شطارة .. موعيارة !

13/4/2010
قريت تصريح من فترة وطحت على ظهري من الضحك.. واحد بايعها بالطول والعرض اصدر «فتوى» ان وسائل الاعلام ورا كل مصيبة تصير بالديرة.. خذ عندك مثلا البنغال اللي يبوقون الوايرات بسبب الصحافة الكويتية.. والفلبينيات اللي بصالات البلياردو يتحرشون بالشباب بسبب القنوات الفضائية الكويتية.. وحوادث السياكل بين كيفان والخالدية بسبب المجلات الفنية الكويتية.. شها المنطق العوي.. شها التصريحات الداثرة.. ماعاد فيه عذر مقنع فهاجم الاعلام عباله طوفة هبيطة.. بس المصيبة مو هني.. المصيبة الكبيرة ان اللي صرح حب يصير مكار وعيار على العالم بس ما عرف .. لانه البتمبة نفسه اهو اللي عطى صلاحيات حق شخص مكشوف لزملائه فالغلط عليه مو على الاعلام.. وعلى فكرة الاعلام مثل التجارة فيه شطارة وما فيه عيارة.. والا انت بتقط بلاويك على خلق الله وتطلع سالم؟
البتمبة اللي صرح وضحكنا نقول له.. جان زين يتبنى فكرة استحداث خدمة رسايل خاصة للتصريحات المضحكة.. وكل يوم يدز تصريح علشان نضحك وننسى الهم.. وبالمرة اذا يبي يستفيد يسوي مسلسل تصريحات حق رمضان.. يحطه على قناة ما فيها تفصخ وخرابيط.. يأخذ أجرين من الله.. أجر التوبة عن الافلام الهشك بشك في «الباقات» اللي هو يروجها.. وأجر انه يضحك اهل الكويت على تصريحاته.. وانا اضمن له ان وزير الاعلام السنة الياية يعطيه منتج منفذ ويصير زميل اعلامي لنا وما يهاجم وسائل الاعلام ويتوب مثل ما تابت الممثلة المصرية.. يا اخي انت تخصصك غير.. وخبرتك بالبسكوت رهيبة.. ومعرفتك بالسياسة مثل معرفتك بالاعلام.. جابل شغلك وفكلنا.. ولا تنسى تسكر السحاب وتشد الحزام منشان الله لوعت جبودنا.. جبح تصريح..

• كلمة راس
النائب الفاضل محمد هايف انت عضو لجنة الظواهر، ليش ساكت عن باقات تلفزيونية تروج للدعارة على عينك ياتاجر؟