أنا وسيبويه

25/2/2010
ياحلو لهجتنا ولكن للأسف ناس وايد مايبونها يقولون تقتل اللغة العربية.. وأرد يامعوووود يالطيييب يالحببببيب.. اشمعنى حنا مو اللهجة اللبنانية اللي نسمعها بالقنوات ونحبها ما تقتل العربية؟ طبعا هالكلام قاله لي واحد من المدققين باحدى المطبوعات فيقول اذا صادفت تيس بالطريق لا تقول ان هذه اصخلة لان التيس يختلف عن الصخلة والفرق واضح.. ومثله الثور والبقرة.. فالذكر يختلف عن الأنثى هو صج في بالبشر حالات شاذه كيفهم.. ولكن بالجراد فحنا نسمي الذكر والأنثى جرادة ولازم نسمي الذكر العنظب وهذا مو كلامي ولكنه كلام واحد من الزملاء اللي نسميهم أولاد سيبويه ويقول اذا شفت عنكبوت اللي على الطوفة ذكر فقول في بيتي حدرنق لان هذا اسم ذكر العنكبوت ويزيد الهجرس هو ولد الثعلب والحبربش ولد الحية ومنها عرفت من وين جت كلمة ذول حبربش..وأم قشعم هو الضبع والخوقع هو ولد الذبان اشوه ان له اسم ثاني وإلا جان تروح الجمعية او البقالة وتطلب مبيد خواقعان قولوها بسرعة سبع مرات.. ويقولون ان لغتنا العربية سهلة هي حلوة صح بس صعبة مو بكل شيء فمرض الروماتيزم اللي يشتكون منه نص نص أمهاتنا وابهاتنا وماله علاج اسمه بالعربي مرض.. البدل.. شوفوا اشحلاته وافتكر لو تام على اسمه الأولي جان بسرعة صار علاجه سهل مثل اسمه ويطيبون شيابنا.. ما علينا.. كان ودي أتعلم اللغة العربية الغلجة عشان اكتب مقالة مثل ما يطلب مني بعض القراء مع ان بنتي مدرسة ثانوي عربي.. ولكن كل ما ابدا اتعلمها منها او زميلي ولد سيبويه اغير رأيي خاصة اذا بدوا يعلموني الاصوات ومعنى الأصوات والكلمات اللي لها نفس الدلالة تقريبا.. كمثال ملل كسل فشل شلل دجل زعل خبل زلل جدل والأخيرة تعني المناقشات واختلاف الآراء الى حد قد يصل الى الخصام، مثل مجلسنا يعني صيحة على الفاضي وكلام لا يودي ولا يجيب واغلبهم ناسين المقولة اللي تقول اذا أراد الله بقوم سوءاً حببهم للجدل ومنعهم العمل وعندنا من هالاشكال ذبحونا جدل. خطل..زعل..هبل..عقدنوني.. يبااا خلوني على لهجتي اشحلاتها واللي مايبي يقرع راسه بالطوفة.