هارودز وسوق الجمعة

10/5/2010
كنا وما زلنا كدولة كبيرة بعقول ابنائها نقتنص الفرص ونسوي اللي ما يصير في سبيل رفعة الكويت..وعندنا ناس مفتحة باللبن تقدر تحول رمال السودان الى ذهب وعندنا بالديرة نظرة حكومية للاستثمار تعدت نظرات الاوروبيين ..واكبر شاهد على كلامي الحصص اللي تملكها الكويت منذ الستينات في شركات ضخمة تعتبر كنز الكل يتمنى يحصل عليه..ولما نقول هالشي ما نقوله عبط او عيائه على قولة اهل القاهرة..صاحب السمو الله يحفظه كان ولا يزال اللاعب الرئيسي من ايام ما كان وزير للخارجية في تحصين اموال اهل الكويت عن طريق سياسات الاستثمار من الستينيات والسبعينيات..لكن بعض النواب الله لا يوريهم عقل هذا اذا عندهم شوية عقل..اشغلونا بتفاهات مشاريعهم ورغباتهم الداثرة وخلونا نلتفت للداخل وننسى الخارج..ولأن النائب صار فرعون زمانه ومحد قادر يوقفه..وقفت الحال وتلاشت الاستثمارات الجديدة..وآخرتها شنو؟ صار لنا عشر سنوات ما سمعنا عن فرصة استثمار يديدة فازت فيها الكويت..صارلنا عشر سنين مكانك راوح في قطاع الاستثمار الضخم العالمي..وهذولا اهل قطر يا عيني عليهم..بلشوا ياخذون مكانة الكويت الاستثمارية عليهم بالعافية..وآخرتها شراؤهم لمتجر هارودز الضخم المعلم البريطاني الكبير..ضربة معلم ..وقبلها فندق تشرشل وقبلها شراكات استراتيجية في ثمانية شركات اوروبية ارباحها مضمونة ومكانتها مرموقة..واحنا يا خلاف علينا..نوابنا مو عارفين يخصخصون سوق اليمعة وبسطاته..شي يفشل وشي يخليك ككويتي لما تشوف وتقرا خطط قطر التجارية تطق تحيه احترام لهالعقول..اما حنا فلا طبنا ولا غدا شرنا والسبب نوابنا اللي ادمنوا التأزيم ومسوين روحهم بوالعريف..

• كلمة راس
لما يصير عندك مجلس فيه بعض النواب اللي كراسيهم تفهم اكثر منهم..لما يصير عندك جم كاتب ارخص من اقلامهم ومأجورين..ما تقول لي شلون الديره تمشي؟ جبح نواب وكتّاب وناخبين عقارب..

• كلمة راس 2
الكاتب المأجور يقول انه طلب من أحد النواب يعيد النظر بقراراته.. يالحبيب جم انت حصلت اصوات بالانتخابات.. وجم حصل النائب المكرم.. رحم الله امرئ عرف حده..