بو شيخــــــة

مسويين زحمة


21/9/2011

حبيب قلبي المواطن، بدل ما تروح ساحة الارادة، وتتعب نفسك، انا راح انقل لكم شنو راح يصير بالتجمع قبل لا يجتمعون ويقولون ويهتفون.
طبعا في البداية لازم يطلع واحد ما نعرفه، وهو عريف التجمع، حافظ كم شعار على كم بيت شعر على كم جملة سامعهم مني ومنّاك، وهو يصرخ، ويعدل غترته، واجباري الجمهور يهتف وراه وهو ما له خلق!
بعدين طبعا لازم يطلع ممثل القوى الطلابية، وممثل قوى البنشرجية، وممثل نقابات التطريز والخياطة، وبعدين يطلع نائب ويقول لازم يرحل لان الفساد استشرى، طبعا محد يعرف يعني شنو استشرى بس الجمهور راح يصفق، وبعدين يطلع العريف، ويقول مقدمة عن نائب ثاني بانه نائب الامة، وانه ينحط على الجرح يبرى، ويصعد النائب ويقول الكويت مختطفة ولازم ننقذها.
يخلص النائب راح تشوف ستة سبعة لابسين اسود، انت حسبالك حانوتية، بس يقولون انهم وفد المحامين طاقينها مشي من قصر العدل الى الساحة، دعما للشباب المقاوم في ساحة الارادة.
بعدين يطلعون بنت صغيرة على المنصة وتقولها كلمتين وشعارين سياسيين، ويصفقون لها وهم يبتسمون، لانها تمثل اطفال الكويت وصندوق الاجيال القادمة.
وبعدين النواب كل واحد يقوم ويقول كلمتين ونكتتين، وكبيرهم يطلع ويقول كلام كبير، والثالث يطلع ويقول كلام اكبر، ويقول لهم، لازم تستحون، والناس تصفق، وبعدين الجماعة ينتشرون على القهاوي يتابعون المباريات! هذا اللي يبي يصير، لا اكثر ولا اقل، وما يحتاج تتعبون روحكم، وتسوون زحمة، ورحم الله من قعد ببيته وخفف الزحمة!
twitter.com/bushi5a