بو شيخــــــة

قل أدبك تاخذ حقك

15/12/2011

جرب تقعد بالبيت، واشتر لك مية كتاب في الاقتصاد، ومية كتاب في السياسة، ومية كتاب في علم الاجتماع السياسي، ومية كتاب في التاريخ والجغرافيا، وحتى في الديناصورات والاحافير...
بعدين فكر تكمل دراستك وتسافر وتصير دكتور، وتحضر المؤتمرات، وتكتب البحوث وتطور من ثقافتك، يعني تجمع بين العلم وبين الاخلاق والادب والتربية الصالحة ... بهالطريقة انت تعتبر انسان فاهم وواعي، وفاهم شنو تبي تسوي، وشنو تبي تقول، وتعرف وين مشاكل البلد، ووين علاجها.
انت بعد كل هذا، لو تروح وتقدم اي شي للحكومة، محد راح يسمع صوتك، ولا احد راح يعبرك، ولا احد يعطيك وجه، او حتى يفتح لك الباب لانك ببساطة انسان فاهم، والاهم انك تتكلم بهدوء وعقلانية، وتحط المشاكل وتحط الحلول، ومن الطبيعي بما انك فاهم وتتكلم بهدوء وادب انه محد يعطيك وجه.
هذي الحالة هم تنطبق عليك اذا كنت نائب في مجلس امتنا المنحل، لو تقعد اربع سنين تتكلم بهدوء كونك معارض أو مؤيد، محد راح يسمع لك، ويمكن حتى سلام ما يسلمون عليك، لسبب بسيط انك ما تخرع وما تخوف احد.
المطلوب من أي واحد يبي حقه او حتى باطله، يوقف جدام باب المجلس ويصرخ صرختين، ويسب ويلعن وزيرين، وما يخلي أهل إلا ويسبهم، واذا هم دش وكسر احسن واحسن، وإذا قال غصبا على شواربكم يمكن يزيدون من عطاياهم، واذا يبون الف يعطونهم الفين، اذا يبي كرسي يعطونه كرسي وسرير ومكتب، واذا يبي يشيلون الوزير اللي يبيه، علشان لا يزعل..
الفايدة من القصة، اذا تبي شي من الحكومة، عندك طريج واحد «صرخ، عصب، قل أدبك..» تحصل على اللي تبيه وزيادة.
twitter.com/bushi5a