أفلام الإعلام

7/6/2010
قاعد بأمان الله في الصالة وبيدي الريموت كنترول أتنقل بين القنوات الفضائية.. وفجأة طاحت عيني على قناة حاطة فيلم وثائقي عن الكويت.. قلت أشوفه وانادي شيوخة تشوفه معاي وتعرف تاريخ ديرتها.. وبالفعل كان فيلم مو طبيعي صور الكويت من العشرينات مرورا بالخمسينات انتهاء بالألفية اليديدة.. التفت حق شيوخة والا بعينها ستة وخمسين سؤالا وثلاثمية وستعش استفسار.. قلت حق روحي وليييه شهالوهقة.. تعال الحين جاوبها وحلل لها كل شي.. بنتي وأعرفها فيها فضول أهل الصين.. وبلاغة شف أهل بومبي.. وبالفعل بلشت المزيونة شيوخة وقالت لي.. يبا شنو قصدهم بالفيلم الوثائقي لما قالوا.. (وقد كان التجار يمدون النظام بالمعونة).. هني تعومست وفكرت وقررت أكون صريح معاها.. قلت لها يا بنيتي هذا حجي معضرط واللي كاتبه ومسويه فيلم ثور الله ببرسيمه.. التجار لوما الله وبن صباح ما يمعوا بيزاتهم.. جان تبادرني وتقول لي.. انزين يا بوشيخة الحكيم.. ليش المذيع قال في الفيلم.. (جرت الانتخابات المزورة فانسحب النواب).. قلت لها يا بوج الفيلم فيلم لا تصدقين كل شي، الحكومة لو تبي تزور الانتخابات جان بودميعة وراعي الدياي وضمير الجبرة ما نجحوا.. نزرتها وقلت لها شيخووو ويهد قومي سوي لي حليبة وهاتي لي بخصم ودقي على أمج قولي لها ترد من بيت خالج.. ماصارت أخو هذا اللي مجابلته أكثر مني.. من زين أخوها عاد ثلاث أرباع ويهه حواجب والباجي خشم.. ويوم شيوخة راحت تزهب لي الحليبة.. دشيت عالرسيفر وحذفت القناة.. وقلت حق روحي.. بالله ما تقولون لي من اللي كاتب هالتاريخ.. وين وزارة الإعلام عنهم، والا بس شاطرين رفع قضايا على القنوات الكويتيه؟ هذا تاريخنا وما يجوز ينكتب بصورة مشوهة.. يا جماعة الكويت من قامت واهيا بلد تكافل بين الحاكم والمحكوم.. ولا عمر التجار تصرفوا بشي الا وفق نظرة الحاكم.. وبعدين وين الدليل على ان المجلس مزور؟ هل في أدلة وبراهين والا بس حجي ناس دايخة ما تدري وين الله حاطها.. هذا عيب ويا وزارة الإعلام شوفوا شغلكم هذا تاريخ دولة مو لعب يهال..

• كلمة راس
تخيلوا بعد خمسين سنة يطلع لنا فيلم وثائقي يقول «وقد كان النواب انبطاحيون فتم حل المجلس».. أو لقطة ثانية تقول.. «أما بودميعة فقد كان بطلا في التلوث فحاز التصفيق».. بذمتكم هذا عاد يصير.. اصحى يا نايم تكفى اصحى لا تحدني أصحيك..