطولت الطريج وقلت له ترى يبيلنا ساعتين ونص على ما نوصل الفندق.. هني فتح لاب توبه وقام يطربني بالمفاجأة الغريبة.. قال لي بو ماركيز خال أم شيخة ان اللي يبي يبني النفق شخصية معروفة اسمه الحركي وليد بوند.. عنده لحية وكان حافي وصار يسولف بالملايين.. وقال لي بو ماركيز ان وليد بوند عنده مؤسسة يطرّ لها فلوس من علية القوم.. ماعلينا.. سألته طيب وليد بوند على قولتك شيبي بالنفق؟ فقال لي ان هالرجل معروف عنه حبه للانفاق في سبيل وناسته.. وعنده صديقة اسم ابوها اسم شهر عربي يا شعبان أو رجب يروح لها الديسكو علشان يحاول يهديها للطريق القويم ويدششها الإسلام عن طريق النفق اللي يبي يسويه.. سألته طيب شالحكمة من النفق؟ فجاوبني يا أبا شيخة انت مسلم وتعلم ان الدين النصيحة بالسر وليس العلن.. والسيد وليد بوند يريد نصيحتها وهدايتها بالسر كما فعل في أماكن كثيرة.. هني سألته سؤال أخير، طيب شكثر يكلف بناء هالنفق يا بوماركيز فقال لي.. فقط ستة وثلاثين مليون دولار.. فصعقت وذهلت وتمغطت وقلت له بل بل بل من وين له وليدو بوند هالمبلغ.. فضحك رافييل ماركيز وقال لي.. عندما زارنا وليد بوند على شاطئ العراة حصل على شركة راعية لجسده الغريب، قدمت له مبلغ يفوق المئة مليون دولار بدافع الدعاية الدينية.. هني رحت قطوع ونزلت ماركيز عند المنطقة اللي يبي يحفر النفق فيها.. كيفي..
إقرأ المزيد...

3 + 1 = 3

4/5/2010
لأن تجربة النائبات في المجلس بالنسبة للكويت حديثة ويديدة وتوها بجياسها.. راح أحصر بعض السلبيات والايجابيات فيها.. وارجو من النائبات ان تتسع صدورهن لهذه الدراسة الحلمنتيشية وما يعصبون ويتنرفزون مثل النواب ربعهم.. وخصوصا (بوحمود) اللي يمشي ويتشره على بوشيخة بالدواوين.. مع اني ما انتقدته شخصيا.. المهم.. فازوا النائبات الأربع بالانتخابات.. واصبح هالشي أمر واقع وصاروا يشرعون ويراقبون.. أعتقد أن العملية يبيلها رصد ومتابعة.. زيها زي أي ظاهرة جديدة.. اللهم أن النائبات الأربع لهن حضور وتجارب سابقة.. لا يمكن تنفصل عن واقعهم العملي بالمجلس.. دورت وبحثت ورحت يمين ويسار ولقيت وايد اشيا.. وجمعت وطرحت وقسمت واكتشفت الموضوع.. يعني بالعربي الفصيح وبالكويتي الصريح لقيت خوش سالفة.. شنو اللي لقيته تعالوا أقول لكم.. د.معصومة المبارك أستاذة وأكاديمية ووزيرة سابقة ولها حضور طاغ في كل المحافل المحلية والخليجية والعربية وتنحط ع اليمين.. د.رولا دشتي بنت الاقتصاد المحلي ومراقبة باتعة للاقتصاد العالمي ولها إسهامات جميلة وجهود جبارة في المجتمع وبنت أبوها ما تخاف أبد.. د.سلوى الجسار مجتهدة وما تحاول تمد ريولها إلا على قد لحافها ولها مواقف تنازع فيها مرتبة الرجولة عند بعض النواب وصريحة تبرد الجبد.. أما د.أسيل العوضي فمن أيام الانتخابات واهيا تفلص ومرتبكة وداشة عرض بزوجات الرسول صلى الله عليه وآله وسلم.. وطاقة الرصيف ومطفية الليتات وما عندها سالفة.. ايجابيتها الوحيدة أغنية أبراج الكويت تحجى حاضر بلادي.. ما عندها شغل غير أكل الكاكاو بالمجلس وتوزيع الورد على الوزراء وبكل تصويت ترفع ايدها وتقول.. ممتنعة.. ما علينا المهم عندنا ثلاث نائبات يرفعون الراس فلا تهتمون إذا طلعت لكم نائبة خوارة وخابة روحها على ما ميش.. أحسن مافيها تصريحاتها ما تدري مع منو وحق منو وحق شحقه وحق ليش.. جبح يجبح الكاكاو والورد.

• كلمة راس
الله يستر وما ينحل المجلس وتصير الانتخابات ونتفاجأ بفوز أربع نائبات يدد تكون بينهم فطومة وينقلب المجلس سامري وينترس ياوي وشب وحرمل.. لا يبا أنا راضي بأسيل ولا فطومة لا يحوشك

إقرأ المزيد...

خصخصوها وخلصونا

3/5/2010
البلد رايحة مستنة الى الخصخصة، والخصخصة مو بدعة، ولا كفر ولا شرك ولا عبادة اصنام ولا فساد ولا ولا ولا.. لانه يا جماعة الدول الاكثر فسادا في العالم هي الدول اللي مو مخصخصة، اقصد الدول الاشتراكية، وشركاتها كلها خسرانة لانه المدير اللي يحطونه الحكومة هو المراقب على الاموال، يعني هو يراقب نفسه!
الخصخصة في الدول المتقدمة في كل العالم مثل الديمقراطية، الديمقراطية ماتعني الفوضى بل بالعكس فيها رقابة وامن اكثر من الديكتاتورية، والخصخصة نفس الشي، معناه جهاز رقابي شديد يراقب حتى عدد النمل اللي يدشون ويطلعون من الشركة، يعني الخصخصة في اي دولة بالعالم يعني، شغل اكثر، مصاريف اقل، وارباح اكثر، وخدمات احسن.. ياسلام علي لمن اقط حكم!
يا جماعة الحكومة قاعدة تقط فلوسها بالبحر، في المواصلات والاعلام والرياضة مع انه بسهولة ممكن تتحول خاصة وتحت اشراف الحكومة، قارنوا بين الخطوط الجوية الحكومية وشركات الطيران الخاصة، قارنوا بين قنوات تلفزيونات الكويت وبين باقي القنوات الخاصة حتى تعرفون الفرق بين اللي يتابع ويدفع من ماله الخاص، ويسعى علشان يتطور، وبين اللي نايم ومتأكد انه اذا اشتغل او ما اشتغل نفس الشي!
طيب ليش في معارضة، ونواب يصرخون ما نبي خصخصة، لسبب بسيط لانه وقتها ماراح يصير عندهم شغل، بعض هالنواب شغلته في الحياة، يسوي واسطة حق فلان في هالوزارة، ويرقي نسيبه الفاشل ويسويه رئيس قسم، ويرز رفيجه ويسويه مدير، وينقل فلان ويحط علان.. بس هذه شغلتهم، فرضا صارت خصخصة بعد ما يقدر يوطوط عند باب الشركات، لانه الناس ما تبي بطالية واللي ينامون بالبيت ويحطون معاشاتهم تحت المخدة!
بس بصراحة موقف احمد السعدون، في الصميم، الرجل كل ما صار شي وقف مع المعارضة وضد الحكومة في كل تافه وبسيط بس وقت الصجية حط السيارة على «R» ورجع على الشعبي، ودخلهم بالطوفة، وكل طوفة وانتو بخير!
إقرأ المزيد...

لله درك يا سمو الأمير

28/4/2010
ص: صعبتها على كل مثير للفتنة والقلاقل.
ب: بحت باللي بقلوب كل اهل الديرة.
ا: أنا أشهد انك حكيم زمانك يا شيخ الشيوخ
ح: حطيت ايدك على الجرح بكل وضوح
ا: انت الزعيم اللي نفتخر فيه دايما
ل: لا تعبت يا أمير قلوبنا وعقولنا
أ: الله يطول عمرك ولا يخلينا منك يا كبيرنا
ح: حلت ايامك ودامت لياليك بطاعة الله وخدمة الشعب
م: ما أعتقد بعد كلامك في كلام يا شيخنا العود
د: درأت كل الشبهات بتصريحك الواقعي
ا: أحمد ربي اني كويتي وانت تاج راسي وأميري
ل: لاح عزك يا بوناصر فوق لاح
ص: صلاح شعبك كان ولا يزال أهم أولياتك
ب: بايعين لك الروح لي أمرت نفداك كلنا
ا: ادام الله عزك لأن عزنا من عزك يا صباح العز
ح: حافظك الله وترد لنا سالم يا سمو الامير

• كلمة راس
وطني الكويت سلمت للمجد..وعلى جبينك طالع السعد
يا مهد آباء الأولى كتبوا..سفر الخلود فنادت الشهب
الله أكبر انهم عرب..طلعت كواكب جنة الخلد
إقرأ المزيد...

ثقافة الخصخصة

27/4/2010
لما تشوف اللي رفضوا قانون أو مشروع الخصخصة في مداولته الأولى على طول تنبهر وتطق بريك وتسحب السايد وتشوف ويهك بالمنظرة وتتعوذ من إبليس.. وترد تتمقل بالأسماء فتكتشف أن الغالبية منهم أبناء قبائل وطلعوا بانتخابات فرعية.. والبعض الآخر منهم يموت وينولد بين الجماهير بالشارع يوميا.. هني على طول تنط لك ستة واربعين علامة تعجب وستعش علامة استفهام وتستغرب وحواجبك يختفون.. ترجع تطالع المنظرة وتاخذ نفس عميق وتالي تكتشف أن الثقافة والبيئة ما زالت تؤثر في العمل السياسي.. شلووون.. أنا اشرح لكم النظرية.. لو مسكت لك كويتي من أصول عيمية وقلت له بشتري بيتك.. على طول يدششك بمفاوضات ويلوع جبدك لين تدفع أعلى سعر أو تهون عن البيعة.. لأن ثقافته هالشكل.. ولو قضبت لك كويتي من أصول حساوية وقلت له اعزمني على العشا راح يننك لين يحوشك مرض الشبع بدون ما تاكل شي وبالتالي تهون او تعزمه على حسابك وتفتك.. ولو اخترت كويتي من أصول نجدية وقلت له عندي مشروع أبيك تشاركني فيه راح يطلع لك براسك ستمية قرن وان طلت نسبة بالمشروع يمكن يطلع لك نص بالامية وتحب كوعك.. ولو تناقشت مجرد نقاش مع كويتي من أصول عراقية بموضوع الأمور الطائفية تشوفه يلطم ويبجي ويسوي لك مهرجان ما تخلص منه فتاكل هوا وتسكر الموضوع.. بالتالي لو رحت ديوان أحد أبناء القبائل وطرحت عليه فكرة انك تشتري سيارته على شرط انك تقضي كل مشاويره وتودي وتييب عياله راح تتفاجأ بمخه المقفل ويبتدي يقول لك وشلون وش الدبرة وش انت ناوي عليه ويفتح لك بيبان ما يسكرها إلا رب العالمين هذا اذا ما طار عقلك وصرت مهبل.. عرفتوا الحين اللي صوتوا على الخصخصة بعدم الموافقة شنو عذرهم؟ هذي الكويت صل على النبي اهيا ديرتنا وفيها اللي نبي.. وآخر شي يطلع لك متفذلك ويقول لك شعبنا واعي ومتعود على الديمقراطية.. والنعم فيهم كلهم لكن الطبع يغلب التطبع.. عطني موسيقى وريحني من هالدوخة.. الحل بالحل اذا عدت أو ما عدت الخصخصة.. جبح ثقافة.

• كلمة راس
الكاتب المأجور بوكرش متروس لحم مشوي وبو رقبة تعودت على نومة الخيمة اللي هاب هاليومين بالتهديد ومسوي له صندوق مثل خباز حسينو بدرب الزلق جنه مو له.. وايد شاد حيله ومالي ايده من الشارع.. لا تلومونه اللي ثقافته في الكتابة شوارعية يموت على الشارع.. صج مأجور.. سليمة تصكك.
إقرأ المزيد...

تعديل الدستور

26/4/2010
النائب علي الراشد ما كفر لما نوى يتقدم بطلب تعديل الدستور.. والرجل اجتهد وعمل دراسات وحاول يستمزج رأي الكتل السياسية وعمل برزنتيشن بسيط للعامة وكاهو قاعد يحاول يطلع على القنوات وبالصحف يشرح العلة ويشخصها ويطرح رأيه كنائب تهمه الكويت من وجهة نظره.. لي هني عادي الامر.. الغير عادي لما احد التكتلات يتهم بوفيصل بالعبث بمقدراتنا وزعيمه موافق على الخصخصة! والغير عادي لما فيصل المسلم يتهم بوفيصل بالتجني واهو اول من خرق المادة «ففتي».. «حلوة «ففتي» يعني خمسين.. استمر يابوفيصل بس واللي يسلمك نبي مادة يديدة بالدستور تفكنا من العبث بعقول العالم والنزول للشارع.

الملتقى الاعلامي
ماضي الخميس مخلص لوطنه والدليل ما يقدمه للجسم الاعلامي من عطاء ويعرف يتعامل مع احباب واصدقاء الكويت بشكل ممتاز، وزيد فوق كل هالامور الرجل مزيون وانيق ويعرف الاصول.. بوعبدالله تكفه اعمل لك معهد لتعليم بعض النواب شي من اللباقة في المحافظة على اصدقاء الكويت بدل تنفيرهم..

بن سلامة.. آل ثاني.. الدويش
هذي القاب اصحاب القرار في الثلاث شركات الخاصة بالاتصالات .. زين والوطنية وفيفا.. ارجوكم رجاء حار جدا جدا جدا جدا.. ابيكم تتبنون مشروع جائزة تشجيعية تضم احلى لوحة واحلى صورة واحلى قصة خاصة بالطفل.. منها تقدمون شي لمجتمعكم، ومنها ننشر ثقافة التسابق باتجاه التنمية.. واذا ما لكم نية تتبنون الجائزة بقطع خطوطي اللي عندكم ثلاثتكم وقد اعذر من انذر.. يازين الخط الأرضي .. متردد.
إقرأ المزيد...

«من أمرني.. من نهاني»

25/4/2010
شهور وسنين وأسابيع وأيام وساعات ودقايق وثواني ولحظات وهنيهات (قوية هنيهات)، تمر على أجمل بلد وأحلا بلد وأعظم بلد في الكون بدون فايدة..؟ بتقولون متشائم قولوها ما يهمني بتقولون ما عنده سالفة بحط أصابعي بعيونكم يا مسؤولين ومهتمين وأعلنها بصريح العبارة.. الحشيمة الحشيمة الحشيمة.. اي نعم الحشيمة اللي ضاعت وغادرت بعض اهل الكويت من مواطنين ومسؤولين وغيرهم.. رضينا بالنقد والديمقراطية وقبلنا برأي الأغلبية وقلنا يمكن هالأمور طارئة وراح نتغلب عليها.. لكن التجربة أثبتت أن التمادي صار سمة البعض.. وأن الخطوط الحمرا مالها وجود إلا بمخيلتنا.. والعيب والحشيمة ما عاد لهم أي تواجد في تعاملنا.. تبون الدليل روحوا وشوفوا مقالات عراب الفتنة الطرار الفتيني الناقم صاحب أكبر قلم مأجور بالعالم.. شوفوه شقاعد يكتب من سموم وقاعد يكسر حاجز العيب اللي ما يعرفه.. شوفوه شلون مدفوع الأجر لتخريب أخلاقيات التخاطب بين اهل الكويت.. لكن قالوها: من أمرني من نهاني.. ودام أجهزة الأمن مرتاحة.. وأهل الربط والحل عاجبهم.. الله يستر على الكويت ولا تستغربون اذا شفتو عراب الفتنة المأجور يحط صور رموزنا وينتقدهم بالصوت والصورة والقلم ولا أحد يمتلك يقول له شي.. هزلت.

• كلمة راس
قد أعذر من أنذر وهذا أنا بطيت الجربة لكم وقلتها بحسرة ومرارة.. يا توقفونه عند حده وإلا باجر بيطلع لكم ألف كاتب مأجور وبعثي وغيرهم، وساعتها بتقولون صدق بوشيخة وجذب علينا بوالقراطيس..
إقرأ المزيد...

قاعدين بالحراج

22/4/2010
النائب علي الراشد صرخ على النواب في الجلسة الأخيرة بسبب الفوضى، وقال لهم «وين قاعدين.. بالحراج» طبعا النائب يقصد الطنازة، بس ترى صج، اقول للنائب الفاضل نعم سوق حراج وشريطية حراج، حراج سيارات، اثاث مستعمل، سكراب.. كله ماشي!
كل واحد من النواب منزل بضاعته ويحرج عليها، واحد منهم يتكلم عن «رافال» وصفقة الاسلحة والطيارات، عاد نوابنا خبراء يعرفون خاصة بالطيارات الحربية، اصلا يقولون ان تكتل الاصلاح والتنمية، أهمه أعضاء في لجنة تطوير الاسلحة في وزارة الدفاع الاميركية، يعني الاسلحة هناك ما تمشي الا لمن يوافق الثلاثي!
تبون حراج ثاني، قصة احد النواب الاسلاميين مع النصب التذكاري اقتراح نصب تذكاري لشهدائنا اللي مو سامع عنهم، ما ادري وين كان ايام الغزو؟! اعتقد بالمقاومة! المهم الاخ قال يبي فتوى، فتوى شنو و ليش؟ نصب تذكاري للشهداء، مو نصب تذكاري للرقاصات، بس عاد مثل ما قال الراشد، حراج!
تبون حراج، سالفة نائب ثالث مع لجنة المرأة، شيبي فيهم؟ لجنة حريم، ولازم ما في اختلاط، ليش مناشبهم، ومتابع اخبارهم، وكل شوي ناط يسأل عن تقاريرهم، مع انه الموضوع حريمي، هو شكو مدخل روحه ومسوي حراج عليهم محد يدري؟
والعملية ماشية، هذا يقول وهذا يرد وهذا يسب، وآخر شي يحيلونه للجان! كل ما صارت قضية حولوه للجنة تحقيق ولا لجنة برلمانية، ليش؟ لانه مالهم خلق، يتكلمون عن شي يفيد الناس ولا يهم الناس، وهذا هو الحراج، الشريطي دائما يدور على بضاعة رخيصة يبيعها غالي، سيارة بومية يبيعها بالف، وربعنا مع الاسف قاعدين يبيعون اغلى شي وهو وطنا.. برخيص!
إقرأ المزيد...

القلب المأجور

21/4/2010
ما يختلف اثنين ان عراب الفتنة صاحب القلم المأجور منكر حسنة وما يبين بعينه شي ولا تنترس عيونه الا لي نزل القبر وجابل أعماله القبيحة.. عراب الفتنة ما غيره اللي يعيش مراهقة متأخرة بين بنات وشباب الانترنت عنده قصص عمية وحوادث تلوع الجبد ريحتها تزكم كل الخشوم بالديرة.. ببتدي معاكم اليوم بقصة دخوله للساحة الاعلامية كمريض بالقلب عضويا ونفسيا لغاية ما صار قلبه وتحول الى قلم مأجور يضرب رموز البلد، ويمزق وحدتنا الوطنية ويتجنى على عمامه وتاج راسه.. العراب الدايخ حس بعوار صوب جتفه اليسار، وتم تشخيص الحالة على انها مرض بالقلب.. فقام وراسل مدينة امريكية مشهورة بجراحة القلب اظن اسمها يا كلوف لاند او كلاف لاند او كليف لاند.. خلونا نقول انها مدينة طبية امريكية وبس.. المهم.. لما راسلهم قالوله عمليتك تكفي هالكثر.. دور يمين يسار ولأنه حافي ومنتف خلقه التفت عليه اخوه الرجل الشهم الوفي واخذ له من الشيخ مبلغ يساعده على العلاج.. وهني كانت اول الخطة.. طبعا الطرار الفتيني عراب الفتنة صاحب القلم المأجور خطط بعد ما عالج الشيخ قلبه عن طريق اخوه الوفي وقال حق روحه.. هذي فرصتك يا بوخدود متروسة.. وبالفعل بقعدة وحدة قدر يستحوذ على انتباه الشيخ وأول شي سواه لما تقرب من الشيخ خون اخوه وطرده وصار نائب المدير.. وابتدت قصة الطرارة والقلم المأجور.. واحد مريض نفسي وعضوي مثل هذا ياي يمثل علينا دور الشريف العفيف؟ بس شتسوي بشوية يهال قد يغسل عقولهم بلسانه وقلمه المأجور.. طيح الله حظك يا مأجور..

• كلمة راس
غريب عجيب أمر النائب المحترم محمد هايف المطيري! ما يوقف اذا انعزف السلام الوطني ويقول دستورنا القرآن فقط.. والحين يطلع ويقول انا ضد اي تعديل دستوري؟ عاد كلش اللي يسمعك يقول علي الراشد ماخذ رايك.. شهالتناقض؟.
إقرأ المزيد...

ملحق إسلامي.. تبع منو؟

20/4/2010
يا جماعة الخير أنا بحلم والا بعلم؟ صج والا غشمرة؟ من صجكم اللي قاعد يصير عندنا بمجلس الأمة والا مسرحية كوميدية؟، شنو يعني نائب منتخب يقترح بإرسال ملحق اسلامي بسفاراتنا بالدول غير الإسلامية مهمته نشر الاسلام؟! خل نفترض ان اقتراحك بمحله.. طيب وين اللي حولك اللي ماخذين شهادات ومتعلمين.. شلون طاف عليهم؟.. ولو سلمنا لك وقلنا انك صح.. منو بترشح للملحقية الاسلامية؟ شافعي والا حنبلي والا مالكي والا حنفي..؟ واذا كان شيعي شلون بتختاره..؟ تبع أي مرجع؟ وعلى فرضية ان اقتراحك تم قبوله هل راح تقبل ان بريطانيا تدز حق سفارتها كاثوليكي يبشر اهل الكويت ويحثهم على اعتناق المسيحية؟ وين رايح؟ ارجوك طق بريك اخذ نفس.. وبعدين شنو الأسلحة اللي راح يتسلح فيها ملحقك الإسلامي؟ بأي كتب راح تطرشه هناك؟ بكتبكم والا بكتبهم والا بشنو.. احنا مليون كويتي مسلم ومداعمين ومتهاوشين ولا احنا متفقين إلا على أقل الاشياء، ما تقول لي شلون ومتى وكيف وليش وشحقه هالموضوع..؟ تبون الصج هذي مصيبة اذا كانوا مشرعينا بالمجلس هالنمونة لا ثقافة ولا منطق ولا إحساس بالمسؤولية.. ودام الموضوع جذيه سبهللة أنا أعتقد ان الأيام القادمة راح تحمل لنا اقتراحات عمية كثيرة.. فلا تستغربون اذا شفتوا نائب مقدم اقتراح يقول فيه ارجو تعيين ملحق ليبرالي في كل سفارة كويتية لإقناع الناس بالفكر الليبرالي.. ويطلع لنا نائب يقترح بإرسال مشجع رياضي لكل سفارة لتعليم العالم الاوربي شلون يصطدموا مع «الفيفا».. وثالث يقترح بإرسال ملحق كويتي متخصص بالجذب لتعليم الغرب ثقافة التكلك.. جبح نائب وجبح اقتراح ووعوووووه على هيك اقتراحات.

• كلمة راس
أنا كوني مواطن كويتي أطالب وزير الخارجية بتعيين الخمسين نائب في سفارات العالم علشان نفتك منهم ويكون دورهم بالسفارات تخليص معاملات الكويتيين بالخارج في مؤسسات الدول الأخرى الحكومية.. منها نفتك منهم ويتعلمون هناك شلون القانون ماشي.
إقرأ المزيد...

نبي الإثنين إجازة

19/4/2010
جان زين المسؤولين في ديوان الخدمة المدنية يفكرون ويبحثون ويقررون باعتماد يوم الاثنين من كل اسبوع اجازة لكل موظفي الدولة بشرط.. شرط ان تنعقد جلسة مجلس الأمة في ملعب كرة ويكون الموظف حاضر للجلسة.. تسألوني ليش هالاقتراح؟ اجاوبكم واقول لكم.. اول شي الناخب يراقب النائب جدام عينه ويشوف الافلام الهندية اللي تصير بين النواب والوزراء جدامه علشان يحكم على النائب اللي عطاه صوته.. وثاني شي نستعمل الملعب لأنه بعد قرارات الفيفا يمكن يمنعوا المباريات.. ثالث شي يمكن بالجلسة الرابعة تطيح المقاعد وينهار الملعب ونفتك من الناخبين الملاقيف وبالمرة نفتك من النواب الداثرين.. أكيد راح تصير كارثة عندنا بس يا جماعة لا تركزون على السلبيات أبيكم تشوفون الجانب الإيجابي للكارثة.. اذا قلنا الحضور سبعين ألف ومات منهم خمسة وثلاثين ألف؟ جذيه نقدر نجنس كل البدون ونسكر ملف اهم قضية عندنا.. واذا قلنا ماتوا ثلاثين نائب راح نشوف ان الناس تخاف ترشح عمرها للمجلس الا المتخصص ويمكن يصير تعيين نص المجلس ونفتك من بلاوي الاستجواب والمال السياسي.. واذا قلنا ماتوا ست وزراء مثلاً.. بعيد الشر عن سمو الرئيس واحمد الفهد والمزيون بدر الشريعان.. راح نقدر نعدل الوزارة من يديد ونوزر ناس شباب قادرين يحققون طموحنا ويطبقون التنمية.. هذا غير فرص العمل اللي راح يوفرونها لنا اللي ماتوا والأزمة الإسكانية ويمكن نقدر نوسع دائرة قبول الطلبة بالجامعة.. شرايكم؟ والله تبون الصج أنا مع أن نسوي بروفة للنواب بروحهم مع جم وزير وندعو ناخبين من كل الدوائر ونجربها.. اذا مشت الامور خوش على خوش.. ها تبون إجازة والا لأ يا شباب؟ جبح مجلس مجتمع بملعب..
إقرأ المزيد...

رسائل للنواب

18/4/2010
• جاسم الخرافي - صحتك بالدنيا
• عبدالله الرومي - حاسب نفسك
• دليهي الهاجري - مبروك جيب اللكزس
• عبدالرحمن العنجري - حكومي
• علي الراشد - لا تردد ولا تراجع
• مسلم البراك - تكتيكك فاشل
• أحمد السعدون – تبي تروح الكتّاب
• حسين القلاف - قوة
• سيد عدنان - عاد الينا من جديد
• محمد المطير - عاش ملك السياكل
• مرزوق الغانم - طموح.. إلى أين؟
• مبارك الوعلان - وينك سألنا عليك وينك
• جمعان الحربش - الرافال بترجعك الخيمة
• عدنان المطوع - مواقف رجال
• حسن جوهر - رأي سديد
• أسيل العوضي - مثل الهواء..
• ضيف الله بورمية - نبي ندوة تحل المجلس
• فيصل الدويسان - جم وكيل في الإعلام

• كلمة راس
لأن الجو سرايات والوضع السياسي رطوبة اعتقد ان مجلس الامة لا راح يقدم ولا راح يأخر بالتنمية شي، وأكبر دليل أن البعض يطالب بعقد الجلسات دون حضور الحكومة..يعني الموضوع كله سوالف بسوالف وماكو زبدة..جبح!
إقرأ المزيد...

مجلس فلسطين

15/4/2010
صحيت من النوم الساعة 11.33 الضحى العود.. وتذكرت الوقت تحديدا لأني فتحت الموبايل وابتدت رسايل خدمة برلماني تهاجم موبايلي وكان أولها (الرئيس يرفع الجلسة لعدم وجود نصاب) مع ان النصابين شكثرهم.. استغربت وما استغربت.. اللي خلاني استغرب عدم حضور النواب واللي خلاني ما استغرب غيابهم الدائم عن الجلسات.. المهم.. قمت من فراشي وغسلت ويهي وسخنت لي فطاير وسويت لي جاي أخضر.. ورجعت ومسكت موبايلي وهات يا رسايل من خدمة برلماني.. وبديت استغرب وارفع حواجبي من كلام وتصريحات النواب بالجلسة.. كان كلامهم منصب.. (حلوة منصب).. على قضية فلسطين.. واحد يقول يجب ان نوقف العدوان.. وثاني يقول فليخسأ وزير الخارجية الاسرائيلي.. وثالث يشجب ورابع يستنكر وخامس ينادي بجمع السلاح ومواجهة العدو! حسيت من كلام نوابنا انهم وايد متأثرين بمشكلة أهل غزة ومقطع قلبهم بيت لحم وشاق راسهم الاقصى.. وياني إحساس بأن الاستخبارات الاسرائيلية من سمعت كلام ربعنا سوت استنفار وطقتهم الخرعة! والأهم من كل هذا واللي ضحكني ان اثنين من النواب مدحوا المقاومة في غزة ولبنان؟ يعني «حماس» و«حزب الله».. ليش ضحكت من هالتصريحين؟ أنا أقول لكم.. عندنا جم نائب بالمجلس مرة يكفرون الشيعة ومرة يمدحون مقاومتهم.. ومرة يناصرون العريفي اللي رايح اسرائيل ويغلط على السيد السيستاني ومرة تلاقيهم قاطينه قري ويمدحون الشيعة.. شي يضحك يدل على شغلتين لا ثالث لهما.. الاولى انهم ينسون بسرعة والثانية انهم ماشين مع الموجة والجمهور عاوز كدة.. ضاعت الجلسة على فلسطين الا ماراح ترد وان ردت أكيد مو التصريحات السبب.. وضاع يوم من الإنجاز والتنمية.. وسلم لي على مجلس الأمة..

• كلمة راس
جان زين النواب اللي وايد ذابحتهم قضية فلسطين يستقيلون من المجلس ويلبسون لبس عسكري ويشيلون أسلحة خفيفة مثل نباطات وعصي أو أسلحة ثقيلة مثل صخر عشيرج ويروحون غزة ويفكونا.. هم أهما يستفيدون ويصيرون شهداء وهم احنا نستفيد ونحصل لنا نواب يتابعون قضايانا الداخلية.. جبح مقاومة نيابية.
إقرأ المزيد...

مسلسل سوسو.. وميمو!

14/4/2010
قطاع حيوي يئن من الاهمال.. ويتعرض لإهانة بليغة.. وهو بلا ضمائر.. هذي عناوين عريضة للي قاعد يصير في القطاع اللي تعتمد الديرة عليه مليون وستين مليون بالامية.. واللي منه نصرف ونكشخ ونتعلم ونتعالج.. أي نعم.. لولا نعمة الله علينا فيه ما كنا صرنا دولة مؤسسات ولا كان عندنا دستور ولا يمكن تقوم لنا قائمة.. شيوخنا الله يحفظهم من عهد أحمد الجابر رحمة الله عليه وهم محافظين على هالقطاع وبنوا علاقات استراتيجية مع العالم كله بهذا الخصوص.. قوتنا كدولة كلها مستمدة منه.. وهذا شي متفقين عليه ككويتيين من صغيرنا لي كبيرنا.. وآباءنا وأجدادنا اللي أسسوا العمل فيه وجاهدوا وحاربوا وجلبوا الانجليز وشاركوهم وتعلموا منهم.. لو يرجعون اليوم ويشوفون اللي قاعد يصير.. اقل شي يمكن يلحقون بعض قيادات القطاع بنييديه ويكفخونهم تكفخ.. أو يمكن لورجعوا اللي أسسوا القطاع يشوتونهم فناقر لين يقولون الله حق.. للأسف مصدر دخلنا الوحيد قاعد يتعرض لهجمة منظمة تنم عن إهمال وتغافل ومص دم وعمك اصمخ.. قيادات ما همها الا الترزز والمصالح الحزبية أو الشخصية ولاني شايف عضو يرفع ايده ويقول شي.. اللي يسمعهم يقول عندنا ستعش نهر وثلاثين مليون نخلة وخمسين حقل ذرة.. يا جماعة اصحوا اذا راح هالقطاع وفسدت قياداته ضعنا.. سوسو وميمو لاعبين لعب .. واللي تحتهم مع الخيل يا شقرا.. اللهم بعض ابناء الكويت المخلصين اللي كل همهم دوام هالنعمة واستمرار البلد.. وأنا بوشيخة بعد اللي وصلني من أوراق وحقائق من تمادي سوسو وميمو ومسلسل إهمالهم.. اقولها بملء الفم إلا هالقطاع.. واذا سوسو وميمو عاميين عيونكم يا قيادات ومسؤولين فبوشيخة بيحط لكم مرهم يخليكم تشوفون اللي قاعد يصير.

• كلمة راس
شكوك كثيرة تحوم حول البعض في هالقطاع.. ذولا ما ينسكت عنهم.. آخرتها بتبين السالفة وتنكشف.. واذا النواب مالهم خلق هالموضوع أنا أتصور أجهزة الاعلام والصحافة والكتّاب راح يكون لهم موقف مغاير.. وقد أعذر من أنذر.
إقرأ المزيد...

شطارة .. موعيارة !

13/4/2010
قريت تصريح من فترة وطحت على ظهري من الضحك.. واحد بايعها بالطول والعرض اصدر «فتوى» ان وسائل الاعلام ورا كل مصيبة تصير بالديرة.. خذ عندك مثلا البنغال اللي يبوقون الوايرات بسبب الصحافة الكويتية.. والفلبينيات اللي بصالات البلياردو يتحرشون بالشباب بسبب القنوات الفضائية الكويتية.. وحوادث السياكل بين كيفان والخالدية بسبب المجلات الفنية الكويتية.. شها المنطق العوي.. شها التصريحات الداثرة.. ماعاد فيه عذر مقنع فهاجم الاعلام عباله طوفة هبيطة.. بس المصيبة مو هني.. المصيبة الكبيرة ان اللي صرح حب يصير مكار وعيار على العالم بس ما عرف .. لانه البتمبة نفسه اهو اللي عطى صلاحيات حق شخص مكشوف لزملائه فالغلط عليه مو على الاعلام.. وعلى فكرة الاعلام مثل التجارة فيه شطارة وما فيه عيارة.. والا انت بتقط بلاويك على خلق الله وتطلع سالم؟
البتمبة اللي صرح وضحكنا نقول له.. جان زين يتبنى فكرة استحداث خدمة رسايل خاصة للتصريحات المضحكة.. وكل يوم يدز تصريح علشان نضحك وننسى الهم.. وبالمرة اذا يبي يستفيد يسوي مسلسل تصريحات حق رمضان.. يحطه على قناة ما فيها تفصخ وخرابيط.. يأخذ أجرين من الله.. أجر التوبة عن الافلام الهشك بشك في «الباقات» اللي هو يروجها.. وأجر انه يضحك اهل الكويت على تصريحاته.. وانا اضمن له ان وزير الاعلام السنة الياية يعطيه منتج منفذ ويصير زميل اعلامي لنا وما يهاجم وسائل الاعلام ويتوب مثل ما تابت الممثلة المصرية.. يا اخي انت تخصصك غير.. وخبرتك بالبسكوت رهيبة.. ومعرفتك بالسياسة مثل معرفتك بالاعلام.. جابل شغلك وفكلنا.. ولا تنسى تسكر السحاب وتشد الحزام منشان الله لوعت جبودنا.. جبح تصريح..

• كلمة راس
النائب الفاضل محمد هايف انت عضو لجنة الظواهر، ليش ساكت عن باقات تلفزيونية تروج للدعارة على عينك ياتاجر؟
إقرأ المزيد...

الكاذب عشر

11/4/2010
كل يوم والثاني تفوح ريحتك يا محامي الغفلة.. وكل أسبوع تنكشف أكثر يا بولمعة.. وتكتب كلام ماله معنى.. وصاير علينا رأفت الهجان بزمانه.. وسين وصاد ولام وخاء وحاء.. يا عمي بطل من سوالفك العمية.. وبعدين تعال شسالفتك هاليومين شغال نفي بعلاقتك مع الشيوخ.. هذي قوية ما تتصدق.. لأن المعروف عنك تحلب النملة وبخيل.. بالتالي منو دفع لك ثمن الحصة؟ الا اذا سهم الصناعات صار بستين دينار واحنا ما ندري!.. وعلى طاري سالفة التخرف اللي طايح فيه ومسوي روحك هدف الاستخبارات الروسية، وان السي آي إيه حاطينك بقائمة الكتّاب الأكثر خطراً.. وسالفة الرموز! اثبت لنا انك مريض نفسي فريد من نوعك.. يمكن تكون آدمي وأشك بهالشي، والدليل خدودك اللي تتفخت من عطايا عمامك.. بس موضوع ان جهازك الأمني الخاص أكد لك وأثبت لك وبين لك.. جايدة.. انت عيال عمك رافعين الجام عنك.. والخيمة تشهد ان اقرب الناس لك ما يبونك.. أما ربعك فما عندك إلا اثنين.. واحد يتاغر من زود العطايا.. والثاني مخليك ورايح.. تبي الصج الشرهة مو عليك.. الشرهة على الزمن اللي خلاك أنت وأشكالك تعيثون فساداً بالديرة.. والشرهة العودة على اللي كبر خدودك.. على أجهزة الأمن اللي يقرون كلامك وما يتحركون.. تدري شلون.. يمكن لاعت جبودهم منك.. ومن جذبك وتخاريفك.. كل مقال تكتبه عبارة عن جذبة يديدة.. وكل ما هنالك انك ودك تصير بطل قومي.. بس الحقيقة انك بطل سفن آب بو مغطة تفتر.. مو الطويسة.. انت سحقت مسيلمة وطقيت بولمعة ستين صفر.. وتفوقت على كل الشعراء بالخيال يا بولحم مشوي..

• كلمة راس
المحامي طفل الانابيب بدل لا يكون هو المترافع عن المتهمين .. صار هو عملياً داخل قفص الاتهام.
إقرأ المزيد...

حضرتك عاوز إيه؟

11/4/2010
في شي غريب عندنا بالبلد! إحنا ديرة أو كلش ما عندنا شي، او عندنا من كل شي اثنين!
في اشياء كثيرة ما عندنا، ما عندنا ملعب كرة رئيسي مثل الناس، او عندنا، نسيت بس لي الحين ما خلص، بس يخلص يصير عندنا معلبين عند بعض!
ما عندنا مثلا دار للاوبرا، ياسلام لو عندنا دار اوبرا، جان النواب كلهم مطيحين هناك ومستلمينا هالغناء الاوبرالي، مع رقص الباليه!
ما عندنا مكتبة رسمية للدولة، مع انه كل دولة عندها هالمكتبة، حتى يوثقون تاريخهم!
تبون تحسبون، ما عندنا اشياء كثيرة، بس صار عندنا الحين شيئين!
رؤساء الاندية صار عندنا كل نادي «رئيسين»، و«مجلسين» ادارة!
وصار عندنا شي غريب في هيئة الشباب والرياضة، صار عندنا رئيسين للشباب ونائبين للرئيس!
وهذا ان دل على شيء، فانما يدل على لا شيء، يعني شنو هالفوضى، معقولة مافي احد يعرف القوانين، معقولة ما يقرون القوانين شلون صايرة، بس يالله وراهم وراهم، معاهم معاهم.. برو برو، بيو بيو، ماكو احد يسأل ليش وشحقه!.. بس الظاهر هذا الخبير القانوني سألوه، يصير ولا ما يصير؟ وجاوبهم «حضرتك عاوز ايه»!
ياجماعة احنا في مركب، ومركب الرياضة فيه خمسين الف نوخذة، وكل نوخذة، وراه عشرين ألف مستشار دايخ، والله يخليه لنا رئيس الشباب، لبس هالبشت ومو راضي يفصخه، طيب ما علينا، المنصب حلال عليك، نبي قرارات، نبي خطة، نبي شغل... ماكو شي، متفرغ للنجرة بين فلان وعلان، وضد فلان على علان، اي خلاص عاد، رئيس الشباب والرياضة المفروض يكون محايد يمثل الجميع، مو يمثل على الجميع انه محايد، هالهيئة المسكينة مهتمة بكل شيء، ماعدا الشباب.. الله يعين الشباب!
ونختم مقالنا، باغنية «توني عرفتك زين، تلعب على الحبلين، كل يحب واحد وانت تحب اثنين»!

• كلمة راس:
اتصل فينا كثيرين يسألون منو طفل الأنابيب؟ معقول ما عرفوه؟ هو بالشكل نسخة طبق الأصل من عبدالمجيد عبدالله.. بس ياريته بنص اخلاقه..
إقرأ المزيد...

جاسم الخرافي.. استريح (1)

9/4/2010
محد ينكر الدور السابق والمشهود للرئيس جاسم الخرافي في إدارة مجلس الامة وتطبيق لائحته الداخلية، ووضعه على سكة العمل التشريعي والحرص على المصلحة الوطنية.. وفي نفس الوقت مايقدر أحد يتجاهل المواقف المفصلية للرئيس الخرافي، أقلها من جم سنة ولي اليوم، وفي ظروف وايد حساسة، واللي يفتخر فيها عياله ويحق لهم.. لكن ايضا، أي مراقب محايد وفلته، يعرف على طول بان استمرار الرئيس بو عبدالمحسن في ترؤس السلطة التشريعية وفي العمل العام يحدّه مثل يقول «مرغم اخاك لا بطل» حيث ان «ابو عبدالمحسن» طقت جبده من تصرفات بعض الاعضاء في مجلس الامة، واللي تجاوزوا كل الحدود والاعراف والخطوط الحمرا والمبادئ والتقاليد العتيجة، فهو جود أعلن عن عدم رغبته بالترشح لعضوية المجلس الحالي، وقال وقتها ان السبب الاول هو ضيقة خلقه من انحدار لغة الخطاب في المجلس، واللي يتعارض مع طبيعته وتربيته وحرصه على الاخلاق العالية، لكنه رجع عن قراره، وصدق ظنه، وردت اللغة السوقية داخل قاعة عبدالله السالم الى أسلوبها الاول، وأكثر، اللي ضيق خلق «بو عبدالمحسن» وأثر على تغيبه المتكرر عن رئاسة الجلسات «الساخنة»، وحتى تصريحاته صارت بالقطارة، وما فيها ريحة، إلا ان خدمة «برلماني» كانت تنقلها وتبثها بشكل واسع، مع ان ولده الحبيب لؤي تدخل لإيقاف هذه الخدمة بعدما نشرت خبر عن حكم يدينه في قضيته مع السيدة فوزية الرفاعي، وهذه القضية لها قصة ثانية.. ورح نتكلم عنها لكن في العموم بعدين الظروف السودة اللي تراكمت في مجلس الامة صورت الرئيس جاسم الخرافي وجنه فقد السكان من حركة مجلس الامة، أكبر دليل جلسة السب والصراخ والردح الحجي الفاضي قبل اسبوعين الامر اللى صارت الجلسة مثل سوق الجت، ضاعت هيبة ووقار الرئاسة واعتبار مجلس الامة.. فبعد أن كان لمطرقة الرئاسة دورها الكبير صارت طقطقة القلاليف، وهني يبدأ الخطر، لان الرئيس الخرافي ما استطاع جدام هالفوضى السياسية احكام السيطرة على زمام مجلس الامة وفرض اللائحة الداخلية، وقبل ذلك فرض وقار وهيبة الرئاسة للي يستمده من ثقة نواب الشعب، هذي الفوضى تسببت بسلسلة من المشاكل، اهمها خطر القطيعة بين مجلس الوزراء كسلطة تنفيذية ومجلس الامة كسلطة تشريعية، وهي ضد رغبة سمو الامير المتكرره، ويخالف طموح الحكومة، واكيد ضد قناعة الخرافي نفسه..
لذلك، وبكل محبة وتقدير لـ«بو عبدالمحسن» نقول: هذا التدهور مو انت المسؤول عنه وأكيد مو راضي عنه، وكلنا ندري شلون خدمت الكويت.. وكلنا نعرف الظروف السياسية والاقتصادية والتجارية الصعبة اللي مرت على الديرة، واللي راح تحدث تغيرات في الاولويات.. واحنا وياك، نعرف ان الكويت هي الاهم، نقدم لك النصيحة الصادقة ونقول لك: استريح.. نعم دقت الساعة يا «بو عبدالمحسن» حتى تستريح من اجل مصلحة الديرة.. وعشان تفسح المجال امام الاخرين.. وانت اعلم.. نعم انت اعلم.. بأن عندنا العديد من الرجالات اللي يملكون القدرة والاهلية على ادارة الحياة النيابية بالكويت.. وعسى هذه الراحة اتطلعك من هذا النفق البرلماني المظلم.. وعسى الله يعطيك العافية.. اللهم آمين يا رب العالمين.

• كلمة راس
السجال الجديد بين مسلم البراك وجاسم الخرافي كان حامي.. ويوم الأحد شكلها بتولّع.
إقرأ المزيد...

باب الألمنيوم أحسن

7/4/2010
يافتاح ياكريم يارزاق ياعليم، من الصبح افتح الجريدة، لا والله مافتحتها، على الصفحة الاولى، النائب مشغل اسطوانته، بس هذي المرة على اوسع شوي، وأعلى، يعني الازعاج واصل آخر الفريج!
هالمرة النائب تارك الوزراء والحكومة، ولصوص المال العام، والسراق، وما ادري منو، ومستلم النواب، والصحون تتحاذف من كل صوب على النواب.. شنو القصة؟ القصة ان النائب اكتشف، انه في نواب يعارضون رايه، وفي نواب لا يؤيدون الاستجواب، وفي نواب لا يريدون التأزيم، وفي نواب لا يريدون ان تضيع الجلسات بالكلام الفاضي، وانهم صوتوا بخلاف رايه، الاخ عصب عليهم: اما تصوتون ضد الوزير او اشلخكم واشرشحكم وابهذلكم، جدام الي رايح واللي جاي!
انا اقول للنائب من «باب» النصيحة، اولا الباب اللي يجيك منه الريح سده واستريح، يعني انت فتحت باب الاستجواب، وفشلت مرة ومرتين وثلاث وعشر.. خلاص غير، بدل، ماله داعي كل شوي فاتح هالباب، اللي ما تحصل من وراه غير الخسارة!
ثانيا ياحبيبي اللي يطق الباب يسمع الجواب، يعني انت دشيت على النواب عرض، وقطيت عليهم التهايم بكل اريحية «ياعيني على الاريحية».. اكيد تبي تسمع اللي يرد عليك، ويسمعك كلام مايعجبك!
وثالث نصيحة، لازم ما تحط باب خشب للباب الخارجي للبيت، لانه مثل ما تعرف الديرة رطوبة وحر، ومطر، والباب يخترب بسرعة، فالافضل تركب باب المنيوم!
وما يخالف يمكن انت ناسي، وان كنت ناسي حفكرك، انت تعرف ان نائب المجلس يمثل الامة، يعني مافي بالدستور ولا المذكرة التفسيرية، ولا المؤنثة التفسيرية، ان نائب المجلس يشتغل موظف عند نائب ثاني، وعليه ان يسمع كلامه، والا سيجلده «سبعين جلدة»!
هذه نصيحتي، يمكن ما تسمع بالنصيحة، بس على الاقل طبق واحدة منها، وهي حط باب المنيوم بدل الخشب، وايد احسن!
إقرأ المزيد...

نواب «الصندوق الأسود»

6/4/2010
مادري ليش حسيت ان الكويت فيها يمكن 49 طيار يداومون في المجلس لما طرحوا موضوع طيارات الرافال الفرنسية؟ ياني احساس عجيب ان بعض النواب طيارين وبعضهم مو طيار عادي يحسسك من طرحه للقضية والصفقة ان اقل شي طاير 50000 ساعة.. وبعض النواب يعقدك بمداخلاته بتفاصيل التفاصيل وكأنه محارب بفيتنام.. يا جماعة الخير صفقة عسكرية اتفقنا اختلفنا حول حجمها وفايدتها احنا شكو كمدنيين؟ خلو الضباط الكبار يسوون الشغل ويضبطون الامور لخدمة الكويت وخل النواب يرتاحون.. عندنا وزير دفاع متمرس وعندنا رئيس أركان قزر عمره بالجيش وعلى كفاءة مو طبيعية وعندنا قيادات بسلاح الجو والدفاع الجوي على قدر من المسؤولية وذمتهم ذهب وقلوبهم شزينها.. انتو شكو يا نواب البلا داشين بالموضوع؟ شي يحير ويخليك تستغرب عزيزي القارئ.. بعض النواب بقدرة قادر صاروا خبراء عسكريين وطيارين.. وتحس من كلامهم ان النائب منهم عنده فوق سطح بيتهم ثلاث هليكوبترات.. والثاني ما يداوم الا بإف ثمانتعش.. والثالث يخليك غصب تصدق انه السويج اللي بمخباته سويج طيارة انجليزية قديمة.. واحد منهم تعتقد انه يداوم المجلس بهيركوليز مع ناخبينه.. شي يحير ويعقد ويدوخ ويفر الراس ويشلخ البدن.. أحد هالنواب لما يتحجى عن الصفقة يوهمك ان المطار مثل بيوت خيطان مسجل باسمه.. اما الثاني فحدث ولا حرج.. لي تحجى عن الصفقة والحرمنة اللي فيها يتراوالك انه خبير عالمي بالطيران.. كافي يا نواب انتو شكو بهالأمور بالنهاية الصفقة بتنعرض على ديوان المحاسبة وعليكم وعلى كل الكويت.. الا اذا المحامي ترك المخافر ومجابلكم وقاعد يترجم لكم الصفقة من اللغه الفرنسية لي الكويتية.. لأنه خبير بالفرنسي.. جبح طيارين لابسين بشوت.

• كلمة راس
لو رد الزمن فينا ستين سنة واليابانيين ربعنا طلبوا طيارين كميكازي والله لأدز لهم نواب الطيران اللي عندنا بالمجلس.. هم احنا نفتك من لويتهم ونبني بلدنا.. وهم اليابانيين يحصلون لهم طيارين صيدة لزوم الانتحار.. مشكلة.
إقرأ المزيد...

جمبازية .. وخرطي!

5/4/2010
تابعت من خلال برنامج مع التقدير للإعلامي أحمد الفضلي مقابلتين في أقل من شهر وشاب شعر راسي.. اللقاء الاول كان مع النائب السابق ناصر الدويلة.. هذا الرجل اللي من كثر شفافيته تحس انك قاعد مع ملاك سياسي.. ولما سأله الفضلي وقال له شتقول بوعود النواب ومواقفهم؟ جاوب الدويلة وقالها بالحرف «كلهم كذابين وآراؤهم مزدوجة وشغلهم خرطي بخرطي.. يقصون على الشعب والشعب يمشي وراهم».. طبعا الفضلي ضحك وما قدر يواجه ناصر الدويلة بهالادعاء الكبير في حق نواب الأمة اللي قاصين علينا.. وقلت في نفسي دام هذا راي ناصر في زملائه عيل اكيد أهو كاذب سابق من قاعدة التساوي.. ويجوز ان ناصر يقصد البعض مو الكل لأن فيه نواب مو يكذبون ولا يكتفون بالكذب.. لأنهم مهرجين وفيهم نقص.. المهم بعدها بأسبوعين استضاف احمد الفضلي بنفس البرنامج النائب سيد حسين القلاف.. ولما سأله أحمد نفس السؤال قالها السيد بملء الفم.. «يا احمد النواب جمبازية يدغدغون مشاعر الناخبين وماخذينها مصلحة».. وزاد السيد وقال.. «كل النواب رايهم معروف بالاستجوابات قبل لا يقدمون الاستجواب».. وهني افتر راسي وعقلي طق فوق حدر من صوب اذني اليسار وراح صوب حلجي ونزلت راسي وفكرت وما استغربت، بالفعل مجلس الأمة عبارة عن فيلم عووود.. وتمثيلية ماصخة.. والأدوات الدستورية عبارة عن بقرة حلوب تدر على بعض النواب ملايين وجاه ورزة على ما ميش.. معناها ان دم أحدهم من اللثة اللي قالوا فيه شعر ويمكن يسوون له يوم بالسنة نحتفل فيه كان خرطي، وتمثيلية، أو دم عادي ماله أي مغزى.. وصراخ اليهال من النواب مجرد هجوم صبياني تحت مسمى الحصانة.. وترى الرجولة انك تواجه مثل بو مشعل.. عموما المقابلتين يستحقون التوقف.. والنواب ما يفيد فيهم الا «التلسب» بالقانون وغيره.. وبعض الكتّاب اللي شادين حيلهم ومصدقين لازم يعرفون ان حجمهم وايد اصغر من اللي عايشينه بجوهم..

• كلمة راس
الكاتب الكبير القدير الواقعي نبيل الفضل أحرج كل النواب حتى الذين يحبهم ويحبونه لأنه رجل يمتلك قلماً يعجز عن فهمه وإدراكه اصحاب اللب.. ويستسيغه ويتلقفه اصحاب الألباب المتفتحة.. فمن يهاجمك يا بو براك قد استهواه بريقك.. اما محبو قلمك فلله درهم قد انعكس ذلك في أقلامهم.
إقرأ المزيد...

قال احلبوه!

4/4/2010
توجد مقولة مشهورة لبو شيخة، اقول فيها «النائب الذي يشكك في ذمة نائب آخر، فكأنه يشكك في ذمة الامة كلها»، يا سلام علي وأنا اقول حكمة، طبعا المفروض هالحكمة تنكتب على الطوف والباصات والمدارس.. بس وين اللي يقدر الحكمة في هالبلد؟
قال أحد النواب وربعه، عن النواب ما لا يقال، يعني شنو نائب في البرلمان يقول لبقية النواب انكم وقفتم مع الحكومة مقابل ثمن، ومساومات، وان الحكومة ستدفع فاتورة الاستجواب.. هذا الكلام اقل ما يقال عنه عيب، وما يجوز!
بعدين ليش فقط اللي يوقف مع الحكومة في الاستجواب مدفوع له، ومستفيد شخصيا، ويحصل على ثمن موقفه، ومن يقف ضد الوزير قوي، وامين، وشهم، وشجاع.. وعمره ما مشى ورا الحكومة، ولاعمره استفاد من المناقصات، والعمولات، والشاليهات، والجواخير، والعلاج في الخارج، والجنسية، و...و...و... ما راخ تخلص «الواوات»!
بعدين يبه ماصارت كل ما خسرت المباراة قطيتها براس غيرك، مرة قلت الحكم ضدنا، ومرة الهوا ضدنا، ومرة الجمهور ضدنا، ومرة الكرة عوية، ومرة ساعة الاستاد غلط.. يقولون لك خسرت 23 ضد 22 تقول لهم هذا دليل انه احنا فايزين؟ شلون فايز وانت خسران، والخسران فرق هدف ولا عشرة نفس الشيء، لانه ما ينحسب فرق الاهداف في مجلس الامة!
الحل حتى لا يزعل، لازم نغير في اللائحة الداخلية، والسعدون موجود يضبط اللائحة ويخلي اللي يجيب اصوات اقل هو اللي يفوز.. وانا متأكد هم راح يخسر!
ما يخالف ايها النائب، انت وطني ومحترم، وخايف على البلد، بس ترى هم بقية النواب مثلك ويمكن اكثر منك، بس الفرق انهم ما يصرخون ولا يتهاوشون.. اهمه يشتغلون!
إقرأ المزيد...