مو.. رشيدة

21/6/2010
لي قبل جم يوم وأنا شاد ظهري بالحكومة وأسميها «حكومتنا الرشيدة» لكن بعد اللي شفته وصار ودريت عنه من اليوم ورايح بسميها حكومتنا اللي مو.. رشيدة.. تدرون ليش؟ أنا أعلمكم السالفة.. حتة إرهابي مدان بقضايا أمنية وعليه شبهات فزع له واحد من النواب، فوقفت الحكومة على صبع واحد.. اللي شال موبايله ودق يستفسر واللي شال شليله وركض يتأكد.. والوزراء الله خير كلن صار بلبل صادح.. تصريحات غير شكل.. وتلميحات يمين ويسار، وكأن الإرهابي المنحاش بطل الأبطال ومحقق النصر العظيم.. صج صج حكومتنا مو رشيدة ولا عندها سالفة وحركتها بهالموضوع ما تنبلع مولية حتى لوشربنا وراها مليون برميل ماي لقاح.. عيل بذمتكم واحد قاتل ويهدد الأمن وخرب علاقاتنا بالعالم ونوقف معاه هالموقف الفاشل؟ وعيالنا اللي ينطقون بالأردن وينهانون بلندن محد درا عنهم؟ وليش نروح حق اللي برة والكويتي بديرته ماكل هوا ديون وقروض وضبط وإحضار والحكومة بسابع نومة؟ ما جذب الصرعاوي لما قال حكومة فاتحة ريولها حق النواب اللي يصرخون عليها.. وما جذب الراشد لما قال ان المعارضة اليديدة تستبيح الكويت باسم الديمقراطية.. مو باجي إلا البلدية تدق وتقول لا تحاتون ترى المطبة اللي يم بيت الإرهابي شلناها علشان إذا بغى يفجر ما يتعطل.. ويدق وزير ويقول أبشركم طرشت ذخيرة حية حق الإرهابي علشان يقوم بشغله على أكمل وجه.. وينط وزير المالية ويقول لا تحاتون معاشاته ومكافآته بصرفها له بأثر رجعي.. ويطامر وزير الشؤون ويطق صدره ويقول ما تغلبوني يا زملائي الوزراء أنا بصرف له إعانة بدل إرهاب وذبح بخلق الله.. ويقوم وزير الخارجية ويعطيه جواز دبلوماسي وبعدها يزعل وزير الداخلية ويقول ما خليتوا لي شي يا وزراء .. بعطيه دورية علشان محد يوقفه واهوا بطريجه للإرهاب.. حسافة يا كويت يصير فيج جذيه.. وحسافة على النواب الأبطال اللي لعبوا دور في الوقوف مع الحكومة هذا قدرهم كموالين ولله دركم يا هايف والبراك آمروا تدللوا ترى هذي فرصتكم..

• كلمة راس
قالها الشيخ الراحل جابر العلي.. حكوماتنا تنقش الردي وتقربه وتخلي الرجل وصاحب المواقف بعيد عنها.. وأنا أحذر اليوم وأقول اذا استمر هالحال مع اللي يصرخون واليهالو رح تشوف الحكومة إن اللي كارمتهم رح يكونون أول الناس ضدها.. والسبب إنها مو.. رشيدة.