ميزانيات النواب

30/6/2010
مع موسم السفر والصيف اشتغلوا النواب بشكل غريب عجيب على تأشيرة «لامانع» للعلاج بالخارج.. وبالفعل كل نائب على الأقل وقع له 200 معاملة للعلاج بالخارج حق ناخبينه منها على أقل تقدير 100 معاملة مخالفة للنظام وأخذ فيها استثناء.. طبعا شاملة المريض العيار مع خمطة مرافقين.. ولما تشوفها وتقيسها ماليا تشوف ان التكلفة الإجمالية تتعدى مبلغ نقدر نبني فيه مستشفى.. أو نستقدم فيه أفضل دكاترة العالم لعلاج الامراض المستعصية في الكويت.. نواب من هالنوع شلخوا وأرهقوا ميزانية البلد في وزارة الصحة
.. مو غريبة عليهم يسلقون الموازنات والحسابات الختامية اللي تسوى لها ستعش مليار دينار بثلاث جلسات.. ويطلع لك نائب يتفلسف ويقول يجب المحافظة على المال العام! أي عام أي خاص يا عمي وانت سالق ستعش مليار وموافق عمياني عليها وانت ما تدري عن هوى دارك ولا تعرف وين الله حاطك.. انتو نفسكم يا نواب عندكم ميزانيات شخصية ما يعلم فيها أحد.. البلد ابتلشت فيكم وفي أفكاركم اللي ما تمثل إلا مصالحكم.. والله العظيم عزيزي القارئ تحت ايدي أوراق يشيب لها راس الطفل من معاملات لمرضى علاجهم موجود بمستوصف خيطان.. لكن النائب الفلتة أخذ لهم موافقات للعلاج بلندن بشخطة قلم  استثنت له الموضوع علشان مواقفه مع الوزارة وقياديينها.. ويطلع لك الأخ بالصحف والتلفزيونات ويقول إعلام فاسد وحكومة لا تعرف الأصول السياسية.. يا عمي.. اتق الله في وطنك وفي دعوة مريض حقيقي انحرم من العلاج بسبب استثناء ناخبينك..

• كلمة راس
الإدارة العامة للجنسية والجوازات صكت على التأمينات الاجتماعية بالخدمة المميزة والانضباط الوظيفي.. قولوا آمين عسى الله لا يغير على قياديينها وموظفينها وما يخضعون لصراخ نائب في المجلس.. بالفعل هذي الإدارة نموذج نتمنى يتعمم على جميع مرافق الدولة.