بو شيخــــــة

النواب فاهمين غلط


28/8/2011

خلونا نشوف شنو عندنا من مشاكل، ما في ديرة ما فيها مشاكل، بس الفرق انه في ديرة تحل مشاكلها وفي ديرة ما تحل، وفي ديرة ما يخلونها تحل مشاكلها، مثل ديرتنا العزيزة!
عندنا مشكلة الجامعة، طلبة متخرجين، مستانسين، مجهزين جنطهم واقلامهم رايحين الصالون مضبطين شعرهم شارين نظارات ريبان علشان يداومون في الجامعة فجأة يكتشفون انه ما في مكان شلون ما في مكان وينه الوزير؟ وينه مدير الجامعة؟ اي واحد يحل لنا الموضوع المهم صعدنا نزلنا يمين يسار اخيرا توصلوا الى حل ترقيعي نقبلهم الحين والباجي على دفعات يعني مثل النساف يشيل التراب على دربين وثلاث!
عندنا موضوع بوبيان والميناء البحري والمشاكل اللي عليها واللي يحاول البعض مع تحريض من بعض الاطراف ان يشعلون القضية والموضوع مهم للكويت وكل ما بنوا الميناء اسرع احسن وافضل للكويت وللعراق ونوابنا ما يدرون وين الله قاطهم لا حركة ولا بركة ويسافرون هاواي لحل مشكلة الميناء!
عندنا مشكلة الكهرباء اللي مو راضية تنحل كل سنة نفس القصة بنفس الوقت موتورات خربانة مكاين تحترق مناطق كاملة برمضان بدون كهرباء ومافي احد يتجرأ ويقول انه في فساد بالوزارة!
لو بقعد احسب ماراح اخلص من قصة مشاكلنا اللي تحتاج حل عاجل بس نوابنا خوش نواب هادين كل شي وصايرين دوليين فجأة يبون يحررون ليبيا وبعدين سوريا وبعدين القدس وبيمرون على كشمير وتايلند يعني اي ديرة فيها مشاكل حتى لو مشكلة ازدحام السيارات يبون يسقطون نظامها ويحلون مشاكلها لان النواب فاهمين غلط حسبالهم انهم نواب كأس العالم وكل واحد متخيل نفسه باتمان وسوبرمان.. رجاء قضبوا ارضكم وجابلوا ناخبيكم رحم الله والدينكم!
twitter.com/bushi5a