ملحق إسلامي.. تبع منو؟

20/4/2010
يا جماعة الخير أنا بحلم والا بعلم؟ صج والا غشمرة؟ من صجكم اللي قاعد يصير عندنا بمجلس الأمة والا مسرحية كوميدية؟، شنو يعني نائب منتخب يقترح بإرسال ملحق اسلامي بسفاراتنا بالدول غير الإسلامية مهمته نشر الاسلام؟! خل نفترض ان اقتراحك بمحله.. طيب وين اللي حولك اللي ماخذين شهادات ومتعلمين.. شلون طاف عليهم؟.. ولو سلمنا لك وقلنا انك صح.. منو بترشح للملحقية الاسلامية؟ شافعي والا حنبلي والا مالكي والا حنفي..؟ واذا كان شيعي شلون بتختاره..؟ تبع أي مرجع؟ وعلى فرضية ان اقتراحك تم قبوله هل راح تقبل ان بريطانيا تدز حق سفارتها كاثوليكي يبشر اهل الكويت ويحثهم على اعتناق المسيحية؟ وين رايح؟ ارجوك طق بريك اخذ نفس.. وبعدين شنو الأسلحة اللي راح يتسلح فيها ملحقك الإسلامي؟ بأي كتب راح تطرشه هناك؟ بكتبكم والا بكتبهم والا بشنو.. احنا مليون كويتي مسلم ومداعمين ومتهاوشين ولا احنا متفقين إلا على أقل الاشياء، ما تقول لي شلون ومتى وكيف وليش وشحقه هالموضوع..؟ تبون الصج هذي مصيبة اذا كانوا مشرعينا بالمجلس هالنمونة لا ثقافة ولا منطق ولا إحساس بالمسؤولية.. ودام الموضوع جذيه سبهللة أنا أعتقد ان الأيام القادمة راح تحمل لنا اقتراحات عمية كثيرة.. فلا تستغربون اذا شفتوا نائب مقدم اقتراح يقول فيه ارجو تعيين ملحق ليبرالي في كل سفارة كويتية لإقناع الناس بالفكر الليبرالي.. ويطلع لنا نائب يقترح بإرسال مشجع رياضي لكل سفارة لتعليم العالم الاوربي شلون يصطدموا مع «الفيفا».. وثالث يقترح بإرسال ملحق كويتي متخصص بالجذب لتعليم الغرب ثقافة التكلك.. جبح نائب وجبح اقتراح ووعوووووه على هيك اقتراحات.

• كلمة راس
أنا كوني مواطن كويتي أطالب وزير الخارجية بتعيين الخمسين نائب في سفارات العالم علشان نفتك منهم ويكون دورهم بالسفارات تخليص معاملات الكويتيين بالخارج في مؤسسات الدول الأخرى الحكومية.. منها نفتك منهم ويتعلمون هناك شلون القانون ماشي.