محامي الكلينكس

14/3/2010
كل العالم يعرف ان المحاماة مهنة شاقة وتتطلب من صاحبها جهد ووقت وعطاء ذهني.. وتلاقي المحامي لابس نظارته اللي جنها قاعة بطل وأهو يقرا المذكرات ويكتب الصحيفة ومشغول الفكر.. ودايما ما يكون المحامي عنده مستشار يسنع له الأمور ويقراله القضايا ويعطيه «راي قانوني بحت».. وبعض المحامين تشوفه زقيد من الصبح بقاعات المحاكم لابس روبه وبيده ملفاته ووراه مندوبينه يدافع عن قضاياه ويثبت لموكلينه انه كفو وقد المسؤولية.. والكويت مليانة محامين مجدين وينحطون على الراس أمثال خالد الشطي وعبدالرحمن البراك والحميدي السبيعي وحسين الغريب وطارق الخرس وراشد الردعان ومبارك الخشاب شباب فيهم البركة وتفتخر ككويتي بقضاياهم اللي حققوا فيها نجاحات باهرة وهذولا نماذج للكثير من محامينا السنعين.. لكن بعض المحامين الله لا يوريك.. لي لبس الروب جنه دش فوق السطح.. ولي تحجى يا مصخه جنه بيبي منو حافظ الحجي ويكرره.. وتشوفه يتفنتك ويتفذلك وهو ما عنده ما عند يدتي أم الخير الله يرحمها.. لا وهابين هاليومين بالفيس بوك وحركات.. ولا عندهم ثقافة قانونية ولا لهم حضور يذكر.. مبقق عينه على الطل وراسه شكبره على الهبني.. شهادة بو ربع من الدقي وماخذ امتياز من شارع الهرم.. وفي محامي بالذات من بين هالمحامين حاط له مندوب وملبسه بدلة ومكشخه بس علشان يشيل له قواطي الكلينكس.. لأنه الحبيب دمعته بمخباته.. وهالمحامي طبعا ما يبجي بالمحكمة.. بس اذا شرب بيذان وكثر تشوفه يمشي ووراه مندوبه بقوطي الكلينكس لزوم دموعه اللي تصب اربع اربع.. والمحامي اياه تدرون ليش يبجي؟ الأخ مو ماشية معاه الامور.. يدق حديد وطراقه ببيزة .. يصرح وايد ومحد ملقيه بال موليه.. معتز بشواربه والشباب بايعين الشنب ومالطينه.. حاول يكون رياضي قاموا الشيوخ ولخوه راشدي.. علشان جذيه الاخ قرر يصير «بطل» وطلع فالصو.. تلزق بالتجار وحاول يبوق الضوء من محامين متفوقين وأكل فشقي وطاح بلسان بوشيخة.. بذمتكم بعد كل هذا اكيد الريال دموعه بتصبب اربع اربع خاصة وان البيذان حاجم وطعمه حالي.. نصيحتي لك دامك دشيت لعبة اكبر منك استثمر بشركة كلينكس لانك بالأيام الياية راح تحتاج مصنع كلينكس لانك بتبجي وايد بالويك إند الياي «يا حمش»، على قولتها.

• كلمة راس
المحامي الخشبي حتى أحمد يكيكي بفريج العتاوية يطقه عشرة صفر.. أنا ماني عارف شلون له خلق يجابل روحه بالمنظرة خصوصا بعد ما اختربوا حواجبه.. تدرون شلون؟ خلوني أكمل لكم باجر سالفة الحواجب.