نواب «الصندوق الأسود»

6/4/2010
مادري ليش حسيت ان الكويت فيها يمكن 49 طيار يداومون في المجلس لما طرحوا موضوع طيارات الرافال الفرنسية؟ ياني احساس عجيب ان بعض النواب طيارين وبعضهم مو طيار عادي يحسسك من طرحه للقضية والصفقة ان اقل شي طاير 50000 ساعة.. وبعض النواب يعقدك بمداخلاته بتفاصيل التفاصيل وكأنه محارب بفيتنام.. يا جماعة الخير صفقة عسكرية اتفقنا اختلفنا حول حجمها وفايدتها احنا شكو كمدنيين؟ خلو الضباط الكبار يسوون الشغل ويضبطون الامور لخدمة الكويت وخل النواب يرتاحون.. عندنا وزير دفاع متمرس وعندنا رئيس أركان قزر عمره بالجيش وعلى كفاءة مو طبيعية وعندنا قيادات بسلاح الجو والدفاع الجوي على قدر من المسؤولية وذمتهم ذهب وقلوبهم شزينها.. انتو شكو يا نواب البلا داشين بالموضوع؟ شي يحير ويخليك تستغرب عزيزي القارئ.. بعض النواب بقدرة قادر صاروا خبراء عسكريين وطيارين.. وتحس من كلامهم ان النائب منهم عنده فوق سطح بيتهم ثلاث هليكوبترات.. والثاني ما يداوم الا بإف ثمانتعش.. والثالث يخليك غصب تصدق انه السويج اللي بمخباته سويج طيارة انجليزية قديمة.. واحد منهم تعتقد انه يداوم المجلس بهيركوليز مع ناخبينه.. شي يحير ويعقد ويدوخ ويفر الراس ويشلخ البدن.. أحد هالنواب لما يتحجى عن الصفقة يوهمك ان المطار مثل بيوت خيطان مسجل باسمه.. اما الثاني فحدث ولا حرج.. لي تحجى عن الصفقة والحرمنة اللي فيها يتراوالك انه خبير عالمي بالطيران.. كافي يا نواب انتو شكو بهالأمور بالنهاية الصفقة بتنعرض على ديوان المحاسبة وعليكم وعلى كل الكويت.. الا اذا المحامي ترك المخافر ومجابلكم وقاعد يترجم لكم الصفقة من اللغه الفرنسية لي الكويتية.. لأنه خبير بالفرنسي.. جبح طيارين لابسين بشوت.

• كلمة راس
لو رد الزمن فينا ستين سنة واليابانيين ربعنا طلبوا طيارين كميكازي والله لأدز لهم نواب الطيران اللي عندنا بالمجلس.. هم احنا نفتك من لويتهم ونبني بلدنا.. وهم اليابانيين يحصلون لهم طيارين صيدة لزوم الانتحار.. مشكلة.