الأهم من الغزو

4/3/2010
أول مرة من ثلاث سنوات يتفق النائب مسلم البراك صوت الأمة الجهوري مع النائب اللي يبي يغير الدستور ويخلي الحكومة تصوّت، القاضي السابق والمحامي علي الراشد.. واتفاقهما كان مثار عجب بالنسبه لي.. اتفقوا الاخوان على ضرورة تضمين المناهج الدراسية موضوع الغزو العراقي للكويت عام 1990!.. طول هالعشرين سنة شاللي صحاهم مادري ليش هالتوقيت برضو مادري.. المهم.. لو خذنا هالاتفاق المريب وسلمنا فيه ووافقنا مبدئيا على طلبهم شتبونا نقول بالمنهج؟ نقول ان بوعلي نام كويتي وقعد الساعة ست خكري؟ شتبونا نهبب ونفضح؟.. تخيلوا معاي لو ان الطلاب سقطوا باختبار الغزو شنو بتكون ردة فعلكم؟ اي نعم عندنا شهداء قدموا روحهم للوطن علشان نوابنا يتنطعون بالديمقراطية.. فهل استفاد النواب الكبار من هالشهادة وأثرها على الحياة الكويتية؟ هل النواب طالبوا بيوم من الايام باقتراح لرفاة أبناء الشهداء أو الصامدين في الوطن؟ خل يعلموا روحهم بالأول وتالي يطالبون بتعليم الصغار.. الغزو درس للكبار قبل ما يكون درس في المدرسة للصغار يغشون فيه من بعض لي توهقوا.. الغزو للي عايش المرحلة وشاف بعينه مو للي انولد عقب تسعين؟ واذا بيكون منهج ومادة لازم نحجي لهم لعيالنا اللي اداروا البلد بغياب النظام ولجان التكافل والتماسك اللي كان سمة ذيج الايام.. ولازم نعلمهم بمواقف أهل الكويت بالخارج اللي تضامنوا ونسوا خلافاتهم.. رغم اللوية اللي سواها البعض بمؤتمر جدة.. الغزو درس لنا قبل لا يكون درس لأحفادنا.. لكن للأسف بعض الكبار نسوا الغزو وسووه شماعة لفشلهم في تصحيح الأوضاع.. ودام أسرتنا الحاكمة موجودة لازم نتكاتف حولها ونلتف معاها ونطيع ولي الأمر لأنه يعرف ويحب الكويت أكثر من بعض النواب.

• كلمة راس
عندي اقتراح حق النواب، يا ليتهم يتفقون عليه ويقدمونه.. وهو تجريم كل نائب يفتت الوحدة الوطنية بالدرجة الأولى علشان تهدا الكويت وينتج النائب بدل الخبصة والخلافات على أشياء ما تسوى.. جبح نواب مختلفين وجبح نواب متفقين على الخلافات.