بو شيخــــــة

طعنوا بظهر القبيلة


14/12/2011

ما ادري ليش يقولون عن المرشح اللي يفوز بالفرعيات انه «خرج من رحم الفرعيات» شمعنا طالع من رحم مع انه مو قاعد في رحم الفرعيات تسعة اشهر، ولا الفرعيات مسوينها في مستشفى الولادة، ولا المرشح بعد ما يطلع من رحم الفرعيات يسوون له استقبال، ولا يوزع كاكاو وحلاو ولازقين صورته وهو مبتسم.
المهم نوابنا ملوت الفرعيات فجأة نزل عليهم القانون، وصاروا خوش ناس، وقالوا انه ما راح ندش التشاورية، وطبعا لمن يقولون ما راح ندش التشاورية تعني ثلاثة شغلات:
الاولى، انهم يعترفون ان المرة اللي طافت دخلوا التشاوريات، وفازوا فيها، وانهم يعترفون انهم خالفوا القانون والدستور، وانهم بالفعل نواب عليهم شبهة لانهم دخلوها من باب الدوس على القانون وهمه مسويين روحهم حماتها وحراسها.
الثانية، انهم يعترفون بحصولها حاليا، وكانهم يبلغون الحكومة، ان في هناك تشاوريات بين مرشحين القبائل، وهذه تعتبر طعنة في خاصرة القبيلة اللي رزتهم، واوصلتهم الى الكرسي النيابي، وارتزوا على الكرسي الاخضر، يعني بس ناقص يبلغون الحكومة وين ومتى الفرعيات.
الثالثة، ان النواب اللي طلعوا من التشاوريات وفازوا، الحين هم اول ناس يطعنون بظهر القبيلة، وينزلون من شأن القبيلة اللي رزتهم، ليش؟ لانهم خايفين من السقوط في الفرعيات، خاصة وان اغلبهم لا مواقف، ولا معاملات، ولا عماة عين، كل اللي كانوا يسوونه، شوية شعارات وكلام فاضي، ما يودي ولا يجيب، ولانهم يدرون انهم داشين بسواد الوجه لقبيلتهم، ولهالسبب يبون يبينون روحهم انهم ابطال، وانهم ضد الفرعيات مع انهم ما يبونها لانهم يخافون من السقوط.
هذي حالة نوابنا التشاوريين، المعارضة، الابطال.. صيحة ونجرة دافعا عن القبائل، صارت الانتخابات، وصاروا اول ناس يطعنون القبيلة!
twitter.com/bushi5a