ما جذب الزعفراني

6/3/2010
كل يوم والثاني طالع لنا مؤرخ يديد وباحث تاريخي يديد مادري من وين يجيبون الحجي؟ واحد يقول كان جدي رحمه الله يجلس عند البقالة قبل صلاة المغرب بشوي؟؟ طيب احنا شكو..شمستفيدين من يدك اللي قعد عند البقالة؟ ويطلع لك الثاني ويقول ان خاله رحمه الله عاش تسعين سنة قضاها بالبر والتقوى.. وخاله قزرها بمصر وبيروت وباريس ولا مرة راح العمرة؟ يطلع لك مؤرخ مادري وين الله حاطه ويتحجى عن فترة تاريخية حرجة لا اهو ولا يده ولا ابوه عايشوها..ويقعد ينقل لك كلام ما انزل الله به من سلطان..مثلاً تشوفه يكتب بكتابة الدايخ....وحين استعد الجيش في حرب الجهراء قامت عمتي بفتح باب البيت ووقفت على الرخام لتخاطب عمي قائله (بو مساعد ترى الكويت محتاجتك) شهالجذب؟ حرب الجهراء بالعشرينات من وين لنا رخام بالديره؟ بل بل بل هذا مو مؤرخ الا جذاب بوطير..عاد اللي خلاني اكتب عن هالموضوع وانتقد المؤرخين الجدد..السوالف العمية اللي نسمعها من بعض النواب والكتاب والسياسيين اللي ماخذينا بشراع وميداف ومشلخينا تشلخ بالجذب والتخرف.. اشوف هاليومين كل نائب وكاتب ما عنده شغلة الا التاريخ يعيد نفسه..ويتفلسف بجملة «السوابق تولد من الماضي لتخط المستقبل»؟؟ شهالحجي الماصخ.. معنى كلام النائب ان بعد خمسين سنة راح يكون مجلس الامة بمبنى البلدية... وبعد ميتين سنة نرد نبني السور الثالث...وقيس عليها عزيزي القارئ كل مناحي الحياة بالديرة..يبا السوابق التاريخية نادراً ما تتكرر.. والمعطيات صعب تكون هيا هيا بعد تطور الحياة التكنولوجية.. والا بتفهموني ان العضو بعد امية سنة يسوق «بي أم» موديل الفين وتسعة والناس كلها طيارات؟ شهالحجي المعضرط شهالوييه شهالتضهول عنبوكم ركدوا..بس والله ما جذب الزعفراني لما قال، فقام الوالي وبصق في وجه ابوالحصاني... بهذي صج التاريخ عاد نفسه..واكبر شاهد على كلام الزعفراني استاد جابر وفضيحة الحمامات.. بوقتين تكرروا مرة لما بوالحصاني باق الدياي ومرة لما الاستاد طلعت مدرجاته ما تشيل الا ستالاف وفيه ستين الف كرسي.

• كلمة رأس
أتقدم بجزيل الشكر لكل من ارسل لي رسالة الكترونية يسبني وينتقدني ويهاجمني بشكل شخصي وبكلام شوارعي..هذا دليل ان مقالات بوشيخة مسوية شغل وكاشفة وايد ناس..والشكر ايضا لكل من يرسل ايميلات متنوعة..