الفن والسياسة.. رسالة

19/5/2010
مرات وايد تمر علينا مقولات مشهورة مرور الكرام – ياسلام على بوشيخة لما يقول حكم – مثل الفن مايوكل عيش على قولة اهل الفن من ممثلين وممثلات مع ان أغنى أغنياء الفنانين تلاقيهم ممثلين، شوفوا هوليوود وبوليوود ونفس الشي عندنا بالكويت تلاقي واحد كومبارس.. يعني الممثل اللي يطلع يقول السلام عليكم ويروح.. أو اللي يوقف عند الحادث أو كلش كلش يتهاوش وياخذله جم طراق وبوكس.. والمشكلة انه بصوب والتمثيل بصوب وبعد جم سنة تلاقيه صار منتج ورصيده بالآلاف وراكب أغلى سيارة.. وعنده يخت.. وشقة على البحر وهلم جرا وتلاقيه يطلع في اللقاءات التلفزيونية والصحفية، ويقولك ان الفن رسالة انت وين والرسالة وين.. وكل أعمالك طراقات وبجي وبنت منحاشة تحب واحد أغنى منها والأخ طايح بالمخدرات، والأبو مريض بالقلب عقب ماخسر تجارته والأم تقعد بالصالة لابسة دراعة تنتظر رجعة اعيالها.. نفس الشي لو غيرنا البوصلة صوب مجلس الأمة تلاقي واحد منتف كحيان مولاقي وظيفة فجأة طول لحيته وقصر دشداشته وترجاله جم واحد من عيال فريجهم، وعيال عمه وصار نائب خو الدوائر الخمس والعشرين فيها دوائر منطقة ماتجاوز عدد قطعها 7 قطع ودوائر فيها 16 منطقة وبعد جم سنة ينسى اللحية ويجابل مذيعات ومقدمات برامج.. والمشكلة ان تسجيل الجلسات فضحهم لأن الغالبية من ممثلي الشعب صج ممثلين كل يوم تلاقيلهم دور، مرة شرير مرة طيب.. مرات يصير دكتور.. مطوع.. تاجر ولاعب كرة !ويزيد نفوذه والحسابة تحسب، لاهدف لا إصلاح لا قوانين ولاتنمية ولا بطيخ ويطلع باللقاءات يقول الكويت اهم شي عندي! جبح رسالة..

• كلمة راس
استغربت تصريح بعض النواب عن الانتخابات المبكرة واستغربت اكثر لما قال أحدهم ان بقاء المجلس أربع سنوات كارثة على الأمة؟!.. وتقولون لي عندنا ديمقراطية؟.. الا عندنا قوقراطية وقواطي.