ما تغير شي

30/12/2011

عندي سؤال للجميع: شنو صار بعد استقالة سمو رئيس الوزراء؟
لو نبي نشوف الواقع ما صار شي، في الآخر تبي تتشكل حكومة من الوزراء، وبنفس الطريقة، يعني ما راح يتصلون على وكالة ناسا يدورون لهم على وزير، الفرق يمكن يغيرون بعض اللاعبين وبعض النواب، اللي كان معارض يمكن يصير مؤيد، والمؤيد يقلب معارض، وفي النهاية همه النواب، والتحالفات، والبلوكات النيابية هي نفسها ما تتغير.
ولا الموظفين بيقومون الفجر ويروحون الدوام، ولا اللي كان يتميرض راح يداوم حتى لو مريض، ولا اللي كان يختلس راح يتوب ويروح الحج ويتبرع بفلوسه لافريقيا، ولا اللي كان يستنفع من المال العام راح يصير شريف روما.
واذا صارت انتخابات جديدة، راح تشوفون نفس الناس يتحدثون عن الوحدة الوطنية، والمساواة، والقوانين، ونفس النواب بنفس الطريقة.
ونفس هالناخب راح ينتخب فلان لانه من عائلته، وفلان ما ينتخبه لان اهله ما يحبونه، وفلان زين لانه يمر ويسلم عالربع، وفلان مو زين لانه ما تعشى عندنا، وهذا علشان الطائفة، وهذا علشان القبيلة، وذاك علشان العائلة .. وهذا كل اللي راح يصير وباجر نشوف .. وسلامتكم.
twitter.com/bushi5a


إقرأ المزيد...

فرعي ولد فرعي


26/12/2011

حبيبي الفرعي واللي داش علينا واللي طبيت من سور الفرعي لا تصرح باجر انك من دعاة الاصلاح وانك مع الدستور ولا تروح بعدين ساحة الارادة تطالب بتطبيق القانون ولا ترفع علينا شعارات الا الدستور والاصلاح.. يعني عرفناك بالاسم الصريح والواضح، انك فرعي ولد فرعي فماله داعي تمثل علينا دور ابو القانون، ولا تمثل علينا دور التقي النقي الورع، فخلك على فرعيتك وخلنا على قانونا ولا تحط خشمك في شي ما خصك.. والقانون يا طويل العمر هو الشي اللي ما يخصك لانك اساسا دست عليه مع اول يوم اعلان عن فتح باب الترشح للانتخابات!
بتقوللي هذي مو فرعية هذي تشاورية، ولا تبي تقول هذي تزكية او زكية زكريا هم كيفك سمي اللي تحب على مولودك المشوه بس احنا نعرفه انه اسمه فرعي ولد فرعي من عائلة الفرعيات المجيدة وهذا اسمه الكامل في البطاقة المدنية!
حبيبي الفرعي واللي نجحت بالفرعي واللي بتدش المجلس بفرعي تكفه ما نبي منك لا تعتصم ولا تصرخ ولا تتهاوش بس اقعد وخلك ساكت بالمجلس واقبض معاشك او غير معاشك حتى نحترمك ونقول عنك والله كان خوش ريال.. دش ساكت وطلع ساكت!
twitter.com/bushi5a



إقرأ المزيد...

كل الفيلم.. كرسي

22/12/2011

وينهم النواب اللي دوخونا شعارات ودستور وقانون، وصاعدين ونازلين، وإلّا الدستور، وإلّا القانون، وإلا الديوانية، والّا الصمون فلافل وبطاط؟
احد النواب قبل، عسى ما نام الموظف في الدوام طالب رئيس الوزراء يمر الدوام ويقومه من النوم، واذا لف عليه سايق بنغالي، طالب رئيس الوزراء بقطع العلاقات مع بنغلادش، وتسفير كل البنغاليين، واذا ولده كح شوية طالب الرئيس باقالة وزير الصحة او الاستجواب والمنصة، واذا صار غبار قال وينه رئيس الوزراء؟ أكيد الغبار سببه خطط الحكومة! واذا مواطن طاف الاشارة الحمرا دق على رئيس الوزراء يهدده لانه لازم استجواب ومعاه وزير الداخلية لانه ما تجرأ الولد على ان يطوف الحمرا لو انه غير مشارك ومتواطئ مع رئيس الوزراء.
استقال رئيس الوزراء وارتاح، كمحارب يحتاج الى راحة حتى يكمل قتاله، الوضع ما تغيّر الوضع على حاله، الشوارع ازدحام، المستشفيات مليانة مرضى، الفوضى في كل مكان، حل فيه شك دستوري وخلل قانوني، وبنوك تلعب سياسة وآخرها قمع القوات للناس «البدون» في الجهراء... ونوابنا لا راحوا «الارادة» وقالوا «ارحل» ولا طالبوا، ولا هددوا، واكتفوا بشوية تصريحات ما تصلح للاستعمال الآدمي، وبدل ان يتنادوا ويروحون «الارادة» على الاقل يعبرون عن تضامنهم مع هالبشر، ولكن مع الاسف نوابنا على قولة المصريين «زي قلتهم» ما ينفعون حتى للكلام الفاضي، وتبين انه كل هالفيلم لا علاقة له لا بحريات ولا قانون، ولا دستور، كل الفيلم.. «كرسي».
twitter.com/bushi5a










إقرأ المزيد...

رمز البطيخ

21/12/2011

في مصر المحروسة، أم الدنيا مثل ما يقولون، عندهم طريقة خاصة بالانتخابات، هالطريقة يحطونها علشان تساعد الناس الاميين اللي ما يعرفون يقرون ويكتبون حتى يختارون النائب اللي يبونه في البرلمان وهالطريقة هي طريقة الرموز يعني كل نائب يحطون جدام اسمه رمز معين ورسمة خاصة فيه يختارونه طبعا بالقرعة وكل واحد وحظه.
مرة النائب يطلع رمزه الاسد ومرة البيت ومرة الحصان ومرة الفيل... وانت رايح، وبما انه انت رايح انا اقترح نحط جدام كل تجمع او نائب رمز او رسمة تعبر عنه علشان يختار الناس على الرمز!
فمثلا اقترح نحط رمز الميكرفون ورمز اللمبة ورمز المسدس ورمز السيكل ورمز الدرنفيس ورمز الحصان ورمز الزرافة ورمز الصاروخ وانتو اختاروا رمز لكل مرشح..
أما الوضع السياسي ككل.. فالمفروض ينحط له رمز البطيخ.
twitter.com/bushi5a












إقرأ المزيد...

حرب على نواب الأولى

20/12/2011

من يحارب النواب الشيعة، هم مجموعة من الطائفيين العنصريين الفئويين الي يتصورون بان الديرة ملكهم الخاص، وان بقية الناس يشتغلون عبيد عندهم، ويتصورون بان الناس لازم يمشون وراهم مو عندهم كتف بكتف.
الي يحاربون النواب والمرشحين الشيعة تحت مسميات الانبطاحيين والقبيضة والمرتشين والفاسدين... لا يهمهم يكون في صلاح واصلاح لان همه اساس كل فساد، وهمه من يديرون الفساد، وهمه الي نشروا الفساد بكل انواعه في الديرة، وندري انه ما تهمهم الانبطاحية او الانسداحية، لانهم اول ناس يسوون صفقات مع الحكومة علشان يحصلون على المناقصات والمعاملات وغيرها، وندري انه ما تهمهم الوحدة الوطنية لانهم اول ناس يغنون على انغام الطائفية ولا اغاني ام كلثوم في الحب، بس علشان يحصلون على كم صوت زايد، وندري انهم ما يخافون على الديرة انما يخوفون ربعهم من المواطنين ومن النواب لمجرد انهم شيعة، وكأن النائب الشيعي وحش او ديناصور يبي يخرب الديرة ويبيعها للأجنبي.
ماادري متى يتعلمون هالبشر بان المواطن الشيعي مثل السني وان النائب الشيعي مثل السني، قلبه على ديرته، حاله من حال غيره، والردي ردي سواء كان شيعي او سني او بدوي او حضري.. وفي النهاية عمل الانسان هو الي يقيمه لان نسبه ومذهبه.
اقول لهؤلاء الانتهازيين الي يبيعون الناس كلام فاضي، نعم ممكن تقصون على كم واحد مغرر فيهم، ولكن لا يمكن تقصون على الشعب الكويتي بهالدعاوى، ولا يمكن الناخب ينقص عليه بالكلام الفاضي، الايام بيننا وستثبت صناديق الاقتراع منو على حق ومنو على باطل، وشلون وعي الناخب في الدائرة الاولى، الي دائما تظل اولى في حبها للكويت ولاهل الكويت.
twitter.com/bushi5a










إقرأ المزيد...

ذكرى ديوان

16/12/2011

حسبالنا نكتة سووها صج، النواب قرروا في الذكرى السنوية لاحد الدواوين المعروفة تحويل البيت الى متحف وطني، واعتبار اليوم عزاء وطني تعطل فيه الدوائر وتسكر فيه المدارس وتبند فيه المخابز.
حسبالنا نكتة وطلع صج ان مطبخ بجدوره وصحونه وملاليسه من اهم المعروضات في المتحف لان النواب اجتمعوا في المطبخ في هذه الليلة، ولهذا يمكن اعتبار اي شي في المطبخ من الاشياء المباركة المقدسة اللي لازم تنعرض في المتحف ويفتخر فيها الشعب!
حسبالنا نكتة وطلع صج في المتحف يمكن يحطون عقال منتف وقحفية مخرومة وجوتي مسحك وغترة مقضوضة للنواب وهذي اهم مقتنيات النواب اللي يفتخرون فيها وما حلوة نسوي متحف مافيه قحفية وفانيلة ومكسر لنواب الامة!
حسبالنا نكتة سووها صج من باجر راح نشوف شباك التذاكر عند باب ديوان لانه ما يصير نسوي متحف ببلاش لازم بفلوس ونوزع ريعها للمعارضة الكويتية واي معارضة في العالم حتى ننمي من التوجهات المعارضة الشعبية عبر البحار والمحيطات والخلجان.
حسبالنا نكتة وسووها صج يقولون داقين على المخرج سبيلبيرغ علشان يسوون فيلم خاص بيسموه «ليلة في ديوان» ويمكن يمثل فيه توم كروز ويشاركون بالفيلم في مهرجان كان وراح يشارك النواب في التمثيل لانهم محترفين تمثيل للامة طبعا.
مع احترامنا الكبير والعظيم للنواب في ديوان الحربش اعتقد ان تحويل الديوانية الى متحف قوية شوي .. انا اقترح تسوون نصب تذكاري، ولازم النصب يكون كبير.
twitter.com/bushi5a







إقرأ المزيد...

النائب الجمبازي

16/12/2011

سلام الله على الحسين .. كم من البركات تصير باسمه، وسلام الله على الحسين اللي جمع قلوب الجميع على حبه واحترامه وتقديسه والتشرف بذكر اسمه ويتبرك الناس الطيبين بذكر اسمه وزيارته.
بس عندي رجاء من بعض الكلكجية انه يوخرون عن الامام وعن ذكر اسمه لانه اكتشفت هاليومين ومع حل مجلس الامة ان النواب كلهم صاروا يحبون الامام الحسين، اللي صرح يمدح في ثورة الامام الحسين، واللي ينزل بيان واللي يعطينا دروس عن الامام.. طبعا هذه الامثلة حقيقية يعني مو جايبها من جيبي، فقط حتى أبين لكم شلون النائب الجمبازي اللي صار له سنين بالمجلس عمره ما ذكر اسم الحسين الحين فجأة صار مؤمن بقضيته!
واحد من النواب نجح بأصوات الشيعة، ومع ذلك كل مواقفه مع المؤزمين، هاد دائرته ورايح صوب دوائر ثانية، وعسى ما صار تجمع راح صفط معاهم وصفق لهم .. الحين فجأة قام يقلقس ويتكلم عن ثورة الحسين ويحاول يلزق نفسه بالامام الحسين!
واحد ثاني طلع بنظرية جديدة قال ان الامام الحسين هو اول من خرج للشارع .. يا سلام عليك بس كان ناقص يقول ان ساحة الارادة مثل اللي كربلاء!، معقولة الى هذه الدرجة تستغل المقدسات علشان شوية أصوات، مع ان هالنائب هو اول واحد صفق ووقف مع استجواب البحرين بدوافع طائفية!
ما أدري هالنواب المؤزمين حسبالهم الناخبين الشيعة بهالسذاجة اللي ينقص عليهم بكلمتين وانهم ما يتابعون فضايحكم وما يتابعون أعمالكم ومواقفكم.. فرجاء خلوا الحسين في قلوبنا ولا تلوثوه بلسانكم.. هذا اللي ناقص بعد!
twitter.com/bushi5a













إقرأ المزيد...

قل أدبك تاخذ حقك

15/12/2011

جرب تقعد بالبيت، واشتر لك مية كتاب في الاقتصاد، ومية كتاب في السياسة، ومية كتاب في علم الاجتماع السياسي، ومية كتاب في التاريخ والجغرافيا، وحتى في الديناصورات والاحافير...
بعدين فكر تكمل دراستك وتسافر وتصير دكتور، وتحضر المؤتمرات، وتكتب البحوث وتطور من ثقافتك، يعني تجمع بين العلم وبين الاخلاق والادب والتربية الصالحة ... بهالطريقة انت تعتبر انسان فاهم وواعي، وفاهم شنو تبي تسوي، وشنو تبي تقول، وتعرف وين مشاكل البلد، ووين علاجها.
انت بعد كل هذا، لو تروح وتقدم اي شي للحكومة، محد راح يسمع صوتك، ولا احد راح يعبرك، ولا احد يعطيك وجه، او حتى يفتح لك الباب لانك ببساطة انسان فاهم، والاهم انك تتكلم بهدوء وعقلانية، وتحط المشاكل وتحط الحلول، ومن الطبيعي بما انك فاهم وتتكلم بهدوء وادب انه محد يعطيك وجه.
هذي الحالة هم تنطبق عليك اذا كنت نائب في مجلس امتنا المنحل، لو تقعد اربع سنين تتكلم بهدوء كونك معارض أو مؤيد، محد راح يسمع لك، ويمكن حتى سلام ما يسلمون عليك، لسبب بسيط انك ما تخرع وما تخوف احد.
المطلوب من أي واحد يبي حقه او حتى باطله، يوقف جدام باب المجلس ويصرخ صرختين، ويسب ويلعن وزيرين، وما يخلي أهل إلا ويسبهم، واذا هم دش وكسر احسن واحسن، وإذا قال غصبا على شواربكم يمكن يزيدون من عطاياهم، واذا يبون الف يعطونهم الفين، اذا يبي كرسي يعطونه كرسي وسرير ومكتب، واذا يبي يشيلون الوزير اللي يبيه، علشان لا يزعل..
الفايدة من القصة، اذا تبي شي من الحكومة، عندك طريج واحد «صرخ، عصب، قل أدبك..» تحصل على اللي تبيه وزيادة.
twitter.com/bushi5a









إقرأ المزيد...

طعنوا بظهر القبيلة


14/12/2011

ما ادري ليش يقولون عن المرشح اللي يفوز بالفرعيات انه «خرج من رحم الفرعيات» شمعنا طالع من رحم مع انه مو قاعد في رحم الفرعيات تسعة اشهر، ولا الفرعيات مسوينها في مستشفى الولادة، ولا المرشح بعد ما يطلع من رحم الفرعيات يسوون له استقبال، ولا يوزع كاكاو وحلاو ولازقين صورته وهو مبتسم.
المهم نوابنا ملوت الفرعيات فجأة نزل عليهم القانون، وصاروا خوش ناس، وقالوا انه ما راح ندش التشاورية، وطبعا لمن يقولون ما راح ندش التشاورية تعني ثلاثة شغلات:
الاولى، انهم يعترفون ان المرة اللي طافت دخلوا التشاوريات، وفازوا فيها، وانهم يعترفون انهم خالفوا القانون والدستور، وانهم بالفعل نواب عليهم شبهة لانهم دخلوها من باب الدوس على القانون وهمه مسويين روحهم حماتها وحراسها.
الثانية، انهم يعترفون بحصولها حاليا، وكانهم يبلغون الحكومة، ان في هناك تشاوريات بين مرشحين القبائل، وهذه تعتبر طعنة في خاصرة القبيلة اللي رزتهم، واوصلتهم الى الكرسي النيابي، وارتزوا على الكرسي الاخضر، يعني بس ناقص يبلغون الحكومة وين ومتى الفرعيات.
الثالثة، ان النواب اللي طلعوا من التشاوريات وفازوا، الحين هم اول ناس يطعنون بظهر القبيلة، وينزلون من شأن القبيلة اللي رزتهم، ليش؟ لانهم خايفين من السقوط في الفرعيات، خاصة وان اغلبهم لا مواقف، ولا معاملات، ولا عماة عين، كل اللي كانوا يسوونه، شوية شعارات وكلام فاضي، ما يودي ولا يجيب، ولانهم يدرون انهم داشين بسواد الوجه لقبيلتهم، ولهالسبب يبون يبينون روحهم انهم ابطال، وانهم ضد الفرعيات مع انهم ما يبونها لانهم يخافون من السقوط.
هذي حالة نوابنا التشاوريين، المعارضة، الابطال.. صيحة ونجرة دافعا عن القبائل، صارت الانتخابات، وصاروا اول ناس يطعنون القبيلة!
twitter.com/bushi5a










إقرأ المزيد...

مطالب نائب

13/12/2011

نائب قعد بمكتبه وكتب مطالبه على الورقة ودزها بالفاكس على مكتب مجلس الوزراء بعد أن استقالت الحكومة لأن الأقلية ما يبونهم .. المهم صاحبنا كتب مطالبه الجديدة وهي:
- أطالب بأن يمر الخط السريع عند باب بيتي لانه مالي خلق أفتر بالشوارع على ما اوصل الخط السريع.
- أطالب تصير عطل الاسبوع أربعة ايام وايد اريح وفي فرصة اروح دبي وارجع.
- أطالب بأن يسوون موكب رسمي لي في الشارع ويسكرونه علشاني لاني ما احب الزحمة.
- أطالب بأن يسوون وزارة باسمي وأحط الوزير اللي أبيه واستجوبه متى ما أبي.
- أطالب بأن يسمون شارع المطار باسمي علشان أي واحد يدش لازم يقرا اسمي بالشارع ويوقف بسيارته ويطق تحية.
- أطالب بأن يكون راتبي مثل راتب بيل غيتس لأن إنجازاتي اكثر من انجازاته وصوتي أحلى من صوته.
- أطالب بأن يدمجون الدوري الكويتي مع الانجليزي ولازم النادي العربي ياخذون كأس إنجلترا.
- أطالب بأن أترس بنزين سيارتي ببلاش لمدة عشرين سنة مع سيارات الربع في الديوانية ولازم تنكر البنزين يمرني البيت لاني مالي خلق أروح محطة البنزين.
- أطالب اي وزير يتعين لازم يغديني الأول على حسابه، اذا عجبني الغدا أدعمه واذا مو شي أقدم فيه استجواب.
- أطالب مع كل ناقلة نفط يعطوني عشرين درام نفط عمولة أبيعهم على حسابي لاني من الشعب وكيفي!
- حاليا بس هذي مطالبي أروح البيت وأدز لكم باجي المطالب!
twitter.com/bushi5a









إقرأ المزيد...

الحكومة الصمنديقية

12/12/2011


قالوا بأنها حكومة تصريف العاجل، وحكومة مؤقتة، الى ان يتبين الخيط الابيض من الاسود، يعني الى ان يتبين امام بياض وجه الناس لمن يختارون من يمثلهم تمثيل حقيقي، او يتبين سواد الوجه، لمن يختارون إللي كانوا السبب في ازماتنا إللي نعيشها طول السنين إللي طافت.
حكومة تصريف العاجل، قالوا عنها بأنها حكومة تمشي الامور، وتمتنع عن الندب والنقل والتعيين.. حتى لا يتم استغلال الوزارات لمصالح انتخابية، كلام حلو وجميل ومرتب ومصفف.
بس حكومة تصريف العاجل لا تعني ان الوزير يداوم وزارته، مأخذ معاه المخدة والكنبل وينام بمكتبه لانه تصريف عاجل، ولا معناته ان الوزير في وزارته يكون «صمنديقة» لا يهش ولا ينش، لا يحل ولا يربط.
ولا معناته ان وزارة الداخلية تنام على قصة الفرعيات، وتسوي روحها ما تدري، لانها ما تبي تزعل احد، وتبي تراضي الكل على حساب حكم المحكمة الدستورية، وعلى حساب القانون إللي لازم تكون وزارة الداخلية حريصة عليه، ولكن الظاهر ان الانتخابات من اولها بطيخ، يعني راح يكون هناك شك في نزاهتها، خاصة مع معرفتنا بوجود الفرعيات، ومع معرفتنا ان الحكومة مطنشة مع سبق الاصرار والترصد!
القضية، مو تسوي روحك ما تدري وتسكت، والقضية انه بهالطريقة انت تؤكد للناس ان الحكومة مشاركة في الجريمة، ومشاركة في الفساد، ومشاركة يمكن حتى في تنظيم الانتخابات الفرعية.
الظاهر، والله اعلم، حكومة تصريف العاجل بتصير حكومة تصريف العاجل من الفساد السياسي.. وتصبحون على اصلاح!

كلمة رأس
لما نقول حكومة صمنديقية ما ظلمناكم .. الريال صعد المنبر وشتم خلق الله وكفر فئة كبيرة من الكويتيين وللحين قاعدين تداولون شنو راح تسوون وياه .. مو قلنالكم صمنديقية؟!



إقرأ المزيد...

يوم الوحدة


8/12/2011

يوم العاشر، يوم وحدة المسلمين، ويفترض أنه يوم للتضحية من اجل كل البشرية، ومحرم وعاشوراء والحسينيات في الكويت غير، الناس غير، والشباب وحماسهم لخدمة الحسين غير، وحبهم للحسين وأهل ديرتهم غير.
السنة اللي فاتت حاول واحد من هالدايخين يسوي فتنة ونشر وقال يوم فرح وسرور تصدى له بعض الناس بكل قوة ووقفوه عند حده، الكل وقف ضده كان سني ولا شيعي حضري ولا بدوي.
هالسنة هم بلش بنفس القصة والسرور والفرح في تحدي لمشاعر المسلمين أقول المسلمين لانه بالفعل ما في مسلم إلا ويحزن من اجل الامام الحسين ولكن هالسنة كان الرد اقوى عليه.
أول رد قوي كان من اتباع الحسين لمن تجاهلوه ولا كأنه كتب او قال او وزع لانهم اكتشفوا انه اصغر من ان يردوا عليه، وانه من يوم قتل الحسين والناس تحارب ذكراه وهو يزداد حبه في قلوب البشرية.
وثاني رد كان من المثقفين والكتاب وحتى رجال الدين اللي وضحوا للناس ان الدعوة للوحدة قبل الدعوة للتنازع وان المسلم اخو المسلم مهما حاولوا التفرقة بينهم يعني صارت طقته ببيزة في شارع الصحافة بدون استثناء.
والرد الثالث واللي كسر ظهره وظهر التكفيريين هم شباب الرميثية في هالمنطقة ومع توزيع الشربت والعدس - عاد خوش عدس عندهم- كان اهل الرميثية من الشباب السنة اللي وقفوا مع ربعهم الشيعة ينظفون المنطقة وينظمون الشارع والسيارات بدون أي حرج ولا إحساس بالفرق لانهم في النهاية يحسون بانهم أهل ديرة وحدة وجيران وابناء دين واحد قبل اي شي.
هذولة هم اهل الكويت اللي توحدهم قيم ثورة الامام الحسين وهي قيم الاسلام الخاص.. وسلام على الحسين وسلامي لاهل الكويت!
twitter.com/bushi5a

إقرأ المزيد...

تعلموا منه

5/12/2011

من أهم قيم ثورة الحسين (ع) قيمة الاصلاح، قال: «ما خرجت الا لطلب الاصلاح في أمة جدي اريد ان آمر بالمعروف وانهى عن المنكر» وهذي القيمة اللي بالفعل نحتاج الى تطبيقها في حياتنا اليومية والاجتماعية وحتى في حياتنا السياسية، لان الامام الحسين لمن خرج الى كربلاء كان هدفه اصلاح الوضع السياسي اللي يديره الفاسدين.
الفساد اللي كان متمثل في يزيد وأعوانه، وما كان في أحد يتجرأ ويوقفه عند حده، خرج على مغتصب الحكم لانه كان يؤمن انه لمن الحاكم يفسد، ولمن الولاة يفسدون، الشعب كله سيكون على دين ملوكه ويكون فاسد، ولهذا خروج الحسين كان من اجل اصلاح الامة كلها، لانه يعلم ان فساد الناس من فساد الحاكم.
هذه القيمة المفروض كل مواطن يحملها، ومن خلالها يحارب الفساد، يحارب الموظف المرتشي، والمدير اللي يمشي الناس بالواسطة، والوكيل اللي يستنفع من منصبه، والوزير اللي يسوي أي شي بس علشان يقعد على كرسيه اطول فترة، ويمشي المعاملات اللي ما تمشي.
قيمة الأمر بالمعروف من أرقى القيم الإنسانية اللي خلدها الامام الحسين، ما امر بالمعروف بالسوط، وضرب الناس، وملاحقة الناس، ولا بسجن الناس وقتل الناس.. انما أمر بالمعروف من خلال تقديم نفسه واهله قرابين في سبيل الله، واصلاح الامة، وتطبيق هذه القيمة العظيمة.. هكذا يأمر بالمعروف وإلا فلا!
twitter.com/bushi5a
إقرأ المزيد...

عندما يسمو الرئيس

4/12/2011

الناس نوعين.. النوع الأول صغير، ومهما تشوفه بالتلسكوب علشان يكبر بعينك، يظل صغير، وحتى لو تكبر في صورته، وترزه وتقعده بصدر الديوانية هم يظل صغير بعين الناس وقبلها بعين نفسه، لو تلبسه البشت وتغني له من الصبح الى الليل، أغاني تمجد فيه وترفع منه، هم يبقى نفس الانسان الوضيع اللي ما يرتفع.. لسبب واحد انه صغير في داخله، ويدور على أي منصب، أو جاه، علشان يفتك من عقدته!
والنوع الثاني كبير، كبير بعين الناس، كبير بأقواله وأفعاله، كبير بتصرفاته وعلاقاته مع الناس، ومع اهله وربعه وناسه، كبير ماتهمه المناصب، ولا ترفع من شأنه، بل هو اللي يرفع من قدر المنصب!
وسمو الشيخ ناصر المحمد، بالفعل من الناس الكبار قبل ما يترأس الحكومة، وبعد ما تركها برغبته وباختياره، لانه عمره ما سعى للمنصب، ولا نزل نفسه لكرسي، ولهذا لمن نقول له «سمو» لانه بالفعل «سمو» بأخلاقه، و«سمو» بأفعاله، و«سمو» حتى في مواجهة خصومه، وبقدر ما قللوا ادبهم البعض عليه، واستخدموا ابشع الالفاظ بحق سموه، الا انه ما رد عليهم الا بالكلام الراقي، اللي ينم عن رقي هذا الانسان!
بالفعل ياسمو الشيخ ناصر المحمد، عندما نحبك، وعندما نقدرك، سواء في الوزارة او خارجها، فاننا نفعل بدافع من اعجابنا بما فعلت، وتقديرنا للتضحيات اللي قدمتها وستقدمها دائما لوطننا العزيز، وسيعرف بعض المغرر منهم ذلك قريباً، وقريبا ايضا سيرددون: «وفي الليلة الظلماء يفتقد سمو الشيخ ناصر»!
twitter.com/bushi5a




إقرأ المزيد...

ما تغير شي


30/11/2011

عندي سؤال للجميع: شنو صار بعد استقالة سمو رئيس الوزراء؟
لو نبي نشوف الواقع ما صار شي، في الآخر تبي تتشكل حكومة من الوزراء، وبنفس الطريقة، يعني ما راح يتصلون على وكالة ناسا يدورون لهم على وزير، الفرق يمكن يغيرون بعض اللاعبين وبعض النواب، اللي كان معارض يمكن يصير مؤيد، والمؤيد يقلب معارض، وفي النهاية همه النواب، والتحالفات، والبلوكات النيابية هي نفسها ما تتغير.
ولا الموظفين بيقومون الفجر ويروحون الدوام، ولا اللي كان يتميرض راح يداوم حتى لو مريض، ولا اللي كان يختلس راح يتوب ويروح الحج ويتبرع بفلوسه لافريقيا، ولا اللي كان يستنفع من المال العام راح يصير شريف روما.
واذا صارت انتخابات جديدة، راح تشوفون نفس الناس يتحدثون عن الوحدة الوطنية، والمساواة، والقوانين، ونفس النواب بنفس الطريقة.
ونفس هالناخب راح ينتخب فلان لانه من عائلته، وفلان ما ينتخبه لان اهله ما يحبونه، وفلان زين لانه يمر ويسلم عالربع، وفلان مو زين لانه ما تعشى عندنا، وهذا علشان الطائفة، وهذا علشان القبيلة، وذاك علشان العائلة .. وهذا كل اللي راح يصير وباجر نشوف .. وسلامتكم.
twitter.com/bushi5a

إقرأ المزيد...

الخبل من يحرق البلد

25/11/2011

اخيرا العم السعدون صرح وقال عن احد الوزراء بانه خبل، بدل ما يصرح عن الاعتداء على مجلس الامة!
العم السعدون بعد ما كنا نقول عنه الفاهم العاجل بين المينن بدل ما يسكتهم قام يمشي وراهم ويردد نفس كلامهم ويتكلم بنفس اسلوبهم!
بس يا عم بو عبدالعزيز رغم احترامنا لك ما صدت الخبل ولا عرفته، واذا تبي تعرف منو الخبل انا اقولك.
طال عمرك الخبل اللي يقول للناس انه اذا صار غزو من اي دولة على الكويت راح يكون اول منحاش من الديرة ومن الحين قاعد يفكر وين ينحاش هذا بدل ما يكون اول واحد يدافع عن ديرته!
الخبل طال عمرك اهو اللي ما يخلي تجمع حتى لو مصبنة عند جمعية حتى لو تجمع هنود في المرقاب راح يروح ويتجمع معاهم ويخطب فيهم ويصرخ ويسعبل عليهم ويهدد الحكومة ويطالب ويندد ويستنكر ويستنزل!
يا طويل العمر يا عم احمد السعدون الخبل هو اللي صج يوقف في الارادة ويتكلم عن الفساد وهو اول واحد فاسد ويتصور الناس ما تدري عن فساده واللي اخبل منه اللي يصفق له ويشجعه ويهتف له ولا كانه اول واحد استغل منصبه وسيلة للربح والاستفادة!
يا بو عبدالعزيز الله يخليك لنا اللي دش مجلس الامة وكسر ووقف على طاولة الرئاسة ولوث كرسي الرئيس اللي انت كنت قاعد عليه يوم من الايام هذا يعتبر خبل اصلي واللي يدافع عنه اخبل منه طال عمرك وانت اكثر واحد تلتزم بالقانون وتعتز بالدستور.
الخبول وايدين يا طويل العمر بس طيبين الا الخبول اللي حوالينك شوفهم عدل وانتبه منهم لانه عمرهم ما يبون الخير لا لك ولا لغيرك.. ما يبون الا مصالحهم انت تعرفهم اكثر منا طال عمرك فامسك خبولك واربطهم زين، قبل لا تتهم العالم بالخبل!
twitter.com/bushi5a
إقرأ المزيد...

الثلاثاء الأبيض

24/11/2011

هذا تجمع وذاك تجمع، وكلهم اهل الكويت، ما في احد يزايد على احد في حب الكويت هذا خالصين منه..
بعضهم قال لا يبدأ مهرجان «الله يحفظج يا كويت» بدأ يطلع الشائعات... واحد «احمق» قال، بان هذولة يجمعونهم على عشرين دينار، وبكل قلة ادب سب اهل الكويت الي يمثلهم، والي رزوه علشان يصير نائب، وبدل ما يشكر الناس الي وصلوه شتمهم!
وثانيهم طلع وسواها قضية طائفية، وانه في توجه طائفي، وانها طائفية مع ان الكل شهد ان كل اهل الكويت كانوا بالساحة يوم الثلاثاء الابيض، ورفعوا راس الكويت، وبينوا ان كل اهل الديرة، سنة وشيعة، حضر بدو، من الشامية لي الاحمدي والجهراء والرميثية كانوا هناك... وهذا التنوع كان شوكة ببلعومهم!
وثالثهم قال انه المتجمعين وافدين ومو أهل الكويت، وهو يدري ان الوافدين لو يسمحون لهم بالتظاهر لحب الكويت، لكانت الساحات انملت منهم، مو من خوفهم انما لحبهم لهالديرة، ويحبونها اكثر من بعض عيالها مع الاسف!
كانوا يدعون انهم يتكلمون باسم الشارع، وكانوا يطبلون باسم الشارع، وكانوا يراكضون ورا الشارع، وسنة كاملة وهم يحاولون يحشدون، مرة بالكذب، ومرة بالحيلة، ومرة بالمفاجآت، وتالي اكثر من الفين ثلاثة ما يحصلون، نصهم سكرتارية النواب وربع ديوانياتهم... وجماعة «الله يحفظج يا كويت» في يوم الثلاثاء الابيض، وبمجرد اقتراح من بعض اهل الكويت، وبدون دعايات النواب، واعلامهم الفاسد، جمعوا اضعاف اضعاف مصفقينهم، وبكل حب غنوا للديرة ولاهل الديرة، بدون تزلف، وبدون ما يسبون احد، ولا يمثلون ويقطون دشاديشهم، ويرفعون عقلهم، وبدون ما يصعد كم فاسد على المنصة ويتكلم عن الشرف!
بكل رقي تعاملت الاغلبية الصامتة مع الغوغاء، ووقت التحدي نزلوا ساحة الارادة، وفي اول خمس دقايق طقوا فريق بابا سنفور (10) صفر... اقترح يصفطون فنايلهم لي بعد سنتين!
twitter.com/bushi5a

إقرأ المزيد...

رعاع


22/11/2011

ابي واحد فاهم وعاجل وخبير دستوري من ربعهم ويا كثرهم الخبراء الدستوريين.. يقعد ويفهمني علاقة اقتحام مجلس الأمة بمحاربة الفساد والقبيضة والاصلاح، كلكم شفتوا الصور الي وزعوها الجرايد والمحطات، ناس باشكال وملابس تنكرية.
صورة واحد داش ومتربع على كرسي الوزراء، وقاعد يصب لروحه القهوة، وشايل المطارة... شنو علاقتها بالديمقراطية؟
صورة النائب السابق الامين الصادق فهد الخنة، وهو يتعبث بالاوراق، ويقرا شنو مكتوب فيها.. شنو علاقتها بالفساد والاصلاح ومحاربة القبيضة؟
صورة الشاب الي قاعد على كرسي رئيس الوزراء، وشكله دايخ، وماخذ له درزن كبتي... شنو علاقتها بالايداعات المليونية؟
صورة النائب فيصل المسلم، وهو حاط ايده على رقبة حرس المجلس، علشان لا يروحون صوب الناس، ولا يمنعون الناس... شنو علاقتها بمحاربة الفساد في البلدية والشؤون والاشغال؟
صورة الي شايل مطرقة رئيس المجلس السيد جاسم الخرافي، ومودي معاه البيت، والي يفتخرون انه بيعرضه بالمزاد العلني... شنو علاقتها بمطالبهم الاصلاحية؟
صورة الي داش المجلس، وواقف على طاولة الرئاسة بكل قلة حيا وقلة احترام... شنو علاقتها بمحاربة القبيضة والقضاء عليهم؟
صورة الي يدز باب قاعة عبدالله السالم، ويكسر قفل الباب، ويدش المجلس كأنه مقتحم أسوار القسطنطينية... شنو علاقتها بالحياة الدستورية؟
صورة الرعاع الي دخلوا بيت الأمة، شنو علاقتها بالشعارات الي رفعوها... أبي خبير دستوري من الي تارسين البلد يشرح لي علاقة الفوضى بالدستور والقانون، ما يحتاج يتكلمون وايد، ويبربرون أكثر.. الصور واضحة وصريحة ان كل الي صار جريمة بحق الديرة وبالجرم المشهود، والمجرمين هم الي ليل نهار يتكلمون عن دولة القانون.
twitter.com/bushi5a


إقرأ المزيد...

كبير يا الدويسان


21/11/2011

كذب ودجل ما يحصل.. وتلفيق وخلط للأوراق ..
هدوا خطاباتهم الي انتهكوا فيها الدستور، وتعدوا على مسند الامارة، وتحريضهم وتغريرهم بالشباب على مخالفة القانون، وهدوا جريمتهم في اقتحام مجلس الأمة، وكسر ابوابه، واتلاف محتوياته، ومسكوا في تصريح النائب الفاضل فيصل الدويسان!
فيصل الدويسان ذكر وقال ما يعرفه الناس، لا ذكر اسماء دول ولا اشخاص، انما تكلم كلام عام يحذر فيه الناس من أي تدخل، وخاصة ان الديرة مستهدفة!
طبعا نواب الغباء علشان يغطون على فضيحتهم وعلى غباءهم، بلشوا ينتقدون الدويسان ويسبون حتى أهله الكرام، حتى يغيرون مسير الراي العام الي صار ضدهم، وراحوا يعرضون بالنائب فيصل بس علشان يغطون على سواد وجوههم!
متاكد انه ما فيهم واحد تهمه دولة شقيقة ولا صديقة، كل الي يهمهم كراسيهم وشلون يقعدون على الكرسي مرة ثانية، ويشترون لزقة «يوهو» علشان لا يهدون الكرسي!
اكثر واحد تكلم على السعودية، وطالبهم باتخاذ مواقف من سورية ومن اليمن، واخر شي تدخل حتى في شؤونهم الداخلية، وطالب بفصل الامارة عن رئاسة الوزراء هو النائب وليد الطبطبائي، ومحد قال له انت مخرب، ولا انه يبي يسوي فتنة، أو انه يعرض العلاقات الدولية للخطر، او يزعزع امن البلاد مع الدولة الشقيقة السعودية، ومع ذلك نواب الغفلة محد فيهم بطل حلجه!
نواب الغفلة حسبالهم الناس اغبياء، وحسبالهم اهل المملكة مدمغين، حتى تطوف عليهم سوالف النواب وشعاراتهم واعلامهم وتصريحاتهم السخفية، واهل المملكة يعرفون الصادق من الكاذب والردي من الطيب، من الي يقلقس تحتهم والي صادق وياهم... وللدويسان نقول امش مع قافلتك وخلهم يبنبعون لي الصبح...!
twitter.com/bushi5a

إقرأ المزيد...

أفا يا كيفان


20/11/2011

افا يا حضرة النائب .. هذا وانت نائب الامة، وولد كيفان، كيفان الصمود ضد الغزاة، كيفان اللي قاومت وواجهت الجيوش الصدامية وما تراجعت، تالي تقول إذا غزتنا ايران وين نروح؟
أفا يا حضرة النائب .. مو انت طلعت صورتك جدام العالم بالتلفزيون وانت تقول لهم أنا كنت ضمن الجيش اللي حرر الكويت، وأنا اللي حررت الديرة، تالي وقت الصجية تدور على مكان تنخش فيه؟!
أفا يا دكتور .. هذا وانت مجاهد ودشيت أنفاق وركبت سفن وطقيت اليهود بوكسات واقتحمت أسوار المجلس، يعني انت انسان مجاهد كامل الدسم، وقت الصجية تبي تنحاش، يعني تروح لغزة بريلك، الكويت تنحاش منها، كلش مو خوش حجي!
يا دكتور .. أهل الكويت ما يسألون وين نروح، يسألون شلون نقاوم شلون نوقف ضد الغزاة مهما كان شكلهم ولونهم وعلمهم وعمرهم، ما قالوا وين ننحاش، الا اللي النحشة في دمهم ومو قادرين يوقفون دقيقة يدافعون عن ديرتهم وعرضهم وشرفهم.
يا دكتور.. أهل الكويت يقولون لك شيسوون وقت الصجية، وقتها يقاومون ويدافعون ويواجهون بأرواحهم علشان الديرة، مو يركبون سياراتهم وقبيب على أقرب حدود .. اهل الكويت لي حجت حجايجها رجال وسباع مو نعام ونحشة وما نشوف الا غبارهم.
يا دكتور .. أهل الكويت لي سمعوا نداء الوطن مو يدورون سويج السيارة علشان يقبون.. يدورون السلاح اللي يحاربون فيه.
أفا يا دكتور .. هذي آخرتها وقت الصجية ... بتقب!
twitter.com/bushi5a

إقرأ المزيد...

الرمز سنفور

17/11/2011

في ناس يتحولون الى رموز...
جيفارا رمز الإنسان الثوري اللي قاتل وحارب علشان مبادئه.
غاندي مثال الانسان اللي دعا الى السلام والسلم واللاعنف وحب الناس بما فيهم اعدائه.
قيس بن الملوح مثال الحب العذري، واشعاره مشهورة والى الان يرددها الناس، وكان يموت في ليلى بس حظه انه ما تزوجها، وليلى يقولون صارت مدرسة بعد ان اقروا الكادر.
المتنبي رمز للشعر والبلاغة العربية، واشعاره الى الان نرددها ونحفظها، أو كنا نحفظها ايام المدرسة.
عنتر بن شداد رمز الشجاعة والاقدام وياما شق ويه عماري الزيادي، ورفع راس بني عبس، في غزواتهم وحروبهم ضد بني فزارة منو بني فزارة ما ادري بس شكلهم كانوا اصحاب مشاكل وسوابق.
نيل ارمسترونغ رمز نزول الانسان على القمر، لانه اول انسان داس بجوتيه سطح القمر.
أينشتاين رمز العلم الحديث لانه اكتشف النظرية النسبية ولا تسألوني شنو النسبية لانه مادري بس متأكد انه شي زين ومهم وحلو.
القذافي رمز للحاكم اللي ضاربة فيوزاته ودمر ديرته بجنونه وطلعاته الغريبة، وزنق نفسه في الاخر زنقة عجيبة.
صدام رمز للاجرام والطغيان، اللي البعض للحين يترحمون عليه بكل قلة حيا.
بيليه رمز للكرة واللاعب المثالي والهداف كان من زمان ومازال هو الرمز المشهور.
كل هذوله رموز وعندنا في الديرة هم رموز، رموز محترمة، ورموز غير محترمة، واعتقد ان بابا سنفور وبعد سالفته في المجلس، وكلامه عن رئيس الوزراء ورئيس مجلس الامة صار وبدون منافس، رمز لقلب الأدب!

twitter.com/bushi5a

إقرأ المزيد...

«الأزرق» يفوز بدون القبسة

16/11/2011

علميا يقال له «قبس» والعالم الكويتي الشعبي يعرف القبسة بالقول «انه واحد مقبس على العالم، يعني نحس، منحوس، ووجهه ما تشوف من وراه الا الغم والهم»!
وشخصيا اعرف واحد من الربع «قبسة»، اول ما اشوفه لازم تصير لي مصيبة، حتى لو يدق علي، اذا انا بالسيارة أطق الرصيف، اذا انا بالبيت تنطفي الكهربا، اذا انا بالبر يصير غبار، هذا بالاتصال بس!
وواحد ثاني من الربع قبسته تطلع بس على الاندية والمباريات، ما في ولا مرة قعد معاي بالديوانية او شاف المباراة بالقهوة الا وخسر فريقي، قمت اتنحش منه وقت المباريات، واقوله انا طالع كشتة المريخ بس علشان ما اشوفه!
واعرف هم نائب قبسة، راح مع سفينة اغاثة، بسبته الناس ماتت، والسفن احترقت، وصارت خمسين الف مصيبة لهم، مو بسبب اليهود، لا طبعا بسبب قبسته، حتى هذا مكتوب وموثق في تقرير الامم المتحدة!
ونفسه هالنائب من يوم ما صار معارض والمعارضة ما ترقعت، من فشل لي فشل، ومن مصيبة لي مصيبة، ومن فضيحة لي فضيحة، والسبب منو، هو السبب طبعا، «وشه يقطع الخميرة من البيت»، ومن المعارضة اللي اساسا ما فيهم واحد «وشه سمح»!
آخر مرة شفته بمباراتنا مع لبنان، يوم الجمعة، تصدقون كنت متفائل، ومجهز نفسي وشاري خيشة بنك، وكرتون بطاط ودرام نفيش، علشان اقعد واطالع، بس شفت سحنته وهو راز نفسه بالمقصورة قلت رحنا فيها، يعني هذا جاي من الحج، والمفروض تعبان ومريض، مو قاعد ومرتز، طبعا ما ابي أكمل الباجي تعرفونه، بس أبيكم تعرفون شيء، القضية مو بالاتحاد، ولا باللاعبين، ولا بالخطة، ولا بالمدرب، كل القصة ان الاتحاد كان لازم يمنعون دخوله لمباراة الامارات أمس، أحسن حتى يربح «الأزرق».
twitter.com/bushi5a





إقرأ المزيد...

سنفور نزل عليه الوحي


15/11/2011

انا مستعد ابصم بالعشرة والخمسة والثلاثة والواحد ان «السنفور» مجاهد فقد اهليته او فقد عقله او فقد شي فيه ما ادري شنو، والا فيه انسان عاقل وصاحي يقول عن نفسه بانه مثل الامام الحسين «عليه السلام» وانه عنده حوبة مثل حوبة الامام الا اذا كان هذا البني آدم خبل او يستخبل علينا.
الحبيب سنفوري الظاهر فيوزاته ضربت وقام يخلط ماي ودهن او قام يشرب تيزاب والعياذ بالله وبصراحة من يوم ما شفته فاصخ دشداشته وطالع بمكسر وفانيلة بوكابتن في الاعتصام قلت اكيد هذا داش في شي ويحتاج علاج ولازم يودونه الطب النفسي او يودونه عند ملا بلال يقرا عليه يمكن يرجع ادامي ومحترم.
يعني على هالسالفة مو بعيدة بعد يومين يطلع لنا ويقول انه عنده عصاية واذا طق فيها البحر يصير نصين ويقدر يعبر الخليج مشي لي محطة بوشهر.
او يقول عن نفسه انه يشافي الناس ويعالج الصم والبكم ويطير بالليل بسعفة لي خليج المكسيك يسبح ويرجع.
او يطلع لنا طلعة يقول انه حلمان انه قائد الامة وزعيمها وان الاوامر تقول ان الناس تتبعه علشان يهديهم.
واحد من الربع قال لي انه هذا لا خبل ولا يستخبل، هذا انسان جليل حيا ولو عنده شوية حيا واحترام للناس ولعقولهم ما قال هالكلام ولا قارن نفسه بالامام الحسين بس شنو نقول البعرة تدل على البعير اعزكم الله من البعرة!
ونطروني المقالة الياية لمن يعلن سنفور كلكجي ان الوحي نزل عليه!
twitter.com/bushi5a


إقرأ المزيد...

معاها قلباً



14/11/2011


هذا لقاء حصري مع بابا سنفور، بعد ان طحنا عليه راجع تالي الليل من المطار، ويقول انه راجع من الحج طبعا:
• بالنسبة لموضوع الضابط ورفيجته، ممكن تعطينا رأيك بالموضوع؟
• طبعا انا مع رفيجته، قلبا وقالبا وضد الضابط.
• وشنو المطلوب؟
• المطلوب من وزير الداخلية يتدخل فورا ويشيل الضابط، ويحط بداله ضابط ثاني، والاسم عندي ممكن أعطيه علشان يعينه.
• وشنو سبب وقوفكم مع رفيجته في الحفلة؟
• أنا مع حقوق المرأة قبل كل شيء.
• انت صوت ضد حقوقها؟
• نعم هذا قبل، بس بعد سالفة البنت، اكتشفت اني لازم اوقف معاها.
• حبيب قلبي، هل عندك مشروع لحل أزمة رفيجته؟
• طبعا رفيجته انا كلمتها شخصيا، وكانت تطالب بكادر خاص.
• يعني بتقدمون لها الكادر؟
• طبعا عندي مشروع خاص فيها، كادر لعيونها، واذا الحكومة اعترضت راح نسوي اضراب واعتصام في السالمية وحولي.
• معقولة تهدون الديرة ومشاكلها وتراكضون ورا البنت؟
• احنا ما نراكض وراها، احنا نمشي وراها، والفرق كبير بين المشي والركض.
• اقصد مشاكل الديرة والناس؟
• مشاكل الناس تنحل، بس نحل مشكلتها.
• ومشكلة المرور والازدحام اليومي؟
• هذي هم تنحل بس انحل الزحمة الي عند الشقق.
• ومشكلة الاسكان؟
• هم انحلها بس ندور شقة للمسكينة.
• ومشكلة المستشفيات؟
• هذي هم نحلها بس نعالج مشكلتها.
• واخرتها شنو الحل؟
• ما ادري اروح اسألها، واقولك!
twitter.com/bushi5a

إقرأ المزيد...

إنزين .. وبعدين؟!


4/11/2011

هذولة حرامية ونصابين، قاعدين يبيعون البلد..
هذولة خنازير الظلام، ولازم نذبحهم واحد واحد..
هذولة يسرقون وينهبون البلد، وكل شي في البلد مسروق..
هذولة ماعندهم ذمة، ولا ضمير، ولا غارية..
هذولة مو من جنس البشر..
هذولة قبيضة مرتشين، الله ياخذهم..
انشا الله تطيح عليهم الطوفة، او يدعمهم باص شايل عمال بنغالية..
مالت على أمكم اللي يابتكم، يا نواب ويا قبيضة!
ندري انكم كنواب معارضة تعرفون تسبون كل انواع السب، وبكل لغات العالم، وحتى بلغة الطيور، والثعابين، والثعالب، وندري ان حنجرتكم ذهبية، ويمكن بعد اعتزالكم للسياسة تنزلون البوم غنائي، وندري أنكم وايد شرفاء لان الانسان شرفه مثل عود الكبريت تولع مرة وحدة، وانتم مولع على طول .. بس نبي نعرف بعدين، اي نعم عرفنا كل هذا اللي قلتوه، وسمعناه... وبعدين؟
أوضح لكم اكثر يا نوابنا الافاضل، سؤالي: شنو الاجراءات العملية اللي سويتوها واللي بتسوونها علشان توقفون الفساد والرشاوي مثل ما تقولون؟
وين لجان التحقيق اللي لازم تشكلونها، واللي بتشاركون فيها، واللي راح تكشف الحقائق؟الا اذا خايفين ان كشف الحقائق تكشف حقائقكم؟وتطلع للناس خياش الفساد اللي شايلينها على ظهوركم!
وين الفعل الحقيقي، بدل الكلام الفاضي والسب، يا معارضتنا يا حلوين وطيبين؟ اما انكم بالفعل تشتغلون مثل الرجال وتكشفون كل الحقائق، وتقولون منو الفاسد ومنو النظيف، أو اكرمونا بسكوتكم!

كلمة راس
إلى الموظف العيار وبدون تحية: ترى مو ناسيك.. بس بعد العيد مش راح تقدر تغمض عينيك.
twitter.com/bushi5a
إقرأ المزيد...

لابس بشته من الطيارة



3/11/2011


المعارضة الشعبية والوطنية التكتلية التنموية الإصلاحية الاخوانية السلفية، كلهم على بعض لازم يحددون موقفهم، يا أبيض يا أسود، ما يصير نص ونص، لازم مواقفهم وكلمتهم تكون واحدة!
يعني مثلا في يوم الافتتاح بعضهم لبس البشت وبعضهم ما لبس البشت، الرئيس السابق كان لابس بشته، وهو والبشت جيران مثل انا والقمر جيران، وفي نفس الوقت دشوا بعض النواب جطل بدون بشت، طبعا لمن ما تلبس بشت له عدة معاني، وحدة منهم انك نائب مع الناس وماتبي تميز نفسك وانك ياي تشتغل، ومو ياي تكشخ بالبشت، او انك ماتلبس بشت لان المناسبة مو مهمة عندك، واعتقد الناس فهموا ان النواب اللي بدون بشت كان هدفهم يبينون انه مو مهم عندهم دور الانعقاد، ولا مهم عندهم يلبسون البشت احتراما، مع ان بعضهم يوم راح يعزي في السفارة السعودية كان لابس بشتين مو بشت واحد، وبعضهم راح يعزي القيادة السعودية في الرياض ومن التزلف والنفاق، كان لابس بشته بالطيارة!
الموضوع مو لابس بشت، أو بدون بشت،لانه كل واحد حر في اللي يلبسه، الموضوع هي الاخلاقيات، واهل الكويت مهما اختلفوا كانوا ملتزمين بالاخلاق والادب، واحترام اللي يخالفونهم جزء من ادب الاختلاف، لان صراعهم عمره ما كان شخصي انما كان على مصلحة الديرة، بس هالبدعة الجديدة اللي طلعت، بينت ان بعض النواب عمرهم ما عاشوا مع اهل الكويت، ولا يعرفون ثقافة الاختلاف والاحترام!
ما ابي اطولها انتو شفتوا كل شي، واعتقد ان مشكلة المعارضة عندنا مو قلة عددهم، ولا قلة جمهورهم، ولا قلة امكانياتهم...إنما قلة ...!
twitter.com/bushi5a


إقرأ المزيد...

قعدات تالي الليل


2/11/2011

اما انهم بطالية وماعندهم شغل،او انهم بينحاشون من حريمهم وعذرهم الاجتماع،لانه لي الحين ما ادري شنو سر تجمعاتهم تالي الليل،يعني ممكن يجتمع الحرامية تالي الليل علشان يخططون لبوقة بنك، او يسطون على بقالة،لانهم حرامية،وبين اللصوص والليل علاقة قديمة،بس الظاهر الزمن تغير،وبعض النواب صاروا عشاق ليل وظلمة!
تالي الليل يجتمعون،ويسربون اخبار،وانهم بيكسرون الدنيا،وانه حنضرب بالمليان،وانه راح نشق شقوق ما تخيط،وانه راح يكسرون الطوف ،وانه البيان الي بيطلع بس السطر الاول منه راح يحرقون فيه نص الحكومة،وعلى اخر البيان يمكن يحتلون اميركا!
نواب جلسات تالي الليل وبعد نطرة من الناس،والاذاعات، والكونغرس الاميركي، ومجلس الدوما الروسي،ومخلين اوباما ما ينام بسبة بيانهم، آخر شي يطلعون ويستحبون واحد واحد،والبيان يمتخض ويتمخض و«يلد فارا» والفار هم يطلع منتف ماله خلق نفسه!
نواب من طلب الكرسي سهر الليالي، من كثر ما نفخوا في روحهم، وسووا روحهم ابطال،وانه كل واحد يقدر يشيل ثور على زنده ويمشي فيه من الضاحية لي ام الهيمان، بسبة بياناتهم اكتشفوا الناس انهم ابطال من شرق وروق، لا يهشون ولا ينشون، لا عندهم قرار،ولا شورهم بايدهم،ولهذا السبب اكثر ناس طايحين تشلخ بنواب المعارض اهمه ربعهم،والي طول الاشهر الي فاتت كانت تشجعهم، واكتشفوا فجأة ان نوابهم يموتون على الكرسي الاخضر، ولو تمسح الحكومة فيهم القاع هم راح يظلون على كراسيهم،يعني بالمختصر النواب طلعوا صوت بدون صورة!
twitter.com/bushi5a


إقرأ المزيد...

توهق السنفور البطل


31/10/2011

تورط البطل، وتوهق السنفور العظيم، لمن كتب في حسابه التويتري انه يطالب بفصل السلطات في المملكة العربية السعودية ويطالب بالإفراج عن المعتقلين هناك وهم فوق البيعة.. الأخ تلخبط في ذكر اسم ولي العهد السعودي الأمير نايف!
بعد هالتغريدة اللي غردها، وهو مبتسم ومنشكح في شواطئ البهاما وصلتنا اخبار دقيقة جدا ومطلعة انه تم الاتصال فيه من داخل الكويت وسمع في الاتصال كلام نقدر نقول عنه انه خارج نطاق التغطية وانه من الخوف دز كم تغريدة حاول يرقع فيها الكلام اللي قاله، وانه آسف، وانه مو قصده، يعني بس كان ناقص يبوس رجولهم علشان يعفون عنه ويسامحونه وما يسكرون عليه حنفية الهدايا!
السنفور العظيم صاحب الصولات الجهادية والمواقف الثورية والشيكات الألفية والشركات الطبية والمبرات الإيمانية شكله مو فاهم ولا راضي يفتهم ان السياسة لها اهلها وان السياسي يختلف عن المطيرجي وان اللعب في السياسة غير اللعب في البراحة واللي يقود الأمة مو نفس اللي يسوق باص.. بس عاد تعال وفهم القطو على تشغيل الآي باد هذا المثل توني مكتشفه!
اقتراحي لابو السنافر انه لازم يدش دورات مو دورات مياه اقصد دورات في فن الخطابة فن الكلام مع الناس، فن احترام منصبه وموقعه بدل ما يصير مطنزة للعالم، أقول قولي هذا، واستغفر الله لي ولكم وأدعو للسنفور بالمرة وأقوله «الله يشفيك»!
وايضا اعتذر لاخواننا في المملكة السعودية واقول لهم يا جماعة الخير «سنفورنا» فاقد للأهلية ولو بايدي جان وصلته للطب النفسي وربحت من وراه خمسين دينار وتدرون انه ما على الخبل من حرج فسامحونا!
twitter.com/bushi5a


إقرأ المزيد...

عهد صاحب العهد


27/10/2011

عهد سمو الرئيس الشيخ ناصر المحمد، عهد الاعلام المفتوح، فبعد سنوات من احتكار الاعلام والصحف، فتح المجال جدام الكل، حتى الكل يمارس حريته، وطبعا وسط الاوادم لازم في النطيحة والمتردية اللي يدشون الحقل الاعلامي، وهم سمعوا عن الحقل الاعلامي حسبالهم الحقل يعني مرعى وعلف، وهني ما قمنا نفرق بين الكاتب والحصان، وبين اللي يعلف والي يكتب، وبين اللي يتكلم ويناقش وبين اللي يتهجم ويشاتم، وكله حقل اعلامي، وفي النهاية الطيب يبقى والردي يقضب الباب!
في الاعلام الحديث شفنا حتى الطقاقة تشتغل خبيرة استراتيجية في الشؤون العالمية، وعندها توجهات واراء وحتى دراسات عالمية، وكانت مستشارة لكيلنتون من فترة بس هدت كلينتون، لان اجتماعاتها كانت تتعارض مع حفلاتها!
في عهده فتح الباب على الكوادر، وهو اللي خله الكل يستفيد، ويرفع من مستوى دخل المواطن الكويتي، ويستنفع من زيادة اسعار النفط، وهذا الشي الايجابي اللي سواه سمو الرئيس والي محد يقدر يناقشه ويقول انه غلط، بالعكس هو ساهم بشكل مباشر في دعم الاقتصاد وتحريك السوق، واذا اهمه يقصون على الناخبين بكم كلمة فالشيخ بالفعل ساعد في رفع مستوى المواطن الكويتي، ولكن مع الاسف بعض الهوامير بتحالف مع بعض النواب، يتصورون ان الديرة ملكهم، وما يحق للحافي ان يرفع راسه، حاله من حالهم، وهذا هو بالفعل سبب حقد بعض الهوامير عليه!
هذا بعض اللي سواه الشيخ ناصر، نوابنا تفضلوا قدموا اللي عندكم وانا ناطر!
twitter.com/bushi5a
إقرأ المزيد...

مو بس كلام


26/10/2011

العضو الأول النائب الامين والصادق والفاهم، والدكتور اللي عمره ما اعطى طالب اقل من حقه، ولا اكثر من حقه حتى لو كان من خيطان ومن دائرته، واللي عمره ما راح ورا معاملات، ولا تثمينات لصالحه او لصالح اهله، قال انه عنده شيكين، بارقامهم، وحط لنا رقم الشيك والمبلغ.
بعدها العضو الثاني اللي عمره ما سوى واسطة لأحد، وده علاج للخارج، ولا شال وحط، ولا توسط لربعه واهله، ولا عمره صار واسطة لاخو او خال او عم، وفي كل استجواب يوقف ضد الحكومة حتى لو كان الوزير ولد قبيلته، عنده ادلة على انه كاشف اهم سر للبشرية، وان هالاكتشاف، اهم من من وصول الانسان للقمر.
سعدون حماد اللي هو نائب حاله من حالهم، وعنده من الصفات العظيمة مثل ما عندهم، وعنده ناخبين صوتوا له مثل ما صوتوا لهم، هم قال وصرح، انه عنده وثائق، برشاوى ودفعات وانه عنده ادلة على تحويلات من بنك محدد في السعودية لاحد النواب واللي كشف اسمه تلميحا، وكان اكثر شجاعة منهم، وتكلم عن النائب الرمز والعراب اللي هم عنده شركات وتحويلات ورشاوى واموال وعقارات.. يعني سعدون حماد هم كان واضح اكثر وقطها بالوجه مثل ما نقول.
شنو الدليل على ان حماد غلطان وان الاعضاء اياهم على حق؟ شنو اللي يخلينا نصدق ان الحماد ما يقول الصج، وان الاعضاء اياهم اهمه الملائكة؟
واذا الاعضاء اياهم هالكثر ذابحتهم الامانة وانهم متأكدين انهم على حق؟ وانهم متأكدين ان الشيكات وغيرها فيها شبهة فساد، ليش ما يروحون النيابة ويقدمونها حتى بالفعل نصدقهم يحاربون الفساد؟!.. وكما قال الحكيم المشهور غلام في درب الزلق «مو بس كلام»!
twitter.com/bushi5a


إقرأ المزيد...

إذا حجى الشرع


25/10/2011

«إذا حجى الشرع الكل ياكل تبن» هذي مقولة الفنان عبد الحسين عبد الرضا الشهيرة في مسرحيته القديمة، وبالفعل الشرع لمن يقول لازم نسمع ونطيع، وما نبطل حلجنا، والمشرع لمن يحكم نفس الشي، لازم الكل يسمع وينفذ.
المشرع والمحكمة الدستورية قالوا بالفم المليان والواضح والصريح، لا لبس فيه ولا جدال، ان الاستجواب الذي قدم لرئيس الوزراء غير دستوري، وغير دستوري اذا نبي نشرحها بوضوح، تعني ان الاستجواب غير دستوري وبطريقة ثالثة نقول انه غير دستوري، وبطريقة رابعة نقول، ان الاستجواب الي قدموه لازم الحين يجيبون طشت، ويترسونه ماي، ويجيبون اوراق الاستجواب وينقعونه فيه، وبعدين يشربون ماي الطشت المستجوب،
وهذا دواهم وعلى الله شفاهم، من كل مرض بدني ونفسي.
بس لازم فجأة يطلع كم خبير دستوري، ويا كثر الخبراء الدستوريين الي مطيحين عند باب كل وزارة، ولفة، اركب سيارتك وافتر وانت تشوف عشرين الف خبير دستوري يأشر لك، يبي توصيلة، والثمن استشارة دستورية مجانية.
والواضح ان هالخبراء او فيهم خلل عقلي، أو ما يعرفون يقرون، او انهم من طيور الجنة، لان واحد منهم طلع وقال بان الحكم لا يشمل هالاستجواب، والثاني طلع وقال بان الحكم رفض الاستجواب بالعموم وليس بالخصوص، وثالث هم تفلسف على مخنا وقال إن الحكم غير ملزم، وكانه رايه هو الملزم الاخ خبير الغفلة.. أقولها بعد مرة مثل ما قال بو عدنان اذا حكمت «الدستورية»، رجاء ولو سمحتوا، الكل ياكل تبن»!


إقرأ المزيد...

عدّوهم عدل


24/10/2011

سؤال كم عدد الحضور في ساحة الإرادة؟
دزيت خبير تعداد سكاني الى موقع الحدث وقلت له ووصيته روح عد لي كم واحد حاضر بالضبط وتعال بسرعة!
راح ساحة الارادة واخذ معاه كاميرا التصوير وآلة حاسبة وقام يحسب وفي النهاية عطاني التفاصيل:
9 نواب كانوا قاعدين وبعضهم واقفين، و4 نواب سابقين، هم كانوا قاعدين يلعبون بموبايلاتهم، 134 سكرتير نائب كانوا واقفين وشايلين الباجات ويرددون الشعارات الوطنية، 13 مهندسين صوت وصورة واضاءة، 23 مصور من الصحف الكويتية والشقيقة والرفيقة، 34 صحافي من الصحف والمجلات والتلفزيونات، 65 شرطي مرور ينظمون السير، 347 مباحث كانوا في ساحة الارادة شلون عرفتهم؟ طبعا كانوا واقفين ولابسين بالطو طويل وماسكين جريدة مخرومة، 8 من الحزب التقدمي، 23 من التجمع الليبرالي، 32 من التجمع الدستوري الوطني، 21 من كافي، 23 من تجمع حافي، 34 من تجمع اي شي، 22 كانوا يتمشون وشافوا روحهم بالساحة، 33 كانوا يدورون ربعهم اللي مسلفينهم، 36 كانوا قاعدين وشافوا فجأة الناس حولهم، 76 بيشوفون شالسالفة، 25 كانوا بالقهوة وقالوا يمرون على ما يبدا دوري ابطال اوروبا، 203 حسبالهم عرس وفيه عشا، 124 قالوا لهم تعالوا وبتطلعون بالتلفزيون، 34 قايلين لهم في ارقام وفي سحب على السيارات، 45 كانوا سافطين والسيارات صاكة عليهم، نزلوا يدورون اصحاب السيارات، 234 سامعين ان كيم كردشيان بعد دبي مارة على الكويت علشان تحضر ساحة الارادة، 333 حسبالهم صج النواب عندهم سالفة وبيطلعون وثائق، 1 وهو المندوب اللي دزيته علشان يحسب!
المهم كم صار عددهم، ما ادري قالوا 12 الف بالضبط وهذا يعني انه على الاقل فيه 3 الاف سيارة اذا افترضنا ان كل 4 راكبين سيارة وحدة ممكن تقولون لنا وين سفطت الثلاث الاف سيارة؟
twitter.com/bushi5a
إقرأ المزيد...

أربعاء الترفيه



23/10/2011


نبدأ اليوم بقصة الأربعاء، وفي قصة الأربعاء عبر كثيرة ومهمة لأي مواطن كويتي، الزبدة نبي نقولكم شنو توصلنا له في التجمع، وشنو اكتشفنا:
-1 اكتشفنا إن عدد التجمع 12 ألف، هذا اللي قالوه حتى قبل التجمع، والى الان ما نعرف شمعنى 12 الف بالضبط، ليش مو 12 الف وواحد.
-2 اكتشفنا ان فيصل المسلم لي الحين عنده شيكات خاشهم، بس هم اكتشفنا انه شكله خايف يطلع الشيكات، وبمختصر العبارة «اللي يتلسع من الشوربة ينفخ بالزبادي.. ويصير ربادي» يا عيني علي وأنا أقول أمثال شعبية مصرية.
-3 اكتشفنا ان الشباب مع بداية الكلمات تحركوا ومشوا، ليش مشوا؟ مو لانه ما يحبون الخطيب، لا طبعا، بس لانهم رايحين يشوفون ميسي، يعني بذمتكم الناس تتابع برشلونة وميسي ولا ربع «الإرادة»؟
-4 اكتشفنا ان احد النواب مثل ما هو، كلام قوي، وشعارات، وكله معصب من اول الخطبة لي اخر الخطبة، وبدون توقف بس هالمرة تكلم وايد، ومع ذلك وصلنا الى نتيجة مهمة، انه ما قال شي، كل اللي سواه حط لنا شوية اوراق بدون اسامي، على انها تحويلات، بخط اليد، لا ختم ولا اسم، ولا توقيع، ولا حتى طابع بودينارين واصر انها فضيحة ومصيبة.
-5 اكتشفنا إننا صج البلد فيها ديمقراطية وان سمو الشيخ ناصر رجل يؤمن بالديمقراطية، والنواب الشجعان يتكلموا عليه وعنه بكل شيء، ومن شجاعتهم انهم ما تجرأوا يقولون اسم نائب واحد يقولون عنهم مرتشي، وهذا دليل شجاعتهم طبعا.
-6 واكتشفنا إن أوراقهم احترقت وان كل اللي عندهم قالوه، وان الاسبوع الياي يمكن يعطلون!
-7 واكتشفنا أخيرا، انه بالفعل صارت بالبلد أماكن ترفيهية جديدة!
twitter.com/bushi5a

إقرأ المزيد...

ألعاب العضو»


19/10/2011

قالوها من قبل «هم يبكي وهم يضحك» وهم يخليك تشق هدومك، وهم يخليك تنط من فوق السطح وتصير شهيد الوضع السياسي الكوميدي على طريقة المرحوم اسماعيل ياسين.
العضو دور، ودور، مالقى شيء غير مسدس مستورد من الصين، طبعا مسدس العاب مو اسلحة ارهابية، واكتشف ومعاه خبراء السلاح الصيني ان المسدس يقول اضرب السيدة عائشة، وهو يطالب وزيرة التجارة بالتدخل، ويمكن يستجوب رئيس الوزراء على اللعبة الصينية اللي تنباع من عمر بالبقالات.
العضو حاط صورته في التويتر وهو شايل المسدس كدليل على صحة كلامه، واحنا معاه، ونفترض ان المسدس يقول مثل ما سمعه العضو مو لازم نسأل العضو ونسأل روحنا، طيب المطلوب شنو؟ هل المطلوب نطلع مظاهرات ونسوي اعتصامات، ولّا المطلوب ان العضو يهد شغله ويجابل المسدس من وين جاي، ومنو بايعه، او ببساطة العضو يبلغ وزارة التجارة وتنتهي القضية؟ يعني الموضوع لا يحتاج عضو ولا وزراء ولا اعتصام، ولا خطاب ناري، ولا تصوير فيديو لوقائع اجتماع المسدس.
لمن اقول هم يبكي صج يبكي يعني العضو اللي المفروض يشرع القوانين، ويراقب اداء الوزراء قاعد يراقب الالعاب والمسدسات، يعني كل هالفساد اللي في البلد، وكل هالاعتصامات اللي بسبب وبدون سبب، وكل هالتهديدات التي تواجه الديرة، والمشاكل الاقليمية اللي عندنا.. ما ترست عينه، واللي شغل باله هالمسدس!
حبيبنا العضو «سر ونحن من ورائك»
حتى ندمر كل المسدسات الصينية اللي في الديرة!
twitter.com/bushi5a

إقرأ المزيد...

أنواع الاعتصامات



18/10/2011


الاعتصامات أشكال وأنواع، وهذا ملخص لأهم أنواع الاعتصامات في الديرة.
1 - اعتصام خطابي: وهذا النوع، يوقفون مجموعة من الناس، ويخطبون في مجموعة ثانية، طبعا لا الي يتكلمون فاهمين شقاعد يقولون ولا الي يسمعون، ودايما تصير هوشة في هالتجمعات، منو الي يتكلم آخر شي، ومنو الي يتكلم اكثر شي، يعني اعتصام يصير فيه مخامط على المايكروفون.
2 - اعتصام صامت: وهم مجموعة ثالثة ما لهم خلق يسمعون الخطابات، فيجتمعون صامتين وساكتين، ما يسلمون على بعض انما يؤشرون، وطبعا اذا بتشارك لازم تعرف لغة الاشارة، لانه ما يصير تسولف مع رفيجك، ولا صار اعتصام سوالف.
3 - اعتصام راقص: وهذا النوع يعتبر جديد وقديم، فالجماهير تعتصم وترقص، طبعا يرقصون على الحبل أو الحبلين او عشرين حبل، ويسويها الناس الي كل يوم على رأي ويتلون على حسب الموجة!
4 - اعتصام أكل: وهذا الاعتصام لو يسوونه راح يصكون على كل الاعتصامات، والاعتصام يكون عبارة عن بوفيه مفتوح، مع سيخ شورما على السريع، واتوقع في هالاعتصام عدد المشاركين راح يصك الميتين الف.
5 - اعتصام نائم: يعني كل واحد يجيب لحافه معاه وينام بساحة الارادة، مع ان هالايام الجو رطوبة بس عادي، ندبرها بمراوح ماي، وهذا احسن اعتصام، لا مشاكل ولا هتاف ولا واكل، بس نوم، وما نسمع غير صوت الشخير، والصبح كل واحد يروح بيته.
6 - اعتصام سفري: وهذا احسن اعتصام، وهذا الاعتصام مريح وانا راح اطبقه، كل المطلوب منك تدق على اي مطعم، ونقرر ساعة الاتصال، وتقول لراعي المطعم، «لو سمحت ابي واحد اعتصام سفري» والناس وهمه قاعدين، يوصلهم الاعتصام لي البيت بدل ما اهمه يروحون الاعتصام!
هذا اقتراحي، وراح اطبقه من هالاسبوع، وانتو كيفكم!

• كلمة راس
للكاتب اللي يقول عن نفسه سلفي، واللي قال الكلام القذر بـ«تويتر».. أنا سلمت مقالتي للجريدة.. ينشرونها ما ينشرونها .. كيفهم.. بس راح انشرها في أماكن ثانية يا «الوسيع»..
ملاحظة: كلمة «وسيع» لها عدة تفسيرات.. لا يروح فكركم لبعيد.
twitter.com/bushi5a


إقرأ المزيد...

شيبوب الدبدبة


17/10/2011

يبي يلعب دور الشريف على الشرفاء، هذا مختصر مفيد لحالة شيبوب الدبدبة .. هو يدري، وأنا ادري، وعبود خواجة يدري، وزكي رستم يدري، انه نصاب وحيال بوطير، ويبوق الكحل من العين!
الشريف اللي عامل فيها زعيم دولي للقبائل ما وراء البحار، طالع طلعة هالايام وهو يتكلم من الرشاوى والنواب القبيضة والفساد، والأخ تاريخه كتاب مفتوح، من أيام كان يداوم المجلس بجمس، ومن بعد الجمس فجأة نزلت عليه المناقصات .. شارع مني، ومنطقة مناك، ودوار ذاك الصوب، المهم ما في مناقصة رايحة او رادة، الا الأخ حاط ايده وقابض كم فلس، لزوم الاستشارات!
شيبوب الحدساوي يبي يلعب دور الواوي اللي فجأة نزل عليه الايمان والتقوى والصلاح مع انه لي الحين فضيحة الشركة لاحقته، وهي الشركة اللي طلع وقال بانها راح تكسر الدنيا، والارباح مضمونة، والحسابة بتحسب، وبعدها بأشهر الناس ما شافت الا اسهم الشركة تنباع بسوق الحمام، وشيبوب اختفى!! ورد يتكلم الحين عن الشرف والامانة!
وها الايام قاعدة يدرب ولده علشان يصير زعيم، تقدرون تقولون مثل عايلة كندي .. ولد شيبوب نفس حالته مو ياجماعة الحدساوي على طريقة الزعماء العرب، اذا مشى وهد المنصب لازم يحط ولده مكانه، وولده اللي انولد وبحلجه ملعقة من اسمنت المقاولات المليونية، حاليا يتكلم عن الجهاد والثغور والثورة .. شيبوب البراحة، بعد هالتاريخ المعفن بيمثل علينا دور عنتر بن شداد مع انه حتى شيبوب يخب عليه!!
twitter.com/bushi5a


إقرأ المزيد...

قوية .. وايد قوية!



16/10/2011


كأنه الامريكان لاقينا مقصة، وبيسوون علينا فيلم هندي؟ يعني ما يخالف الامريكان حبايبنا ونحبهم، ونشتري منهم الآي فون، والسيارات، والملابس، ونوقف بالدور في طابور سيارات المكدونالدز، وهم الي حررونا، وهم الي خذوا فلوسنا بعد، بس عاد قصة الاغتيال، شوي قوية، أو وايد قوية.
ما يخالف يابوحسين «اوباما» معقولة ديرة شكبرها، ومخابرات، واخر شي مسؤول يدق على العميل ويقوله بالموبايل، يالله خلصنا وروح اذبح وفجر، وكانه داق على مطعم يبي ماعون كباب وحمص وورق عنب.
بعدين طال عمرك يا اخ اوباما، لنفترض انه انتو صح، وكلامكم عدل، ممكن تفهمونا، ليش؟ يعني ليش ايران يبون يغتالون السفير السعودي في امريكا، ليش مو الي في طاجكستان او الكونغو او السودان؟ وليش يغتالون السفير؟ شنو الرسالة الي بيوصلونها من اغتيال سفير دولة ثانية؟
الملخص ان طريقة الاغتيال هم بايخة، يعني يبون يفجرون مطعم علشان يغتالون السفير؟ وهم زين ما قالوا انه سيتم اغتياله انه يحطون مسدس في الاكل، او واحد يوقف ورا الطوفة وفجأة ينط جدامه ويخرعه، وتحوشه سكتة ويموت!
المراد يا شباب، الامريكان قاعدين يلعبون ويخططون، وما يبون تقارب إيراني خليجي، لانه لو اتفقوا الطرفين بعد ماله داعي يقعدون بالخليج ويشفطون من هالنفط، ويصفرون عداداتنا، وينظفون خزاينا، وهذي هي حالة الامريكان، يخرعون العالم من الكل بس علشان يستفيدون، مثل ما خوفوا الناس من بن لادن سنين الحين ماكو غير الإيرانيين، يخرعون الناس فيهم، وباستثناء بعض الملاقيف من ربعنا، الي يرزون «فيسهم» في كل شي، فاكثر الناس عداوة مع الايرانيين هم قادرين يصدقون الفيلم الامريكي الهندي.. وكلهم يقولون كلمة وحدة.. قوية!
twitter.com/bushi5a


إقرأ المزيد...

كادر بانكوك


12/10/2011

كانه الموضوع قام يمصخ شوي، قلنا بعض الفئات يستحقون لانهم يتعبون في شغلهم ولان بعض تخصصاتهم نادرة، وقلنا ان بعض العاملين في الحكومة يستحقون كوادر، وبعض النقابات عندها حق في بعض مطالبها، بس اللي قاعد يصير ان البعض قام يطالب باي شي!
موظفين يتظاهرون ويعتصمون لانه ما يبون يبصمون يا سلام ليش يبه ما تبي تبصم مو المفترض انك مداوم وعلى راس عملك وانك جاهز دايما ليش عيل ما تبي تبصم من شنو خايف مو جهاز البصمة ماراح ياكلك!
موظفين في ادارة ثانية يطلعون اعتصام لانهم تعبوا من الدوام يبون يوم يداومون ويوم ينامون ويوم يقزون في الافنيوز وباجي الاسبوع يسافرون دبي يعني يبون كادر دبي وبآخر الشهر يومين في بانكوك.. يعني يبون كادر بانكوك.
الطلبة طالعين يبون درجات حتى الطلبة علموهم على الخراب يبون درجات ويبون ينجحون بدون اي سبب واية مقدمات وبدون امتحان بس ناقص الطلبة يطلعون ويطالبون الوزارة يمتحنون بدالهم ويقدمون على الجامعات وتتخرج الوزارة بدالهم!
موظفين طالعين لانه يبون بوفيه يومي ريوق على حساب الحكومة لانه مو معقولة يداوم وياكل على حسابه وهو في الوزارة!
اللاعبين هم طالعين ما يبون يلعبون ليش يبه ما تلعبون؟ يبون كادر اهداف كل هدف يحطه اللاعب بتسعيرة الشوتة بسعر والراس بسعر والدبل كيك بونص!
وحتى المغازلجية اللي يفترون بشارع الحب والخليج والمجمعات قايلين بيطلعون اعتصام يبون كادر خز وترقيم وكادر خاص لبنزين السيارة!
كل دول العالم يطلعون اعتصام لان العمال يعانون وعندهم مشاكل ووايد شغل بس احنا غير، موظفينا يطلعون لانه فاضيين وما عندهم شغل!
twitter.com/bushi5a

إقرأ المزيد...

اسمع يا صبي الصبي


11/10/2011

هذي الايام، المهن القديمة قاعدة ترجع، ويعيدون احياءها، يعني الفداوي اللي كان قبل شايل سلاحه ويمشي ورا المعزب، هالمهنة اختفت، ومالها داعي، بس صار لها اعادة احياء، وقاموا الفداوية يشتغلون في كل مكان، كل واحد شايل قلمه، وركضة ورا فلن وعلان يدافع عنهم!
ومن المهن الجديدة مهنة الصبي ويقولون اللي عنده خير ايام زمان بدل العبيد والخدم والسواق من بنغلادش كانوا يربون الايتام والفقارة عندهم في البيت ويصير واحد من اهل البيت، يكبر مع الاولاد ويلعب معاهم ويشتغل بالبيت ويسمونه الصبي .. هذا الصبي هالايام غير موجود بهالطريقة الصبي هالايام تشوفه ريال مشورب وكله على بعضه صبي وعادي تشوفه الصبح يغسل سيارات المعزب، ويوخر اللي يمشون جدام المعزب وهم يدافع عنه ضد اللي يغلط على معزبه!
وفي نوع جديد طالع مع تطور التكنولوجيا يسموه «صبي انترنت» يفتح موقع في الانترنت ويشغله صبي عند فلان وعلان واللي يدفع اكثر، وواحد من هالمواقع سووه شوية صبيان علشان يبيعونه بس مشروعهم فشل وابتلشوا فيه فقاموا يجمعون الربع في الديوانية وسووهم كتاب في الموقع.. يسبون العالم ولا احد صوبهم!
وعلى طاري الصبيان في مهنة جديدة طلعت وهالمهنة اسمها صبي الصبي يعني يشتغل صبي عند الصبي وهالنوعية توه متعلم كلمتين وراز صورته ويبوق كلمتين ثلاث من القاموس المحيط ليثبت انه مثقف.
«صبي الصبي» يبي يتحدى ويواجه ويحارب ويبارز الاخ مصدق نفسه ما يدري لو نجمعه مع معزبه وكل الصبيان اللي معاه ونبيعهم بسوق الحمام ما يسوون «يوز ارانب»!
twitter.com/bushi5a

إقرأ المزيد...

الطقاقة عايشة الدور

10/10/2011

أسهل مهنة بالديرة شنو؟
هذا سؤال يمكن نسأله الناس بالشارع، الي راح يجاوب يقول لك طرار، والي يقول تبيع بنك على الدوار، والي يقول تصير نائب لانه ما يبي غير ترفع ايدك، أو اذا انت معارض تقعد وتسب الناس، او واحد رابع يقول لك هالايام اسهل مهنة تصير معتصم صامت، توقف وتسكت وتاكل برد وتعتصم!
انا اكتشفت مهنة جديدة وسهلة، وهو انك تصير ناشط سياسي، أو ناشطة سياسية، وهذا اللقب لا يبيله شهادة، ولا دراسة، ولا تشتري خيشة بنك مثلا وتقعد على الدوار، ما تبي غير لسانك، وميكرفون، وتدوّر مذيع دايخ يقابلك!
قبل أيام قاعد ادور في هالقنوات ما وعيت الا طقاقة ماركة «ايف سان هيلق» قاعدة وتسولف، ومعتبرة روحها ناشطة سياسية، تحلل الوضع الكويتي، وتطلعات الشعب، وأحلام الاجيال القادمة، وتقسم الناس هذا وطني وهذا قبيض، هذا زين وهذا فاسد!
واقول حق الي ما يعرفها، ان هالطقاقة الناشطة عايشة تاريخ مجيد، فهي من بداية نشاطها (أقصد الصحافي علشان لا يروح بالكم بعيد) وهي تمارس (اقصد الكتابة علشان لا يروح بالكم بعيد) التنظير، وتبيع القلم حق الي يدفع اكثر، طبعا يدفع اكثر في مقابل خدماتها (أقصد الصحافية علشان لا يروح بالكم بعيد)!
الطقاقة الي عايشة على الفساد وعلى التقلقس ورا كل بشت، صارت ناشطة دولية، وطقاقة إقليمية!
ما علينا الطقاقة الي عايشة على الحيلة وعايشة على الكذب، وعايشة على بيع الكلام.. ياية هالمرة تبيعنا وطنية، ومواقف مشرفة، على اساس انها ناشطة شريفة..
لمن هالنوعية من الناشطات يدشون على الخط لازم تعرفون شنو نوعية المعارضة، وشلون صايرة..
وسامحونا لان «هجي ناشطة تحتاج هجي مقالة»!
twitter.com/bushi5a
إقرأ المزيد...

شاعر المليون


9/10/2011

لمن اقول في ناس فاضية وما عندها شغل البعض يزعل ويقول عني انبطاحي وانسداحي والتوائي ولولبي.. وهذا شي عادي لانهم يعتبرون اي واحد يعارضهم ولو بكلمتين قبيض ومن خنازير الظلام.
المثل يقول الفاضي يعمل قاضي، بس الكويتي غير الفاضي فينا يعمل شاعر، وهات يا شعر واستلم شعر الناس متجمعة وعندها مطالب مثل ما يقولون والنواب والخطباء والعظماء كل واحد واقف بالدور ويبي يصعد المنصة وبس يصعد يصك العالم بقصيدة شعبية طويلة عريضة وحنا وانتو ورحنا ورحتوا والناس تصفق.
ينزل يصعد الثاني ويصك العالم بقصيدة فصحى «الليل ليل واياكم ولعلكم وتبا لكم» والناس تصفق وتهلل وتيبب.
الاعتصام تحول الى ديوانية شعراء النبط - مع احترامي للديوانية - بس نبي نعرف الزبدة شنو اكو شي جديد؟ مو معقولة يقولون نفس الكلام اللي قالوه قبل اسبوع بس ربعنا مصرين على الاعادة قالوا علشان الجمهور يفهم مع اني اشك انه حتى بعض اللي يتكلمون مو فاهمين عن شنو قاعدين يتكلمون.
حبايبي المعتصمين ما أبي اخرب عليكم سهراتكم الاسبوعية بس عندي طلب صغير منكم يا جماعة الشرف والامانة اللي عمركم ما اخذتوا فلس ولا معاملة اولها تحضرون للخطبة العصماء لان الواحد منكم يصعد بعدين يدور على شي يقوله وثاني شي حاولوا تقولون شي جديد لان المهرجان مو فيلم انور وجدي علشان نشوفه كل اسبوع وثالثا لازم تقصرون من صوتكم لانه مسوين ازعاج على الفاضي ورابعا لازم تبتسمون وانتو تخطبون مو قاعدين تخزون في الناس وكأنهم بايقين حلالكم.
ما اطولها يالربع، آخر شي اقترح الاسبوع الياي تقلبونها مهرجان شعري على الاقل اذا ما فلحتوا في اعتصاماتكم تتدربون على برنامج شاعر المليون.
twitter.com/bushi5a


إقرأ المزيد...

الشرفاء» القبّيضة المحترفين


3/10/2011

كان لوزير الإعلام الألماني غوبلز أيام هتلر مقولة مشهورة، يقول فيها: «اكذب.. اكذب.. حتى يصدقك الناس» أما نوابنا في هالمرحلة الطرطنقية من الحياة السياسية، عندهم مقولة ثانية يقولون فيها «اصرخ اصرخ حتى يقبضك الناس».
طبعاً والناس هني مو اي ناس، يعني مو انا ولا انت اللي نبي نقبض هالنائب، لأنه احنا على المعاش، وآخر الشهر ندور واحد يسلفنا، الناس المقصود فيهم الناس اللي فوق، اللي يلعبون بالملايين لعب، واللي يخشون في طفاية السيارة مليون دينار لزوم الرش على بعض النواب «الشرفاء»!
طبعاً الفلوس على حسب طبقة الصوت، اذا كان صوته عالي، حسابه عالي، واذا صوته متوسط حسابه خفيف، واذا صوته واطي ما ينسمع كلش، يعني حسابه مصفر، ومافي ولا فلس!
فاذا تبي تعرف النائب القبيض، تقدر تصيده بسرعة، راقب حنجرته وصوته، اذا شفته من النوع اللي يهدد، راح استجوب، وراح اكشف، وراح ادمر، وراح وراح وراح.. وانت رايح، فلازم تعرف ان الأخ مو قاعد يهدد أحد، هو قاعد يترجى انه يدفعون له حتى يسكت، او يدفعون له حتى يكمل طريج التهديد والصراخ، واللي يدفعون وايد، الله يكثر من أمثالهم كل واحد يدفع لمصلحته. وبعض المرات نقول اللي يدفع إما يبي مصلحة أو بيمشي معاملة، وعمره ما قال انا شريف وأنا قوي وأنا مدافع عن المال العام، بس الرك والمصيبة على النواب اللي ذابحينه بالشعارات، وتاليتها اكتشفنا ان اللي مسويين روحهم شرفاء وبطيخ يقبضون أكثر، ومن كل مكان، وبعضهم صاروا محترفين دوليين، والفلوس قامت تحولهم من بره.. وعاشوا النواب الشرفاء!

• كلمة رأس
أحلى ما في القبيضة الجدد انه واحد يقول انا بعت مزرعة، والثاني يقول الحوالة والشيكات حق مبراتي، والثالث العدسي اللي جاتله الحوالة يشهد له الثاني مال المبرة، والرابع يحب السياكل ويقول انا ملياردير، والخامس سكرتيره اللي ماخذ الفلوس، والسادس والسابع والثامن والتاسع والعاشر.. الله يستر.
twitter.com/bushi5a

إقرأ المزيد...

بابا سنفور قول وفعل

2/10/2011

حبيبي وعزيزي بابا سنفور.. شلونك حبيب قلبي، ان شاء الله بخير، اسمح لي اسولف وياك واطيح الميانة، على اساس انه انا ناخب وانت نائب، وبما انك نائب تمثلني في البرلمان فمن حقي اقول رايي فيك!
انت ما محفوظ السلامة كل شوي عندك سالفة، مرة شايل جوتيك، ومرة لابس جوتيك، مرة شايل عقالك ومرة حاذف غترتك، مرة راكب سفينة ومرة داش بنفق، مرة تطالب سورية ومرة تطالب السعودية، مرة تمدح اردوغان ومرة تتهمه، واخر شي قررت تستقيل ووعدت وحلفت مثل كل مرة، انك راح تمشي اذا الرئيس ظل في موقعه، وهذا اللي بيصير طبعا، وطبعا انت تضطر تستقيل، ولمن تستقيل تعرف شنو راح يصير؟ انا اقولك! اوباما ما راح يستقيل من رئاسة اميركا، ولا راح يقول يا جماعة كافي اربع سنوات، وابي اعطي الفرصة للشباب، ولا راح يقول علشان بابا سنفور استقال فاحنا راح نصوت لصالح فلسطين!
وبريطانيا ما راح تلغي الاولمبياد، بيشبون الشعلة الاولمبية والالعاب ستكون موجودة وشغالة والناس تتابع والرياضيين بيجمعون الذهبيات والفضيات واحنا كالعادة نطمش!
اليابان ما راح توقف اعادة اعمارها لانك استقلت، وبيشتغلون باقصى طاقتهم حتى يردون ديرتهم احلى من قبل!
وكالة ناسا للفضاء في اميركا ما راح يوقفون اطلاق صواريخهم وبيطيرون صواريخهم كل يومين ثلاثة على حسب مزاجهم!
ام شيخة ما راح توقف روحاتها للسوق الشعبي لانه مقرر اسبوعي تروح وتفتر وتشتري قلاصات ومطارات!
فاذا تبي تستقيل، هالمرة دربك خضر، طبعا اعداءك يقولون انها تهويشة بس انا قلت لهم لا الريال قول فعل والريال عند كلمته، طلبتك بابا سنفور استقيل علشان لا تقص ويهي جدام الربع في الديوانية!
twitter.com/bushi5a
إقرأ المزيد...

نائب وخياط حريمي


28/9/2011

واحد من اللي طلعوا بساحة الارادة، بروحه فيلم كامل، فيلم هندي مع اخراج سخيف وبايخ، طبعا هذا الممثل «قبيض» من الدرجة الاولى، يقبض حتى لو ربع دينار، ومسوي روحه معارض ويبي يخدم الجماهير، وبيسقط القروض، وبيوزع جواخير وشاليهات، وربعه كالعادة يشيلونه على اكتفاهم!
المهم هذا البطل التاريخي بنفس يوم الاعتصام، حولوا ملفه من البنوك سبة حساباته المتضخمة، يعني نقدر نقول عنه مرتشي، وكل الناس تعرف منو اللي قاعد يرشيه، من تحت الطاولة!
ووفقا لآخر احصائيات عن هالمرتشي انه طاحوا عليه عنده صالة، ويؤجر الصالة اضعاف السعر، لانه يبي يطلع فلس فلس من ورا ظهر هالناس، وبدل ما يساعد الناس يستغل حاجتهم للصالة!
ولانه عينه ضيقة، وراسه كبير، وجسمه صغير، فتح له محل خياطة نسائي بالسرداب، نائب يمثل الامة ويشرع القوانين، ويصرح ويفتي وحالته حالة، وآخر شيء يطلع عنده محل خياطة، طبعا سألوه ليش عندك محل خياطة مخالف، قال علشان «أفصّل القوانين».
هذا بس عينة وحدة نمونة للعرض فقط، واذا نبي نمر على باجي ربعه من اللي مسويين روحهم شرفا، وابطال، راح نشوف البلاوي والفضايح اللي ما لها اول ولا تالي، بس شنو نقول، اذا ما تستحي سو ما تشتهي، وهالنوعية من النواب الله وكيلكم لو تقف عنده ثانيتين تختنق من فساده.. ننصحكم توخرون عنه!

twitter.com/bushi5a


إقرأ المزيد...

جليل الحيا

27/9/2011

شنو غبي هالبني آدم، اللي وقف جدام الناس، ومسك المايكرفون متصور نفسه صلاح الدين، راكب حصانه الأشهب وشايل سيفه البتار ورايح يحرر أورشليم من الفرنجة، هذا المتخلف وقف وخطب وقال.. احنا ما نبي ألف دينار نبي كرامتنا!
وأقول يالحبيب تبي كرامتك من منو؟ هل يوم من الايام تكلمت او صرخت او سبيت احد، وشفت امن الدولة عند باب بيتك، وساحبينك جدام عيالك، وقاطينك بالسجن يا ابو الكرامة مثل مو قاعد يصير بالدول العربية، ولا مو سامع عنهم؟!
اقول يا ابو الكرامة اللي ذابحنا فيها، هل يوم من الايام لفيت غلط او مشيت غلط بالشارع ونزل لك شرطي مرور ولخك كف، او شاتك فنقر من اول الشارع لي اخر الشارع مثل مو قاعد يصير ببعض الدول؟!
انت يا ابو الكرامة، عندك دستور مثل دستورنا وديرة مثل ديرتنا، اللي المواطن يروح القضاء، ويطلع حقه غصب طيب، لا يوقفه وزير ولا خفير، ويمشي مرفوع الراس وهو شايل جنسيته، بجيبه؟!
انت يا صاحب الكرامة المفقودة، ممكن تقول لي متى الكويتي الحر فقد كرامته، حتى بالغزو، اللي كنا بدون دولة، وعشنا تسع اشهر، اللي برة الديرة واللي داخلها، الكل معزز ومكرم وما مد الكويتي ايده لاحد، عاش عزيز وما انذل، والحين انت ياي تتكلم عن الكرامة والعزة؟!
انت يا بني آدم، الالف دينار اللي ما تبيها اغلى من كل كنوز الدنيا، وغالية لانها من الغالي.. وعند هذا وتنطم!
جليل الحيا خلاني اطلع عن طوري!
twitter.com/bushi5a
إقرأ المزيد...

الباب يوسع جمل


26/9/2011

لمن تسمع اللي يقوله ثوارنا الجدد موديل 2011 في ساحة الارادة والصفاة والبلدية وسوق الحمام وحراج السيارات، واللي يقرا للكتاب الثوريين اللي فجأة كل واحد متخيل نفسه جيفارا، عن الكويت وحالة الكويت، يتخيل ان الموضوع عن الصومال او اثيوبيا او الكونغو.
مبالغات ما لها معنى غير الاثارة، وهم يدرون اكثر من غيرهم انه ما في مثل الكويت في الرخاء الاقتصادي لانه ما في دولة بالعالم توزع تموين ببلاش الا الكويت، وما في ديرة بالعالم تدعم مواطنينها ماديا غير الكويت، وما في ديرة توفر التعليم والعمل في العالم وبهذه الطريقة غير هالديرة!
الاخ يقوم الظهر انه صار سنين مو داوم، والربع في الدوام شغالين توقيع وكرت بالنيابة عنه، وهو بس يتعب نفسه اخر الشهر يروح البنك يسحب معاشه، الظهر ياكل المندي والمفطح مع بطلين لبن، يقولك اسد يوعان، وينسدح بعد مرة ساعتين يريح بطنه، وبعدين يفتح النت على أي موقع دايخ، ويقعد ينظر على راس الناس، العصاري يفتر على المولات بدون سبب، وبالليل يروح الديوانية، وينسدح عشر ساعات لي الصبح... وبعدين يقول لك يا اخي الوضع السياسي في البلد فاسد، والاقتصادي مدمر بفعل التلاعب، ولازم نغير المجلس والحكومة والجمعية، وهو ما له خلق يبدل لمبة غرفته المحروقة!
هذي النوعية هم مع الاسف اللي ماشي سوقهم، اخذ كذب على كم واحد بالديوانية، ويسوي روحه بطل والناس تصدق، نعم، يمكن احنا مو احسن بلد في العالم، ولا احلى بلد في العالم، بس ديرتنا «أحن» بلد في العالم على ناسها، واللي مو عاجبه يقدر يسلم جنسيته ويفارجنا!
twitter.com/bushi5a

إقرأ المزيد...

مينون يا سعادة القاضي مينون


25/9/2011

اعجبتني الصورة وايد، سياسي فاصخ غترته وعقاله، وسعابيله على دشداشته، وقاعد يطق على راسه كانه من خبول الفرجان القبليين، وقلت اسوي عليه تحقيق صحافي، اخذت الصورة وراويتها الناس اللي في المولات، وكانت هذي اجابتهم لمن شافوا الصورة:
الصورة حلوة، بس اهله ليش هادينه بالشارع، ليش
ما يودونه الطب النفسي، وياخذون لهم خمسين دينار.
الصورة وايد معبرة، بس ودي اشوف الناس اللي يصوتون له كل سنة، هالسنة شلون بيصوتون له؟
الصورة تهبل، بس ليش مطلعينه من القصف؟
الصورة تموت من الضحك هالمسرحية وين معروضة؟
الصورة ذباحة، ولازم يعرضونها في برامج هوليود، يعني مع صور وافلام باريس هلتون!
الصورة مو طبيعية، اكيد هذا جزء من مسلسل طاش ما طاش السنة الياية!
الصورة معبرة وحلوة وجميلة واللي صورها محترف، ولازم ينشرها في مجلة «الناشيونال جوغرافيك»!
الصورة مو طبيعية، وهالصورة لازم ينشروها بالمدارس علشان يخوفون الاولاد الشياطين!
الصورة زينة، بس عندي سؤال اذا الواحد سوى بروحه جذي يكون حارب الفساد؟
الصورة تموت من الضحك بس ما يخالف هو زعلان لانه في ناس تقبض ولا زعلان انه قبض شوية!
الصورة فنية، وانا اطالب هبة حمادة تسوي مسلسل رمضاني وتسمي المسلسل «مسكوا مينونكم»!
twitter.com/bushi5a

إقرأ المزيد...

عندي ثلاثين .. تبونهم؟


22/9/2011

من خلال معلوماتي البسيطة اعرف انه في كعبة وحدة مقدسة وطاهرة وهي بيت الله، يحترمها المسلمين ويطوفون حولها، وفي عندنا اولى القبلتين وهي المسجد الاقصى، ويدخلها الاطهار المصلين، وعندنا القرآن المقدس ولا يمسه الا المطهرون، هذي مسلماتنا وثوابتنا اللي نحترمها ونقدسها!
بس الظاهر في ناس اضافوا عليها اشياء جديدة مثل مباني البنوك، واللي يشتغلون في البنوك، واللي يتعاملون مع البنوك، واعتبروهم من المقدسات اللي مو لازم نتكلم عنهم، ولا نجيسهم او نتكلم من وراهم، او نمر عند باب بيتهم!
السالفة لو سوالف ديوانيات، كنا نقول غلط ومو زين وحرام، ولازم ما نتهم الناس، بس المشكلة انها تقارير قاعدة تطلع من كل مكان وتقول انه في خسائر بالملايين بسبب بنوك غربية خسرانة مليارات، قبل سنتين نفس السالفة، قالوا ماكو شي، واحنا زينين واقتصادنا متين، وكله تمام يا افندم، بعدين اكتشفنا فضايح لها اول ومالها تالي، والحين نفس الشي، وبما انهم ينفون لازم نعرف انه في شي تحت خاشينه تحت الكاشي، وان الدخان ما يطلع بدون نار، بس مع ذلك يكابرون!
وخوفكم كل هذا يطلع على روس الفقارة والمتقاعدين واللي ماخذ الف والفين قرض، ويكتشف ان فوايد قرضه صايرة عشرة الاف، لانه لازم في واحد يدفع ثمن مغامراتهم، وخسايرهم، ومافي غيرنا هو اللي يدفع لان الكبار شكلهم موقاعدين يدفعون ولا فلس من الملايين على ظهرهم!
بنوكنا خلوكم صريحين معانا ولا تلفون وتدورون، وعطونا من الاخر، ندري انتو خسرانين بس نبي نعرف اشكثر، وبالعراقي اشقد، وبالمصري قد ايه خسرانين؟ يمكن اقدر اساعدكم، عندي ثلاثين دينار بجيبي اتقاسمها معاكم!
twitter.com/bushi5a

إقرأ المزيد...

مسويين زحمة


21/9/2011

حبيب قلبي المواطن، بدل ما تروح ساحة الارادة، وتتعب نفسك، انا راح انقل لكم شنو راح يصير بالتجمع قبل لا يجتمعون ويقولون ويهتفون.
طبعا في البداية لازم يطلع واحد ما نعرفه، وهو عريف التجمع، حافظ كم شعار على كم بيت شعر على كم جملة سامعهم مني ومنّاك، وهو يصرخ، ويعدل غترته، واجباري الجمهور يهتف وراه وهو ما له خلق!
بعدين طبعا لازم يطلع ممثل القوى الطلابية، وممثل قوى البنشرجية، وممثل نقابات التطريز والخياطة، وبعدين يطلع نائب ويقول لازم يرحل لان الفساد استشرى، طبعا محد يعرف يعني شنو استشرى بس الجمهور راح يصفق، وبعدين يطلع العريف، ويقول مقدمة عن نائب ثاني بانه نائب الامة، وانه ينحط على الجرح يبرى، ويصعد النائب ويقول الكويت مختطفة ولازم ننقذها.
يخلص النائب راح تشوف ستة سبعة لابسين اسود، انت حسبالك حانوتية، بس يقولون انهم وفد المحامين طاقينها مشي من قصر العدل الى الساحة، دعما للشباب المقاوم في ساحة الارادة.
بعدين يطلعون بنت صغيرة على المنصة وتقولها كلمتين وشعارين سياسيين، ويصفقون لها وهم يبتسمون، لانها تمثل اطفال الكويت وصندوق الاجيال القادمة.
وبعدين النواب كل واحد يقوم ويقول كلمتين ونكتتين، وكبيرهم يطلع ويقول كلام كبير، والثالث يطلع ويقول كلام اكبر، ويقول لهم، لازم تستحون، والناس تصفق، وبعدين الجماعة ينتشرون على القهاوي يتابعون المباريات! هذا اللي يبي يصير، لا اكثر ولا اقل، وما يحتاج تتعبون روحكم، وتسوون زحمة، ورحم الله من قعد ببيته وخفف الزحمة!
twitter.com/bushi5a


إقرأ المزيد...

ثلاثة نواب

19/9/2011

ليش طالعين؟ بيقولون علشان نحارب الراشي والمرتشي .. طيب يعني شنو الراشي والمرتشي؟ يعني واحد يدفع خمسين الف دينار، والثاني يقبض خمسين الف دينار، او مثلا واحد يعطي مناقصة بالملايين، والثاني يأخذ المناقصة وتصير وسيلة لربحه، او واحد عنده شركات خسرانة من الفساد اللي فيها، وهو ذابحنا بالشعارات عن محاربة الفساد، طبعا اللي ذكرتهم ثلاثة امثلة لثلاثة نواب رافعين شعارات محاربة الحرامية، والناس شاهدة، والحسابات البنكية شاهدة على شرفهم!
ماكو احد بالديرة يحب الفساد، حتى لو رحت السجن وسألت اكبر فاسد، شنو شعورك وانت فاسد؟ بيقولك انا ما احب الفساد، ومو زين الواحد فاسد، بس الشيطان شاطر، وقص علي وخلاني فاسد، يعني من الاخر كلنا ضد الفساد حتى الفاسد! والناس لأنهم طيبين ايضا ضد الفساد، ويبون احد ينقذهم من الفساد في ادارات الدولة، اللي معاملته تتأخر اشهر مع انها تحتاج يوم، وينقذهم من فساد التجار واللحوم الفاسدة اللي يبعيون لحم فاسد بس علشان يزيدون رصيدهم على حساب صحة الناس، يبون احد يحميهم من فساد بعض المتنفذين اللي يستغلون حاجات الناس في كل شيء، يبون احد يتابع الوزير الفاسد والنائب الفاسد والبنك الفاسد، بس مع الاسف ما شافوا الا نواب وتجمعات سياسية يصعدون على كتف المواطن المسكين بشعارات محاربة الفساد!
في واحد يسأل، في امل من بعض النواب؟ الجواب: طبعا، مثل ما الماي يروب، والبقرة تطير والفيل يغني سامري، هالنواب راح يحاربون الفساد!

twitter.com/bushi5a


إقرأ المزيد...

صايع سفارة


15/9/2011

أم شيخة: ها بوشيخة وين طالع حزة الظهر؟
بوشيخة: عندي اعتصام ومظاهرات!
أم شيخة: وين بعد هالمرة مو خلصت من ساحة الصفاة والارادة والسفارة السورية؟
بوشيخة: هالمرة السفارة الفنزويلية!
أم شيخة: ليش بعد؟
بوشيخة: لموقفها من أحداث سورية؟
أم شيخة: ومتى ترجع؟
بوشيخة: ما أرجع بروح بعدها اعتصام ضد السفارة الكينية؟
أم شيخة: ليش بعد؟
بوشيخة: علشان موقفها من قضية زنجبار!
أم شيخة: وترجع؟
بوشيخة: لا بروح السفارة الهندية لأني معترض على موقفها من قضية كشمير لازم يشوفون لهم حل في قضيتهم!
بوشيخة: وترجع بعدها علشان نتغدى؟!
بوشيخة: لا أبي أمر بالمرة على السفارة الفرنسية معترض على قانون منع النقاب في فرنسا، مو معقولة هالكلام والموقف المتخاذل!
أم شيخة: وترجع؟
بوشيخة: لا يبه بروح السفارة الموريتانية وبعدين الموزمبيقية وبعدين الاثيوبية وبعدين الفلبينية
أم شيخة: وليش الفلبينية بعد؟!
بوشيخة: علشان الخدامة انحاشت رايح أدور عليها هناك!
أم شيخة: أنت من الظهر لي الليل تبي تفتر على السفارات متى تبي تجابل بيتك؟
بوشيخة: أجابل بيتي لمن النواب يجابلون ديرتهم!
twitter.com/bushi5a

إقرأ المزيد...

نواب الجمبزة


14/9/2011

الديرة لها ميزة فريدة، قبل كل شهرين او ثلاثة نسمع عن فضيحة، مصيبة، كارثة، هذه الايام كل يومين نسمع عن فضيحة، وبعض المرات كل عشر دقايق نسمع عن فضيحة، ومن ميزة سرعة الفضايح، انه كل ما تسمع عن مصيبة وكارثة جديدة تنسى الفضيحة اللي قبلهااخر فضايحنا اللي ما تخلص كانت سالفة الملايين اللي قالوا انها موجودة في البنوك، طبعا في بعدها فضايح الويكيليكس بس في النهاية هذه كانت الكبرى، شنو صار وشلون تعامل معاها مجلس الأمة! مجلس الامة والنواب المحافظين على المال العام، واللي داقين الصدر بيكشفون اي فضيحة سرقة، قالوا نسوي جلسة برلمانية استثنائية، علشان نوقف ضد الفساد، ونفتح الملفات، ونحاسب، ولن نقف، ولن نسكت، ولن نتراجع!
كل الكلام السابق كان على الفاضي، وللاستهلاك المحلي، وحتى غير صالح للاستهلاك المحلي ولا البشري ولا حتى النباتي، لانه خداع للعقول، ولانهم لاقين الناس مقصة، يبون يمشون عليهم سالفة الجلسة الطارئة، وهم يدرون قبل غيرهم انها ما راح تصير، وان النواب مسافرين، وانه حتى لو تحصل على التوقيع وتصير الجلسة فنتيجتها لا شي، غير الصراخ وازعاج الناس، بالكلام الفاضي اللي ما يروي عطش العطشان، ولا ينقذ الغريق!
حفظنا الدرس، وتعلمنا على الجمبزة من حركاتهم، واحنا ندري انه كل هالفيلم بس علشان تقولون لربعكم انكم حاولتم وما صار، وان النواب الفاسدين ما يخلونكم تشتغلون، وانكم حريصين بس فيه مؤامرة عليكم.. والان بعد ان احيل بعض النواب للنيابة هم ندري انه ماكو شي، والنتيجة راح تكون صفر، وانه اللي صار طريقة ثانية لطمطمة الموضوع!
المشكلة مو في اللي يقبض، هذا انعرفه، المشكلة في اللي قاعد يستشرف على مخنا، وصاير فيها شريف روما والجليب وكيفان وخيطان!
twitter.com/bushi5a


إقرأ المزيد...

خلك شجاع


13/9/2011

كل اللي قاله مدير مؤسسة معروفة رأيه الشخصي، والمدير ما قال شي، قال رايه، ولكن نسى انه لمن مدير مؤسسة عامة يتكلم، أو مدير حتى كانتين بسوق الجمعة يتكلم ويسولف، فانه ما يتكلم بصفته الشخصية، انما يتكلم بصفته الرسمية!
يقولون انه قالها في حديث شخصي وفي التلفون، وانه كلام شخصي، ومو دليل، بس القضية مو في كلامه الشخصي القضية في فعله، يعني هو ما يتكلم بس، لانه كلامه راح يتبعه فعل وهذه هي الكارثة الكبيرة!
القضية مو شخصية! وهو لمن يتكلم عن أصحاب اللحى والشيعة.. لازم هم يتحمل مسؤولية كلامه، ولو كنت مكانه لقدمت استقالاتي فورا، وهديت الكرسي، وسلمت المفاتيح احتراما لتاريخي، لانه راح تظل هالصفة لازقة فيني، وأي قرار آخذه راح يكون قرار مشبوه، واعتقد انه الاستقالة تعبر عن الشجاعة!
سعادة المدير، لا يغرك بابا سنفور، اللي دق الصدر، واعتبرك وطني ومحترم، هذا احنا نعرفه، انت انسان وطني، وما عليك شبهة، ولا عمرك استغليت موقعك، بس اللي قلته ما كان زلة لسان، كان اراء صريحة، وهذا اللي يتشد الظهر فيه، اول واحد راح يقطع فيك الحبل، لانه ببساطة يبي يستغلك لمصالحه، مو علشان سواد عيونك!انت اخطأت بحق الناس، وبحق نفسك قبل كل شي، وأبسط شي من المخطئ يعتذر، ويترك المجال لغيره، ويطلع وهو معزز مكرم، ويا دار ما دخلك شر، بس اذا مشيت ورا نواب الفتنة، فهذه مصيبة اكبر من مصيبة اتصالك التلفوني!
twitter.com/bushi5a

إقرأ المزيد...

غزوة مانهاتن


12/9/2011

في هاليوم قبل عشر سنوات، صارت تفجيرات نيويورك، وعلى رأي بن لادن صارت غزوة مانهاتن، وقبل عشر سنوات في مثل هاليوم، بدل ما نبين للناس ان الاسلام دين محبة، ودين سلام، ودين تراحم، ودين يحب الكل بدون تمييز بين عرق ولون وشكل... بينا لهم مع الاسف بان ديننا الاسلامي دين ارهابي!
كانه، قلنا للغرب انه احنا نحب الدم، وان ديننا انتشر بحد السيف، وان الاسلام والمسلمين ما يفكرون الا بقتل غيرهم، وهذا مع الاسف هو الشي اللي كان يروج له الصهاينة من زمان، واحنا قدمنا لهم هدية على طبق من فضة!
مع الأسف هذا الدين تحول وحش شرير قاتل لاهداف سياسية، ما لها علاقة لا بدين ولا مذهب ولا احياء كلمة الله، ولا حتى بتحرير فلسطين، لانه ما شفنا لا قتال ضد اليهود، ولا تفجيرات ضد الاسرائيليين، بل شفنا هجوم وقتل ناس ابرياء ماتوا من كل الاجناس والاديان، في أبراج التجارة في نيويورك!
اللي يصفق ويهلل للتفجيرات، نقول له، شنو تشوف بعد عشر سنوات، منو اللي انتصر في غزوة منهاتن؟ أكيد مو المسلمين، واكيد المسلمين مو بس ما استفادوا من هذي الغزوة، انما العكس حاشهم اكبر ضرر على مر التاريخ!
الانسان لازم يستفيد من كل حدث تاريخي، واحنا مع الاسف مع كل اللي نشوفه جدامنا، الى الان مو راضين نستفيد، والى الان معتبرين بن لادن مجاهد وشهيد وعظيم، بس لانه قتل شوية اطفال ونساء ورجال ابرياء في مكاتبهم!
twitter.com/bushi5a

إقرأ المزيد...

العضو البارز.. أيضاً


11/9/2011

العضو البارز، الظاهر بدأ في الايام الاخيرة تزيد عنده حالة الانا، فاجأ الناس، وخاصة المغردين، بكتابة تصريح مخجل، الاخ حط نفسه في موقع صاحب المقام السامي، وبدأ يتكلم بالنيابة عنه، دون احترام لمقام صاحب السمو.
غير معقول ولا مقبول ان توصل الأمور الى هذه الدرجة من عدم الاحترام، وكأن العضو البارز اللي ذبحنا وهو يتكلم عن الدستور، ما سمع ان الأمير ذاته لا تمس، ولا يجوز ان ندخل الامير ومقامه السامي، في امورنا ومشاكلنا السياسية، لانه فوق الجميع! الاخ ما تطاول بس على المقام السامي، انما صار يتدخل حتى في قرارات الدول الشقيقة، وكأنه يتكلم عن كل حكام الخليج، لان الاخ مو راضي على مواقفهم من سورية، وكأن الناس مختارينه نائب عن منطقة درعا، لانه هد كل مشاكل البلد، وراح يركض ورا المظاهرات والاحتجاجات في سورية.
والله انها مهزلة ان توصل فينا المواصيل الى هذه الدرجة، حتى يحط أي واحد نفسه في مقام صاحب السمو، ويبدأ يتخيل بخياله المريض شنو يسوي، وشنو يقول، وشنو يحط ويشيل، لانه غدا كل مريض راح يتعدى اكثر واكثر، اذا ما شاف احد يوقف جدامه.
الشعب الكويتي اصيل، وما قصر معاه، وخلاه من خلال «التويتر»، يعرف حجمه في مقابل صاحب السمو، وعلى الداخلية الان اذا بالفعل تبي تطبق القانون، وترفع من مقام صاحب السمو من مهاترات النواب وربعهم، ان يتخذوا الاجراء اللازم.. ننطر ونشوف!
twitter.com/bushi5a
إقرأ المزيد...

أبيض ومنقط بأحمر



8/9/2011


قبل يومين كنت أتمشى في اماكن مشبوهة طبعا ليش اتمشى هناك؟ مو لاني مشبوه بس قلت اشوف شلون صايرة هالاماكن المهم ما شفت الا واحد يطوطح يمين يسار وريحته يقولولك سيارة بلدية ويشبه ميكي ماوس مجبل صوبي! وقف عندي وسلم علي ربع سلام سألته: شلونك؟ رد علي: لوني ابيض ومنقط احمر.. قلت له: يعني شنو ابيض واحمر؟ قال: مو شغلك هذه شفرة! قلت له: مو كانك تطلع بالاخبار قول لي شنو الاخبار؟ قال: انا عندي كل الاخبار البايتة والدايخة راح اعطيك وايد اخبار! قلت له: عطنا يا صبي واحد خبر! قال: انا اشوف انه في صواريخ عراقية لونها ابيض ومنقط احمر جاية صوب الكويت بس انا ماخليتهم وقفت فوق السطح وتصديت لهم بالنباطة! قلت: انزين وبعد؟ قال: وفي اخبار انه راح يشكلون الحكومة وقالوا لي تعال صير وزير بس ما رضيت لانه قلت لهم شرطي ادش الوزارة ببشت ابيض ومنقط احمر! قلت له: بعد ابيض ومنقط؟ كمل كلامه: وبعدين في خبر بيصبغون المجلس! قلت: ادري اكيد ابيض ومنقط احمر! قال: صح عفية عليك وفي بعد خبر اكيد مية بالمية يعني كله مثل ما عودتكم انه بيطبعون الدولار نوط بو ألف وبيسوون الدولار ابيض ومنقط باحمر! قلت له: اقول الظاهر انت حياتك كلها منقطة بالاحمر! قال: طبعا انت تدري يوم كانوا يدورون على مراسل وانا الوحيد اللي تقدمت وقبلوني بعد صراع طويل! قلت له: عندك اقوال اخرى لاني ما ابي اوقف مع مشبوه في مكان مشبوه! قال: لا ماكو شي بس اطالب الداخلية بمحاربة المغشوش لانه ما يصير اطلع خبر مغشوش واشرب مغشوش ويطلع كل شغلي بالفاشوش وحوش ياللي تحوش حوش!
twitter.com/bushi5a


إقرأ المزيد...

القبّيضة جاهزين


7/9/2011

في اشياء تعرفها من أول نظرة، ومن اول نظرة تعرف منو اللي يبي يشوه سمعة الديمقراطية بالكويت طبعا شنو الهدف من تشويه الديمقراطية في ديرتنا، اولها الحسد وثانيها واهمها انه في اطراف يخافون من الانتخابات والديمقراطية وحرية الراي، ويخافون من الكلمة الحرة والصحافة الحرة!
لهالسبب حصلوا لهم على نواب بياعة وقبيضة هدفهم في الحياة والممات تشويه الديمقراطية!
لمن تشوفون نائب ليل ونهار يتكلم عن السنة والشيعة والبدو والحضر وفلان قال وفلان رد عليه لازم تتأكدون انه رجل بدون مبادئ وان هدفه بس يبين انه الديمقراطية والحرية راح توصلنا الى التفرقة والتناحر حتى يخوفون الناس من الديمقراطية!
لمن تشوفون نائب ليل ونهار شغلته بس يسب فلان ويشتم في علان الوزير والمدير والوكيل لازم تعرفون انه يبي يقول ان الحرية تعني ان الناس تتشاتم، وكل واحد يسب الثاني ومحد يحترم غيره! لمن تشوفون نائب كل يوم شغلته انه يتهم بعض النواب بانهم مرتشين وانهم فاسدين ويؤلف القصص مع انه اكثر واحد قبيض ويبيع ضميره بفلس لازم تعرفون ان هدفه بس يشوه الديمقراطية ومجلس الامة ويبين للناس انها مؤسسة فاسدة!
هدف بعض النواب وبدافع من جنط الفلوس تشويه سمعة الديمقراطية علشان لا تصير نموذج وهدفهم تشويه اي شي متعلق بالحرية والديمقراطية لحساب اجندات خارجية ومو مهم عندهم حتى لو يسكرون المجلس للابد لانه يكفي معزبينه راضين وهو عنده من فلوس السحت ما يكفيه طول عمره!
بسهولة تقدرون تعرفون هالنوعية بس راقبوهم وراح تصيدونهم واحد واحد!


إقرأ المزيد...

عسى ظهره الكسر


6/9/2011

بعض الناس، يتمنون ان يحل مجلس الامة وتصير انتخابات جديدة، وليل نهار، صبح ومسا، فوق وتحت، بالبيت وبالجاخور يصرح، نبي حل مجلس الامة واعادة الانتخابات، وتغيير اعضاء مجلس الامة!
وخلونا نتصور شنو يصير اذا حل مجلس الامة وصارت الانتخابات، ورحنا المقرات، واكلنا الشورمات، وسمعنا الوعود والخطابات، ورحنا وصوتنا، والناس صوتت وطلعت النتايج!
طبعا النواب نفسهم ماراح يتغيرون راح ينجحون، وكالعادة نص النواب يتغيرون والباجي يقعدون بالبيت، يعني من نص المجلس ضمنا نصهم موجودين، والنص الباجي، حتى لو شلنا من هني وحطينا هناك الوضع ما راح يتغير، لانه الوضع صار له خمسين سنه ولا تغير شي!
وخلونا نتكلم بصراحة، بعض النواب اللي بلاعيمهم طاحت وهم يتكلمون عن حل المجلس كل همهم انه في تسع نواب شيعة، وانه لازم يصيرون اقل، مع انه هذولا ما يدرون انه تمثيل المجلس والعدد مو كل شي، وان هالطائفة كان عندهم عشرين نائب في البرلمان او نائب واحد، فالوضع ما يختلف في ديرة القانون، لان الناس ما تاخذ حقوقها لانه عندهم نواب، لانه في مؤسسات تحكم، وفي اسرة كريمة تظل الجميع!
وبعضهم يقول ان المجلس حكومي، مع اني أتحداه ان يعطيني مجلس ما كان حكومي، اصلا ما في برلمان بالعالم المجلس فيه مو حكومي، يعني ما في برلمان الاغلبية فيها ما تحكم، ومن الف باء الديموقراطية ان الحكومة عندها الاغلبية، في اي برلمان في العالم بما فيه برلمان الكويت!
الحين ينحل هالمجلس، يتسكر يتغير، فالوضع ماراح يتغير، مادام في نوعية فاسدة من النواب وموجودين بكل العصور، يرفعون الشعارات وبنفس الوقت يرفعون خياش فلوس الرشاوى على ظهورهم.. عسى ظهورهم الكسر قولوا امين!
twitter.com/bushi5a


إقرأ المزيد...

السنافر


5/9/2011

قريباً وبعد أفلام العيد، أفلام بعد العيد، وأفلام بعد العيد ما تفرق عن أفلام العيد، يعني بالعيد كان في فيلم السنافر، وهذا الفيلم راح يستمر بعد العيد، بطولة بابا سنفور المشهور، والي يطوف البحار، وينخش بالحمامات والجحور!
وفي فيلم كابتن أميركا، وهذا الفيلم الأميركي بيسوون منه فيلم على نسخة كويتية، اسمها كابتن كويت، وهذا كابتن كويت يسوي كل شي، يكسر ويطق ويشيل ويحط ولا أحد يكلمه، على اعتبار انه كابتن نواب الكويت، وعنده عضلات بس عضلاته مو بجسمه انما بلسانه، يقدر بلسانه يشيل الأثقال، ويلعب بلياردو، ويبني بلسانه العمارات ويشتري المجمعات!
وفيه أفلام هندية وعربية، وكل هالأفلام موضوعها واحد، وهو حل مجلس الأمة بأي طريقة، كانوا قاعدين طول رمضان يخططون لفيلم ما بعد العيد، شلون يحطون السيناريو، ببطولة نفس الممثلين، طبعاً مع اخراج مخرج الروائع النائب العظيم، الي يبي يخرب البلد بس علشان يصير رئيس! وطبعاً الكومبارس جاهزين كالعادة على الحدود، بس يصفرون لهم تشوفونهم بساعة زمان بساحة الإرادة لأن الفيلم ما ينعرض الا بساحة الإرادة.
الزبدة بعد العيد الممثلين جاهزين، والكومبارس جاهزين، والكل يبي يخرب، ويثير الفتنة، بأي طريقة أقولها مرة ثانية وثالثة، فتنة جاية بالطريج، يحاولون اثارتها بأية طريقة، حتى لو مافي شي، راح يألفون اية قضية يزيدون ويعيدون فيها ويحولونها طائفية بس علشان يدفعون لحل مجلس الأمة والحكومة!
ربطوا الأحزمة وشوفوا منو يدير ومنو يخرج ومنو يمثل، الأهم احنا الجمهور نكون واعين وما تطوف علينا أفلامهم!
twitter.com/bushi5a

إقرأ المزيد...

هايف.... هلا هلا بهالطلة


30/8/2011

طل علينا النائب الهمام محمد هايف أول أمس بأسئلة برلمانية وجهها لوزير الداخلية عن الإجراءات التي اتخذتها الوزارة تجاه صحيفة او وسيلة اعلامية اللي ادعى أنها أساءت للملك عبدالله بن عبدالعزيز ملك المملكة العربية السعودية ودخل بالموضوع سيد هادي المدرسي وان كلامه عرض بالصوت والصورة في جلسة الاستجواب وهني ابي أطرح شوية ملاحظات تبين ان هالأسئلة تدين «بوعبدالله» وما ترفع من شأنه حتى ما فيها اكشن انتخابي:
أولا : الجريدة اللي يقصدها هايف ما أساءت لخادم الحرمين الشريفين او غيره واللي يحاول الإساءة هو من يؤول التصريحات او الأخبار حسب ما يشتهي ويقول المقصود فيها فلان ولا فلان.
ثانيا : السيد هادي المدرسي كان يكتب بالجريدة المقصودة وتم وقف مقالاته من بداية أحداث البحرين وما ذكره هايف عن اللي انعرض في جلسة الاستجواب «السرية» يعتبر خرق للائحة الداخلية وافشاء لسرية الجلسة والمفروض انه يحترم اللائحة ويكون مؤتمن على سرية اللي صار فيها حسب القسم اللي أداه.
ثالثا : سؤال هايف يعتبر أداة يحاول فيها قمع الحرية الإعلامية....والله حيرتنا تطالب برفع سقف الحريات انت وغيرك من النواب لكن وقت الصجية تبون تسكرون حلوج اللي تخالفكم وتكسرون الأقلام اللي تنتقدكم وبالتالي تنطبق عليكم الآية الكريمة «كبر مقتا عند الله ان تقولوا مالا تفعلون».
رابعا: حاولت أدور تفسير أو سبب لهالأسئلة وإثارة هذا الموضوع بعد فترة طويلة من أحداثه وبعد أن قامت وزارة الاعلام بالواجب وزيادة حبتين ورفعت كم قضية على الجريدة بهالخصوص الا واحد من اثنين والله اعلم إما أن هايف يبي يوصل رسالة لوزير الداخلية يقوله فيها انك في مرمى النار بسبب القضية التي رفعتها وزارته ضده و احالوه للنيابة بسببها واللي أمرت بحجزه وما طلع الا بكفالة دفعها غصب مو طيب، اما التفسير الثاني ان في ضغوطات خارجية عليه لإثارة هذه القضية مرة ثانية.
كان ودي أن تكون أسئلة النائب الإسلامي اللي يطالب بالعدالة وتطبيق الشريعة أكثر واقعية وأهمية يعني مثلا لو يسأل الوزيرعن أسماء النواب اللي توسطوا للإفراج عن ارهابيين أو تجار مخدرات أو متهمين بهتك العرض «خصوصا المتهمين باللواط» والنواب اللي يتوسطون لتمرير معاملات ناخبيهم وقرايبهم واللي يعز عليهم من نقل وندب وعلاج بالخارج...الخ
مشكلتنا ان بعض النواب صاروا ملوك الإثارة بكل أنواعها الطائفية او الاجتماعية آو حتى الخارجية فمرة يطلع لنا واحد يطالب بتعديل المادة الثانية من الدستور ويطالب بفتوى هدر دم السفير السوري وما راح نخلص كل يوم طالعين لنا بسالفة . فاتقوا الله في بلدكم يا جماعة وفي المجتمع الكويتي بمختلف اطيافه ومشاربه ونذكرك يا بوعبدالله بأنك نائب في مجلس الامة الكويتي !!!!!!!

• كلمة راس
شنو سالفة النائب اللي كاتبين عنه في تويتر انه مستلم مبلغ «دسم» من دولة مجاورة ؟؟؟؟
twitter.com/bushi5a


إقرأ المزيد...

النواب فاهمين غلط


28/8/2011

خلونا نشوف شنو عندنا من مشاكل، ما في ديرة ما فيها مشاكل، بس الفرق انه في ديرة تحل مشاكلها وفي ديرة ما تحل، وفي ديرة ما يخلونها تحل مشاكلها، مثل ديرتنا العزيزة!
عندنا مشكلة الجامعة، طلبة متخرجين، مستانسين، مجهزين جنطهم واقلامهم رايحين الصالون مضبطين شعرهم شارين نظارات ريبان علشان يداومون في الجامعة فجأة يكتشفون انه ما في مكان شلون ما في مكان وينه الوزير؟ وينه مدير الجامعة؟ اي واحد يحل لنا الموضوع المهم صعدنا نزلنا يمين يسار اخيرا توصلوا الى حل ترقيعي نقبلهم الحين والباجي على دفعات يعني مثل النساف يشيل التراب على دربين وثلاث!
عندنا موضوع بوبيان والميناء البحري والمشاكل اللي عليها واللي يحاول البعض مع تحريض من بعض الاطراف ان يشعلون القضية والموضوع مهم للكويت وكل ما بنوا الميناء اسرع احسن وافضل للكويت وللعراق ونوابنا ما يدرون وين الله قاطهم لا حركة ولا بركة ويسافرون هاواي لحل مشكلة الميناء!
عندنا مشكلة الكهرباء اللي مو راضية تنحل كل سنة نفس القصة بنفس الوقت موتورات خربانة مكاين تحترق مناطق كاملة برمضان بدون كهرباء ومافي احد يتجرأ ويقول انه في فساد بالوزارة!
لو بقعد احسب ماراح اخلص من قصة مشاكلنا اللي تحتاج حل عاجل بس نوابنا خوش نواب هادين كل شي وصايرين دوليين فجأة يبون يحررون ليبيا وبعدين سوريا وبعدين القدس وبيمرون على كشمير وتايلند يعني اي ديرة فيها مشاكل حتى لو مشكلة ازدحام السيارات يبون يسقطون نظامها ويحلون مشاكلها لان النواب فاهمين غلط حسبالهم انهم نواب كأس العالم وكل واحد متخيل نفسه باتمان وسوبرمان.. رجاء قضبوا ارضكم وجابلوا ناخبيكم رحم الله والدينكم!
twitter.com/bushi5a



إقرأ المزيد...

الكراج على حسابي


23/8/2011

يا جماعة الخير، الامور كلها تنحل بالتفاهم، وخاصة مشكلة الشركة الوطنية للطيران، انا وفقا لخبرتي في الطيران ولاني تقريبا كل شهرين ثلاث اسافر اروح دبي والبحرين والبصرة بالطيارة فانا عندي خوش اقتراح علشان اطلع الشركة الوطنية من هالمعضلة!
طبعا تسألوني شنو تقصد بالمعضلة؟ اقولكم ما ادري بس دائما اسمعها، والكل يقول معضلة فقلت اقولها مثلهم يعني مثقف وفاهم، المهم حل مشكلة شركة الوطنية للطيران وطياراتها عندي وانا بوشيخة!
فاذا الشركة ما عندها فلوس، واعضاء المجلس هم مفلسين انا حاضر ورقبتي سدادة من باجر اروح ابيع الذهب اللي عند ام شيخة وهالايام الذهب غالي وابيع الكابريس مع ثلاجتين من زمان حاطهم بدار الجيل واسلف الشركة على الاقل يدفعون فلوس البنزين للطيارة والعمال!
بعد شنو يبون مهبط خاص بالطيارة هم عندي، وراي بيتي شارع عريض ومافي زحمة او كلش كلش ينزلون طياراتهم على الدائري السابع والناس تنزل وكل واحد يركب سيارته ويروح بيته يعني العملية ما تحتاج لوية وكراج وبدل دهن وماي راديتر للطيارة ومن نفس المكان الطيارة تكمل طريجها!
طيب واحد يقول لي الطيارة وين تصفط تحتاج هذي هل لها حل انا بيتي في ارتداد خمسين متر وفيها مظلات يصفطون الطيارة عند بيتي وفي عندي سايق يغسل السيارة والطيارة يعني يقدرون يصفطون الطيارة عند الباب وسايق الطيارة هم اقدر انومه عندي بغرفة السايق!
واذا اقتراحي مو شي خلاص يبه ردوا فلوس المساهمين و«تصطفلوا» انتو وطيارتكم!
twitter.com/bushi5a



إقرأ المزيد...

بو مشاري عند السفارة


22/8/2011

قررت تلبية دعوة الجماهير المليونية لدعم الشعب السوري، أو الصج ما قررت، صاحبي بومشاري، لزم علي، الا تعال معاي بروح اعتصم، قلت له مثل ما تحب، هدينا الديوانية، ركبنا سيارتنا، وعلى مشرف، قلت له: بومشاري مو الاعتصام بساحة الارادة، رد قال: لا بمشرف عند السفارة السورية، لانهم بيوصلون رسالة!
بيني وبينكم قلت يمكن البريد مسكر وبيودون الرسايل ويسلمونها السفارة بايدهم، ما علينا المهم رحت الاعتصام وانا في بالي مظاهرات الستينات، ايام عز الشباب
لمن كنا نطلع ونهتف ضد اسرائيل، والاستعمار، والامبريالية!
ما اطولها عليكم، وصلت السفارة، الامن محوط المكان والناس واقفة، المصورين والصحافيين اكثر من الجمهور، كل هالدعاية، ومظاهرات في يوم الثلاثاء العظيم، والمسيرات المليونية في العالم العربي، واللي طلعوا في الكويت مية نفر، تسعين منهم سكرتارية نواب، وثلاثة جايين يطمشون، واثنين مباحث، وثلاثة حسبالهم يوزعون تموين ببلاش، وانا غصب ياي، يعني اللي استجاب للدعوة بس بومشاري!
هم ما اطولها، المهم وقفنا وبدينا نسمع الهتافات، ماكوا اسلوب كلش، الشعارات كلها سب، يعني سمعت كلمات مثل حمار، وجحش، وكلب وحصان وخروف.. وما سمعت لا تضامن، ولا حب الوطن، ولا مصلحة الوطن، يعني لو ينشرون الاعتصام كامل على الفضائيات، بدون قطع اكيد بناخذ اوسكار السب والشتايم، ومع الاسف كانت الشعارات مسبة للشعب في سورية قبل نظامها، ويكشف مستوى اللي قاعد يديرون التحركات السياسية والاعتصامات في البلد!
المهم بومشاري هو يهتف اول وثاني هتاف، أنبه ضميره، واستسخف نفسه على هالحركات والشعارات، وقرر يهدهم، تلفت يمين يسار يدور علي، وانا من اول دقيقتين كنت راكب
السيارة وراد البيت! بومشاري
لي الصبح ناطرني عند السفارة!



إقرأ المزيد...

منو بوشيخة ؟؟؟


21/8/2011

يا جماعة والله دخت وافتر راسي الكل يسأل ويبي يعرف منو بوشيخة ومالومكم إحنا شعب يحب الفضول يعني مثلا لو شفنا حادث بالشارع فضولنا يخلينا نصفط بنص الشارع ونعطل السير علشان نشوف الحادث وجم واحد كان بالسيارة ومنو الغلطان.
هذي مو سالفتنا وخلونا نرجع لمحور حديثنا ان الكل يبي يعرف منو بوشيخة وبما ان احنا داشين على العيد عساكم من عواده وتدرون بدينا لوية التشري لليهال وبعدها تقعد الصبح يوم العيد ويرن بإذنك صوت محمود الكويتي واهو يقول «العيد هل هلاله» وتبلش زوارات العيد وخساير هالعيادي وتدفع وما تلحق فيمكن ما يصير لي مزاج اكتب بهالزحمة وبعد ما صار مؤشر بورصتي احمر من المصاريف فعلشان جذي وعلشان ارضي فضولكم راح اقول لكم سر بوشيخة واعترف لكم بشخصيته.
بوشيخه طال عمركم شخصية حقيقية ووهمية بنفس الوقت كان يكتب مقالاتها موظف بجريدة «الدار» وأصرت إدارة الجريدة إنها ما تنزل باسمه الشخصي وحطت اسم وهمي «بوشيخة» لانها تدري ان نوعية هذا الموظف «قلابي» يعني اليوم معاك وباجر ضدك «ذكرني بالمرشح اللي يوم خسر بالانتخابات قال لربعه تاكلون من خيري وتنتخبون غيري؟»..
وبعد إقالة هالموظف قام يكتبها اكثر من كاتب وانا واحد منهم.. ولا تستغربون لما قلت لكم ان شخصية بوشيخة حقيقية وهمية لان بوشيخة يمكن اللي قاعد يمكم بالديوانية ولا بالقهوة او اللي يمشي يمكم بالسوق ولا المسافر وياكم على نفس الطيارة ولا اللي سافط يمكم عند الاشارة ولا رفيجكم بالدوام ويمكن يكون بوشيخة انت اللي قاعد تقرا هالمقالة لاني وايد استفيد من ملاحظاتكم ونقاشاتكم ورسايلكم واحولها لمقالات توصل صوتكم للشخصيات المهمة وغير المهمة وعايش وياكم وحاس بهمومكم ومشاكلكم لان بوشيخه اهو الابو والولد والاخو والصديق لكم.
اعتقد الحين بردت جبودكم وأرضيت فضولكم وهذا ردي حق كل اللي يبي يعرف منو يكتب مقالات بوشيخة ويسأل عن هالشخصية اللي حيرت ناس وايد واتمنى لكم عيد مبارك مقبول والله يعيده علينا وعليكم بالخير.

• كلمة راس
قبل ما كنت اقدر اقول كلمة «راعي النحشة» وما كنت اقدر انتقد طلال وعذبي... أكيد عرفتوا ليش !







إقرأ المزيد...

نقطع راس السفير مرتين



18/8/2011


عندي اقتراح حلو مادام الوضع كله صاير ماصخ، واقتراحي اقدمه للنواب عسى الله يحفظهم مادام هدوا شغلهم وقاموا يشتغلون قصابين، واقترحي ان يصدرون قانون يسموه قانون «ضوابط السفراء» وبهالقانون يحددون صفات السفراء بالديرة:
إذا السفير من دولة هندوسية وبوذية ويعبد الاصنام يسمح باعدامه!
إذا السفير من دولة كافرة، طبعا هني نحط قانون يفرض على السفير ان يتوب الاول إذا ما تاب نقتله من خلال قطع راسه مرتين!
إذا السفير من دولة مسيحية ندز له لجنة التعريف بالاسلام علشان يهديه، اذا ما اهتدى نجلده حتى يعلن اسلامه واسلام اهله!
إذا السفير كان لدولة تمنع النقاب، نجبر زوجته تلبس النقاب، وهو يقصر بدلته!
إذا السفير في ديرته محلات الخمور مسموحة لازم يعاقب السفير بالجلد والحبس بتهمة شرب الخمر في بلده!
إذا السفير دمه ثقيل، نصدر قانون بجلده خمسين جلدة، ويتم استبداله بسفير ينكت!
إذا السفير ما عندنا معاه ولا مع دولته اي مشكلة ندور لنا على مشكلة علشان نعاقبه!
المهم في هذا القانون اللي افكر فيه انه نطلع لكل سفير قانون ونبهدل عيشة السفراء حتى يتعلموا الادب في ديرتنا مع اني ما ادري شنو يتعلمون المهم مادام مو قادرين نسوي شي، ولا النواب فيهم شدة يطلعون قانون محترم للناس، على الاقل نطلع حرتنا بالسفراء، واحد نطرده واحد نجلده وواحد نذبحه.. لانه النواب صار لهم سنين بيذبحون الفساد والواسطة والعنصرية والطائفية.. وبعد هالسنين اكتشفنا انهم قاعدين يذبحون الديرة!
twitter.com/bushi5a



إقرأ المزيد...

بومشاري عند السفارة


17/8/2011

قررت تلبية دعوة الجماهير المليونية لدعم الشعب السوري، أو الصج ما قررت، صاحبي بومشاري، لزم علي، الا تعال معاي بروح اعتصم، قلت له مثل ما تحب، هدينا الديوانية، ركبنا سيارتنا، وعلى مشرف، قلت له: بومشاري مو الاعتصام بساحة الارادة، رد قال: لا بمشرف عند السفارة السورية، لانهم بيوصلون رسالة!
بيني وبينكم قلت يمكن البريد مسكر وبيودون الرسايل ويسلمونها السفارة بايدهم، ما علينا المهم رحت الاعتصام وانا في بالي مظاهرات الستينات، ايام عز الشباب لمن كنا نطلع ونهتف ضد اسرائيل، والاستعمار، والامبريالية!
ما اطولها عليكم وصلت السفارة، الامن محوط المكان والناس واقفة، المصورين والصحافيين اكثر من الجمهور، كل هالدعاية، ومظاهرات في يوم الثلاثاء العظيم، والمسيرات المليونية في العالم العربي، والي طلعوا في الكويت مية نفر، تسعين منهم سكرتارية نواب، وثلاثة جايين يطمشون، واثنين مباحث، وثلاثة حسبالهم يوزعون تموين ببلاش، وانا غصب ياي، يعني اللي استجاب للدعوة بس بومشاري!
هم ما اطولها المهم وقفنا وبدينا نسمع، الهتافات، ماكوا اسلوب كلش، الشعارات كلها سب، يعني سمعت كلمات مثل حمار، وجحش، وكلب وحصان وخروف.. وما سمعت لا تضامن، ولا حب الوطن، ولا مصلحة الوطن، يعني لو ينشرون الاعتصام كامل على الفضائيات، بدون قطع اكيد بناخذ اوسكار السب والشتايم، ومع الاسف كانت الشعارات مسبة للشعب في سورية قبل نظامها، ويكشف مستوى اللي قاعد يديرون التحركات السياسية والاعتصامات في البلد!
المهم بومشاري هو يهتف اول وثاني هتاف، انبه ضميره، واستسخف نفسه على هالحركات والشعارات، وقرر يهدهم، تلفت يمين يسار يدور علي، وانا من اول دقيقتين كنت راكب السيارة وراد البيت! بومشاري لي الحين ناطرني عند السفارة!
twitter.com/bushi5a



إقرأ المزيد...

ناطق ينطق نطق


16/8/2011

في كل ديرة في ناطق رسمي باسم الحكومة، شغلة الناطق الرسمي مثلا، انه اسبوعيا، يدش قاعة المؤتمرات الصحفية في مجلس الوزراء، ويقول ويصرح عن موقف الحكومة تجاه اية قضية، بالاضافة طبعا الى آخر اخبار اجتماع مجلس الوزراء، وبعدين طبعا الناطق الرسمي، يوقف ويرد على كل اسئلة الصحافيين المسؤولين عن تغطية اخبار الحكومة..!
كلام حلو، والوزير علي الراشد، صار ناطق باسم الحكومة، والاخ الوزير الظاهر انه فاهم المهمة غلط لانه لا يسوي مؤتمر صحافي، ولا يجابل الصحافيين، ولا له شغل باحد، بس يطلع ويقول تصريحين ويختفي، ويدز فاكس بتصريح ويختفي، يصيده صحفي وهو يتمشى بالسوق ويصرح ويختفي!
وطبعا تصريحاته ما تتعدى، ان الحكومة راح تدرس هالموضوع، والحكومة متابعة لاخر المستجدات، والحكومة ما زالت متابعة لاخر التطورات، وكلنا نحب الكويت، وكلنا فدا الكويت، بس ناقص يحط لنا مقطع اغنية من اوبريت العيد الوطني مع كل تصريح!
اقول هالكلام لانه المفروض الوزير، والناطق الرسمي يعطي الصحافة آخر اخبار الحكومة، واخر تصريحات الحكومة، واخر اتصالات الحكومة ، مو الاخ طايح له تصريحات وكلام انشائي مصفف ماله اول ولا تالي، وفي الآخر نكتشف ان الوزير تكلم وايد، وفي نفس الوقت ما قال شي!
فيا سعادة الناطق الرسمي، اما تنطق بنطق رسمي وواضح حتى نعرف شنو قاعد يصير، او انه تسلم المايكرفون لناطق ثاني، لان الناطق الرسمي مو منصب للكشخة، الناطق يعني هو الي ملم بكل سياسات الحكومة، وكل تحركات الوزارات وخططهم المستقبلية والمشكلات التي يعانون منها.. وبس طال عمرك يا ناطقنا الرسمي!




إقرأ المزيد...

شاهد عيان يستهبل



15/8/2011


الإعلام العربي بصراحة يستهبل على مخنا، لانه يفترض انه احنا نصدقه في كل شي، خاصة في اعلامهم عن سورية، مع ان المفروض يكون الاعلام صادق، واحنا لا شفنا صادق ولا عادل ولا ماجد! مثلا، وزعوا فيلم، قالوا ان الشبيحة يقطون القتلى من الجسر، شفنا الفيلم، طلع في الاخير العكس، واللي يسمون نفسهم ثوار ذابحين الناس ويقطونهم من فوق الجسر، ما ادري شلون ناس تثور على الظلم وفي نفس الوقت، تذبح الناس، وتقطهم بهذه الطريقة الوحشية!
الثانية، قصة شاهد عيان، شاهد العيان يقولك انا من حماة، وبعدين يعطي تقريره عن حلب وحمص ودرعا، عفية شاهد عيان، وعيون اللي تشوف كل هالمدن، وبنفس الوقت!
اخذ كذبة ثالثة، يحطون لنا شاهد عيان، نعم شاهد العيان، شنو اخبار مدينتكم، فيبدأ شاهد العيان يقول، انه جميع الاتصالات والكهربا والماي مقطوعة بالمدينة، ومع ذلك الشاهد يسولف نص ساعة مع التلفزيون مع ان الاتصالات مقطوعة!
اخذو كذبة رابعة، قالوا ان الكهربا مقطوعة عن المستشفيات، واربعين طفل خدج ماتوا في مستشفى واحد، وحطوا لنا صورة ملونة لشوية اطفال خدج يبكون، يعني بذمتك النظام قاطع الكهربا، وارهاب، وقتل، ونفس الوقت مخلينهم يصورون صور واضحة وملونة يعني الاطفال الخدج كلهم عيال المعارضة ما فيهم واحد ابوه حكومي!
كذبة خامسة، خبر عن مليون متظاهر في حماة، هي كل حماة فيها سبعمية الف، من وين طلعوا المليون!
والسادسة لمن يقولون عدد القتلى، من الصبح يعلنون خبر عدد القتلى، مع انه لو حادث باص، وتقرير رسمي يقعدون يومين على ما يتأكدون، طبعا هذا كله والنظام مسيطر والدبابات تحاصر ويقمعون ويذبحون والاخ بسهولة يعرف كم قتيل!
أقول هذا مو لاني ضد الناس، بس لمن الاعلام اللي يساند الثورة بدون مصداقية، الثورة هم تفقد مصداقيتها!
twitter.com/bushi5a







التعليقات لا تعبر عن رأي صحيفة الدار، إنما تعبر عن رأي اصحابها
يحق للصحيفة حذف التعليق أو جزء منه إذا كان يمس شخصيات اعتبارية أو يمس العقائد والأديان أو يخدش الحياء


الاسم البلد الموضوع
الكويت الأردن باكستان فلسطين لبنان سوريا الهند العراق مصر ايران السعودية الامارات مصر عمان قطر البحرين اليمن المغرب الجزائر تونس كندا الولايات المتحدة فرنسا ليبيا






مقالات أخرى للكاتب
التاريخ عنوان المقال
الأحد, أغسطس 14, 2011 مسلسلات نكد وغمّ وطراقات
الخميس, أغسطس 11, 2011 الحكومة شكو
الأربعاء, أغسطس 10, 2011 الحدود مفتوحة الله وياكم
الثلاثاء, أغسطس 09, 2011 ياكله العيار
الاثنين, أغسطس 08, 2011 سفير للقتل
الأربعاء, أغسطس 03, 2011 «إلا الدستور» طلع خرطي
الأحد, يوليو 24, 2011 حمار وركبه خبل... هات دبرها!
الجمعة, يوليو 22, 2011 داخل «سلطان».. طلع «عدوان» منتف!
الخميس, يوليو 14, 2011 كل نائب وجنطته
التالي الأخير

:: آخر أخبار البحرين ::
جمعيات بحرينية تقاطع الانتخابات التكميلية...
برنامج تلفزيوني يتسبب بأزمة بين البحرين و...
المنامة: العلاقات مع إيران لازالت متوترة ...
وزير العدل البحريني: من يقاطع الانتخابات...
"الوفاق" البحرينية المعارضة تعلن مقاطعتها...


يقولون
ان النواب التأزيميين شادين حيلهم لمنع إحالة هايف للنيابة بعد تجاوزه الدستور والأعراف الدبلوماسية والشرع.

سؤال بريء
• الأول: ليش البرامج الدينية للإعلام الرسمي تجاهلت ذكرى وفاة أم المؤمنين السيدة خديجة



إقرأ المزيد...