اللمبجي

11/3/2010
في أغنية عراقية شعبية مشهورة عند أهل الكويت اللي يحبون الروحة خميس ويمعة للبصرة وبوالخصيف وما حواليهم من أحياء عراقية.. الأغنية تقول كلماتها مات اللمبجي داود وعلومه.. طبعا الكلمات تغيرت وتحورت بأكثر من مناسبة أو حسب اللي يبيه راعي السهرة.. ولكن تمت مقدمة الاغنية مات اللمبجي داود وعلومه.. المراد ماني مطولها عليكم.. عندنا بالكويت عاش اللمبجي وعلومه.. منو اللمبجي؟ انا اقول لكم.. كان يدرس بجامعة الكويت وكان متعقد من الطلبة اللي أشطر منه ويصححون له معلوماته فكان يعطيهم «سي ماينس» بحقد دفين حتى لو الطالب نابغة، واللمبجي مسؤول سابق سواه أحد النواب جيس ملاكمة وهلّق فيه لين قال بس.. تالي صار مستشار لأنه خبير بالتحيلق وموسوعة بالتملق وخطير بمسح الجوخ.. اللمبجي ما غيره عنده هوايات منها بيع الليتات.. علشان جذيه يسمونه اللمبجي بلهجة أهل البصرة.. كان قاضب بيده جنطة سوده متروسة لمبات للزينة وكافة الأشكال.. تبي لمبة مدورة مربعة طويلة قصيرة مالك الا تتصل باللمبجي تحصل عنده اللي تبيه.. طبعا اللمبجي ملك النحاسة ورهيب بالمعلومات الخطأ اللي يقدمها وقت الاستشارة.. وله نشاط تجاري مشبوه في صفقة الشريطية الشهيرة، مستفيد درجة اولى.. احسن واحد يربط عصاعص.. ما عنده كلمة.. وكل دقيقة له قناعات يديدة.. واللمبجي قبل اسبوعين مو اكثر سجل ارض باسم واحدة لزوم تحويلها بعد فترة.. المعروف عن اللمبجي بخله ونحاسته حتى على اقرب الناس.. وآخر همه معاشه.. لانه ما يصرفه الا بطلعة الروح.. لا لبس مثل العالم وكل شهر يطر بشت من زملائه.. لكن الريال الشهادة لله وبخبرته باللمبات يعشق الشغل بالظلمة.. ملك العمولات على كل شي.. وذكي بالظهور.. وحاول مرة يصير من رجالات البلد فحصل له زفة محترمة من أحدهم.. بذمتكم هذا يسوى مستشار؟ هل هذا اللي راح يقدم الاستشارة؟ طيح الله حظها استشارة يقدمها اللمبجي.. وهالمرة ما كفاه حرمنته وخرابيطه ياينا يبي يصير إصلاحي ويفرز الناس.. ما جذب الشاعر العراقي لما قال مات اللمبجي وعلومه.. قضى عمره بالـ....؟ بس باجي هذي وراح نتأكد منها بعد سالفة الأرض.

• كلمة راس
الغريب العجيب بهالديره ان كل واحد أخذ له شهادة من أميركا وداوم على واجب العزاء واستمر على روحة العروس بقدرة قادر يصير مسؤول وبعدها يصير مستشار.. والأغرب من كل هذا ان اللمبجي ناقم على الكويت واهلها جينيا وبيولوجيا.. واللي مو مصدقني يقرا التاريخ.