قاعدين بالحراج ؟

9/5/2010
لما النائب علي الراشد صرخ على النواب في احدى الجلسات بسبب الفوضى، وقال لهم: «وين قاعدين.. بالحراج؟» طبعا النائب يقصد الطنازة، بس ترى صج، اقول للنائب الفاضل نعم سوق حراج وشريطية حراج، حراج سيارات، اثاث مستعمل، سكراب.. كله ماشي..! والدليل قرارهم بالنزول لساحة الإرادة ضد قانون «الخصخصة»!..
وكل واحد من النواب يبي ينزل بضاعته ويحرج عليها، واحد منهم راح يتكلم عن رافال وصفقة الاسلحة والطيارات، عاد نوابنا خبراء يعرفون خاصة بالطيارات الحربية، اصلا يقولون ان الثلاثي الكوكباني اهمه اعضاء في لجنة تطوير الاسلحة في وزارة الدفاع الاميركية، يعني الاسلحة هناك ما تمشي الا لمن يوافق الثلاثي!
تبون حراج ثاني، قصة النصب التذكاري، اقتراح نصب تذكاري لشهدائنا اللي مو سامعين عنهم بعض النواب، ما ادري وين كانوا ايام الغزو؟ المهم الاخوان قالوا يبون فتوى، فتوى شنو وليش؟ نصب تذكاري للشهداء، مو نصب تذكاري للرقاصات، بس عاد مثل ما قال الراشد حراج!
تبون حراح، سالفة نائب مع لجنة المرأة، شيبي فيهم؟ لجنة حريم، ولازم مافي اختلاط، ليش مناشبهم، ومتابع اخبارهم، وكل شوي ناط يسأل عن تقاريرهم، مع انه الموضوع حريمي هو شكو مدخل روحه ومسوي حراج عليهم محد يدري؟
والعملية ماشية، هذا يقول وهذا يرد وهذا يسب، وآخر شي يحيلونه للجان! كل ما صارت قضية حولوه للجنة تحقيق ولا لجنة برلمانية ولا..لساحة الارادة.. لانه مالهم خلق، يتكلمون عن شي يفيد الناس ولا يهم الناس، وهذا هو الحراج، الشريطي دائما يدور على بضاعة رخيصة يبيعها غالي، سيارة بو مية يبيعها بالف، وربعنا مع الاسف قاعدين يبيعون اغلى شي وهو وطنا... برخيص !