طفل الأنابيب

22/3/2010
سبق وقلت لكم ان الديرة فيها بلاوي.. في ناس تشوف ان الديرة عبارة عن شركة كبيرة يديرونها بكيفهم.. أو بقالة يفتحونها ويسكرونها على مزاجهم.. لكن هيهات يا غنيمان على قولة اهل الأردن.. حنا ككتاب لازم نكشفهم لكم يا مواطنين الكويت الاعزاء.. قصتي لكم اليوم عن محامي راسه عوي ولسانه لك عليه بدون شرب العنب.. يعني اذا شرب عنب وسولف يتراوالك انه قاعد يغني كردي.. المهم.. المحامي نسى روحه وبدال ما يضبط تصرفاته عشان لا ينحبس بالبيت او بمستشفى الطب النفسي.. قام وسوى اتصال حق النسيب الذهبي الدايخ اللي يمشي بنظرية (بيو بيو.. برو برو) وقال له بالحرف اقطع ووقف خدمة «برلماني».. وحسب ما قالت لنا السكرتيرة المزدوجة.. كان اتصاله كتير حامي وماكنت بعرف شو بيقول لانه مكتر عصير العنب.. ومرتفع عنده السكر شوي.. المهم انه المحامي يظن ان بفعلته هذي يقدر يحجب الحقيقة عن الناس.. وانه يستطيع.. حلوة يستطيع.. انه يحارب الإعلام والخدمات الإخبارية.. شي غريب عجيب.. ينتقدون أسرة الحكم وما يبون احد ينتقدهم.. يتناولون أسرار الناس.. ولما الواحد ينشر أحكام قضائية تخصهم يتنرفزون؟ أنا مستغرب شلون الاخ محامي ومو عارف ان الأحكام الصادرة من القضاء تعتبر معلومات عامة يحق للمواطن تداولها.. والا يعني أهوا على راسه العوي ريشه؟ البلوة العودة وين؟ ان شركة محترمة وفيها مساهمين كبار وصغار تخضع لرأي المحامي شلون؟ والله يبا الواحد يخاف باجر المحامي يتصل بالسكرتير ويقول له قول حق أبوي يطفي الليتات لأنهم انتقدوني! أمره غريب هالمجتمع الداثر.. يعني أكثر من الشيخ أحمد الفهد وإخوانه محد تعرض للظلم والنقد ومع هذا ما حاولوا يتسلطون على أحد ويقطعون رزقه.. تعلم منهم يا يبا تعلم.. وبعدين تعال يا الحبيب.. إذا هالكثر تحب الستر والسنع والعدل.. ليش مسوي روحك رامبو وطاق خال أم العيال؟ والا العمة لي أمرت تطاع.. عشتو وجبح وسليحط وسليمة تصكك..

• كلمة راس
عرفت من الإخوان في خدمة «برلماني» ان قرارهم تم بمجانية مشتركي خدمة «زين».. والله كفو وهذي الرسالة الاعلامية المحترمة.. ويستاهلون مشتركين «زين» الخدمة المجانية لأنهم قدها ويستحقونها.. بس شذنب مساهمين «زين» اللي انحرموا من عائدات الرسايل اللي تضاف للأرباح؟ منو يعوضهم؟