ليش الشعب يرش فوم؟

1/3/2010
صار لنا سبعة وأربعين سنة نحتفل بعيد الاستقلال وعشرين سنة نحتفل بعيد التحرير وكانت الاحتفالات قبل عبارة عن كرنفالات بشارع الخليج يصاحبها أوبريت غنائي يرقصون فيه بنياتنا وعيالنا على لحن تراثي وكلام جميل.. وبعد ما صار عندنا عيد للتحرير اختلفت الأمور.. فجأة شفنا الناس توقف على شارع الخليج وترش الفووم على الكويتي والمقيم.. ليش ما ندري ولو تسأل أي كويتي ليش ترش فوووم يكون جوابه مو مقنع.. يقول لك مستانس.. طيب شنو علاقة الفووم بالفرحة وشنو تأثيره على العيدين الوطني والتحرير هم ما ندري.. تشوف الكبير والصغير المرأة والرجل الشايب والشاب كلهم ماسكين فووم ورغوة وطايحين له رش على خلق الله.. أنا بوشيخة حاولت أرصد الظاهرة وادرسها وتوصلت لتحليلات أعتقد انها فسرت لي الموضوع.. لما المواطن يشوف التجار ماكلين الخضر واليابس وأهو ماكل هوا من القروض والضغوطات لازم يرش فوووم وإلا راح يموت من الكبت.. لما المواطن يشوف بعض النواب يمشون ورا مصالحهم ومكتسباتهم الشخصية وما يدرون عن هوى داره وقضاياه أكيد بيمسك الفووم ويرشه على البنغالي مال التنظيف من باب تفريغ الشحنات.. لما المواطن يمسك الريموت كنترول ويلف على القنوات ويشوف الناشطين السياسيين اللي اكثر من الهم على القلب يصرحون ويهددون ويتوعدون على الفاضي والمليان يحق له يرش فوووم على السيارات علشان يعبر عن رايه بطريقته.. لما المواطن يشوف مشاريعه التنموية معطلة والأوامر التغييرية على ودنو وعلى أفا من يشيل لا تلومونه إذا رش فووم على أمه وأبوه من الحرّة.. لما المواطن يشوف اشلون توقف نشاطه الرياضي يحس بالمغثة ويرش فووم ما ينلام.. السؤال المهم واللي يطرح ويضرب ويقسم نفسه أمامنا ويقفز ببهلوانية مثل بعض النواب هو التالي: متى نشوف الفووم ينرش بالمجلس؟، أنا اعتقد ان الموضوع مسألة وقت وبتشوفون مين يمسك الفووم ويرشه على كل نائب يطلع عن الموضوع.. لحظتها راح يتقدم نائب اسلامي باقتراح مثل اقتراح انشاء لجنة الظواهر السلبية.

• كلمة راس
ثلاثة نواب شفتهم شوف العين يتمشون بسوق شرق بين البنات والشباب والعوائل بروحهم.. والغريبة انهم ضد الاختلاط وضد الفرح! اعتقد والعلم عند الله يا انهم ناوين نية شينة وقاعدين يستكشفون الوضع أو انهم مزوغين وصادهم بوشيخة.. الثلاثة عندهم لحى.