بو شيخــــــة

«الأزرق» يفوز بدون القبسة

16/11/2011

علميا يقال له «قبس» والعالم الكويتي الشعبي يعرف القبسة بالقول «انه واحد مقبس على العالم، يعني نحس، منحوس، ووجهه ما تشوف من وراه الا الغم والهم»!
وشخصيا اعرف واحد من الربع «قبسة»، اول ما اشوفه لازم تصير لي مصيبة، حتى لو يدق علي، اذا انا بالسيارة أطق الرصيف، اذا انا بالبيت تنطفي الكهربا، اذا انا بالبر يصير غبار، هذا بالاتصال بس!
وواحد ثاني من الربع قبسته تطلع بس على الاندية والمباريات، ما في ولا مرة قعد معاي بالديوانية او شاف المباراة بالقهوة الا وخسر فريقي، قمت اتنحش منه وقت المباريات، واقوله انا طالع كشتة المريخ بس علشان ما اشوفه!
واعرف هم نائب قبسة، راح مع سفينة اغاثة، بسبته الناس ماتت، والسفن احترقت، وصارت خمسين الف مصيبة لهم، مو بسبب اليهود، لا طبعا بسبب قبسته، حتى هذا مكتوب وموثق في تقرير الامم المتحدة!
ونفسه هالنائب من يوم ما صار معارض والمعارضة ما ترقعت، من فشل لي فشل، ومن مصيبة لي مصيبة، ومن فضيحة لي فضيحة، والسبب منو، هو السبب طبعا، «وشه يقطع الخميرة من البيت»، ومن المعارضة اللي اساسا ما فيهم واحد «وشه سمح»!
آخر مرة شفته بمباراتنا مع لبنان، يوم الجمعة، تصدقون كنت متفائل، ومجهز نفسي وشاري خيشة بنك، وكرتون بطاط ودرام نفيش، علشان اقعد واطالع، بس شفت سحنته وهو راز نفسه بالمقصورة قلت رحنا فيها، يعني هذا جاي من الحج، والمفروض تعبان ومريض، مو قاعد ومرتز، طبعا ما ابي أكمل الباجي تعرفونه، بس أبيكم تعرفون شيء، القضية مو بالاتحاد، ولا باللاعبين، ولا بالخطة، ولا بالمدرب، كل القصة ان الاتحاد كان لازم يمنعون دخوله لمباراة الامارات أمس، أحسن حتى يربح «الأزرق».
twitter.com/bushi5a