دموع السيف

8/3/2010
طبعا كالعادة صليت الفجر وسويت الريوق حق شيّوخة وأمها وصحيتهم حق المدرسة ونمت.. لأني أعشق النوم لما تطلع الشمس.. أنا بطبعي أحب أنام النهار وأصحى مسيان واقزرها دواوين وسوالف.. وأول ما صحيت دقيت على صالح النهام وقلت له يا بوصلوح الحق علي حلمان حلم مزعج.. سألني «خيغاً رغيت».. فقلت له أي خير يا شيخ.. شفت نفسي بنادي صحي قاعد أسوي تمرين المعدة ويمي واحد مفتل شواربه ولابس تي شيرت اصفر مكتوب عليه (متى أصير عضو بنادي القادسية) وقاعد يشيل حديد من الوزن الثجيل.. وفجأة رن موبايله ورد على الاتصال وقال بالحرف (الله يبارك فيك أخيرا ربحنا قضية).. فسألته حضرتك محامي فقال لا تغلط لو سمحت.. أنا خريج مصر ومرشح سابق وكان مقري هناك.. ودايما اترزز بالقضايا اللي ضد نادي القادسية.. ومرة كتبوا عني بالجريدة اني بو دميعة.. استغربت وقلت له خريج مصر عرفناها يعني دافع وماخذ الشهادة.. مرشح سابق هم معروفة قصتك لأنك تبي تضبط والا اكو واحد يترشح ويحط مقره عند الأسواق غير حق القز.. دايما تترزز بالقضايا اللي ضد نادي القادسية لان بو احمد الحول كان مواعدك يحطك بقائمته وفلس وفلست معاه.. وموضوع ان جريدة كتبت عنك بو دميعة هذا فخر لك.. لكن ليش كتبوا عنك بودميعة؟ سكت وما جاوبني.. وخلص الحلم.. هني قال لي بو صلوح النهام.. ان الحلم له تفسير واحد وهو ان المحامي مستانس على لقب بودميعة لأنه الدمعة تحسسه بالنشوة اذا شرب بيذان.. ونصحني النهام اني ألغي اشتراكي بالنادي الصحي اللي عالبحر واروح نادي ثاني علشان أفتك من هالمحامي الداثر.. بس الغريب اني ما اكتفيت بتفسير النهام ودورت ولفيت وعرفت ان المحامي بو دميعة مسوي عمره عنتر وقاعد يتدرب على الحديد ويشيل أوزان ثجيلة لزوم السيف.. بالنهاية قررت ألغي اشتراكي بالنادي أو أقاضيهم لأنهم خلوا هالمحامي يشترك.. واحترت منو اوكل لقضيتي وشفت ان أحد المحامين أهو أفضل من يترافع عني عقب ما فاز بقضيته الأخيرة.. أبرك من بو دميعة اللي شايل سيفه الخرطي.

• كلمة راس
سألت واحد من الربع عن جامعات مصر.. صج فيها بيع شهادات.. فجاوبني وقال لي تبي ماجستير؟ قلت له بس أنا ما عندي بكالوريوس؟ قال لي عادي يعطونك دكتوراه اذا تبي.. سألته شلون؟ قال لي انت من صجك.. بودميعة عنده طتوراه بس خايف يطلعها لأن نسى ياخذ ماجستير.