مباراة درجة ثانية

2/3/2010
منتخب التجمع الشعبي وربعهم، خسروا آخر مباراة اربعة صفر من الحكومة، والمباراة كانت على ارض المجلس طبعا، لانه الى الان ما خلص استاد جابر، ناطرين حمود فليطح يقول لنا متى الافتتاح..!
المهم منتخب الشعبي، بعد التفكير والاتصال بالمدرب فيرجسون، ومورينيو، وشحاتة، ومحمد ابراهيم.. قرروا استقدام لاعب محترف، والمحترف كان النائب الدقباسي!
والدقباسي يعتبر نائباً محترفاً لانه يصرح في كل قضية، عنده تصريح مع كل خبر، وعنده رأي في كل سالفة، يعني ما يطوف يومين الا ويطلع في التلفاز - حلوة تلفاز- واخذ عندك كود تصريحات!
المهم قالوا الدقباسي لاعب زين وعنده لياقة، ولهذا جهزوا له مباراة مع وزير الاعلام!
تسألوني، وسألني مصطفى الاغا في الـ«إم بي سي» والاخضر بالريش بالجزيرة أشجع، منو؟ وشنو توقعاتي عن المباراة؟
تبون الصراحة ما أشجع احدا، ليش؟ اولا فريق الدقباسي كلش ما ينبلعون كل ما اشوف فريقهم اتذكر المنتخب العراقي ايام رعد حمودي وعدنان درجال.. ايام اللي غصب او يفوزون علينا، او يطقون ويبهذلون عيالنا في الملعب!
اما وزير الاعلام فهم الله يهديه ما يخلي الواحد يتحمس ويشجعه، ولا فريقه مال مباريات وتحدي، يعني عادي يوم المباراة يكشتون فيه، وما يطبون معاه ويقطونه على صخر، مو اللي يشوف عمايل الوكلاء والمديرين في الاعلام يعرف تاليهم!
وما نسينا موقفه من قانون المرئي والمسموع، واللي يبي يطبقه بأثر رجعي، وبطريقة فيها دفاشة!
وهم ما ننسى حالة تلفزيون الكويت المسكين، اللي صاير هدد، ماله صاحب، ولا والي، يكرم الممثلين المصريين، وهاد عيال الديرة، يعني حتى لو احاول اشجعه مجاملة، هم ما اقدر..!
واخيرا ياجماعة حاس ان المباراة راح تكون بدون طعم، يعني بيطلع صفر صفر، واللي يفوز راح يفوز بالقرعة.. بس عاد تهقون قناة الجزيرة يشترون الحق الحصري لبث المباراة!