مأجور يا الجاسم

15/3/2010
قبل مدة رحت مستوصف اليرموك ابي اطق ابرة السكر مالت الفقارى.. مو مثل بوبراك اللي يطق ابرة عيال بطنها من ورا الدشداشة.. المهم نطرت المضمد وكان يمي قاعد شاب انيق لابس ساعة باتيك فيليب وبمخباته قلم كارتيه.. وبزماته غير نمونه مرصعة بالألماس.. زقرتي كامل والكامل الله.. ولأني شيبة واحب السوالف.. سألته عسى بس مافيك سكر؟ فجاوبني وقال لا الحمدلله بس باخذ ابره اللقاح ضد الانفلونزا خبرك الموسم ياي وانا ما احب اطيح مريض ووراي سفر للدراسة.. سألته وين تدرس يا انيق اللبس والكلام؟.. فقال لي ادرس بفرنسا.. قلت بقلبي بل الكويتيين ما خلو جامعة بالعالم الا ودشوها.. ما ينلامون يدودهم وابهاتهم اهل سفر وبحر وتجارة ما خلو ديرة الا وراحولها.. المراد قلت له وشنو دراستك؟ فقال لي قانون؟ هني تذكرت وسألته عسى القانون مالهم مكتوب بالعربي والا بس بالفرنسي .. فجاوبني وقال وي.. بالفرنسي يا حجي.. على طول تذكرت سالفة محمد عبدالقادر لما قرر يتبنى مشروع ترجمة الدستور الكويتي الى اللغة الفرنسية.. جنه الفرنسيين ناقصين قوانين ودساتير.. احنا ربعنا غاصين بالدستور ومواده اللي تعل هالدور فرنسي! خوش والله مو ناقصنا الا دستور فرنسي.. المهم عاد محمد عبدالقادر طق الصدر وعزم يترجم دستورنا وقوانينا الى فرنسي واخذ له لفة محترمة لزوم الشغل والتمويل.. وما قصروا وياه الكبار والصغار وعطوه كل اللي يحتاجه.. فقام وأخذ الأجر كالعاده وراح طبع الدستور الكويتي بالفرنسي .. تدرون الشعب الكويتي يموت بالفرنسي.. وبالفعل تترجم الدستور وحصل محمد عبدالقادر سبونسر محترم لرعاية الدستور الفرنسي.. والسبونسر تكفلت فيه شركة واللي ترجم الدستور موظف بالسفارة الفرنسية ما يندرا هل تطوع والا اخذ له مقابل من القطية اللي اخذها محمد عبدالقادر من الكبار والصغار.. يبقى سؤال محيرني.. كتاب مثل الدستور تكلف ترجمته بالكثير، حسب مواد الدستور لو قلنا المادة بعشر دنانير، يكلف 1830 دينارا، وما اعتقد انك حصلت اقل من 60 الف دينار، يعني صبة حقنة لبن، والقشية معدن.. والرزق يحب الخفية! السؤال الكبير اللي يطرح نفسه: فلوس القطية من الشيوخ والتجار والسفراء وين راحت؟ وعقب كل هذا يطلع محمد عبدالقادر ويقول ما عندي فلوس ادفع.. طلع مقزرها فرنسي واحنا ما ندري بس هم نقول لك مأجور يا الجاسم على كل شغلة تسويها انت وقلمك.

• كلمة راس
لاحظت قبل جم يوم بشارع كندادراي سيارات شكثرها محملة على تريلات.. سألت شالسالفة ولقيت الجواب.. طلعت دفعة يديدة لزوم العقد الحكومي! شهالديرة اللي النائب وكيل والوكيل نائب ويقولون عندنا معارضة.. جبح نواب معارضين.