ضيقة خلق

9/3/2010
يا جماعة ما تحسون بضيقة الخلق.. يعني الوضع مو مثل قبل كم شهر!
قبل كم شهر كان عندنا النائب فيصل المسلم، الله يذكره بالخير ويطول عمره، كل يومين طالع لنا في الصحف انا عندي شيك، وبعدين في التلفزيون يصرح انا عندي ثلاث شيكات، وفي اليوم الثاني يقول انا ما قلت، وانا ما شفت، انا سمعت، وفي اليوم الثالث يقول انا عندي وايد شيكات.. يعني كانت ايام حلوة واحنا ندور في «النت» على اسامي اللي ماخذين شيكات.. ويطلع نصه غلط، والنص الثاني ربعه ماخذين الشيكات.. يعني صج كانت ايام تضحك وناسة!
تذكرون قبل مسلم البراك وهو يصرخ ويهدد، واحنا نكسر، واحنا ندمر، والصحن الدوار، والضربة المزدوجة، والسلاح الناري، صار علينا غريندايزر المجلس، وآخر شي يطلع الاستجواب كلام فاضي، وهوا وبشبك، لا احد يتعور، ولا خسائر في الارواح ولا المعدات، والحكومة بهجمات عكسية فازت في النهاية بس كان عذرهم، مثل عذر معلق المباراة السعودي.. الحكم ضدنا، والجمهور ضدنا، والهوا ضدنا!
تذكرون قبل ايام تجمع العقيلة، والنواب اللي كانوا شادين حيلهم، واخذ تصريحات وتهديدات، ويا احنا يا الحكومة، ووينك ياعنتر، والربع شادين حيلهم خطابات وتصفيق وهتافات وزيطة وزمبليطة وشايلين الطاحوس اسد العقيلة ويدورون فيه.. كله لانه في واحد نفرات قال كلمتين في برنامج، ولانه في واحد طلع قال كلمتين في التلفزيون!
تذكرون قبل، ايام قصص النائب وليد، اللي راح مصر ودش غزة تهريب، عن طريق الحفر مع البضائع المهربة وقعد شلون يسولف عن قصته وهو داش بالحفرة وطالع من الحفرة مثل قائد بالمقاومة!..
يا جماعة صج كانت ايام حلوة.. الله لا يعيدها علينا!