أبطال الملاعب

25/6/2010
ليش مانكون واضحين، الوضوح زين والكلام الواضح يفهمه الكل، بس اللي ما عنده شي، يقول كلام كبير بس على الفاضي، يعني ليش بعض نوابنا وبعض هالكتاب «البوربع» يقولون نص الكلام، ويطخون!
النائب فيصل المسلم تكلم قال انه ضد ابطال الفساد، صراحة بيني وبينكم اول شي حسبالي يتكلم عن ابطال الملاعب، ورحت صوب كابتن ماجد، اللي كان يشوت الكرة، بعد ثلاثة ايام الكرة تدش المرمى، والحارس يومين طاير بالهوا بس علشان يصد الكرة، يعني نقعد شهرين على مباراة وحدة، وما تخلص.. نرجع لابطال الفساد!
عرفنا انه ضد ابطال الفساد، هذا واجد زين، طيب منو ابطال الفساد؟ ممكن تكشف لنا يا نائب الشعب ياللي تخوف ولا تخاف، اسماء الفاسدين، لا تكشف لنا، ما نبي نعرفهم، على الاقل روح بلغ عليهم اقرب مخفر، او على الاقل اقرب جمعية، او اقرب فرع تموين! او بلغ عليهم راعي البرد اللي في الدوار،يعني روح بلغ عنهم ليش ساكت؟
لنفترض ما عندك ادلة، هذي هم سهلة، حلها عندي، سؤال للوزير المختص، او تكلم عنه تحت قبة البرلمان، بعد من شنو خايف؟ مو عندك حصانة، لا احد يحاسبك ولا احد بيدخلك السجن حتى لو كنت غلطان.. تكفه يا نائب الشعب الشجاع اعلنها من هم ابطال الفساد، وانقذ البلد!
بصراحة انا دخت، شكثر نوابنا يحبون يتكلمون ويدوخونا على سالفة الفساد والمال العام والحرامية واللصوص، وما شفنا بعمر عمرنا نائب جر حرامي من خشته، ووداه على النيابة، حتى لو حرامي طوابع بونص دينار!
اقول نرجع لابطال الملاعب وايد احسن!